ta’ata e paraparau ra i roto i te piha ha’api’ira’a a te ’ēkālesia

Fa’a’ohipa i te Mai, pe’e mai—nō te Ha’api’ira’a Sābati

Fa’aineine nō te ha’api’i i roto i te Ha’api’ira’a Sābati

’Ia riro te tuatāpapara’a a te ta’ata hō’ē ’e a te ’utuāfare, i te fare, ’ei pū nō te ’apora’a mai i te ’evanelia. E parau mau te reira nō ’outou ’e nō te mau ta’ata tā ’outou e ha’api’i ra. ’A fa’aineine ai ’outou nō te ha’api’i, ’a ha’amata nā roto i te fāri’ira’a i tō ’outou iho mau ’itera’a i roto i te mau pāpa’ira’a mo’a. E tupu tā ’outou fa’aineinera’a faufa’a roa a’e ’a feruri hōhonu ai ’outou i te mau pāpa’ira’a mo’a ’e ’a tītau ai i te fa’aurura’a a te Vārua Maita’i.

’Ua riro te Mai, pe’e mai—nō te ta’ata hō’ē ’e te ’utuāfare ’ei tuha’a faufa’a rahi nō tā ’outou iho tuatāpapara’a ’e tā ’outou fa’aineinera’a nō te ha’api’i. E tauturu te reira ia ’outou ’ia noa’a te hō’ē hāro’aro’ara’a hōhonu a’e nō te ha’api’ira’a tumu o te mau parau tumu e ’itehia i roto i te mau pāpa’ira’a mo’a. E fa’ati’a ato’a te reira ia ’outou ’ia fa’auru ’e ’ia ani i te mau pīahi ’ia fa’a’ohipa i te Mai, pe’e mai—nō te ta’ata hō’ē ’e te ’utuāfare nō te fa’ananea atu ā i tā rātou iho tuatāpapara’a pāpa’ira’a mo’a ’e tā te ’utuāfare ho’i (nō te tauturu i te ravera’a i te reira, hi’o « Mau mana’o nō te fa’aitoitora’a i te tuatāpapara’a a ta’ata hō’ē ’e a te ’utuāfare » i roto i teie mātēria). ’A nā reira ai ’outou, ’a ha’amana’o e vai ara noa i te mau pīahi ’aita te orara’a ’utuāfare e tauturu nei i te tuatāpapara’a pāpa’ira’a mo’a tāmau ’e te purera’a pō ’utuāfare tāmau.

I roto i tā ’outou fa’aineinera’a, e tae mai te mau mana’o ’e te mau fa’a’itera’a ia ’outou nō ni’a i te mau ta’ata tā ’outou e ha’api’i ra, nāhea te mau parau tumu i roto i te mau pāpa’ira’a mo’a e ha’amaita’i ai i tō rātou orara’a, ’e e nāhea ’outou e nehenehe ai e fa’auru ia rātou ’ia ’ite mai i teie mau parau tumu ’a tuatāpapa ai rātou iho i te mau pāpa’ira’a mo’a.

Mau mana’o nō te ha’api’ira’a

’A fa’aineine ai ’outou nō te ha’api’i, e nehenehe e noa’a mai te tahi atu ā fa’aurura’a nā roto i te hi’ora’a i te mau arata’i ha’api’ira’a i roto i teie mātēria. ’Eiaha e rave i teie mau mana’o ’ei arata’ira’a mai te tahi ta’ahira’a ’e te tahi ta’ahira’a, ’ei mau mana’o tauturu rā nō te fa’a’ara’ara i tō ’outou iho fa’aurura’a. ’Ua mātau ’outou i tā ’outou mau pīahi, ’e e riro ’outou i te mātau maita’i atu ā ia rātou ’a ’apo ’āmui mai ai ’outou i roto i te piha ha’api’ira’a. ’Ua mātau ato’a te Fatu ia rātou, ’e e fa’auru ’oia ia ’outou ma te mau rāve’a maita’i roa a’e nō te tauturu i te mau pīahi ’ia patu i ni’a i te ha’api’ira’a mai i te ’evanelia tā rātou e rave nei i te fare.

E rave rahi atu ā rāve’a tauturu e vai ra nō te tauturu ia ’outou i te taime fa’aineinera’a, mai te mau mana’o i roto i te Mai, pe’e mai—nō te ta’ata hō’ē ’e te ’utuāfare ’e te mau ve’a a te ’Ēkālesia. Nō te tahi atu ha’amāramaramara’a nō ni’a i teie mau rāve’a tauturu ’e te tahi atu, ’a hi’o i te tuha’a « Te tahi atu mau rāve’a tauturu » i roto i teie rāve’a tauturu.

