« ថ្ងៃទី ១២–១៨ ខែ ធ្នូ ។ ម៉ាឡាគី ៖ ‹ ព្រះយេហូវ៉ាទ្រង់មានព្រះបន្ទូលថា យើងបានស្រឡាញ់ឯងរាល់គ្នា › » ចូរមកតាមខ្ញុំ—សម្រាប់ សាលាថ្ងៃអាទិត្យ ៖ ព្រះគម្ពីរសញ្ញាចាស់ ឆ្នាំ ២០២២ ( ឆ្នាំ ២០២១ )
« ថ្ងៃទី ១២–១៨ ខែ ធ្នូ ។ ម៉ាឡាគី » ចូរមកតាមខ្ញុំ—សម្រាប់ សាលាថ្ងៃអាទិត្យ ៖ ឆ្នាំ ២០២២
ថ្ងៃទី ១២–១៨ ខែ ធ្នូ
ម៉ាឡាគី
« ព្រះយេហូវ៉ាទ្រង់មានព្រះបន្ទូលថា យើងបានស្រឡាញ់ឯងរាល់គ្នា »
សារលិខិតមួយចំនួននៅក្នុងគម្ពីរម៉ាឡាគីអាចសំខាន់ជាពិសេស ដើម្បីឲ្យសមាជិកក្នុងថ្នាក់របស់បងប្អូនរៀន ។ នៅពេលបងប្អូនសិក្សា សូមអធិស្ឋានដើម្បីអាចដឹងពីសារលិខិតទាំងនោះ ។ ការធ្វើដូច្នេះក៏នឹងជួយបងប្អូនឲ្យមានអារម្មណ៍នៃសេចក្ដីស្រឡាញ់ ដែលព្រះអម្ចាស់មានចំពោះអស់អ្នកដែលបងប្អូនបង្រៀនផងដែរ ។
កត់ត្រាចំណាប់អារម្មណ៍របស់បងប្អូន
អញ្ជើញឲ្យចែកចាយ
បងប្អូនអាចចាប់ផ្ដើមការពិភាក្សាអំពីគម្ពីរម៉ាឡាគី ដោយការសរសេរពាក្យ សារលិខិត នៅលើក្ដារខៀន ។ សូមលើកទឹកចិត្តសមាជិកក្នុងថ្នាក់ឲ្យចែកចាយសារលិខិតសំខាន់ៗ ដែលពួកគេបានរកឃើញនៅក្នុងជំពូកនីមួយៗនៃគម្ពីរម៉ាឡាគី ។ ដើម្បីជួយសមាជិកក្នុងថ្នាក់ឲ្យចងចាំ និងពិចារណាពីអ្វីដែលបានចែកចាយ បងប្អូនអាចសរសេរសារលិខិតទាំងនោះនៅលើក្តារខៀន ។
បង្រៀនគោលលទ្ធិ
ព្រះអម្ចាស់បង្គាប់ឲ្យមាន « ដង្វាយបរិសុទ្ធ » ។
-
ដើម្បីលើកទឹកចិត្តសមាជិកក្នុងថ្នាក់ឲ្យចែកចាយអ្វី ដែលពួកគេបានរៀនអំពីដង្វាយនៅក្នុង ម៉ាទ្បាគី ១:៦–១៤ បងប្អូនអាចអញ្ជើញពួកគេឲ្យរំឭកខគម្ពីរទាំងនេះឡើងវិញដោយស្ងាត់ស្ងៀម ហើយពិភាក្សាជាមួយសមាជិកក្នុងថ្នាក់ម្នាក់ទៀតពីអ្វីមួយ ដែលពួកសង្ឃអ៊ីស្រាអែលមិនបានយល់អំពីដង្វាយ ។ ហេតុអ្វីព្រះអម្ចាស់បង្គាប់ឲ្យយើងធ្វើអស់ពីលទ្ធភាព ? សមាជិកក្នុងថ្នាក់អាចធ្វើបញ្ជីមួយអំពីដង្វាយ ឬពលិកម្មនានាដែលយើងធ្វើថ្វាយព្រះអម្ចាស់នាពេលសព្វថ្ងៃ ។ សម្រាប់ចំណុចនីមួយៗនៅលើបញ្ជីនេះ ពួកគេអាចពិភាក្សាពីអ្វីដែលអាចធ្វើឲ្យដង្វាយ « មិនបរិសុទ្ធ » ឬអ្វីដែលធ្វើឲ្យមានដង្វាយ « បរិសុទ្ធ » ( ម៉ាឡាគី ១:៧, ១១ ) ។
