Seminelí
Lēsoni 6—Tokāteline mo e Ngaahi Fuakava 1:37–38: “Neongo Pe Ko e Fai Ia ʻi Hoku Leʻo Pē ʻOʻokú pe ʻi he Leʻo ʻo ʻEku Kau Tamaioʻeikí, ʻOku Tatau Ai Pē”

“Lēsoni 6—Tokāteline mo e Ngaahi Fuakava 1:37–38: ‘Neongo Pe Ko e Fai Ia ʻi Hoku Leʻo Pē ʻOʻokú pe ʻi he Leʻo ʻo ʻEku Kau Tamaioʻeikí, ʻOku Tatau Ai Pē,’” Tokāteline mo e Ngaahi Fuakavá – Tohi Lēsoni ʻa e Faiako Seminelí (2025)

“Tokāteline mo e Ngaahi Fuakava 1:37–38,” Tokāteline mo e Ngaahi Fuakavá – Semineli

Lēsoni 6: Tokāteline mo e Ngaahi Fuakava 1

Tokāteline mo e Ngaahi Fuakava 1:37–38

“Neongo Pe Ko e Fai Ia ʻi Hoku Leʻo Pē ʻOʻokú pe ʻi he Leʻo ʻo ʻEku Kau Tamaioʻeikí, ʻOku Tatau Ai Pē”

Sīsū Kalaisi

Ke fakaʻosi ʻa e talamuʻaki fakalaumālie ʻa e ʻEikí ki he Tohi ʻo e Ngaahi Fekaú (ko e Tokāteline mo e Ngaahi Fuakavá he taimi ní), naʻá Ne fakamoʻoniʻi ʻokú Ne folofola mai kiate kitautolu ʻo fakafou ʻi Heʻene kau palōfitá. ʻE lava ke tokoni ʻa e lēsoni ko ʻení ke ako ʻe he kau akó ʻa e folofola ʻa e ʻEikí ʻo fakafou ʻi he ngaahi folofolá pea ʻi he ngaahi lea ʻa e kau palōfita ʻo onopōní.

Ngaahi ʻEkitivitī Ako ʻOku Ala Fakahokó

Ko e hā ka tau fie fanongo ai ki he ʻEikí?

ʻE ala ʻaonga ke kamata ʻaki hano mamataʻi ʻa e “#FanongoKiateIa: ʻOku Fakaafeʻi Kitautolu ʻe Palesiteni Nalesoni ke Fanongo ki he Leʻo ʻo e ʻEikí,” ʻoku maʻu ʻi he ChurchofJesusChrist.org, mei he taimi 0:00 ki he 1:14.

2:32

Fakakaukau ke fakaafeʻi e kau akó ke vahevahe ʻa e meʻa ne nau saiʻia ai pe ako mei he vitioó. Kole ange leva ke kuikui honau matá pea fakakaukauloto ki he tūkunga ko ʻení lolotonga hoʻo fakalaulauloto ki he ngaahi fehuʻi ʻi laló. Fakaafeʻi e kau akó ke vahevahe ʻenau ngaahi talí kapau ʻoku ʻikai ke fuʻu fakataautaha.

Fakakaukauloto naʻá ke maʻu ʻa e faingamālie ke ʻi he loki tatau ai mo e Fakamoʻui ko Sīsū Kalaisí.

  • Ko e hā ka ke ka fie talanoa mo fakafanongo ai kiate Iá?

  • Ko e hā ha ngaahi tefito te ke loto ke mo aleaʻi mo e Fakamoʻuí pe ʻoatu ha fakahinohino ki ai? Ko e hā hono ʻuhingá?

  • ʻOkú ke pehē ʻe liliu fēfē koe ʻe he aʻusiá?

ʻI hoʻo ako ʻa e lēsoni ko ʻení, fekumi ki ha fakahinohino mei he Laumālie Māʻoniʻoní ke tokoniʻi koe ke ke ʻiloʻi ʻa e founga te ke lava ai ʻo fanongo ki he ngaahi folofola ʻa e Fakamoʻuí mo e founga te nau lava ke tāpuekina fakataautaha ai koé.

Founga ke fanongo ai ki he Fakamoʻuí ʻi heʻetau moʻuí

ʻOku ʻofa ʻa e Fakamoʻuí ʻiate kitautolu pea ʻokú Ne finangalo ke tau feinga maʻu pē ke fanongo ki Hono leʻó. ʻI he fakaʻosinga ʻo e talamuʻaki ki he Tokāteline mo e Ngaahi Fuakavá, naʻe fakamamafaʻi ʻe he Fakamoʻuí ha niʻihi ʻo e ngaahi founga ʻokú Ne folofola mai ai kiate kitautolú.

Lau ʻa e Tokāteline mo e Ngaahi Fuakava 1:37–38, ʻo kumi e ngaahi founga ko ia ʻokú Ne folofola mai ai kiate kitautolú. Mahalo ʻe tokoni ke manatuʻi ʻoku ʻuhinga ʻa e lea “ngaahi fekaú” ki he Tohi ʻo e Ngaahi Fekaú (pe Tokāteline mo e Ngaahi Fuakavá).

fakaʻilonga fakataukei fakatokāteliné Ko e Tokāteline mo e Ngaahi Fuakava 1:37–38 ko ha potufolofola fakataukei fakatokāteline ia. Fakakaukau ke fakaafeʻi ʻa e kau akó ke fakaʻilongaʻi ʻa e ngaahi potufolofola fakataukei fakatokāteliné ʻi ha founga makehe koeʻuhí ke nau lava ʻo maʻungofua kinautolu.

