O Le Faaaogaina o le Sau, Mulimuli Mai ia te Au—Mo le Aoga Sa

Sauniuni e Aoao Atu i le Aoga Sa

E tatau ona avea suesuega faaletagata lava ia ma faaleaiga i le fale ma totonugalemu o le aoaoina o le talalelei. E moni lenei mea mo oe ma i latou e te aoaoina. A o e sauni e aoao atu, amata i le i ai o au oe lava aafiaga i tusitusiga paia. O lau tapenaga aupito taua lava o le a tupu a o e ola i le talalelei, suesue i tusitusiga paia, ma sailia le musumusuga a le Agaga Paia.

O leSau, Mulimuli Mai ia te Au—Mo Tagata Taitoatasi ma Aiga o se vaega tāua o au suesuega patino ma au tapenaga e aoao atu. O le a fesoasoani ia te oe e maua ai se malamalama loloto atu o mataupu faaleaoaoga faavae o loo maua i tusitusiga paia. O le a mafai ai foi ona faaagavaaina oe e musuia ma valaaulia tagata o le vasega e faaaoga le Sau, Mulimuli Mai ia te Au—Mo Tagata Taitoatasi ma Aiga e faalautele ai a latou suesuega o tusitusiga paia faaletagata lava ia ma faaleaiga (mo se fesoasoani i le faia o lea mea, tagai “Manatu mo le Uunaia o Suesuega Faaletagata Lava Ia ma Faaleaiga” i le punaoa lenei). A o e faia, manatua ia nofouta i tagata o le vasega atonu o tulaga o o latou aiga e le lagolagoina ai suesuega masani faaleaiga o tusitusiga paia ma afiafi faaleaiga.

I le taimi o au tapenapenaga, o le a oo mai mafaufauga ma uunaiga ia te oe e uiga i tagata e te aoao atu i ai. O le a e maua ni malamalamaaga e uiga i auala o le a faamanuiaina ai o latou olaga i mataupu faavae o loo i totonu o tusitusiga paia. O le a taialaina oe e musuia i latou ia maua na mataupu faavae a o latou aoao mai i tusitusiga paia mo i latou lava.

Manatu mo le Aoao Atu

A o e saunia e aoao atu, e te ono maua ni lagona musuia faaopoopo e ala i le suesueina o otootoga e aoao atu ai i lenei punaoa. Aua e te mafaufau i nei manatu faapea o ni faatonuga tuufaasolo mai i lea sitepu i lea sitepu, ae o ni fautuaga e uunaia ai au oe lava uunaiga. E te iloaina tagata o lau vasega, ma o le a e iloaina atili i latou ao outou aoao faatasi i le vasega. E silafia foi latou e le Alii, ma o le a Ia musuia oe i auala sili e fesoasoani ai i tagata o le vasega e atiina ae ai i luga lo latou aoaoina o le talalelei i le fale.

E tele isi punaoa o loo maua mo oe e faaaoga a o e tapenapena, e aofia ai manatu o i le Sau, Mulimuli Mai ia te Au—Mo Tagata Taitoatasi ma Aiga ma Mekasini a le Ekalesia. Mo nisi faamatalaga e uiga i nei punaoa ma isi, tagai i le vaega ua faaautuina “Punaoa Faaopoopo” i lenei punaoa.

O Ni Mea e Manatua

• O le aoaoina o le talalelei e sili ona aoga pe a totonugalemu i le aiga. I le avea ai ma faiaoga, ua ia te oe se tiutetauave tāua e lagolago, faamalosiau, ma atiae i luga o aoaoga faaletalalelei a tagata o le vasega i le aiga.

• O le a loloto atu le liua o tagata o le vasega ia Iesu Keriso ma Lana talalelei pe a latou malamalama ma faaaoga aoaoga faavae moni. Fautuaina i latou e faamaumau ma faatino uunaiga latou te maua mai i le Agaga Paia.

• O le aoao atu e sili atu nai lo le lauga atu, ae e sili atu foi i le na o le taita’ia o se talanoaga. O se vaega o lau matafaioi o le faamalosiau lea o le auai lea e malamalama ai ma e faavae i luga o tusitusiga paia. E tatau foi ona e faasoa atu manatu musuia e te maua a o e suesueina tusitusiga paia.

• Manatua e tele tagata o le vasega o loo maua aafiaga mamana a o latou suesue i mau lava ia i le aiga o le a outou talanoaina i le vasega. E mafai ona e lagolagoina a latou suesuega o tusitusiga paia e ala i le tuuina atu soo ia i latou o avanoa e faasoa ai mea o latou aoaoina i le fale.

• E finagalo le Tama Faalelagi ia faamanuiaina oe o se faiaoga. Ua Ia saunia le tele o punaoa e fesoasoani ia te oe, e aofia ai ma fonotaga faaleaufono a faiaoga. I nei fonotaga e mafai ai e oe ona fefautuaa’i ma isi faiaoga e uiga i soo se luitau o feagai ma oe. E mafai foi ona e talanoaina ma faataitai mataupu faavae o le aoao atu e faapei o Keriso.

• E sili ona aoaoina tagata pe a latou maua avanoa e aoao atu ai. I nisi taimi, mafaufau e faataga tagata o le vasega, e aofia ai ma le autalavou e aoao atu se vaega o le lesona. Ia faavae lenei faaiuga i luga o manaoga ma tomai o tagata o le vasega. Afai e te valaaulia se tagata o le vasega e faiaoga, faaalu se taimi e fesoasoani ai ia te ia e vave saunia ai e ala i le faaaogaina o manatu o loo maua i lenei punaoa faapea le Sau, Mulimuli Mai ia te Au—Mo Tagata Taitoatasi ma Aiga. Manatua i le avea ai ma faiaoga ua valaauina, ua ia te oe le tiutetauave atoa mo mea e aoao atu i totonu o le vasega.

O lenei punaoa ua aofia ai otootoga e aoao atu mo vaiaso taitasi o le tausaga. O Aso Sa e le faia ai le Aoga Sa, ona o konafesi aoao, konafesi a le siteki po o isi mafuaaga, e faamalosia tagata o le vasega e faaauau ona faitauina le Feagaiga Fou i le fale e tusa ai ma le faasologa ua otooto atu i le Sau, Mulimuli Mai ia te Au—Mo Tagata Taitoatasi ma Aiga. A fai le Aoga Sa, e mafai ona e filifili e faamisi pe tuufaatasi ia otootoga.