16–22 Jenuware

Jon 1

Mifala I Faenem Mesaea Ya Finis

Taem bae yu ridim Jon 1, raetemdaon ol filing mo tingting blong yu long saed blong spirit we yu kasem. Aotlaen blong wik ia long Kam Folem Mi—Blong Wanwan Man, Woman mo Famli i save helpem yu blong stadi long japta ia. Oli aktiviti ia we oli putum, i save givim sam aedia long yu abaot olsem wanem blong helpem ol pikinini blong lanem ol prinsipol insaed long Jon 1. Ol aktiviti blong ol bigfala pikinini, yu save jenisim sapos yu wantem blong i stret long ol smosmol pikinini.

Invaetem Ol Pikinini blong Serem Wanem Oli Gat

Blong helpem ol pikinini blong serem wanem we oli save abaot Jisas, soem ol pikja blong Hem we i stap mekem ol wok blong Hem i hapen we oli tokbaot long Jon 1 (olsem blong krietem wol ia o blong stap tij, gospel. Askem ol pikinini blong tokbaot wanem nao i stap hapen insaed long pikja.

Tijim Doktrin: Ol Smol Pikinini

Jon 1:1–2

Jisas i bin laef wetem Papa long Heven bifo Hem i bon i kam long wol.

Jon i bin tijim se Jisas Kraes i bin stap wetem Papa long Heven bifo Hem i bin bon i kam long wol. Yumi tu, yumi bin stap laef wetem God bifo yumi bin bon i kam long wol ia (luk long “Wan Ofisol Toktok I Go long Wol,”,” ChurchofJesusChrist.org/study?lang=bis). ?Hao nao bae yu tijim ol pikinini abaot trutok ia?

Samfala Aktiviti we Yu Save Mekem

• Eksplenem se “Tok blong God” long Jon 1:1 i stap minim Jisas. Ridim ves ia laod, mo askem ol pikinini blong talem “Jisas” long evri taem we yu ridim toktok ia “Tok blong God.” Soem pikja we taetol i “Laef Bifo Laef long Wol ia” (ChurchofJesusChrist.org; luk tu long Behold Your Little Ones [2008], 15). Eksplenem se Jisas Kraes i bin laef wetem Papa long Heven bifo Hem i kam long wol ia.

• Droem sam samting aot long ol risos olgeta ia blong tijim ol pikinini abaot laef blong yumi wetem God, bifo yumi kam long wol ia: “Fas Toktok: Plan blong Papa blong Yumi long Heven” (long Ol Niu Testeman Stori, 1–5, o vidio we i go wetem long ChurchofJesusChrist.org) o “Laef Bifo Laef long Wol ia” long Ol Gaed long Skripja (olskripja.ChurchofJesusChrist.org).

• Invaetem wan papa o mama blong karem wan bebi i kam long klas. Askem ol pikinini se, wea nao spirit blong bebi ia i stap long hem bifo hem i bon. Rimaenem ol pikinini se, long wan taem oli bin stap olsem wan pikinini, mo testifae se, olgeta tu, oli bin stap laef long heven wetem Papa long Heven olsem ol spirit pikinini, bifo oli bon i kam long wol ia.

Jon 1:3

Jisas i krietem evri samting.

Blong save abaot rol blong Jisas Kraes olsem Krieta, i save helpem ol pikinini we yu tijim, blong oli save respektem Hem moa.

Samfala Aktiviti we Yu Save Mekem

• Ridim Jon 1:3 wetem ol pikinini, mo soem pikja long aotlaen blong wik ia long Kam Folem Mi—Blong Wanwan Man, Woman mo Famli. Helpem ol pikinini blong lanem sentens ia baehat “[Jisas Kraes] i mekem evri samting.”

• Soem long wan pikinini, wan pikja blong ol kriesen blong Lod. Letem hem i tokbaot pikja ia long ol pikinini, mo askem olgeta blong oli traem faenem wanem samting ia hem i luk.

• Askem wanwan pikinini blong talem nem blong wan samting we Jisas Kraes i krietem. Helpem ol pikinini blong oli tingting long sam wei we oli save lukaot long ol kriesen blong Lod long wol ia.

Jisas Kraes i krietem wol mo evri samting we i stap long hem.

Jon 1:35–51

Mi save invaetem ol narafala man blong kam long Jisas Kraes mo lanem abaot Hem.

Jon 1 i tokbaot ol stori blong ol disaepol we oli stap invaetem ol pipol blong “kam mo luk” Jisas ia we i Pikinini blong God. Iven ol smol pikinini oli save folem eksampol ia.

Samfala Aktiviti we Yu Save Mekem

• Tokbaot olsem wanem Andru i lanem abaot Jisas, mo talem olsem wanem hem i bin mekem i semmak taem hem i tijim Pita (luk long Jon 1:35–42). Serem olsem wanem yu lanem abaot Jos o invaetem wan niufala memba blong serem olsem wanem hem i kam blong save abaot Jos.

• Serem stori blong Filip we i stap invaetem Netanel blong “kam mo luk” (Jon 1:43–51). Haedem pikja blong Jisas long wan bokis, mo invaetem wan pikinini blong “kam mo luk,” mo afta talem long ol narafala pikinini abaot wanem we hem i bin luk.

