alii e toatolu o loo malaga atu i kamela

Ina Tatou Ifo Atu ia Te Ia, saunia e Dana Mario Wood

9–15 Ianuari

Mataio 2; Luka 2

Ua Matou O Mai e Ifo Atu ia te Ia

A e e te lei faitauina manatu i lenei otootoga, suesue le Mataio 2 ma le Luka 2, ma tusifaamaumau ou lagona uunai. O le a fesoasoani lea e te maua ai faaaliga i le auala e sili ona e taulimaina ai manaoga o lau vasega.

aikona o le fefaasoaai

Valaaulia le Fefaasoaai

E mafai faapefea ona e faamalosiau atu i tagata o le vasega e faasoa mai malamalamaaga ma aafiaga latou te maua a o latou suesueina taitoatasi nei mau ma faapea foi ma o latou aiga? E ui atonu latou te masani i le tala o le soifua mai o le Faaola, Mataio 2 ma le Luka 2, e mafai lava ona latou maua i taimi uma ni malamalamaaga fou faaleagaga. Fuafua e valaaulia ni nai tagata o le vasega e faasoa mai se savali na latou mauaina na uunaia ai i latou i se ala fou.

aikona o le aoao atu

Aoao Atu le Aoaoga Faavae

Mataio 2:1–12; Luka 2:1–38

E toatele molimau o le soifua mai o Keriso.

• O tala o i latou na ifo atu i le Mataio 2:1–12 ma le Luka 2:1–38 e mafai ona fesoasoani i tagata o lau vasega e manatunatu loloto ai i auala na latou faaali atu ai lo latou alolofa mo le Faaola. Toe faamanatu le siata e uiga i molimau o le soifua mai o Keriso i le otootoga o lenei vaiaso i le Sau, Mulimuli Mai ia te Au—Mo Tagata Taitoatasi ma Aiga. Atonu e i ai ni tagata o lau vasega e i ai ni malamalamaaga e faasoa mai mo lenei gaoioiga, pe mafai foi ona e faia le gaoioiga o se vasega. Aisea e taua ai le faapea o nei molimau ia Keriso e mai i tagata eseese? E mafai faapefea ona tatou mulimuli i a latou faataitaiga?

  leoleo mamoe ma mamoe

  Na avea leoleo mamoe ma uluai molimau o le soifua mai o le Faaola.

• A o lei ifo atu nei molimau i le tamaitiiti o Keriso, sa latou sailia o Ia. Ina ia fesoasoani i tagata o le vasega e aoao mai la latou faataitaiga, e mafai ona e tusia i luga o le laupapa ulutala nei: Leloleo Mamoe, Ana, Simeona, ma le Au Makoi. Ona mafai lea e tagata o le vasega ona suesue le Mataio 2 ma le Luka 2 ma tusi i luga o le laupapa pe o a mea na fai e nei tagata e saili ai i le Faaola. O a ni mea o fautuaina mai e nei tala e uiga i ni auala e mafai ona tatou sailia ai Keriso?

Mataio 2:13–23

E mafai ona maua e matua faaaliga e puipuia ai o latou aiga.

• Ina ia amata se talanoaga e uiga i le ala na taialaina ai e le Tama Faalelagi ia Iosefa ma Maria i la laua matafaioi o ni matua o le Faaola, mafaufau e valaaulia tagata o le vasega e lisi i luga o le laupapa nisi o tulaga lamatia o loo feagai ma i tatou i aso nei. O a ni mea tatou te aoao mai le Mataio 2:13–23 i le auala e maua ai le puipuiga mai nei mea matautia? Na fesoasoani faapefea faaaliga faaletagata lava ia e puipuia o tatou aiga po o isi e pele mai mea matautia? O a fautuaga na tuuina mai e perofeta ma aposetolo e fesoasoani ia i tatou e maua ai le saogalemu faaleagaga?

Luka 2:40–52

E oo foi i lona talavou, sa taulai atu Iesu i le faia o le finagalo o Lona Tama.

• O le tala ia Iesu o loo aoao atu i le malumalu ina ua na o le 12 Ona tausaga, e mafai foi ona faapitoa lona mamana i talavou o loo tau mafaufau i so latou sao e mafai ona latou faia i le galuega a le Atua. E mafai ona e vavaea le vasega i ni paga e faitau faatasi le Luka 2:40–52 (tagai i le malamalamaaga mai le Faaliliuga a Iosefa Samita o loo maua i le Luka 2:46, vaefaamatalagai). Faaaoga e paga taitasi ni nai minute e fefaasoaai ai le tasi ma le isi i mea e musuia ai i latou e uiga i lenei tala. O a avanoa tatou te maua e faasoa atu ai mea ua tatou iloa e uiga i le talalelei? O a aafiaga e mafai ona tatou faasoaina atu?

• O le a se mea o aoao mai i le Luka 2:40–52 ia i tatou pe na faape’ī Iesu a o talavou? O le mamanu mo le tuputupu ae o le tagata lava ia o loo fautuaina mai i le Luka 2:52 e mafai ona musuia ai se talanoaga i mea o loo tatou faia ia avea atili ai faapei o Keriso. Atonu e te fautuaina atu ia manatunatu loloto tagata o le vasega pe faapefea ona latou faateleina i le poto (faalemafaufau), tino mai (faaletino) alofagia e le Atua (faaleagaga), ma le alofagia e isi (faaleagafesootai). E mafai foi ona latou faatutuina ni sini i se tasi pe sili atu foi o nei eria. Afai e te manao e faaauau pea se talanoaga e uiga i le avea e faapei o Keriso i nei eria, aemaise pe a e aoaoina le autalavou, mafaufau e faaaoga le faamatalaga o loo i le “Punaoa Faaopoopo.”

aikona o punaoa

Punaoa Faaopoopo

Fesoasoani i tamaiti ma le autalavou ia tuputupu ae “i le poto ma le tino, ma ua alofagia e le Atua atoa ma tagata.”

Sa faamatala e Peresitene Steven J. Lund le polokalama a Tamaiti ma le Autalavou, lea e faavae se vaega i le Luka 2:52, i le ala lenei:

“O [le polokalama a] Tamaiti ma le Autalavou, o se meafaigaluega e fesoasoani i tamaiti uma o le Peraimeri ma le autalavou ia tuputupu ae i le avea ai ma se so’o, ma ia maua se vaaiga mamao e tumu i le faatuatua i le ituaiga foliga o le alofa. E mafai ona latou faamoemoe ma naunau mo ona nofoaga ma pou faailoilo o le ala o feagaiga, ia o le a papatiso ai ma faamauina ai i latou ma le meaalofa o le Agaga Paia ma vave ona avea ai ma nisi o korama ma vasega a Tamaitai Talavou, lea o le a latou lagona ai le olioli o le fesoasoani atu i isi e ala i se soloa’iga o galuega auauna atu faaKeriso. O le a latou faatutuina ni sini, tetele ma laiti, o le a aumaia ai le paleni i o latou olaga pe a avea atili i latou e faapei o le Faaola” (“Mauaina o le Olioli ia Keriso,” Liahona, Nov. 2020, 36–37).

Faaleleia o Lo Tatou Aoao Atu

Faaaofia ai le au a’oa’o o e le’i suesueina mau i le fale. E ui atonu e lei mafai ona faitau e nisi o le vasega le Mataio 2 ma le Luka 2 a o lei amataina le vasega, e mafai lava ona latou faasoa maia ni malamalamaaga anoa. Ia mautinoa e maua e tagata uma o le vasega ni avanoa e auai ma saofaga ai i le talanoaga.