ការព្យាកររបស់ម៉ាឡាគីកំពុងត្រូវបានបំពេញនៅក្នុងថ្ងៃចុងក្រោយ ។
-
បងប្អូនអាចចាប់ផ្ដើមការពិភាក្សាអំពី ម៉ាឡាគី ៣–៤ ដោយការចង្អុលបង្ហាញថា មរ៉ូណៃបានចែកចាយខគម្ពីរមកពីជំពូកទាំងនេះ នៅពេលលោកបានបង្ហាញកាយមកកាន់ យ៉ូសែប ស៊្មីធ ( សូមមើល យ៉ូសែប ស៊្មីធ—ប្រវត្តិ ១:៣៦–៣៩ ) ។ តើសេចក្ដីពិតអ្វីខ្លះនៅក្នុងជំពូកទាំងនេះ ដែលសមាជិកក្នុងថ្នាក់មានអារម្មណ៍ថាអាចសំខាន់ជាពិសេសដើម្បីឲ្យយ៉ូសែប—និងពួកយើង—ដឹង ? សមាជិកក្នុងថ្នាក់អាចធ្វើការជាក្រុមតូចៗ ហើយរាយនាមសេចក្ដីពិតឲ្យបានច្រើនតាមដែលពួកគេអាចធ្វើទៅបាន ។ សូមលើកទឹកចិត្តក្រុមទាំងឡាយឲ្យចែកចាយបញ្ជីរបស់ពួកគេ ហើយពិភាក្សាពីមូលហេតុដែលសេចក្ដីពិតទាំងនេះមានសារៈសំខាន់នៅក្នុងថ្ងៃចុងក្រោយ ។
ព្រះអម្ចាស់នឹងបើកទ្វារស្ថានសួគ៌ នៅពេលយើងបង់ដង្វាយមួយភាគក្នុងដប់របស់យើង ។
-
ដើម្បីលើកទឹកចិត្តសមាជិកក្នុងថ្នាក់ឲ្យចែកចាយទីបន្ទាល់របស់ពួកគេអំពីក្រឹត្យវិន័យដង្វាយមួយភាគក្នុងដប់ បងប្អូនអាចអញ្ជើញពួកគេឲ្យរកមើលគោលការណ៍នៅក្នុង ម៉ាទ្បាគី ៣:៨–១២ និងចែកចាយរបៀបដែលពួកគេបានដឹងថា គោលការណ៍ទាំងនេះគឺពិត ។ ពួកគេអាចនិយាយអំពីរបៀបដែលព្រះអម្ចាស់បានប្រទានពរជ័យដល់ពួកគេ—ទាំងខាងវិញ្ញាណ និងខាងសាច់ឈាម—ដោយសារការបង់ដង្វាយមួយភាគក្នុងដប់ ។ ឬពួកគេអាចពិភាក្សាមេរៀនអំពីដង្វាយមួយភាគក្នុងដប់ ដែលអែលឌើរ ដេវីឌ អេ បែដណា បានចែកចាយនៅក្នុងសារលិខិតរបស់លោក « The Windows of Heaven » ( Liahona ខែ វិច្ឆិកា ឆ្នាំ ២០១៣ ទំព័រ ១៧–២០ ) ហើយចែកចាយអ្វីដែលពួកគេបានរៀន នៅពេលពួកគេបានខិតខំរស់នៅតាមក្រឹត្យវិន័យនេះ ។
-
