Maria ma Elisapeta

2–8 Ianuari

Mataio 1; Luka 1

“Ia Faia ia te Au e tusa ma Lau Fetalaiga”

Ae e te lei faitauina isi anomea faaopoopo, faitau ma manatunatu loloto i le Mataio 1 ma le Luka 1, ma tusifaamaumau ou lagona uunai faaleagaga. Tuu atu i le Agaga e taitaia au tapenapenaga. Ona vailiili lea o manatu o i le otootoga lea ma i le Sau, Mulimuli Mai ia te Au—Mo Tagata Taitoatasi ma Aiga..

aikona o le fefaasoaai

Valaaulia le Fefaasoaai

O se faamoemoega autu o tusitala o le Mataio, Luka, ma isi Evagelia o le molimau atu o Iesu Keriso o le Alo o le Atua. Tuu atu i tagata o le vasega ni nai minute e toe faamanatu ai le Mataio 1 po o le Luka 1 ma faasoa mai se fuaiupu e fausia ai lo latou faatuatua ia Iesu Keriso. Fautua atu i le vasega a o latou suesue i le Feagaiga Fou i lenei tausaga, atonu latou te fia faia se lisi o fuaitau o loo molimau mai o Iesu Keriso o le Alo o le Atua. E mafai foi ona outou faia lenei lisi o se vasega.

aikona o le aoao atu

Aoao Atu le Aoaoga Faavae

Mataio 1:18–25; Luka 1:5–80

E galue le Tama Faalelagi e ala mai i Ana fanau faamaoni e faataunuu ai Ona faamoemoega.

• E foliga e maua aafiaga anoa o tagata o le vasega a o suesueina le Feagaiga Fou i le tausaga nei pe afai e mafai ona latou maua mai ai ni lesona mai aafiaga o tagata latou te faitau i ai. Ina ia fesoasoani ia i latou e faia lenei mea, e mafai ona e tusia igoa o tagata i le Mataio 1 ma le Luka 1 i luga o le laupapa, faatasi ai ma mau e uiga i nei tagata, faapea:

  • Maria (Luka 1:26–56)

  • Iosefa (Mataio 1:18–25)

  • Elisapeta (Luka 1:5–7, 24–25, 40–45, 57–60)

  • Sakaria (Luka 1:5–23, 59–64)

  O le a se mea e mafai ona tatou aoao mai i nei tala o le a fesoasoani ia i tatou i aso nei?

• Ina ia fesoasoani i tagata o le vasega e mafaufau loloto atili e uiga ia Maria ma lana matafaioi i le fuafuaga a le Tama, e mafai ona e faaali atu vitio “An Angel Foretells Christ’s Birth to Mary” ma le “Mary and Elisabeth Rejoice Together” (ChurchofJesusChrist.org). Pe e mafai foi ona outou faitau faatasi le Luka 1:26–38, 46–56, ma vaavaai mo mea na fai mai ai Maria e faaalia ai se mea e uiga i lona tagata. O le a se isi mea ua tatou aoaoina mai ia Maria?

Luka 1:5–25

O faamanuiaga a le Atua e oo mai i Lana lava taimi.

• Atonu e i ai ni tagata i lau vasega e pei o, Elisapeta ma Sakaria, o loo ola amiotonu ae lei mauaina lava se faamanuiaga o loo faamoemoe i ai. Mafaufau e valaaulia le vasega e suesue le Luka 1:5–25, ma vaavaai mo lesona e mafai ona latou aoao mai ia Elisapeta ma Sakaria e uiga i le faatalitali atu i le Alii. O a isi faataitaiga o le faatalitali i le taimi a le Alii e mafai e le vasega ona faasoa mai i o latou lava olaga pe mai tala i tusitusiga paia? O le a se mea ua tatou aoao mai i nei faataitaiga? E mafai foi e tagata o le vasega ona talanoaina le faamatalaga i le “Punaoa Faaopoopo.”

Luka 1:26–38

“E leai se mea e le mafaia e le Atua.”

• E ono i ai taimi e manatunatu ai tagata o le vasega—e faapei foi ona faia e Maria—pe mafai faapefea ona faataunuu fuafuaga po o folafolaga a le Atua mo i latou. Ina ia fesoasoani i tagata o le vasega ia malamalama e mafai mea uma i le mana o le Atua, e mafai ona e faaali le ata O le Faaaliga: O le Agelu o Kaperielu ua Faaali atu ia Maria (Tusi Ata o le Talalelei, nu. 28) ma valaaulia i latou e faitau faatasi le Luka 1:26–38. O le a se mea e mafai ona tatou aoaoina e uiga i le faatoilaloina o mea e matua foliga mai e le mafai, e ala i le suesueina o upu ma faatinoga a Maria? Fai i le vasega e faasoa mai o latou aafiaga sa fesoasoani ai le Atua ia i latou e faataunuu se mea sa latou manatu e le mafai.

aikona o punaoa

Punaoa Faaopoopo

Faatalitali i le Alii

O le faailoaina atu o le toatele o i tatou e fesiligia pe aisea e tatau ai ona tatou faatalitali mo faamanuiaga a le Atua, na saunoa ai Elder Jeffrey R. Holland:

O le tali i fesili faapena o le “Ioe, e mafai e le Atua ona faia vavega i le taimi lava lena, ae i se taimi vave pe mulimuli ane tatou te aoaoina ai o taimi ma vaitau o la tatou malaga faaletino e na o Ia lava e faatonutonuina.’ … O le faatuatua o le faalagolago lea i le Atua i taimi lelei ma taimi leaga, e tusa lava pe aofia i lena mea sina puapuaga se’ia oo ina tatou vaaia Lona aao o faaalia mo i tatou. …

“… A o e ‘faatalitali ia Ieova e toe faafouina lo latou malosi, [ma] latou te sii ae apaau pei o aeto; latou te femoei, ae le vaivai; … latou te savavali, ae le tigaina” [Isaia 40:31; faaopoopo le faamamafa]. Ou te tatalo ia ‘ata mai le aso’—pe vave oo mai pe tuai—o na faamanuiaga o le a oo mai i tagata uma o outou o e saili atu i toomaga mai i o outou faanoanoaga ma le saolotoga mai lo outou loto faavauvau. Ou te molimau atu i le alofa o le Atua ma le Toefuataiga o Lana talalelei mamalu, lea po o le a lava le itu, o le tali lea i faafitauli uma ua tatou fetaiai i le olaga” (“Faatalitali i le Alii,” Liahona, Nov. 2020, 116–17).

Faaleleia o Lo Tatou Aoao Atu

Fautuaina tagata o le vasega e suesue ia tusitusiga paia i le fale. O se tasi auala e mafai ona e faamalosiauina ai le suesue o tusitusiga paia i le fale o le tuu atu o se taimi mo tagata o le vasega e faasoa mai ai mea latou te maua ma malamalamaaga mai a latou lava suesuega i le fale (tagai Aoao Atu i le Ala a le Faaola, 29).