“26 Disemba–1 Jenuware. “Yumi Wanwan I Responsibol long Yumiwan blong Lanem Samting,” Kam Folem Mi—Blong Wanwan Man, Woman mo Famli: Niu Testeman 2023 (2022)
“26 Disemba–1 Jenuware. Yumi Wanwan I Responsibol long Yumiwan blong Lanem Samting,” Kam Folem Mi—Blong Wanwan Man, Woman mo Famli: 2023
26 Disemba–1 Jenuware
Yumi Wanwan I Responsibol long Yumiwan blong Lanem Samting
Stamba tingting blong gat ol skripja, hem i blong helpem yu blong kam long Kraes, mo blong kam blong jenisim laef blong yu, wetem moa dip fasin, long gospel blong Hem. Kam Folem Mi—Blong Wanwan Man, Woman mo Famli i save helpem yu andastanem ol skripja, mo blong yu faenem insaed, paoa ia long saed blong spirit we yu mo famli blong yu i nidim. Afta, insaed long ol klas blong yu long Jos, bae yu gat janis blong serem ol niu tingting blong yu, mo gat janis ia blong leftemap tingting blong ol nara Sent long hadwok blong olgeta blong stap folem Kraes.
Raetemdaon Ol Filing mo Tingting blong Yu
“?Yufala i lukaot wanem?” Jisas i askem olsem long ol disaepol blong Jon Baptaes (Jon 1:38). Maet bae yu save askem yuwan semfala kwestin ia—from se, wanem bae yu save faenem insaed long Niu Testeman long yia ia, bae i dipen bigwan long wanem nao yu stap lukaotem. “Yufala i mas gohed blong lukaot, nao bambae yufala i save faenem;” hemia nao i promes blong Sevya (Matiu 7:7). So, i gud blong yu askem ol kwestin we oli kam long maen blong yu taem yu stap stadi; mo afta, lukaotem, wetem strong tingting, blong kasem ol ansa ia. Insaed long Niu Testeman, bambae yu rid abaot strong eksperiens long saed blong spirit blong ol disaepol blong Jisas Kraes. Olsem wan fetful disaepol blong Sevya, yu save gat ol strong eksperiens long saed blong spirit blong yuwan taem yu stap akseptem invitesen blong Sevya, we yu save faenem insaed long tabu buk ia, “Kam Folem Mi” (Luk 18:22).
Sam Aedia blong Skripja Stadi blong Yuwan
Blong mi rili lan aot long Sevya, mi mas akseptem invitesen blong Hem: “Kam, folem mi.”
Invitesen ia blong Sevya, “Kam, folem mi,” i blong evriwan—i nomata se yumi niu nomo long rod ia blong stap olsem disaepol, o nomata yumi bin stap wokbaot long rod ia ful laef blong yumi. Hemia i bin invitesen blong Hem i go long wan rij yang man we i bin stap traehad blong obei ol komanmen (luk long Matiu 19:16–22; Luk 18:18–23). Wanem we yang man ia i bin lanem—mo yumi evriwan i mas lanem—i we, blong stap wan disaepol i minim blong givim ful sol blong yumi long Papa long Heven mo Jisas Kraes. Yumi stap progres long fasin blong yumi blong stap disaepol taem yumi faenemaot wanem we yumi no gat, mekem ol jenis, mo lukaotem blong folem Tufala long wan wei we i moa komplit.
Blong stap lan aot long Sevya, hem i stat taem yumi traehad blong andastanem wanem we Hem i bin tijim yumi long hem. Eksampol: ?olsem wanem nao, andastaning blong yu abaot fasin blong putum tingting i stap daon, i kam bigwan moa taem yu lukluk gud long olgeta ia?
-
Ol tijing blong Sevya (luk long Matiu 18:1–5; Luk 18:9–14)
-
Wan eksampol blong laef long Hem (luk long Jon 13:1–15)
Sapos yu wantem lanem moa, traem aktiviti ia wetem wan nara prinsipol blong gospel, olsem lav o fogivnes.
Mi mi responsibol blong mi mas lanem samting.
Elda David A. Bednar i tijim se: “Yumi no sapos blong ting se Jos, olsem wan oganaesesen, bae i tijim o talem long yumi evri samting ia we yumi nidim blong save mo mekem, blong kam ol strong disaepol mo blong yumi stap strong wetem strong tingting kasem en. Be, responsabiliti blong yumi wanwan i blong lanem wanem yumi sapos blong lanem, blong laef olsem we yumi save finis wei blong laef, mo blong kam huia Masta i wantem yumi blong kam. Mo ol hom blong yumi oli stret ples blong lan, laef, mo kam man o woman ia” (“Rere Finis blong Kasem Evri Samting we Mi Nidim,” Liahona, Mei 2019, 101).
?Hem i minim wanem blong yu responsibol long yu blong yu lanem samting blong yuwan? Lukaotem samfala ansa long toktok blong Elda Bedna, mo long olgeta skripja ia: Jon 7:17; 1 Tesalonaeka 5:21; Jemes 1:5–6, 22; 2:17; 1 Nifae 10:17–19; 2 Nifae 4:15; Alma 32:27; mo Doktrin mo Ol Kavenan 18:18; 58:26–28; 88:118. ?Wanem nao yu filim insperesen blong mekem blong yu mekem moa samting blong stap lanem gospel?
