o se fafine o loo faasoa atu le talalelei i le nofoaga o nofoaafi

16–22 Ianuari

Ioane 1

Ua Ma Maua le Mesia

A o e faitau ma mafaufau loloto i le Ioane 1, tatalo mo le taitaiga faaleagaga i lou tiutetauave e aoao atu e uiga i le molimau a Ioane. Tusifaamaumau lagona uunai e te maua. O leSau, Mulimuli Mai ia te Au—Mo Tagata Taitoatasi ma Aiga ma manatu i le otootoga lenei e mafai ona fesoasoani ia te oe e musuia ai tagata i lau vasega ia malamalama ma faaaoga le aoaoga faavae o i lenei mataupu.

aikona o le fefaasoaai

Valaaulia le Fefaasoaai

Ina ia fesoasoani i tagata o le vasega e faasoa mai mea ua latou aoaoina, e mafai ona e fesili ia i latou e tusi ni fesili, faamatalaga, po o ni malamalamaaga mai la latou faitauga i luga o ni fasipepa ona tuu lea i se koneteina. Se’i mai fasipepa mai le koneteina e talanoaina i le vasega.

aikona o le aoao atu

Aoao Atu le Aoaoga Faavae

Ioane 1: 1–5

O Iesu Keriso sa “i le Atua i le amataga.”

• O a mea na aoao atu e Ioane e uiga i le Keriso o le muai olaga? Aisea e taua ai le iloa o matafaioi a Keriso i le muai olaga? E ono fesoasoani le tusi o fesili nei i le laupapa ma fai i tagata o le vasega e vaavaai mo tali i le Ioane 1:1–5 (tagai foi Faaliliuga a Iosefa Samita, Ioane 1:1–5 [i le faaopoopoga i le Tusi Paial]; Mose 1:32–33; Topical Guide, “Jesus Christ, Antemortal Existence of”). E mafai foi e tagata o le vasega ona faasoa mai mea na latou aoaoina e uiga i matafaioi a Keriso i le muai olaga mai le “O Le Keriso Soifua: O Molimau a Aposetolo” (ChurchofJesusChrist.org).

• Afai e te manao e faaaoga fuaiupu nei e talanoa ai e uiga i foafoaga a le Alii, e mafai ona e faitauina le Ioane 1:3 ma faaali atu ata o loo faaalia ai le matagofie o le lalolagi. E mafai ona e faaali atu le vitio “Our Home” (ChurchofJesusChrist.org). Valaaulia tagata o le vasega e faasoa mai pe o faapefea ona fesoasoani foafoaga a le Faaola latou te lagona ai Lona alofa.

Ioane 1:1–14

O Iesu Keriso o le Malamalama.

• Mafaufau e fai i tagata o le vasega e sue faataitaiga uma o le upu malamalama i le Ioane 1:1–14. Aisea ua avea ai le malamalama ma se upu lelei e faamatala ai Iesu Keriso? E mafai e tagata o le vasega ona faasoa mai i auala o loo tuuina mai ai e le Faaola ma Lana talalelei le malamalama faaleagaga i o latou olaga. I le avea o se vaega o lenei talanoaga, e mafai ona e valaaulia tagata o le vasega e faitau atili e uiga i le Malamalama o Keriso i le Mataupu Faavae ma Feagaiga 84:45–46; 88:11–13, pe mafai foi ona e faasino i latou i le “Malamalama o Keriso” i le Lolomifefiloi o le Tusi Paia. E mafai faapefea ona tatou faasoa atu le malamalama o le Faaola i isi?

  la susulu i luga o se papa i le matafaga

  E aumaia e le Faaola ma Lana talalelei le malamalama faaleagaga.

