Meri mo Elisabet

2–8 Jenuware.

Matiu 1; Luk 1

“Mi Wantem blong I Kamtru long Mi olsem we Yu Yu Talem”

Blong stat, ridim Matiu 1 mo Luk 1. Kam Folem Mi—Blong Wanwan Man, Woman mo Famli i save helpem yu andastanem ol japta ia, mo aotlaen ia i save givim sam tingting long saed blong tij. Sapos yu nidim moa help long saed blong stap tijim ol smol pikinini, luk long “Stap Lukluk long Ol Nid blong Ol Smol Pikinini” long stat blong lesenbuk ia.

serem pikja bokis

Invaetem Ol Pikinini blong Serem Wanem Oli Gat

Askem ol pikinini blong sidaon long wan sekol, mo afta, askem wan pikinini blong serem wan samting we hem i jes lanem long ol skripja. Pikinini ia i save rolem wan balong o poenem wan narafala pikinini we i stap long sekol, mo afta, hem nao bae i nekiswan blong serem skripja blong hem

tijing pikja bokis

Tijim Doktrin: Ol Smol Pikinini

Matiu 1:18–25; Luk 1:26–38

Ol enjel oli anaonsem taem we bae Jisas i bon.

Enjel i visitim wanwan long tufala, Meri mo Josef, blong talemaot taem we Jisas Kraes bae i bon i kam long wol. Ol eksperiens ia i save helpem ol pikinini blong oli luksave, olsem wanem, taem ia we Kraes bae i bon long hem, i impoten.

Samfala Aktiviti we Yu Save Mekem

• Askem wan papa mo mama blong wan long ol pikinini blong werem klos olsem Meri mo Josef, mo kam long taem blong klas. Askem tufala blong serem ol eksperiens we oli raetem insaed long Matiu 1:18–25 mo Luk 1:26–38.

• Talem ol stori blong ol enjel we oli stap kamkamaot long Meri mo Josef, olsem we oli rekodem long ol ves ia. (Luk long “Japta 2: Meri mo Enjel” mo “Japta 4: Josef mo Enjel,” long Ol Niu Testeman Stori, 8–9, 12, o vidio we i go wetem long ChurchofJesusChrist.org.) Yu save soem long ol pikinini ol pikja long aotlaen blong wik ia insaed long Kam Folem Mi—Blong Wanwan Man, Woman, mo Famli. Invaetem ol pikinini blong ripitim ol stori i kambak long yu.

• Invaetem ol pikinini blong dro ol pikja blong stori ia we i stap long Matiu 1:18–25 mo Luk 1:26–38.

Enjel Gabriel i kamkamaot long Meri

Anaonsmen blong Taem we Kraes I Bon I Kam long Wol, i kam long John Scott

Luk 1:5–25, 57–63

Papa long Heven i ansarem ol prea blong mi.

Sekaraea mo Elisabet, tufala i bin stap prea blong plante yia, blong gat wan pikinini. Long en, Papa long Heven i bin ansarem ol prea blong tufala mo givim wan pikinini boe long tufala, we hem i Jon Baptaes. ?Olsem wanem nao yumi save yusum stori ia blong tijim ol pikinini se Papa long Heven i stap ansarem ol prea?

Samfala Aktiviti we Yu Save Mekem

• Long ol toktok blong yuwan, serem stori long Luk 1:5–25, 57–63. Bae yu wantem blong ripitim ol stori ia plante taem. Givim wok long ol pikinini blong mekem pat blong Sekaraea, Elisabet, mo enjel, mo aktem stori ia. Tokbaot bigwan ol toktok blong enjel we i go long Sekaraea: “Hae God i harem prea blong yu finis” (Luk 1:13). Serem wan eksperiens blong wan taem we Papa long Heven i bin ansarem prea blong yu.

• Yusum “We Bow Our Heads” (Children’s Songbook, 25) o wan narafala singsing blong tijim ol pikinini olsem wanem blong prea. Evri taem we oli pikinini oli singsing mo talem toktok ia “pray” (blong stap prea) o “prayer,” (prea) invaetem olgeta blong benem hed blong olgeta i go daon, mo foldem tufala han blong olgeta.

• Askem ol pikinini blong mekem ol aksen we i ripresentem wan samting we oli save prea from. Letem ol nara pikinini oli talemaot wanem nao ol aksen ia oli ripresentem. Oli save faenem ol aedia long aktiviti pej blong wik ia.

Luk 1:30–35

Jisas Kraes i Pikinini blong God.

Jisas Kraes i Pikinini blong Papa long Heven mo Meri. ?Wanem nao yu save mekem blong helpem ol pikinini oli lanem moa samting abaot Hem?

Samfala Aktiviti we Yu Save Mekem

• Talem long ol pikinini se, enjel i bin talem long Meri, se bebi blong hem bae oli singaotem hem, Pikinini blong God (luk long Luk 1:35). Helpem ol pikinini blong ripitim sentens ia “Jisas Kraes i Pikinini blong God.” Helpem ol pikinini blong andastanem se, huia i papa mo mama blong Jisas, mo yu invaetem olgeta blong droem pikja blong papa mo mama blong olgeta bakegen. Taem oli mekem hemia, talem long olgeta se, Jisas tu, i gat papa mo mama—Meri mo Papa long Heven. Blong ademap, oli askem Josef blong protektem mo kea long Jisas taem Hem i stap laef long wol ia.

