2–8 Jenuware

Matiu 1; Luk 1

“Mi Wantem blong I Kamtru long Mi Olsem we Yu Yu Talem”

Taem yu stap ridim mo tingting hevi long Matiu 1 mo Luk 1, raetemdaon ol filing mo tingting we yu kasem long saed blong spirit. ?Wanem ol doktrin trutok yu faenem? ?Wanem mesej nao oli moa impoten long yu mo famli blong yu? Sapos yu stadi long ol aedia we oli stap long aotlaen ia, bae oli save helpem yu blong faenemaot sam moa niu tingting.

Raetemdaon Ol Filing mo Tingting blong Yu

Wetem lukluk blong man long wol ia, hemia i no posibol nomo. Wan yangfala gel we i no save man i no save gat bel—mo semmak tu long wan woman we i no save karem pikinini we i olfala bitim yia blong hem blong karem pikinini. Be God i bin gat wan plan long saed blong taem Pikinini blong Hem i bon i kam long wol, mo hemia blong Jon Baptaes, mekem se Meri mo Elisabet, nomata eni samting we i save hapen, tufala i bin kam ol mama. Bae i save help blong tingbaot merikel eksperiens blong tufala taem yumi save fesem wan samting we yumi luk se i no posibol, o i no save hapen. ?Bae yumi save winim ol wiknes blong yumi? ?Bae yumi save tajem hat blong wan memba blong famli we i no mekem samting? Ating Gabriel i bin stap toktok long yumi taem hem i talem bakegen long Meri, “I no gat wan samting we i strong tumas, we God i no save mekem” (Luk 1:37). Mo ansa we Meri i givim, i save stap olsem ansa blong yumi taem God i stap talemaot tingting blong Hem: “Mi wantem blong i kamtru long mi olsem we yu yu talem” (Luk 1:38).

Sam Aedia blong Skripja Stadi blong Yuwan

?Huia ia stret Matiu mo Luk?

Matiu i wan Man Jiu we i stap tekem mane blong takis, o i stap kolektem takis, mo Jisas i singaotem hem i kam wan long Ol Aposol blong Hem (luk long Matiu 10:3; luk tu long Gaed long Ol Skripja, “Takis, Man blong Tekem Mane blong”). Matiu i raetem Gospel blong hem i go plante long ol Jiu; from hemia, hem i bin yusum blong tokbaot plante ol profesi blong OlTesteman abaot Mesaea, we oli bin hapen tru long laef mo seves blong Jisas.

Luk i bin wan Jentael (wan we i no wan Jiu); mo hem i wan dokta we i bin stap travel wetem Aposol Pol. Hem i bin raetem Gospel blong hem afta long ded blong Sevya; hem i bin raet fulap i go long ol pipol we oli no Jiu. Hem i bin testifae se Jisas Kraes i Sevya blong tugeta, Ol Jentael mo Ol Jiu. Hem i raetemdaon ol histri blong ol samting we hem i bin luk long laef blong Sevya, mo hem i putum moa histri we i gat ol woman insaed; hem i bin mekem hemia moa bitim ol nara buk blong Gospel.

Luk tu long Gaed long Ol Skripja, “Ol Gospel,” “Matiu,” “Luk.”

Matiu 1:18–25; Luk 1:26–35

Jisas Kraes i bon i kam long wol ia long wan mama we i gat bodi we i save ded, mo wan Papa we bodi blong Hem i no save ded.

Long Matiu 1:18–25 mo Luk 1:26–35, luk olsem wanem nao Matiu mo Luk, tufala i tokbaot merikel blong taem ia we Jisas i bon i kam long wol ia. ?Olsem wanem nao, wei we tufala i tokbaot taem ia, i mekem fet blong yu long Sevya i kam strong moa? ?From wanem hem i impoten blong yu yu save se Jisas i bin Pikinini blong God, mo tu, Hem i bin boe blong Meri?

Presiden Russell M. Nelson i eksplenem se Atonmen blong Jisas Kraes “i bin nidim blong wan we i nomo save ded bae i mekem sakrifaes ia. Yet, Hem i mas ded, mo i tekem bodi blong Hem bakegen. Sevya i bin wan man ia nomo we i bin save mekem hemia i hapen. Aot long mama blong Hem, Hem i kasem paoa blong save ded. Aot long Papa blong Hem, Hem i kasem paoa blong winim ded” (“Constancy amid Change,” Ensign, Nov. 1993, 34).

Luk 1:5–25, 57–80

Ol blesing blong God oli kam long stret taem we Hem i wantem.

Sapos yu luk se yu bin stap wet from wan blesing, o i luk se God i no stap harem ol prea blong yu, nao stori blong Elisabet mo Sekaraea i save mekem yu yu tingbaot se Hem i no bin fogetem yu. Olsem we Elda Jeffrey R. Holland i bin promes: “So, taem yumi stap wok mo wet tugeta blong ol ansa blong sam prea oli kam, mi givim promes blong mi, olsem wan aposol, se oli harem prea, mo oli stap ansarem prea, nomata se i no hapen long taem mo long wei we yumi wantem. Be, oltaem, ansa i kam long taem mo long wei we wan papa we i luksave evri samting, mo i no save finis, mo i gat sore, i stap ansarem olgeta” (“Stap Wet long Lod,” Liahona, Nov 2020, 115–16). ?Olsem wanem nao Sakaraea mo Elisabet, tufala i gohed blong stap fetful? (luk long Luk 1:5–25, 57–80). ?Yu yu luk se yu stap wet from wan blesing? Long tingting blong yu, ?wanem nao yu filim se Lod i wantem yu mekem taem yu yu stap wet?

