Letem yumi wosipim Hem, i kam long Dana Mario Wood

9–15 Jenuware

Matiu 2; Luk 2

Mifala I Kam blong Wosipim Hem

Bifo yu ridim ol aedia long aotlaen ia, stadi long Matiu 2 mo Luk 2, mo raetemdaon ol filing mo tingting blong yu long saed blong spirit. Hemia bae i save helpem yu blong kasem revelesen blong olsem wanem yu save ansa long ol nid blong memba long klas blong yu.

Invaetem Ol Memba blong Serem Wanem Oli Gat

?Olsem wanem bae yu save leftemap tingting blong ol memba blong klas blong serem wanem ol niu tingting mo ol eksperiens we oli kasem tru long ol skripja we oli stadi long hem olgetawan, mo wetem ol famli blong olgeta? Nomata oli save gud ol storian blong taem we Sevya i bon long hem long Matiu 2 mo Luk 2, oltaem oli save kasem ol niufala tingting long saed blong spirit. Tingting blong invaetem sam long ol memba blong klas blong serem wan mesej we oli faenem i tajem olgeta long wan niufala wei.

Stap Tijim Doktrin

Matiu 2:1–12; Luk 2:1–38

I gat plante we oli witnesem taem we Kraes i bon i kam long wol.

• Ol stori blong ol man blong wosip insaed long Matiu 2:1–12 mo Luk 2:1–38 i save helpem ol memba blong klas oli tingting hevi long ol wei we oli stap soem lav blong olgeta long Sevya. Luklukbak long lis ia blong olgeta we oli witnesem taem we Kraes i bon long hem, long aotlaen blong wik ia insaed long Kam Folem Mi—Blong Wanwan Man, Woman mo Famli. Sam pipol long klas blong yu oli save gat ol niufala tingting blong serem aot long aktiviti ia, o yufala i save mekem aktiviti ia tugeta olsem wan klas. ?From wanem i impoten blong gat ol witnes ia blong Kraes we oli kamaot long ol defdefren wokbaot blong laef? ?Olsem wanem nao yumi save folem ol eksampol blong olgeta?

  

  Ol man blong lukaot long sipsip oli kam olsem sam long ol fas man we oli witnesem taem we Kraes i bon.

• Bifo Ol witnes ia oli wosipim Kraes we i olsem smol pikinini, oli bin stap lukaotem Hem. Blong helpem ol memba blong klas blong lanem samting aot long eksampol blong olgeta, yu save raetem long bod ol taetol we i stap ia: Man blong lukaot long sipsip, Anna, Simeon, mo Ol Waes Man. Afta, ol memba blong klas oli save lukaotem long Matiu 2 mo Luk 2 mo raetem long bod wanem ol pipol oli bin mekem blong stap lukaotem Sevya. ?Wanem nao ol stori ia oli stap tijim yumi abaot sam long ol wei we Lod i stap ansarem ol prea blong yumi?

Matiu 2:13–23

Ol papa mo mama oli save kasem revelesen blong protektem famli blong olgeta.

• Blong statem wan storian abaot olsem wanem Papa long Heven i bin lidim Joseph mo Mary long rol blong tufala, olsem papa mo mama blong Sevya, tingting blong invaetem ol memba blong klas blong mekem lis long bod blong sam long ol denja we yumi fesem tedei. ?Wanem yumi lanem long Matiu 2:13–23 abaot olsem wanem blong faenem proteksen aot long ol denja ia? ?Olsem wanem nao revelesen blong yumiwan i helpem yumi protektem ol famli blong yumi mo olgeta we yumi lavem olgeta? ?Wanem kaonsel nao ol profet mo aposol oli givim blong helpem yumi faenem ples we yumi save sef long hem, long saed blong spirit?

Luk 2:40–52

Iven taem Jisas i stap olsem wan yut, i lukluk nomo blong mekem wanem we Papa blong Hem i wantem.

• Storian blong Jisas we i stap tij long tempol taem Hem i gat 12 yia nomo, i save stap olsem wan stori we i gat paoa speseli nomo long ol yut we oli stap lukaotem blong save tekpat long wok blong God. Yu save invaetem klas blong ridim tugeta Luk 2:40–52 (luk long long translesen we i stap long Josef Smit Translesen blong Luk 2:46, long https://www.churchofjesuschrist.org/study/scriptures/jst/jst–luke/2?lang=bis ). Wanwan grup blong tutu man long hem, oli save gat sam minit blong serem wetem wanwan long olgeta wanem nao i givim insperesen long olgeta long storian ia. ?Wanem ol janis we yumi gat blong serem wanem yumi save abaot gospel? ?Wanem eksperiens nao yumi save serem?

• ?Wanem nao Luk 2:40–52 i tijim yumi abaot Jisas, se Hem i stap olsem wan yut? Fasin blong wan i stap gro we oli talem long Luk 2:52 i save givim insperesen long ol toktok raon blong yumi long wanem yumi stap mekem blong kam olsem Kraes. Maet yu save givim tingting se ol memba blong klas oli tingting hevi long olsem wanem oli stap kam antap long saed blong waes, bodi, long saed blong spirit, mo sosol laef. Oli save putum ol gol long wan long ol eria ia. Sapos yu laekem blong gohed long toktok raon ia abaot, kam olsem Kraes folem ol eria ia, speseli taem yu tijim ol yut, tingting blong yusum stetmen we i stap long “Sam Moa Risos.”

Sam Moa Risos

Helpem ol yut oli gro “long waes mo bodi, mo long saed blong bodi mo sosol laef.”

Presiden Steven J. Lund i eksplenem program blong ol pikinini mo ol yut, we i folem pat blong Luk 2:52, long wei ia:

“Ol Pikinini mo Ol Yut oli wan tul blong helpem evri Praemeri pikinini mo yut blong kam bigwan olsem ol disaepol mo kasem wan fet we i fulap wetem visen long wei blong wan hapi laef. Oli save luk fored from ol saen folem kavenan rod ia, we bae oli baptaes mo kasem konfemesen blong presen ia we i Tabu Spirit mo afta kam pat blong ol kworom mo Ol Yang Woman klas, we bae oli filim glad blong helpem ol narawan tru ol seves we oli mekem we i olsem blong Kraes. Bae oli setemap ol gol, bigwan mo smol, we bae i givim balens long laef blong olgeta mo helpem olgeta i kam moa olsem Sevya” (“Stap Faenem Glad long Kraes,” Liahona, Nov. 2020, 36–37).

Stap Kam Antap long Fasin blong Yumi blong Stap Tij

Yusum olgeta we oli no bin stadi long ol skripja insaed long hom. Nomata sam long ol memba blong klas bae oli no rid long Matiu 2 mo Luk 2 bifo long klas, yet oli save serem ol toktok we i gat mining long hem. Mekem sua se evri memba blong klas oli gat janis blong tekpat mo kontribiut long ol storian long klas.