Mi nid blong miwan mi save trutok ia.
Maet yu save ol pipol we, i luk olsem se oli neva lusum bilif blong olgeta, hemia nomata wanem i save hapen insaed long laef blong olgeta. Oli save mekem yu yu tingbaot parabol blong Sevya abaot ol faef waes yangfala gel (luk long Matiu 25:1–13). Maet wanem we yu no luk, i ol strong hadwok blong olgeta blong mekem testemoni blong olgeta abaot trutok, i kam strong moa.
?Olsem wanem yumi save kasem mo fidim ol testemoni blong yumiwan? Raetemdaon wanem i kam long tingting blong yu taem yu stap tingting hevi long olgeta skripja ia: Luk 11:9–13; Jon 5:39; 7:14–17; Ol Wok 17:10–12; 1 Korin 2:9–11; mo Alma 5:45–46. (Luk tu long Gaed long Ol Skripja, “Testemoni,” olskripja.ChurchofJesusChrist.org.)
Wanwan long yumi bae i mas kasem wan testemoni blong yumiwan.
?Bae mi mekem wanem taem mi gat ol kwestin?
Taem yu stap lukaotem save long saed blong spirit, bae i gat ol kwestin i kam long maen blong yu. Olgeta prinsipol ia we oli kam afta, oli save helpem yu blong lukluk long ol kwestin long sam wei we oli bildimap fet mo testemoni:
-
Lukaotem blong God i mekem yu andastanem samting. God i stamba blong evri trutok, mo Hem i talemaot trutok tru long Tabu Spirit, ol skripja, mo ol profet mo ol aposol blong Hem.
-
Mekem samting wetem fet. Sapos ol ansa oli no kam kwik, trastem se Lod bae i talemaot ol ansa taem we i stret taem. Taem yu stap wet from ansa ia, gohed blong stap laef folem trutok we yu yu save long hem finis.
-
Oltaem gat wan lukluk i go long taem we i no save finis. Traem blong luk ol samting olsem we Lod i stap luk olgeta, be i no olsem we wol ia i stap luk long olgeta. Luklukbak long ol kwestin blong yu long lukluk ia blong plan blong fasin blong sevem man, we i plan blong Papa long Heven.
Ol Aedia blong Famli Skripja Stadi mo Haos Naet
-
Matiu 13:1–23.Blong helpem famli blong yu blong i rere blong lanem samting aot long Niu Testeman long yia ia, yufala i save ridim parabol blong man we i planem sid. Maet famli blong yufala, i glad blong save go aotsaed mo lukluk long ol defren kaen graon ia we oli tokbaot insaed long parabol ia. ?Olsem wanem nao yumi save mekem hat blong yumi i olsem gudfala graon ia we Jisas i stap tokbaot? (Matiu 13:8).
-
Galesia 5:22–23; Filipae 4:8.Presiden Russell M. Nelson i bin invaetem yu blong jenisim hom blong yu i kam wan tabu haos blong fet, mo tanem i kam wan senta blong lanem gospel.” Hem i promesem long olgeta we oli mekem hemia, se bae : “ol pikinini blong yufala bambae oli wantem tumas blong lanem samting, mo blong laef folem ol tijing blong Sevya, mo paoa blong enemi insaed long laef blong yufala, mo insaed long hom blong yufala, bae i kamdaon. Ol jenis insaed long famli blong yu bae i bigwan mo i sapotem yu” (“Blong Kam Ol Lata-dei Sent we I Givim Eksampol,” Liahona, Nov 2018, 113).
Stat blong wan niu yia i wan gudfala taem blong holem wan famli kaonsel abaot fasin blong mekem hom i “wan tabu ples blong fet” mo “wan senta blong lanem gospel.” ?Wanem aedia nao oli kam long maen blong yu abaot wei blong mekem samting ia, taem yu stap ridim Galesia 5:22–23 mo Filipae 4:8? Mebi bae famli blong yu i save putum ol gol blong wanwan memba blong famli, mo ol famli gol blong stap stadi long Niu Testeman long yia ia we i stap kam. ?Wanem nao yumi save mekem blong mekem yumi tingbaot ol gol ia blong yumi?
Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.
Wan singsing: “Tijim Mi blong Folem Laet Ia blong God,” STSP, 66.
Stap Kam Antap long Stadi blong Yuwan
Lukaotem doktrin. Wan doktrin i trutok we i blong taem we i no save finis, mo i no save jenis. Presiden Boyd K. Packer i bin talem se: “Tru doktrin, taem oli andastanem, i jenisim ol fasin mo ol aksen” (“Little Children,” Ensign, Nov. 1986, 17). Taem we yu mo famli blong yu i stap stadi long ol skripja, lukaotem ol trutok we oli save helpem yu blong laef moa olsem Sevya.
Laet blong Wol, i kam long Brent Borup