Afta we tufala i stap fetful mo stap wet, Elisabet mo Sekaraea, tufala i gat blesing ia blong gat wan boe.

Matiu 1:18–25; Luk 1:26–38

Olgeta we oli fetful, oli glad blong folem tingting blong God.

Olsem Meri, samtaem yumi faenem se ol plan blong God long saed blong laef blong yumi, oli defren smol long wanem yumi bin plan from. ?Wanem nao yu lanem aot long Meri long saed blong fasin blong akseptem tingting blong God? Long ol tebol andanit ia, raetem ol toktok we oli kam long enjel mo Meri (luk long Luk 1:26–38), wetem ol mesej we bae yu faenem insaed long ol toktok blong tufala:

Toktok blong enjel i go long Meri	Wan mesej blong mi
Toktok blong enjel i go long Meri “Hae God i stap wetem yu” (ves 28).	Wan mesej blong mi Lod i save situesen mo ol hadtaem blong mi.
Toktok blong enjel i go long Meri	Wan mesej blong mi
Toktok blong enjel i go long Meri	Wan mesej blong mi

Wanem Meri i mekem	Wan mesej blong mi
Wanem Meri i mekem “?Bambae samting ya i save kamtru olsem wanem?” (ves 34).	Wan mesej blong mi Hem i oraet blong askem kwestin blong andastanem gud moa tingting ia blong God.
Wanem Meri i mekem	Wan mesej blong mi
Wanem Meri i mekem	Wan mesej blong mi

Taem yu stap rid abaot stret mo gud eksampol blong Josef, we i stap long Matiu 1:18–25, ?wanem nao yu yu lanem abaot fasin blong akseptem tingting blong God? ?Wanem moa niu samting nao yu yu lanem aot long ol eksperiens blong Sekaraea mo Elisabet? (luk long Luk 1).

Luk tu long Luk 22:42; Gaed long Ol Skripja, “Gabriel.”

Luk 1:46–55

Meri i testifae abaot misin blong Jisas Kraes.

Ol toktok blong Meri insaed long Luk 1:46–55 oli talem finis abaot samfala pat blong misin blong Sevya. ?Wanem nao yu lanem abaot Jisas Kraes aot long ol toktok blong Meri? Yu save komperem ol ves ia wetem ol toktok blong Hana we oli stap long 1 Samuel 2:1–10 mo wetem Ol Eit Gudfala Toktok blong Jisas we oli stap long Matiu 5:3–12. ?Wanem nao Spirit i stap tijim yu taem yu stap tingting hevi long ol ves ia?

Ol Aedia blong Famli Skripja Stadi mo Haos Naet

Matiu 1:1–17.Taem we famli blong yu i stap ridim famli laen blong Jisas, maet yu save toktok raon long stret famli histri blong yufala, mo serem sam stori abaot ol bubu blong yufala. ?Olsem wanem, taem yu save abaot famli histri blong yu bae i save blesem famli blong yu? Blong luk moa famli histri aktiviti, luk long FamilySearch.org/discovery.

Matiu 1:20; Luk 1:11–13, 30.?Olsem wanem pipol we i stap insaed long ol ves ia oli bin fraet? ?Wanem nao i stap mekem yumi filim se yumi fraet? ?Olsem wanem nao God i stap invaetem yumi blong no stap fraet?

Luk 1:37.Blong helpem famli blong yu blong bildimap fet ia se i no gat samting we i no posibol tru long God, tugeta, yufala i save luklukgud long Luk 1 mo faenem ol samting we God i bin mekem, we yumi save talem se i no bin posibol sapos i no Hem. ?Wanem stori nao yumi save serem—aot long ol skripja, o, aot long laef blong yumiwan—we God i bin mekem ol samting we yumi luk se i no posibol blong hapen? Sapos yu luklukgud insaed long Gospel Art Buk, bae yu save faenem sam aedia.)

Luk 1:46–55.?Wanem nao sam long ol bigfala wok we God i bin mekem blong yumi? ?Hem i minim wanem long sol blong yumi blong “stap leftemap nem blong Hae God”?

Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.

Wan singsing: “He Sent His Son,” Children’s Songbook, 34–35.

Stap Kam Antap long Fasin blong Yumi blong Stap Tij

Yusum ol skripja ia long laef blong yu. Afta we yu ridim wan skripja, invaetem ol memba blong famli blong oli yusum ol skripja ia long laef blong olgeta (luk long Teaching in the Savior’s Way, 21). Eksampol: ?Olsem wanem ol memba blong famli oli save yusum wanem we oli lanem aot long Matiu 1 mo Luk 1 abaot fasin blong ansarem singaot blong Lod?

God I Blesem Yu Aot long Evri Woman, i kam long Walter Rane