សូមឲ្យសមាជិកក្នុងថ្នាក់អាន ម៉ាទ្បាគី ៣:៨–១២ ដោយស្ងាត់ស្ងៀម ខណៈសញ្ជឹងគិតពីរបៀបដែលពួកគេអាចបង្រៀននរណាម្នាក់ ពីមូលហេតុដែលព្រះអម្ចាស់បង្គាប់ឲ្យយើងបង់ដង្វាយមួយភាគក្នុងដប់ ។ ពួកគេក៏អាចអានសេចក្ដីថ្លែងការណ៍ដោយប្រធាន ហ្គរដុន ប៊ី ហ៊ីងគ្លី នៅក្នុង « ធនធានបន្ថែមទាំងឡាយ » បានដែរ ។ តើយើងចង់ឲ្យមនុស្សដទៃយល់អ្វីខ្លះអំពីដង្វាយមួយភាគក្នុងដប់ ? ឧទាហរណ៍ តើការបង់ដង្វាយមួយភាគក្នុងដប់មានន័យដូចម្ដេច ? ហេតុអ្វីព្រះអម្ចាស់សព្វព្រះទ័យឲ្យយើងបង់ដង្វាយនេះ ? តើ « ទ្វារស្ថានសួគ៌ » ( ខទី ១០ ) បានបើកតាមរបៀបណា នៅពេលយើងបង់ដង្វាយមួយភាគក្នុងដប់ ? តើមនុស្សម្នាក់អាចមានកង្វល់អ្វីខ្លះ អំពីការបង់ដង្វាយមួយភាគក្នុងដប់ ហើយតើយើងនឹងឆ្លើយតបយ៉ាងដូចម្ដេច ? សូមឲ្យសមាជិកក្នុងថ្នាក់ចែកចាយពីរបៀបដែលការកាន់តាមបទបញ្ញត្តិនេះ បានពង្រឹងសេចក្ដីជំនឿរបស់ពួកគេលើព្រះវរបិតាសួគ៌ និងព្រះយេស៊ូវគ្រីស្ទ ។
រចនារូបភាពអំពីអេលីយ៉ាបង្ហាញកាយទៅដល់ យ៉ូសែប ស៊្មីធ និង អូលីវើរ ខៅឌើរី នៅក្នុងព្រះវិហារបរិសុទ្ធខឺតឡង់ ដោយ រ៉ូប៊ើត ធី បារែត
« យើងនឹងចាត់អេលីយ៉ា ឲ្យមកឯឯងរាល់គ្នា » ។
-
សមាជិកក្នុងថ្នាក់អាចទទួលបានការយល់ដឹងដ៏មានប្រយោជន៍អំពី ម៉ាទ្បាគី ៤:៥–៦ តាមរយៈការប្រៀបធៀបខគម្ពីរទាំងនេះ ទៅនឹងរបៀបដែលមរ៉ូណៃបានដកស្រង់ខគម្ពីរនេះប្រាប់ទៅ យ៉ូសែប ស៊្មីធ នៅក្នុង យ៉ូសែប ស៊្មីធ—ប្រវត្តិ ១:៣៨–៣៩ ។ ( វាអាចជាជំនួយដើម្បីឲ្យនរណាម្នាក់សរសេរឃ្លានីមួយៗនៅក្បែរគ្នាដាក់លើក្ដារខៀន ) ។ តើពាក្យពេចន៍របស់មរ៉ូណៃត្រង់ណាខ្លះ ដែលជួយបន្ថែមដល់ការយល់ដឹងរបស់យើងអំពីខគម្ពីរនៅក្នុងម៉ាឡាគី ? បងប្អូនក៏អាចពិភាក្សាសំណួរដូចតទៅនេះផងដែរ ៖ តើនរណាជា « ពួកឪពុក » ? ( សូមមើល ចោទិយកថា ២៩:១៣ ) ។ តើចិត្តរបស់យើងបង្វែរមកឯពួកឪពុករបស់យើងដោយរបៀបណា ហើយតើចិត្តរបស់ពួកលោកបង្វែរមកយើងតាមរបៀបណា ? ដើម្បីជួយសមាជិកក្នុងថ្នាក់របស់បងប្អូនឲ្យយល់ពីរបៀបដែលការព្យាកររបស់ម៉ាឡាគីត្រូវបានបំពេញ នោះពួកគេអាចអានពីពេលដែលអេលីយ៉ាបានប្រគល់កូនសោនៃការផ្សារភ្ជាប់ទៅកាន់ យ៉ូសែប ស៊្មីធ ( សូមមើល គោលលទ្ធិ និង សេចក្ដីសញ្ញា ១១០:១៣–១៦ ) ។ ហេតុអ្វីសមាជិកក្នុងថ្នាក់មានអំណរ ដែលកូនសោទាំងនេះត្រូវបានស្ដារឡើងវិញ ?