Te tahi mau mea e ha’amana’o noa

• E mea manuia a’e te ha’api’ira’a mai i te ’evanelia ’a fa’atumuhia ai te reira i ni’a i te ’utuāfare. ’Ei ’orometua ha’api’i, e hōpoi’a faufa’a rahi roa tā ’outou nō tē pāturu, nō tē fa’aitoito ’e nō tē patu i ni’a i te ha’api’ira’a mai i te ’evanelia a te mau pīahi i te fare.

• E hōhonu atu ā te fa’afāriura’a i te Iesu Mesia o te mau pīahi ’e i tāna ’evanelia ’a hāro’aro’a ai rātou ’e ’a fa’a’ohipa ai i te ha’api’ira’a tumu mau. E fa’aitoito ia rātou ’ia pāpa’i ’e ’ia rave mai te au i te mau mana’o e tae mai nō ’ō mai i te Vārua Maita’i.

• ’Ua hau atu te ha’api’ira’a i te a’o–noa–ra’a, ’ua hau ato’a rā te reira i te arata’i–noa–ra’a i te hō’ē tāu’ara’a parau. Hō’ē tuha’a o tō ’outou ti’ara’a, ’o te fa’aitoitora’a ïa ia rātou ’ia parau mai i tō rātou mana’o e ha’amaita’i ’e ma te fa’atumu i ni’a i te mau pāpa’ira’a mo’a. ’Ia fa’a’ite ato’a ’outou i te mau mana’o fa’auru tā ’outou i ’apo mai ’a tuatāpapa ai ’outou i te mau pāpa’ira’a mo’a.

• ’A ha’amana’o ē e rave rahi mau pīahi e mau ’itera’a faufa’a roa tō rātou i te tuatāpapara’a i te ’utuāfare i te hō’ē ā mau pāpa’ira’a mo’a ’o tā ’outou e ’āparau atu i roto i te piha ha’api’ira’a. E nehenehe ’outou e pāturu i tā rātou tuatāpapara’a i te pāpa’ira’a mo’a nā roto i te tauturura’a ia rātou i roto i te mau rāve’a pinepine nō te fa’a’ite i te mea tā rātou e ha’api’i mai i te fare.

• Tē hina’aro nei te Metua i te Ao ra ’ia manuia ’outou ’ei ’orometua ha’api’i. ’Ua hōro’a mai ’oia e rave rahi mau rāve’a nō te tauturu ia ’outou, ’oia ato’a te mau rurura’a a te mau ’orometua ha’api’i. I roto i teie mau rurura’a e nehenehe ’outou e ’āparau ’e te tahi mau ’orometua ha’api’i nō ni’a i te mau fifi tā ’outou e fārerei ra. E nehenehe ato’a ’outou e ’āparau ’e e fa’a’ohipa i te mau parau tumu o te ha’api’ira’a mai te huru Mesia.

• E ha’api’i maita’i mai te ta’ata ’ia fāna’o ana’e rātou i te rāve’a nō te ha’api’i i te ta’ata. I te tahi taime, e nehenehe e fa’ati’a i te mau pīahi, te feiā ’āpī ato’a, ’ia ha’api’i i te hō’ē tuha’a o te ha’api’ira’a. ’A rave i teie fa’aotira’a ’ia au i te mau hina’aro ’e te mau ’aravihi o te mau pīahi. Mai te mea e ani ’outou i te hō’ē pīahi ’ia ha’api’i, ’a rave i te taime nō te tauturu iāna ’ia fa’aineine nā mua roa ma te fa’a’ohipa i te mau mana’o e ’itehia i roto i teie mātēria tauturu ’e i roto i te Mai, pe’e mai—nō te ta’ata hō’ē ’e te ’utuāfare. ’A ha’amana’o ē ’ei ’orometua ha’api’i i pi’ihia, tei ia ’outou te hōpoi’a i te mea e ha’api’i i roto i te piha ha’api’ira’a.

I roto i teie mātēria, tē vai ra te mau arata’ira’a ha’api’ira’a nō te hepetoma tāta’itahi o te matahiti. I te mau sābati ’aita e fa’atupuhia te Ha’api’ira’a Sābati, e tāmau noa te mau ’utuāfare i te tai’o i te Faufa’a Tahito i te fare ’ia au i te tārena i fa’ata’ahia i roto i te Mai, pe’e mai—nō te ta’ata hō’ē ’e te ’utuāfare. ’Ia tupu ana’e te Ha’api’ira’a Sābati, e nehenehe ’outou e mā’iti e ’ōu’a ’aore rā e ’āmui i te mau ha’api’ira’a.