E ’orometua ha’api’i ’outou i roto i te ’Ēkālesia a Iesu Mesia

’Ua pi’ihia ’outou e te Atua nō te ha’api’i i tāna mau tamari’i mai tā te Fa’aora. ’Ua fa’ata’ahia ’outou nō teie pi’ira’a nā roto i te ha’amanara’a o tōna autahu’ara’a mo’a. Noa atu ē e ’ere ’outou i te hō’ē ’orometua ha’api’i ’aravihi, ’a ora parauti’a ai ’outou, ’a pure ai i te mau mahana ato’a, ’e ’a tuatāpapa i te mau pāpa’ira’a mo’a, e hōro’a mai te Metua i te ao ra ia ’outou te fa’aurura’a ’e te mana o te Vārua Maita’i nō te tauturu ia ’outou ’ia manuia (hi’o 2 Nephi 33:1).

Te feiā tei tu’uhia i roto i tā ’outou ’atu’atura’a, e mau tamari’i ïa nā te Metua i te ao ra ’e ’ua ’ite ’oia e aha tō rātou mau hina’aro ’e e nāhea e tae’a atu ia rātou. Nā roto i te Vārua Maita’i, e arata’i te Atua ia ’outou ’a fa’aineine ai ’outou ’e i te taime e ha’api’i ai ’outou. E heheu mai ’oia ia ’outou i te mea tā ’outou e parau ’e te mea tā ’outou e ti’a e rave (hi’o 2 Nephi 32:5).

Te tumu faufa’a rahi o te ha’api’ira’a ’e te ha’api’ira’a mai i te ’evanelia ’o te fa’ahōhonura’a ïa i te fa’afāriura’a i te Metua i te ao ra ’e ia Iesu Mesia. Tā ’outou fā ’ei ’orometua ha’api’i ’o te tauturura’a ïa i te feiā tā ’outou e ha’api’i ra ’ia rave i te mau mea ato’a tā rātou e nehenehe ’ia fa’afāriu-rahi-hia atu ā—e tauto’ora’a ’o te ’ore e tupu i roto ana’e i te taime ha’api’ira’a. E ani i te feiā tā ’outou e ha’api’i ra ’ia ’āmui itoito mai i roto i te ha’api’ira’a mai nō ni’a ia Iesu Mesia ’e tāna ’evanelia ’e ’ia rave mai te au i te mea tā rātou i ha’api’i mai. E fa’aitoito ia rātou ’ia rave i tā rātou iho ’e tā te ’utuāfare tuatāpapara’a i rāpae’au i te piha ha’api’ira’a ’ei fā mātāmua nō tā rātou ’apora’a mai i te ’evanelia. Ma te ravera’a rātou nā roto i te fa’aro’o i te tuatāpapara’a ’ei ta’ata iho ’e ’ei ’utuāfare, e tītau manihini rātou i te Vārua i roto i tō rātou orara’a, ’e nā te Vārua e fa’atupu i te fa’afāriura’a mau. Te mau mea ato’a tā ’outou e rave ’ei ’orometua ha’api’i, nō taua fā mo’a ra ïa.

’A ha’api’i noa i te ha’api’ira’a tumu o te ’evanelia a Iesu Mesia tei fa’aho’i-fa’ahou-hia mai, mai tei ’itehia i roto i te mau pāpa’ira’a mo’a ’e i roto i te mau parau a te mau peropheta o te mau mahana hope’a nei. E tītau manihini te ha’api’ira’a tumu ateate—te parau mau mure ’ore ’e te tāuiui ’ore tei ha’api’ihia e te Atua ’e tāna mau tāvini—i te Vārua ’e e mana tō te reira ’ia fa’ataui i te mau orara’a.

Te pi’ira’a ’ia ha’api’i, ’o te ti’aturira’a mo’a ïa, ’e i te tahi mau taime e tae mai iho ā te mana’o ē, e’ita e mara’a ia ’outou. ’A ha’amana’o rā ē nā tō ’outou Metua i te ao ra i pi’i ia ’outou, ’e e ’ore roa ’oia e fa’aru’e ia ’outou. E ’ohipa teie nā te Fatu, ’e ’a tāvini ai ’outou « ma tō ’ā’au ato’a, ma tō pūai, tō mana’o ’e ma tō itoito ho’i » (Te Parau Ha’api’ira’a ’e te mau Parau Fafau 4:2) e fa’arahi ’oia i tō ’outou mau ’aravihi, mau hōro’a ’e mau tārēni ’e e ha’amaita’i tā ’outou tāvinira’a i te orara’a o te feiā tā ’outou e ha’api’i ra.