26 Disemba— 1 Jenuware

Yumi Wanwan I Responsibol long Yumiwan blong Lanem Samting

Taem yu ridim olgeta skripja long aotlaen ia, raetemdaon eni tingting mo filing long saed blong spirit, we yu stap kasem. Bae yu luksave se wanwan aotlaen long lesenbuk ia i gat ol aktiviti blong ol smol pikinini mo ol bigfala pikinini, be yu save mekem eni aktiviti we i go stret wetem klas blong yu.

Invaetem Ol Pikinini blong Serem Wanem Oli Gat

Long stat blong wanwan klas, givim ol janis long ol pikinini blong oli serem wanem we oli stap lanem abaot gospel. Eksampol, long wik ia yu save invaetem olgeta blong serem ol fevret stori blong olgeta abaot Jisas Kraes.

Tijim Doktrin: Ol Smol Pikinini

Jisas i wantem mi blong folem Hem.

Yu mo ol pikinini bae i ridim plante stori abaot laef blong Jisas Kraes, long yia ia. Helpem ol pikinini blong andastanem se, risen from wanem yumi stap lanem ol stori ia, i from se, yumi save folem moa gud eksampol blong Jisas Kraes.

Samfala Aktiviti we Yu Save Mekem

• Talem long ol pikinini abaot invitesen blong Sevya, “Folem mi,” we i stap long Matiu 4:18–22. Mekem wan aktiviti we, wan pikinini i stap mekem wan aksen, mo afta, i talem long ol narawan:“Folem mi.” Invaetem ol narafala pikinini blong ripitim aksen.

• Soem ol pikja blong ol pipol we oli stap folem Sevya, long ol defdefren wei, tugeta long seves blong Hem long wol ia mo long dei blong yumi. Yu save faenem ol pikja long Gospel Art Buk o long Ol magasin blong Jos. Yu save soem vidio blong “Light the World” (ChurchofJesusChrist.org). Letem ol pikinini oli talemaot olsem wanem ol pipol oli stap folem Sevya.

• Helpem ol pikinini blong tingting long ol samting we oli stap mekem blong folem Sevya. Singsing “Seek the Lord Early” (Children’s Songbook, 108) we i save givim sam aedia long olgeta. Letem olgeta oli droem ol pikja blong olgetawan taem oli stap mekem ol samting ia.

Ol pikinini oli save testemoni blong olgetawan abaot ol trutok long skripja.

Ol skripja oli tru.

Ol pikinini oli save kasem wan testemoni se oli skripja oli tru, iven bifo oli save ridim olgeta. Taem yu stadi long ol skripja wetem ol pikinini long yia ia, yu save helpem olgeta blong save olgetawan se ol skripja oli tru.

Samfala Aktiviti we Yu Save Mekem

• Invaetem ol pikinini blong talemaot ol fevret presen we oli bin kasem long betdei o long ol narafala taem. Karem wan kopi blong skripja we oli kavremap long presen pepa, mo askem wan pikinini blong openem mo testifae se ol skripja oli wan presen long yumi, we i kam long Papa long Heven.

• Soem sam buk we i gat ol stori we man nomo i tingting long hem, mo askem olgeta abaot ol fevret stori blong olgeta. Soem ol skripja long olgeta, mo testifae se ol skripja oli gat tok blong God insaed, we i blong yumi. Oli talemaot ol pipol we oli bin laef mo ol samting we oli hapen we oli tru.

• Serem mesej we i stap long 2 Timoti 3:15 mo Moronae 10:3–5, blong stap helpem ol pikinini blong ripitim sam sentens. Helpem olgeta blong save se, olgetawan oli save save se ol skripja oli tru.

• Haedem wan pikja blong Sevya mo givim sam toktok blong givhan blong helpem olgeta blong faenem. Helpem ol pikinini blong save, olsem wanem taem oli stap lukaotem ol skripja, i save helpem yumi blong save Jisas Kraes. Letem ol pikinini blong gat janis wan afta wan, blong haedem pikja mo givim sam toktok blong givhan long ol narafala pikinini blong save faenem.

• Singsing tugeta wan singsing abaot, stap lanem gospel, olsem “Search, Ponder, and Pray” (Children’s Songbook, 109), mo helpem ol pikinini blong mekemap sam aksen we i folem ol toktok long singsing. Serem wetem ol pikinini wan o tu fevret skripja blong yu mo talem long olgeta, olsem wanem yu kam blong save se ol skripja oli tru. Sapos ol pikinini oli gat ol fevret skripja o ol fevret stori, invaetem olgeta blong serem.

Tijim Doktrin: Ol Bigfala Pikinini

Jisas Kraes i wantem mi blong lanem samting abaot Hem mo folem Hem.

Tingting long olsem wanem yu bin kam blong save abaot Jisas Kraes. ?Wanem nao yu save mekem blong helpem ol pikinini blong lanem mo folem Hem?

Samfala Aktiviti we Yu Save Mekem

• Invaetem ol pikinini blong tokbaot wan bes fren we oli save mo tokbaot olsem wanem fren ia i kam olsem bes fren blong olgeta. Ridim mo toktok raon long Jon 5:39 mo Jon 14:15 blong faenem ol wei we yumi save filim se yumi stap kolosap long Jisas. Askem ol pikinini blong serem abaot wan taem we oli bin filim se oli stap kolosap long Hem.

