aiga o loo matamata i se tusi ata

26 Tesema–1 Ianuari

Ua ia te i Tatou le Tiutetauave mo Lo Tatou Lava Aoaoina

A o e faitau ma manatunatu loloto i mau o i lenei otootoga, tusi faamaumau lagona uunai faaleagaga e te maua. O le a valaaulia ai le Agaga i lau tapenapenaga. O leSau, Mulimuli Mai ia te Au—Mo Tagata Taitoatasi ma Aiga ma manatu nei e mafai ona fesoasoani ia te oe e musuia ai tagata i lau vasega e suesue i le Feagaiga Fou i le tausaga lenei.

aikona o le fefaasoaai

Valaaulia le Fefaasoaai

O se tasi o ou faamoemoega o se faiaoga o le faamalosiau i tagata o le vasega e aoao mai tusitusiga paia e i latou lava ma o latou aiga. O le faalogologo i aafiaga o isi e mafai ona musuia ai i latou e sailia ni o latou lava aafiaga. O lea, i le amataga o vasega taitasi, fai i tagata o le vasega e faasoa mai ni mau mai a latou suesuega sa faagaeetia ai pe na uunaia ai i latou.

aikona o le aoao atu

Aoao Atu le Aoaoga Faavae

O le aoaoina e manaomia ai le faatino i le faatuatua.

• E mafai faapefea ona e musuia tagata o le vasega e toaaga i a latou matafaioi o le aoao, nai lo le tuu atu o le tiutetauave atoa i le faiaoga? O se faataitaiga lea. Togi atu se mea faitino vaivai i se tagata o le vasega, lea na e talosagaina muamua e aua nei faia se taumafaiga e sapo. Faaaoga le gaoioiga lea e amata ai le talanoaga e uiga i matafaioi a le au a’oa’o ma faiaoga i le aoaoina o le talalelei. I le avea ai ma tagata aoao, e faapefea ona tatou “sapoina” mea o loo aoaoina i a tatou vasega? O fuaitau i le “Punaoa Faaopoopo” e mafai ona fesoasoani i lenei talanoaga.

• Ua i ai i tagata uma o le vasega le tiutetauave o le valaaulia o le Agaga i le vasega. Ina ia fesoasoani ia malamalama tagata o le vasega i lenei mea, fai i ai e faitau le Alema 1:26 ma le Mataupu Faavae ma Feagaiga 50:13–22; 88:122–23 ma faasoa i mea e mafai e faiaoga ma tagata o le vasega ona fai e valaaulia ai le Agaga. E ono fesoasoani le tusia o a latou tali i luga o le laupapa i lalo o ulutala e pei o nei: O mea e mafai ona fai e le faiaoga ma le O mea e mafai ona fai e tagata a’oa’o. E mafai e tagata o le vasega ona fai se pepa lautele e tusi ai a latou tali e mafai ona faaali i luga mo nai vaiaso e sosoo ai.

E manaomia ona tatou iloa le upumoni mo i tatou lava.

• E tele mau i le Feagaiga Fou e aoao atu ai mataupu faavae e mafai ona taiala ai la tatou sailiga mo le upumoni. O faataitaiga e aofia ai le Luka 11:9–13; Ioane 5:39; 7:14–17; ma le 1 Korinito 2:9–11. E mafai ona e valaaulia tagata o lau vasega na faitauina nei mau ia latou suesuega faaletagata lava ia, e faasoa mai mea sa latou aoaoina. Pe e mafai foi ona outou faitauina nei mau o se vasega ma valaaulia tagata o le vasega e faasoa atu pe na faapefea ona maua a latou molimau.

  alii ma tamaitai talavou i totonu o le potuaoga

  O le saili i le aoaoina e ala i le faatuatua o le a fesoasoani tatou te maua ai a tatou lava molimau.

• O leGaluega 17:10–12 o loo faamatala mai ai le Au Paia o e sa suesue i tusitusiga paia ma maua ai a latou lava molimau i le upumoni. Ina ia fautuaina le vasega e mulimuli i a latou faataitaiga, faitau faatasi fuaiupu nei ma valaaulia i latou e faasoa mai ni mau sa faamalolosia ai a latou molimau i le talalelei.

E mafai faapefea ona tatou faia a tatou suesuega o tusitusiga paia ia anoa atili?

• O le atiina ae o se mausa o le suesueina o tusitusiga paia e ono luitauina ai tagata o le vasega o e manatu e leai so latou taimi talafeagai, malamalama, po o tomai. O le a se mea e mafai ona e faia e fesoasoani ai ia i latou ia faamanuiaina? Ina ia fesoasoani i tagata o le vasega ia maua le mautinoa e suesue ai tusitusiga paia, e mafai ona e faasoa atu i ai faamatalaga mai “Manatu e Faaleleia ai Lau Suesuega Faaletagata Lava Ia o Tusitusiga Paia” i le Sau, Mulimuli Mai ia te au—Mo Tagata Taitoatasi ma Aiga. Atonu e mafai e oe po o isi tagata o le vasega ona faasoa mai ni aafiaga i le faaaogaina o nisi o nei manatu po o isi aafiaga anoa i le suesueina o tusitusiga paia. E mafai foi ona e filifilia se mataupu i le Feagaiga Fou ma taumafai e suesue o se vasega e faaaoga ai nisi o nei manatu.

aikona o punaoa

Punaoa Faaopoopo

Mauaina o le malamalama faaleagaga mo i tatou lava.

Na aoao mai le Perofeta o Iosefa Samita: “O mea a le Atua e loloto le taua; ma o le taimi, ma le poto masani, ma le faaeteete ma mafaufau loloto ma mafaufauga paia e na o le pau ia o mea e mafai ona maua ai. Lou manatu, Le tagata e! afai e te taitai se agaga i le olataga, e ao ina e faalauteleina le maualuga e pei o le lagi silisili ona maualuga, ma saili i ai ma manatunatu i le lua pouliuli sili ona pogisa, ma le lautele naua o le faavavau—e ao ina e fesootai ma le Atua. E maeu le mamalu ma le tamalii o mafaufauga o le Atua, nai lo mafaufauga le aoga o le loto o le tagata!” (Aoaoga a Peresitene o le Ekalesia: Iosefa Samita [2007],267).

Na faamatala mai e Elder David A. Bednar: “Afai na o le pau le mea e te iloa ma ou iloa e uiga ia Iesu Keriso ma Lana talalelei toefuataiina o mea e aoao mai e isi tagata pe ta’u mai ia i tatou, o lona uiga o le faavae o la tatou molimau ia te Ia ma Lana galuega mamalu i aso e gata ai o loo fausia i luga o le oneone. E le mafai ona tatou faalagolago atoa atu pe nonō mai le malamalama ma le iloa o le talalelei mai i isi tagata—e oo lava ia i latou tatou te alolofa ma faatuatuaina” (“Saunia e Maua Mea Manaomia Uma,” Liahona, Me 2019, 102).

Faaleleia o Lo Tatou Aoao Atu

Ia taulai atu i le aoaoga faavae Ia mautinoa e faavae talanoaga a le vasega i tusitusiga paia ma aoaoga a perofeta. E mafai ona e faia lea mea i le faia o fesili faapea: “O a upumoni o le talalelei ua tatou aoao mai faamatalaga sa tatou faalogo i ai?” po o le “Pe mafai e se tasi ona faasoa mai se mau e fesootai ma mea ua tatou talanoaina?” (Tagai Aoao Atu i le Ala a le Faaola, 20–21.)