Ioane le Papatiso o loo Papatisoina Iesu

O le faamalama tioata lanu o le Malumalu o Navu Ilinoi, saunia e Tom Holdman

23–29 Ianuari

Mataio 3; Mareko 1; Luka 3

“Ina Teuteu ia Outou le Ala o le Alii”

A o e faitau ma manatunatu loloto i le Mataio 3; Mareko 1; ma le Luka 3, tusifaamaumau ou lagona uunai na maua. O le a valaaulia ai le Agaga a o e tapenapena e aoao atu. E faaopoopo atu i manatu faafaiaoga i lenei otootoga, o manatu mo suesuega i le Sau, Mulimuli Mai ia te Au—Mo Tagata Taitoatasi ma Aiga e mafai ona fetuunai e faaaoga i lau vasega.

aikona o le fefaasoaai

Valaaulia le Fefaasoaai

Ina ia fesoasoani i tagata o le vasega e faasoa mai pe faapefea ona avea ma faamanuiaga i o latou olaga le aoao mai le Feagaiga Fou, e mafai ona e tusia fesilli nei i luga o le laupapa: O le a se mea na e faia ona o mea na e faitauina i le Feagaiga Fou i lenei vaiaso? Valaaulia tagata o le vasega e faasoa mai a latou tali.

aikona o le aoao atu

Aoao Atu le Aoaoga Faavae

Mataio 3:1–12; Luka 3:2–18

E saunia e soo i latou lava ma isi ina ia talia Iesu Keriso.

• E faapefea ona tatou saunia mo le asiasiga a se malo taua? E mafai ona fesoasoani se fesili faapea ia te oe e folasia atu ai se talanoaga e uiga i le pe na faapefea ona saunia e Ioane le Papatiso tagata ia talia Iesu Keriso. Ona mafai lea ona e vaevaeina le vasega i ni vaega se tolu. E mafai e vaega taitasi ona faitau a le o le Mataio 3:1–6; Mataio 3:7–12; po o le Luka 3:10–15, ma vaavaai pe na faapefea ona saunia e Ioane le Papatiso ia tagata e talia Iesu Keriso i o latou olaga. Ia feauaua’i vaega taitasi e faasoa mai mea na latou maua.

Ioane le Papatiso o loo talai atu

Ioane le Papatiso o loo Talai i le Vao, saunia e Robert T. Barrett

Luka 3:2–14

E tatau ona tatou fua mai ni “fua e tatau ma le salamo.”

• I le Luka 3:8, na aoao e Ioane le Papatiso ia tagata e faapea, a o lei mafai ona latou papatiso, sa tatau ona latou faaalia ni “fua,” po o se faamaoniga, o lo latou salamo. E mafai faapefea ona e fesoasoani i tagata o le vasega e faailoa le faamaoniga o lo latou lava salamo? E mafai ona e fai atu ia i latou e saili i le Luka 3:8–14 ma vaavaai mo mea na manatu Ioane o “fua” o le salamo. E mafai foi ona latou toefaamanatu le Moronae 6: 1–3 ma le Mataupu Faavae ma Feagaiga 20:37. E mafai ona e tusia se laau ma ona fua i luga o le laupapa ma tuu atu i le vasega e faaigoa fua o i luga o le laau i “fua” o le salamo latou te mauaina. E mafai foi ona lelei lenei taimi e talanoa ai pe o le a le uiga o le salamo faamaoni.

Mataio 3:13–17

Tatou te mulimuli ia Iesu Keriso e ala i le papatisoina ma le mauaina o le Agaga Paia.

• Ina ia toefaamanatu le tala o le papatisoga o Iesu Keriso, faataitai le manatu lea: Fai i le vasega pe mafai faapefea ona latou faaaogaina le Mataio 3:13--17 e aoao ai se tasi, e pei o se tamaitiiti po o se tasi o se isi faatuatuaga, e uiga i le papatisoga. (E mafai foi ona latou faaaogaina le ata i le otootoga o le vaiaso lenei i le Sau, Mulimuli Mai ia te Au—Mo Tagata Taitoatasi ma Aiga.) O a elemene taua o le papatisoga o le a latou faamamafaina? E mafai ona latou faataitaia o latou manatu e ala i le aoao atu e le tasi le isi.

• Ina ia fesoasoani i tagata o le vasega e toe manatunatu i le taua o le ola ai i a latou feagaiga o le papatisoga, e mafai ona e valaaulia se tasi e faitau le saunoaga a Elder Bednar i le “Punaoa Faaopoopo.” E ono fiafia tagata o le vasega e faasoa o latou lagona i o latou lava papatisoga ma a latou feagaiga o le papatisoga. E mafai foi ona latou usuina se viiga e uiga i le mulimuli i le Faaola, e pei o le “Mulimuli Mai ia te A‘u” (Viiga, nu. 62).

• Na aoao atu e Ioane le Papatiso e faapea o le Faaola o le a papatiso atu “i le Agaga Paia, ma le afi” (Mataio 3:11). O le papatisoga i le afi e tupu pe a faamauina i tatou ma maua le meaalofa o le Agaga Paia. E tatau i se a ona tatou maua le meaalofa o le Agaga Paia e agai atu ai i le malo o le Atua? O le a le aafiaga o le papatisoga i le afi ma le Agaga Paia ia i tatou? (tagai Alema 5:14). O le vitio “Baptism of the Holy Ghost” (ChurchofJesusChrist.org) e mafai ona fesoasoani i lenei talanoaga.

aikona o punaoa

Punaoa Faaopoopo

O a tatou feagaiga o le papatisoga.

Na aoao mai Elder David A. Bednar: “O le feagaiga o le papatisoga ua aofia ai tautinoga faavae e tolu: (1) ia loto ina ave i o tatou luga le suafa o Iesu Keriso, (2) ia manatua pea o Ia, ma le (3) ia tausi i Ana poloaiga. O le faamanuiaga folafolaina mo le faamamaluina o lenei feagaiga o le ‘ina ia [tatou] maua pea lona Agaga e faatasi ma i [tatou]’ [Mataupu Faavae ma Feagaiga 20:77]. O le mea lea, o le papatisoga o le sauniuniga taua lea e maua ai le avanoa faatagaina mo le mafutaga faifai pea a le sui lona tolu o le Aiga Atua” (“Faatumauina Pea le Faamagaloina o a Outou Agasala,” Liahona, Me 2016, 60).

Mo se faataitaiga o se taulealea talavou o loo tausia ana feagaiga o le papatisoga, tagai i le tala i le amataga o le savali a Sister Carole M. Stephens “Ua Ia i Tatou se Mafuaaga Sili e Olioli Ai” (Liahona, Nov. 2013, 115–17).

Faaleleia o Lo Tatou Aoao Atu

Aoao atu le aoaoga faavae. Na aoao mai Ailama Samita, “Ia talai atu ia uluai mataupu faavae o le Talalelei—ia talai atu pea lava pea; o le a outou iloaina ai mai lea aso i lea aso o le a faaalia mai ia te outou ni manatu fou ma le malamalama faaopoopo e faatatau i ai. E mafai ona outou faalauteleina ina ia matuai malamalama lelei i ai. Ona mafai lea ona e faia ia sili ona malamalama manino i ai i latou e te aoaoina” (i le History, 1838–1856 [Manuscript History of the Church], volume E-1, 1994, josephsmithpapers.org).