• Tekem ol pikinini long klas blong yu oli wokbaot raonem miting haos. Askem ol pikinini blong leftemap han blong olgeta taem oli luk wan samting taem oli stap wokbaot we i rimaenem olgeta long wan wei we oli save folem Sevya (olsem wan ples blong baptaes o wan pikja).

• Singsing wetem ol pikinini wan singsing abaot fasin blong stap folem Jisas Kraes olsem “Kam, Folem Mi” (Liahona, Epril 2010). Invaetem ol pikinini blong serem ol taem we oli bin folem eksampol blong Sevya.

Mi save stadi long ol skripja blong miwan.

Taem yu ridim ol skripja wetem ol pikinini mo askem ol kwestin long olgeta, yu save bildimap tras ia we oli save gat long olgetawan, blong oli save lanem samting aot long ol skripja mo faenem save we i rij mo gat bigfala valiu.

Samfala Aktiviti we Yu Save Mekem

• Tugeta, ridim Jon 5:39 mo Ol Wok 17:10–11, mo askem ol pikinini wanem oli lanem abaot olsem wanem blong stadi long ol skripja.

• Jusum sam skripja long Niu Testeman we oli simpol, mo oli gat bigfala mining; raetem wanwan long ol skripja ia long wanwan pis pepa, mo haedem ol pepa ia. Mekem sam samting blong givim ol toktok blong givhan we i save lidim ol pikinini blong mekem wan gem blong “lukaotem ol rij samting we i gat bigfala valiu” insaed long klasrum o raon long bilding blong jos blong faenem ol skripja ia. Afta we oli faenem wanwan skripja, toktok raon long wanem skripja i minim mo from wanem hem i wan rij samting.

• Serem samfala skripja we yu tekem olsem ol rij samting mo eksplenem from wanem oli gat bigfala mining long yu. Olsem wan klas, mekem wan lis blong ol skripja we oli olsem ol rij samting we ol pikinini oli faenem insaed long Niu Testeman long yia ia—long hom o long taem blong Praemeri.

• Gat wan taem blong toktok raon wetem ol pikinini abaot from wanem, samtaem i had blong ridim ol skripja. Askem ol pikinini blong serem ol advaes wetem olgeta wanwan abaot taem oli stap stadi long ol skripja. Askem olgeta blong serem eni eksperiens we i bin leftemap tingting blong olgeta wetem ol narafala pikinini.

• Helpem ol pikinini blong mekem ol simpol kalenda we oli save yusum blong makem hamas taem oli ridim ol skripja. Kalenda ia i save rimaenem olgeta blong ridim ol skripja blong olgeta evri dei.

Mi nidim testemoni blong miwan.

Ol pikinini we yu stap tijim bae oli nidim blong gat testemoni blong olgetawan abaot Papa long Heven mo Jisas Kraes. ?Wanem nao yu save mekem blong givim insperesen long olgeta blong lanem ol trutok blong olgetawan?

Samfala Aktiviti we Yu Save Mekem

• Serem stori blong ol ten yang gel (luk long Matiu 25:1–13; luk tu long “Japta 47: Ol Ten Yang Gel,” long Ol Niu Testeman Stori, o vidio we i go wetem long ChurchofJesusChrist.org). Askem ol kwestin long ol pikinini olsem hemia: ?Olsem wanem nao ol testemoni blong yumi i olsem wan laet? ?From wanem hem i impoten blong yumi gat ol testemoni blong yumiwan?

• Toktok raon long wanem yumi save mekem blong mekem testemoni blong yumi i kam strong moa. Blong kasem ol aedia, invaetem ol pikinini blong lukluk insaed long Jon 7:17 mo Moronae 10:3–5. Invaetem olgeta blong serem ol samting we oli save se oli tru.

• Askem ol pikinini blong raet long ol brikis blong bilding wetem ol trutok we oli pat mo mekem ol testemoni blong yumi (luk long Gaed long Ol Skripja, “Testemoni,” olskripja.ChurchofJesusChrist.org). Askem ol pikinini blong bildim wan haos we i ripresentem wan testemoni.

Stap Leftemap Tingting blong Lanem Samting long Hom

?Olsem wanem nao yu save leftemap tingting blong ol pikinini wetem papa mo mama blong olgeta blong lanem samting insaed long Niu Testeman long hom? Eksampol, yu save invaetem ol pikinini blong lanem baehat wan long ol skripja we yu bin tokbaot long klas (hemia i save help blong brekemdaon ol skripja i go long ol sot sentens) mo serem ol ves ia wetem famli blong olgeta.

Kam Antap long Fasin blong Yumi blong Stap Tij

Stretem ol aktiviti blong oli go stret wetem yia blong ol pikinini mo wanem we oli save mekem. Ol smol pikinini oli nidim blong oli eksplenem samting long ditel, mo blong oli lanem samting long ol defdefren wei blong tij. Taem ol pikinini oli kam bigwan moa, oli save tekpat moa, mo oli save kam gud moa long taem blong serem ol tingting blong olgeta. Givim janis long olgeta blong oli serem tingting, testifae mo tekpat. Givim help taem i gat nid. (Luk long Teaching in the Savior’s Way, 25–26.)