Letem Yumi Wosipim Hem, i kam long Dana Mario Wood

9–15 Jenuware

Matiu 2; Luk 2

“Mifala I Kam blong Wosipim Hem”

Ol pikinini we yu tijim, oli ol gudgudfala pikinini boe mo gel blong Papa long Heven. Askem Hem blong helpem yu lukaotem blong tijim olgeta long ol skripja. Hem i save lidim yu i go long ol prinsipol we yu mas tokbaot bigwan, mo i save givim insperesen aedia long yu long saed blong ol aktiviti, we bae i stret long ol pikinini blong Hem.

Invaetem Ol Pikinini blong Serem Wanem Oli Gat

Askem ol pikinini blong talem wanem oli save abaot taem we Kraes i bon long hem. ?Wanem fevret pat blong olgeta long stori ia?

Tijim Doktrin: Ol Smol Pikinini

Luke 2:1–14

Jisas i bon i kam long wol ia.

Jisas i lego hom blong Hem wetem Papa long Heven blong i bon i kam long wol, blong Hem i save kam Sevya blong yumi. ?Olsem wanem yu save helpem ol pikinini blong tingbaot taem ia we Kraes i bon i kam long wol?

Samfala Aktiviti we Yu Save Mekem

• Taem yu ridim stori blong taem we Kraes i bon i kam long wol, invaetem ol pikinini blong aktem stori ia olgetawan, o yusum aktiviti pej blong wik ia blong luklukbak long stori ia. (Luk tu long “Japta 5: Jisas Kraes I Bon,” long Ol Niu Testeman Stori, 13–15, o vidio we i go wetem long ChurchofJesusChrist.org.)

• Sapos yu gat wan sam pleiplei pikja blong ples we Jisas Kraes i bon long hem, yu karem i kam mo invaetem ol pikinini blong putum ol pleiplei ia long ol ples blong olgeta, taem bae yu stap talem long olgeta, abaot taem we Jisas Kraes i bon. Yu save soem tu wan pikja blong ples o taem we Jisas i bon long hem (luk from eksampol long, aotlaen blong wik ia long Kam Folem Mi—Blong Wanwan Man, Woman, mo Famli). Poenem ol defren pipol long pikja ia, mo invaetem ol pikinini blong serem wanem oli save abaot wanwan man long pikja ia.

• Singsing tugeta long ol fevret singsing blong olgeta abaot Jisas. Taem bae yu mekem olsem, lukaotem ol taem we yu save serem testemoni blong yu abaot Sevya. Invaetem ol pikinini blong serem tingting blong olgeta long, from wanem oli lavem Jisas.

Matiu 2:1–12

Mi save givim gudfala presen long Jisas.

Ol Waes Man oli givim ol presen blong gol, mo frangkinsens, mo mir, we i wan pomad we praes blong hem i antap tumas. ?Olsem wanem nao yu save yusum stori ia blong tijim ol pikinini se oli save givim ol presen long Jisas tu—ol presen olsem, lav, seves, mo fasin blong stap obei?

Samfala Aktiviti we Yu Save Mekem

• Soem wan pikja blong Ol Waes Man taem yu stap luklukbak,wetem ol pikinini, long stori blong olgeta, we i stap long Matiu 2:1–12. . Yu save soem pikja Wise Men Present Gifts (ChurchofJesusChrist.org).

• Kavremap ol pikja o ol samting we i ripresentem ol presen we yumi save givim long Jisas. Invaetem ol pikinini blong helpem yu blong openem ol presen ia, mo toktok raon long olsem wanem yumi givim ol presen ia i go long Sevya.

• Helpem wanwan pikinini blong dro o raetem wan lis blong ol presen we oli save givim long Jisas, olsem “blong stap wan gudfren” o “stap prea.” Invaetem ol pikinini blong serem lis blong olgeta wetem evriwan long klas mo jusum wan “presen” we bae oli givim long Jisas tedei.

Luk 2:40–52

Jisas i bin wan pikinini long wan taem, semmak olsem mi.

Blong stap lanem abaot taem we Sevya i wan smol pikinini, bae i save helpem ol pikinini we yu tijim blong oli save lukluk i gobak long hem. Askem ol pikinini wanem oli bin lanem aot long ol ves ia abaot olsem wanem oli save kam olsem Jisas naoia.

Samfala Aktiviti we Yu Save Mekem

• Invaetem wan long ol yut blong wod blong visitim klas blong yu mo serem stori blong Jisas we i stap tij long tempol taem Hem i wan yangfala man.

• Askem sam pikinini bifo klas blong karem sam pikja blong olgeta, taem oli bebi, blong serem. Askem olgeta olsem wanem oli bin groap. Serem sam long ol wei we Jisas i bin groap (luk long Luk 2:40, 52). Singsing wetem ol pikinini “Jesus Once Was a Little Child” (Children’s Songbook, 55) o wan narafala singsing abaot Sevya.

• Ridim Luk 2:52, mo eksplenem wanem i minim “waes” mo “bodi.” Yu save askem ol pikinini blong mekem ol aksen we i soem wanem i minim blong kam antap long waes tingting mo blong God mo ol narafala pipol oli laekem. Eksampol. Oli save aktem se oli stap ridim wan buk o helpem wan man we i stap long nid.

