talavou o loo suesue i tusitusiga paia

O Se Mamanu mo le Aoao Atu

O otootoga taitasi i lenei punaoa o loo mulimuli i se mamanu o le valaaulia o le fefaasoaai ma le aoaoina atu o le aoaoga faavae. I le tele o tulaga, a o e aoao atu, o elemene o lenei mamanu e ono fesopoa’i pe tulai mai foi i se faasologa e ese. Mo se faataitaiga, mafaufau o le fefaasoaai o se avanoa lea e aoao atu ai le aoaoga faavae, ma o le aoaoina atu o le aoaoga faavae e tatau ona aofia ai le valaaulia e faasoa. Faataga le toe faatulagaina i lenei mamanu o se mea masani, i le mulimuli i uunaiga a le Agaga e taulima ai manaoga o tagata o loo e aoao atu i ai.

Valaaulia le Fefaasoaai

E avea o se vaega o vasega taitasi, valaaulia tagata o le vasega e faasoa mai malamalamaaga ma aafiaga sa latou maua i le vaiaso ua mavae a o latou suesueina tusitusiga paia ta’itoatasi ma faaleaiga ma faaaoga mea sa latou aoaoina. Fesoasoani i tagata o le vasega ia iloa e tāua a latou lava suesuega patino i fafo atu o le vasega. O lo latou lava liua patino i le Tama Faalelagi ma Iesu Keriso o le a le gata ina oo mai i le aoaoina mai le Aso Sa, ae faapea foi i o latou aafiaga i aso taitasi. A oo ina faalogo tagata o le vasega i aafiga a isi ma molimau ia Iesu Keriso ma Lana talalelei, o le a tele lava ina latou sailia ni aafiaga faapea e i latou lava.

E le o tagata uma o le a faitauina mataupu mo lesona taitasi, e oo foi i nisi sa faitauina e ono le maua le lagona lelei e faasoa mai ai. Ia mautinoa e lagona e tagata uma o le vasega o i latou o se vaega tāua o le vasega, pe i ai pe leai se mea e faasoa mai.

Aoao Atu le Aoaoga Faavae

E tatau ia te oe ma tagata o lau vasega ona taula’i atu ia Iesu Keriso ma Lana aoaoga faavae—o upumoni faavavau o le talalelei—o loo maua i fuaitau o mau e atofaina. E mafai ona fesoasoani leSau, Mulimuli Mai ia te Au—Mo Tagata Taitoatasi ma Aiga ia te oe ia e malamalama atili i le aoaoga faavae o le a e aoao atu. A o e talanoaina aoaoga faavae mai mau, o a fuaiupu, upusii, aafiaga, fesili, ma punaoa faaopoopo atonu e te faasoa atu? E ono mafai faapefea ona e faaaogaina nei punaoa e fesoasoani ai i le vasega ia iloa ma malamalama i mataupu faavae o le talalelei? E mafai faapefea ona e fesoasoani ia i latou ia fausia lo latou faatuatua i le Tama Faalelagi ma Iesu Keriso?