Meri mo Elisabet

2–8 Jenuware

Matiu 1; Luk 1

“Mi Wantem blong I Kam Tru long Mi Olsem we Yu Yu Talem”

Bifo yu ridim eni nara tul blong stadi, rid mo tingting hevi long Matiu 1 mo Luk 1, mo raetemdaon filing mo tingting blong yu long saed blong spirit. Letem Spirit i lidim yu long stadi blong yu. Afta lukluk long ol aedia we i stap long lesen ia mo insaed long Kam Folem Mi—Blong Wanwan Man, Woman mo Famli.

serem pikja aekon

Invaetem Ol Memba blong Serem Wanem Oli Gat

Wan stamba tingting blong Matiu, Luk, mo ol nara man blong raetem Gospel we i blong testifae se Jisas Kraes I Pikinini blong God. Givim sam minit long ol memba blong klas blong lukluk bak long Matiu 1 o Luk 1 mo serem wan ves we i bildimap fet blong olgeta long Jisas Kraes. Givim wan tingting long ol memba blong klas se taem oli stadi long Niu Testeman long yia ia, maet oli save kipim wan lis blong ol ves we i testifae se, Jisas Kraes i Pikinini blong God. Yu save kipim lis ia olsem wan klas.

tijing aekon

Stap Tijim Doktrin

Matiu 1:18–25; Luk 1:5–80

Papa long Heven i wok tru long ol fetful pikinini blong Hem blong fulfilim stamba tingting blong Hem.

• Ol memba blong klas oli save gat eksperiens we i gat moa mining long laef blong olgeta taem oli stap stadi long Niu Testeman long yia ia, sapos oli save karem lesen aot long ol eksperiens blong ol pipol we oli stap rid abaot olgeta. Blong helpem olgeta i mekem hemia, yu save raetem nem blong ol pipol ia we i stap long Matiu 1 mo Luk 1 long bod, wetem ol skripja refrens abaot ol man ia, olsem i stap long ples ia:

  • Meri (Luk 1:26–56)

  • Josef (Matiu 1:18–25)

  • Elisabet (Luk 1:5–7, 24–25, 40–45, 57–60)

  • Sekaraea (Luk 1:5–23, 59–64)

  ?Wanem nao yumi save lanem aot long ol stori ia we i save helpem yumi tedei?

• Blong helpem ol memba blong klas blong ting hevi moa abaot Meri mo rol blong hem insaed long plan blong plan blong Papa, yu save soem tufala vidio ia “An Angel Foretells Christ’s Birth to Mary” mo “Mary and Elisabeth Rejoice Together” (ChurchofJesusChrist.org). O yufala i save rid tugeta long Luk 1:26–38, 46–56, mo lukaotem ol samting we Meri i bin talem we i soemaot sam samting abaot hem se hem i wanem kaen woman. ?Wanem nara samting we yumi lanem long Meri?

Luk 1:5–25

Ol blesing blong God oli kam long Taem blong Hem.

• Maet bae i gat ol pipol insaed long klas blong yu, we, olsem Elisabet mo Sekaraea, oli bin laef long wan laef we i stret mo gud, be oli no bin kasem wan blesing we oli stap hop from. Tingting blong invaetem klas blong rid long Luk 1:5–25, lukaotem ol lesen we oli save lanem aot long Elisabet mo Sekaraea abaot wet long Lod. ?Wanem sam nara eksampol blong stap wet long taem blong Lod, we ol memba blong klas oli save serem aot long sam eksampol blong laef blong olgeta o hemia long ol skripja? ?Wanem nao yumi lanem long ol eksampol ia? Ol memba blong klas oli save toktok raon long stetmen we i stap long “Sam Moa Risos.”

Luk 1:26–38

“I no gat wan samting we i strong tumas we God i no save mekem.”

• Ol memba blong klas samtaem oli stap tingting plante—olsem Meri i bin mekem—Olsem wanem nao bae ol plan o ol promes blong God long olgeta bae i oli hapen. Blong helpem ol memba blong klas i andastanem se tru long paoa blong God evri samting i save hapen, yu save soem pikja ia Anaonsmen: Enjel Gabriel I Kamaot long Meri (Gospel Art Buk, namba 28) mo invaetem olgeta blong rid tugeta long Luk 1:26–38. ?Wanem nao yumi save lanem abaot winim ol samting we yumi luk se yumi no save mekem tru long wanem we yumi stadi long hem abaot toktok mo aksen blong Meri? Askem ol memba blong klas blong serem ol eksperiens we God i helpem olgeta blong mekem wan samting we oli ting se oli no save mekem.

risos pikja bokis

Sam Moa Risos

Stap wet long Lod.

I tru se plante long yumi i askem kwestin from wanem yumi mas wet long ol blesing blong God, Elda Jeffrey R. Holland i talem:

Ansa long ol kwestin ia, hem i “Yes, God i save mekem merikel naoia nomo, be naoia o afta, bae yumi lanem se ol taem blong wokbaot blong yumi long wol ia, bae Hem, mo Hemwan nomo bae i lidim.’ … Fet i minim blong stap trastem God long ol gud taem mo ol nogud taem, iven sapos i tekem sam safaring kasem taem yumi luk han blong Hem i kamaot blong gud blong yumi. …

“… Olgeta we oli ‘stap luk long Hae God bambae Hem i stap givim paoa long olgeta [mo] bambae oli girap olsem we oli gat wing olsem bigfala pijin ya igel; bae oli resis, oli no save taet; … bae oli wokbaot i go longwe, mo no save slak’ [Aesea 40:31; oli ademap italik]. Mi prea se, “i no longtaem”—naoia o afta—bae ol blesing ia oli kam long evriwan long yufala we i askem help from harem nogud blong yufala mo askem blong kam fri long krae sore blong yufala. Mi talemaot witnes blong mi abaot lav blong God mo Kambak blong gospel blong Hem we i gud tumas, we hem i long wan mo nara wei, i ansa long evri samting we yumi stap fesem long laef” (“Stap Wet long Lod,” Liahona, Nov. 2020, 116–17).

Stap Kam Antap long Fasin blong Yumi blong Stap Tij

Leftemap tingting blong ol memba blong klas blong oli stadi long ol skripja long hom. Wan wei we yu save leftemap tingting blong oli gat skripja stadi long hom, hem i blong givim taem long ol memba blong klas blong serem ol samting we oli faenem mo ol niu tingting we oli bin faenemaot long skripja stadi blong olgetawan mo famli stadi (luk long Teaching in the Savior’s Way, 29).