• Ina ia fesoasoani i tagata o le vasega e vaai faalemafaufau i mea o loo aoao mai e le Faaola i le Ioane 1, e mafai ona e faaali atu ni nai ata (e aofia ai le ata mai le otootoga o lenei vaiaso i le Sau, Mulimuli Mai ia te Au—Mo Tagata Taitoatasi ma Aiga) o loo faaalia ai vaega o le soifuaga ma le misiona paia a Iesu Keriso. E mafai e tagata o le vasega ona sailiili i le Ioane 1:1–14, ma vaavaai mo upu po o fasifuaitau e mafai ona avea ma ulutala mo ata.

Ioane 1:35–51

E mafai ona tatou maua a tatou lava molimau i le Faaola ona valaaulia lea o isi e “o mai ia ina matamata.”

• I le Ioane 1, o le valaaulia e “o mai ia ina matamata” e faalua ona faaali mai (tagai fuaiupu 39, 46). Atonu tatou te le maua se avanoa e vaaitino ai i le Faaola e pei ona sa faia e Aneterea ma Natanielu, peitai e mafai ona tatou tali atu i lea lava valaaulia. Faamata o le a le uiga o le “o mai ia ina matamata” i o tatou aso?

• E mafai e tagata o le vasega ona faitau le Ioane 1:35–51 ma faasoa mai mea ua latou aoaoina mai nei fuaiupu e uiga i le valaaulia o isi e aoao e uiga ia Keriso (tagai foi “Punaoa Faaopoopo” po o le vitio “Inviting Others to ‘Come and See’” i le ChurchofJesusChrist.org). E mafai foi ona latou faasoa mai pe na faapefea ona latou maua ni auala faigofie ma masani e valaaulia ai isi e “o mai ia ina matamata.”

aikona o punaoa

Punaoa Faaopoopo

E mafai ona tatou valaaulia isi e “o mai ia ina matamata.”

Na aoao mai Elder Neil L. Andersen:

“Na aoao mai e le Faaola i tatou i le auala e faasoa atu ai le talalelei. Ou te fiafia i le tala ia Aneterea, o le na fesili, ‘Rapi e, o fea ea e te mau ai?’ [Ioane 1:38]. Na mafai lava e Iesu ona tali atu i le mea sa Ia nofo ai. Ae nai lo lena sa Ia fai atu ia Aneterea, “O mai ina matamata’ [Ioane 1:39]. Ou te fia mafaufau faapea sa fetalai atu le Faaola, ‘O mai ia ina matamata e le gata i le mea ou te mau ai ae o le ala o loo ou ola ai. O mai ia ina matamata po o ai a’u. O mai ia ma lagonaina le Agaga.’ Tatou te le iloaina mea uma e uiga i lena aso, ae ua tatou iloa ina ua maua e Anetelea lona uso o Simona, na ia tautino i ai, “Ua ma maua … le Keriso.”[Ioane 1:41].

“Ia i latou e faaalia se fiafia i a tatou talanoaga, e mafai ona tatou mulimuli i le faataitaiga a le Faaola e ala i le valaaulia o i latou e ‘o mai ia ina matamata.’ O le a taliaina e nisi la tatou valaaulia, ae le taliaina e isi. Ua tatou iloa uma lava se tasi ua tele taimi na valaaulia ai a o lei taliaina se valaaulia e ‘o mai ia ina matamata’” (“O Se Vavega,” Liahona, Me 2013, 79).

Faaleleia o Lo Tatou Aoao Atu

Fesoasoani i tagata aoao e faatatau tusitusiga paia ia i latou lava. O le valaaulia lava e tasi na tuu atu e Keriso i Ona soo—e o mai ia ina matamata—e mafai foi ona fesoasoani ia i latou o loo e aoaoina ia mananao e mulimuli i le Faaola. Fautuaina tagata aoao e faaaoga mataupu faavae o loo maua i mau i o latou lava olaga ma valaaulia isi e faia foi le mea lava lea e tasi. (Tagai 1 Nifae 19:23; Aoao Atu i le Ala a le Faaola, 21.)