• Serem testemoni blong yu se, from we Jisas i Pikinini blong God, Hem i save ded from ol sin blong yumi mo kambak long laef. Soem ol pikja blong Jisas we oli hangem Hem long kros, mo taem we Hem i Laef Bakegen long Ded (luk long Gospel Art Buk, ol namba 57, 59).

tijing pikja bokis

Tijim Doktrin: Ol Bigfala Pikinini

Matiu 1:18–25; Luk 1:5–37

I no gat wan samting we i strong tumas, we God i no save mekem.

Tru long paoa blong God nomo, i mekem se i posibol blong Jisas mo Jon Baptaes i save bon i kam long wol ia. Taem ol pikinini oli stap lanem abaot ol merikel ia, i save mekem fet blong olgeta i kam moa strong, se God i gat paoa blong wokem ol merikel insaed long laef blong olgeta.

Samfala Aktiviti we Yu Save Mekem

• Taem yu mo ol pikinini i luklukbak long Matiu 1:18–25 mo Luk 1:5–37, askem ol kwestin long ol pikinini olsem “?Wanem nao bae yu talem sapos yu yu Meri?” o “?Bae yu filim olsem wanem, sapos yu yu Sekaraea?”

• Long simpol toktok, talem ol stori we oli tokbaot long Matiu 1:18–25 mo Luk 1:5–37. Askem ol pikinini blong leftemap han blong olgeta taem oli harem wan samting we bae i no wokaot nomo sapos i no gat paoa blong God i stap. ?Wanem sam narafala stori we ol pikinini oli save serem abaot taem we God i bin mekem wan samting we i no posibol blong hapen?

• Helpem ol pikinini blong lanem baehat Luk 1:37. Blong mekem hemia, yu save raetem ol ves long bod mo askem ol pikinini blong talem ves ia baehat plante taem. Afta long wanwan taem we oli stap talem, waepemaot wan toktok.

Matiu 1:21–25; Luk 1:30–35, 46–47

Jisas Kraes I Pikinini blong God.

Jisas Kraes I Pikinini blong Papa long Heven mo Meri. ?Olsem wanem nao yu save helpem ol pikinini blong lanem trutok ia?

Samfala Aktiviti we Yu Save Mekem

• Askem ol pikinini blong ridim Luk 1:30–35, blong faenem ol ansa blong ol kwestin ia: “?Huia nao mama blong Jisas?” mo “?Huia nao papa blong Jisas? Helpem olgeta blong andastanem se Jisas Kraes nomo i man ia we i gat wan mama long wol ia, Meri, mo wan papa we i no save ded, Papa long Heven (luk long 1 Nifae 11:18–21).

• Taem yu ridim ol ves ia, invaetem ol pikinini blong lukaotem ol nem o ol taetol blong Jisas Kraes. ?Wanem nao ol nem ia oli minim, mo wanem nao oli tijim yumi abaot Jisas?

• Serem testemoni blong yu abaot Jisas Kraes mo invaetem ol pikinini blong serem ol testemoni blong olgeta tu.

Luk 1:5–25, 57–66

Papa long Heven i harem mo ansarem ol prea blong mi.

Oltaem God i ansarem ol prea, be i no oltaem long ol wei we maet yumi wantem. ?Olsem wanem nao yu save yusum stori blong Sekaraea mo Elisabet blong tijim ol pikinini abaot trutok ia?

Samfala Aktiviti we Yu Save Mekem

• Askem ol pikinini wanem nao bae oli talem long wan man we i bin prea from wan blesing be hem i no bin kasem ansa yet. Invaetem olgeta blong tingbaot kwestin ia taem we, tugeta, oli stap ridim Luk 1:5–25, 57–66. (Luk tu long “Japta 1: Elisabet mo Sekaraea” mo “Japta 3: Jon Baptaes I Bon,” long Ol Niu Testeman Stori, 6–7, 10–11, o vidio we i go wetem long ChurchofJesusChrist.org.) ?Wanem nao, maet Sekaraea mo Elisabet oli talem long wan we i bin filim se prea blong tufala i no bin kasem ansa?

• Invaetem sam pikinini blong go long fored blong serem ol eksperiens blong olgeta long taem we Papa long Heven i bin ansarem ol prea blong olgeta. Serem wan taem we yu bin filim se ol ansa blong prea blong yu i bin kam long wan wei we yu no ting se bae i hapen olsem.

• Invaetem ol pikinini blong droem wan pikja blong wan taem we Papa long Heven i bin ansarem wan prea—speseli, wan prea blong olgeta bakegen. Letem olgeta oli serem ol droing blong olgeta wetem evriwan long klas.

stap lanem samting pikja bokis

Stap Leftemap Tingting blong Lanem Samting long Hom

Invaetem ol pikinini blong serem wetem ol famli blong olgeta eni pikja we oli bin droem long taem blong klas. Leftemap tingting blong olgeta blong askem long ol memba blong famli blong olgeta abaot ol taem we God i bin ansarem ol prea blong olgeta.

Stap Kam Antap long Fasin blong Yumi blong stap Tij

Helpem ol smol pikinini blong lanem samting aot long skripja. Blong helpem ol smol pikinini blong lanem samting aot long skripja, lukluk moa long wan ves blong skripja fastaem o iven wan toktok nomo fastaem. Maet yu wantem invaetem ol pikinini blong stanap o leftemap han taem oli harem toktok ia. (Luk long Teaching in the Savior’s Way, 21.)

aktiviti pej: Papa long Heven i stap ansarem ol prea blong mi