• Letem ol pikinini oli kalarem aktiviti pej blong wik ia mo leftemap tingting blong olgeta blong yusum hemia blong invaetem wan blong lanem abaot Jisas.

• Askem wan pikinini blong talem abaot wan taem we hem i bin serem wan samting, olsem wan pleiplei o wan presen wetem wan narafala pikinini. ?Olsem wanem nao yumi save lanem abaot gospel? Talem wan stori abaot wan pikinini we i bin serem gospel wetem wan pikinini, olsem “A Friend and a Missionary,” Friend, July 2018, 12–13; Liahona, July 2018, 70–71.

Tijim Doktrin: Ol Bigfala Pikinini

Jon 1:1–5

Jisas Kraes i bin laef wetem Papa long Heven bifo Hem i bin bon i kam long wol ia.

Iven bifo Hem i bon, Jisas Kraes i bin stap olsem wan pat long plan blong Papa long Heven. Taem bae yu ridim Jon 1:1–5, wanem nao yu stap filim mo tingting long hem abaot wok blong blong Kraes, long laef bifo laef long wol ia?

Samfala Aktiviti we Yu Save Mekem

• Askem ol pikinini sapos oli save eni samting abaot wanem we Jisas i bin mekem bifo Hem i bon i kam long wol ia. Invaetem olgeta blong lukaotem ol ansa long Jon 1:1–5. Hemia i save help blong luk insaed long Josef Smit Translesen, Jon 1:1–5 (long Baebol apendiks).

• Serem ol pat blong “Fas Toktok: Plan blong Papa blong Yumi long Heven” (long Ol Niu Testeman Stori, 1–5, o vidio we i go wetem long ChurchofJesusChrist.org). Askem ol pikinini wanem oli lanem abaot Jisas Kraes.

• Sam dei bifo klas i stat, askem sam pikinini blong rere blong soem o tokbaot wan samting we oli bin krietem. Soem sam pikja blong sam long ol kriesen blong Lod, mo yusum Jon 1:3 blong eksplenem se Jisas i bin krietem wol mo evri samting we i stap long hem.

Jon 1:4–9

Jisas Kraes i laet blong mi.

Minim blong laet i save helpem ol pikinini blong andastanem Sevya mo gospel blong Hem. ?Olsem wanem yu save givim insperesen long ol pikinini blong oli lukaotem laet blong Sevya taem we wol i tudak?

Samfala Aktiviti we Yu Save Mekem

• Invaetem ol pikinini blong ridim Ol Sam 27:1; Jon 1:4–9; Mosaea 16:9; mo Doktrin mo Ol Kavenan 39:1–2, mo stap lukaotem ol sentens we ol skripja ia oli gat we i semmak. ?Olsem wanem nao Jisas Kraes i olsem wan laet?

• Soem wan pikja blong Sevya mo sam samting we i givim laet, olsem wan toj. ?Olsem wanem nao Jisas Kraes i olsem ol samting ia? ?Olsem wanem nao yumi save serem laet blong Hem wetem ol narafala man? Singsing tugeta “The Lord Is My Light” (Hymns, namba 89) o wan narafala singsing abaot laet we i gospel.

• Askem ol pikinini wanem nao oli stap mekem taem oli stap long tudak mo oli filim fraet. Testifae long olgeta se oli save tanem olgeta i gol long Sevya oltaem, taem we oli stap fraet.

Jon 1:35–51

Olsem wan we i stap folem Jisas Kraes, mi save invaetem ol narafala man blong folem Hem.

Tingting long olsem wanem yu save yusum ol eksampol long Jon 1:35–51 blong leftemap tingting blong ol pikinini, blong invaetem ol narafala man blong lanem abaot Sevya.

Samfala Aktiviti we Yu Save Mekem

• Helpem ol pikinini blong lukluk long Jon 1:35–51 blong faenem ol samting we ol pipol oli talem, blong invaetem ol narafala man blong lanem abaot Sevya. Letem olgeta oli praktisim wanem we maet bae oli talem blong invaetem wan fren blong lanem abaot Hem.

• Invaetem ol pikinini blong yusum aktiviti pej blong wik ia blong mekem wan invitesen we oli save yusum blong invaetem wan fren o famli memba blong lanem abaot Jisas Kraes.

• Givim janis long ol pikinini blong talem long evriwan long klas abaot wan samting we oli laekem tumas. Helpem ol pikinini blong luksave, olsem wanem taem oli stap serem gospel i save olsem taem we oli stap serem ol narafala samting we yumi lavem (blong wan eksampol, luk long vidio “Good Things to Share” on ChurchofJesusChrist.org).

Stap Leftemap Tingting blong Lanem Samting long Hom

Leftemap tingting blong ol pikinini blong oli invaetem wan we oli lavem, blong lanem moa abaot Jisas Kraes.

Kam Antap long Fasin blong Yumi blong Stap Tij

Yusum samting we ol memba blong klas oli save luk Faenem ol wei blong helpem ol pikinini blong gat wan pikja long maen blong olgeta, abaot wanem we oli stap lanem long ol skripja. Yu save mekem hemia wetem gospel art, ol droing, ol vidio, ol pleiplei doli o ol skit.