Tijim Doktrin: Ol Bigfala Pikinini

Luk 2:1–21; Matiu:1–12

Ol profet blong bifo oli bin talem finis taem we Sevya bae i bon long hem.

Ol profet mo ol man we oli bilif, oli bin stap lukluk fored from taem we Sevya bae i bon long hem, blong plante yia. Blong andastanem trutok, i save helpem ol pikinini blong kasem wan bigfala glad from laef mo misin blong Sevya.

Samfala Aktiviti we Yu Save Mekem

• Askem ol pikinini blong tokbaot ol samting we oli stap lukluk fored from, olsem wan betdei o wan holidei. Mekem ol pikinini oli ridim Hileman 14:2–5 blong faenem samting we ol profet oli stap lukluk fored from.

• Tugeta, ridim sam profesi abaot taem we Sevya bae i bon i kam long wol ia(luk long Aesea 7:14; 9:6; 1 Nifae 11:18; Hileman 14:5). Helpem ol pikinini blong mekem wan lis abaot ol ditel blong wanem ol profesi ia oli minim, mo taem we oli hapen, olsem we oli raetem long Luk 2:1–21 mo Matiu 2:1–12.

• Invaetem ol pikinini blong dro wan pikja blong wan samting long Matiu 2:1–12 o Luk 2:1–21 mo talemaot from wanem oli tangkyu se Jisas i bin bon i kam long wol ia.

Simeon I Stap Soem Respek long Pikinini Ia, Kraes, i kam long Greg K. Olsen

Luk 2:40, 52

Jisas i groap “moa long bodi blong hem mo long waes blong hem tu, mo oltaem God i glad tumas long hem, mo ol man.”

Olsem Jisas, ol pikinini we yu tijim oli gat wan impoten misin blong oli stap rere from. ?Wanem nao oli save lanem aot long eksampol blong Jisas.

Samfala Aktiviti we Yu Save Mekem

• Taem yu ridim Luk 2:40, 52, talem long pikinini blong lisin long ol samting we Jisas i bin mekem. Invaetem ol pikinini blong tokbaot ol wei we oli bin groap long hem, taem oli smol. Serem eksperiens blong yu taem yu stap lanem gospel smosmol. Serem testemoni blong yu abaot Sevya.

• Komplitim ol aktiviti we i soem ol sentens long Luk 2:40, 52. Eksampol. Yu save makem longfala blong wan pikinini (“Jisas i groap long … bodi”) o askem ol pikinini blong serem fevret skripja blong blong olgeta (“oli kam moa strong long saed blong spirit”). Helpem ol pikinini blong luksave ol wei we oli stap groap, mo serem wetem ol famli blong olgeta.

• Afta we yu luklukbak long Luk 2:40, 52, invaetem ol pikinini blong serem se, long tingting blong olgeta, bae Jisas i olsem wanem taem Hem i gat sem yia olsem olgeta. ?Wanem fasin nao Hem i stap mekem long mama blong Hem? ?Long ol brata mo sista blong Hem?

Luk 2:41–52

Mi save folem eksampol blong Jisas.

Olsem wan yangfala man, Jisas i stap tijim gospel long tempol. I semmak tu long ol pikinini blong klas blong yu, oli gat plante samting blong tijim long olgeta we oli stap raon long olgeta.

Samfala Aktiviti we Yu Save Mekem

• Invaetem wan pikinini blong i rere blong talem long wan toktok long klas abaot stori long Luk 2:41–52. Blong helpem ol pikinini andastanem ol stori, tijim wanem we i bisnis blong Papa, long (ves 49) i minim. Eksampol. Yu save talem long ol pikinini abaot wanem wok yu o papa mo mama blong i bin wok long hem. ?Wanem i wok o bisnis blong Josef, papa blong Jisas long wol ia? (luk long Matiu 13:55). ?Wanem i bisnis blong Papa long Heven? (Luk long Luk 2:46–49; luk tu long Moses 1:39).

• Ridim tugeta wetem ol pikinini Luk 2:46–49, mo askem, “?Hao nao Jisas i stap mekem bisnis blong Papa blong Hem?” Helpem ol pikinini blong mekem wan lis o dro long bod, ol wei we oli save help blong mekem bisnis blong Papa long Heven tu.

• Blong helpem ol pikinini blong bildimap tras se olgeta, olsem boe ia, Jisas, oli save tijim gospel, helpem olgeta blong praktis blong stap tijim olgetawan wan prinsipol long Blong Ol Yut Oli Kam Strong.

Stap Leftemap Tingting blong Lanem Samting long Hom

Invaetem ol pikinini blong tijim ol famli blong olgeta long wan samting we oli bin lanem abaot paoa long toktok Jisas Kraes.

Stap Kam Antap long Fasin blong Yumi blong Stap Tij

Ol pikinini oli wantem save evri samting mo oli lan long plante wei. Ol pikinini oli stap glad blong lanem samting tru long ol niu mo defren eksperiens. Yusum ol aktiviti we bae i helpem olgeta blong muv olbaot, yusum evri sens blong olgeta, mo traem ol niufala samting. (Luk long Teaching in the Savior’s Way, 25–26.)