-
ម៉ាទ្បាគី ៤:៥–៦ ផ្ដល់ឱកាសដ៏ធំមួយឲ្យនិយាយអំពីកិច្ចការព្រះវិហារបរិសុទ្ធ និងពង្សប្រវត្តិ ។ ប្រហែលជាសមាជិកក្នុងថ្នាក់អាចចែកចាយបទពិសោធន៍ដែលពួកគេបានមាន ខណៈធ្វើកិច្ចការនេះ និងរបៀបដែលបទពិសោធន៍ទាំងនោះបានជួយពួកគេ ឲ្យបង្វែរចិត្តរបស់ពួកគេទៅឯឪពុករបស់ពួកគេ ។ តើយើងអាចធ្វើអ្វីខ្លះ ដើម្បីជួយជំនាន់ក្រោយៗឲ្យបង្វែរចិត្តរបស់ពួកគេមកឯពួកយើង ?
ធនធានបន្ថែមទាំងឡាយ
ដង្វាយមួយភាគក្នុងដប់គឺជាបញ្ហានៃសេចក្ដីជំនឿ ។
ប្រធាន ហ្គរដុន ប៊ី ហ៊ីងគ្លី បានពោលថា « យើង អាច បង់ដង្វាយមួយភាគក្នុងដប់របស់យើងបាន ។ វាពុំមែនជាបញ្ហាប្រាក់កាសនោះទេ ដោយសារវាគឺជាបញ្ហានៃសេចក្ដីជំនឿវិញទេតើ ។ ខ្ញុំមិនដែលបានជួបនឹងអ្នកបង់ដង្វាយមួយភាគក្នុងដប់ដ៏ស្មោះត្រង់ម្នាក់ ដែលមិនអាចថ្លែងទីបន្ទាល់ថា តាមរបៀបដ៏ត្រង់ៗ និងអស្ចារ្យបំផុតមួយ នោះទ្វារស្ថានសួគ៌បានបើកឡើង ហើយពរជ័យបានចាក់ស្រោចមកលើរូបគេនោះទេ » ( « Let Us Move This Work Forward » Ensign ខែ វិច្ឆិកា ឆ្នាំ ១៩៨៥ ទំព័រ ៨៥ ) ។
ការកែលម្អការបង្រៀនរបស់យើង
ចែករំលែកការពុះពាររបស់បងប្អូន និងសេចក្ដីជំនឿរបស់បងប្អូន ។ ពេលខ្លះ មនុស្សដែលជួបនឹងការសាកល្បងមានអារម្មណ៍ថាឯកោ ។ វាអាចជារឿងសមរម្យដើម្បីចែកចាយបទពិសោធន៍ផ្ទាល់ខ្លួនម្ដងម្កាល អំពីគ្រាមួយដែលបងប្អូនបានពុះពារ និងរបៀបដែលព្រះអង្គសង្គ្រោះបានជួយបងប្អូន ។