  • Ko e hā ʻa e meʻa naʻá ke ako mei he ngaahi veesi ko ʻení?

    ʻE lava ke ke kole ki he kau akó ke vahevahe ʻenau ngaahi fakakaukaú. Mahalo te nau pehē ʻoku folofola mai ʻa e ʻEikí kiate kitautolu ʻo fakafou ʻi he folofolá mo ʻEne kau palōfitá. Ka ʻikai, fakakaukau ke puke hake ha tatau ʻo e Tokāteline mo e Ngaahi Fuakavá, ko ha fakatātā ʻo e kau palōfita ʻo onopōní, pea mo ha fakatātā ʻo e Fakamoʻuí pea fehuʻi ange pe ko e hā ʻoku nau faitatau ai ʻo fakatatau mo e Tokāteline mo e Ngaahi Fuakava 1:38. Fakakaukau ke fakaafeʻi e kau akó ke fakaʻilongaʻi ha kupuʻi lea ʻokú ne akoʻi ʻa e foʻi moʻoni ko ʻení: neongo pe ko e fai ia ʻi Hono leʻo pē ʻOʻoná pe ko e leʻo ʻo ʻEne kau tamaioʻeikí, ʻoku tatau ai pē.

    Kapau ʻe ʻaonga, hiki e ngaahi veesi ko ʻení ʻi he palakipoé pea fakaafeʻi e kau akó ke lau ha veesi ʻe taha pe ua, ʻo kumi e meʻa ʻoku nau akoʻi ʻokú ne fakapapauʻi e foʻi moʻoni ʻi ʻolungá: Teutalōnome 18:18; Tokāteline mo e Ngaahi Fuakava 18:33–36; 21:4–6. Mahalo ʻe fiemaʻu ʻe he kau akó ke lekooti ʻa e ngaahi veesi ko ʻení ko ha ngaahi potufolofola fakafekauʻaki ki he Tokāteline mo e Ngaahi Fuakava 1:38.

  • Ko e hā ʻe faingataʻa ai he taimi ʻe niʻihi ke ako e folofola ʻa e ʻEikí?

  • ʻE fakaʻaiʻai fēfē koe ʻe he moʻoni ne tau ʻiloʻí, pe ngaahi kupuʻi lea kehe ʻi he Tokāteline mo e Ngaahi Fuakava 1:37–38, ke ke ako e folofola ʻa e ʻEikí?

ʻUhinga ʻoku tau fie ako ai ʻEne folofolá

Sio he vitiō ko ʻení pea lau ʻa e lea ko ʻení, ʻo kumi e ngaahi ʻuhinga te ke fie ako ai e folofola ʻa e ʻEikí ʻi he ngaahi folofolá pea ʻi he ngaahi lea ʻa e kau palōfita ʻo onopōní:

Naʻe akonaki ʻa Sisitā Kalo F. Makongikī, ko ha tokoni mālōlō ʻi he Kau Palesitenisī Lahi ʻo e Kau Finemuí ʻo pehē:

Sisitā Carol F. McConkie

ʻOku lea [ʻa e kau palōfita ʻo onopōní] ʻi he huafa ʻo Kalaisí. ʻOku nau kikite ʻi he huafa ʻo Kalaisí. ʻOku nau fakahoko e meʻa kotoa ʻi he huafa ʻo Sīsū Kalaisí. ʻOku tau ongoʻi e leʻo ʻo e ʻEikí mo e ʻofa ʻa e Fakamoʻuí ʻi heʻenau ngaahi leá. (Carol F. McConkie, “Moʻui ʻo Fakatatau mo e Lea ʻa e Kau Palōfitá,” Liahona, Nōvema 2014, 77–78)

  • Ko e hā ha meʻa naʻá ke saiʻia ai pe ako mei he foʻi vitiō mo e fakamatala ko ʻení?

    Tuku ha taimi ki he kau akó ke nau fakalaulauloto ai ki he fehuʻi ko ʻení kimuʻa pea toki kole ki ha niʻihi ʻe loto fiemālie ke vahevahé. ʻI he fakalaulauloto ʻa e kau akó, fakakaukau ke vahevahe ha sīpinga fakataautaha ʻe lava ke nau fakafekauʻaki ki ai. ʻE ala tokoni hono fakahoko iá ke nau fakakaukau ai ki ha ngaahi sīpinga kehe.

  • Ko e fē ha taimi kuó ke ongoʻi ai (pe ko ha taha ʻokú ke ʻilo) naʻá ke maʻu ha pōpoaki mei he ʻEikí ʻo fakafou ʻi he folofolá pe ʻi he ngaahi lea ʻa e kau palōfita ʻo onopōní?

Akoako Fakahoko

ʻOku fakataumuʻa ʻa e ʻekitivitī ko ʻení ke tokoni ki he kau akó ke nau ʻunu ke ofi ange ki he Fakamoʻuí lolotonga hono ako e ngaahi lea ʻa ʻEne kau tamaioʻeikí. Fakapapauʻi ke ʻoange ha taimi lahi ki he kau akó ke fakakakato ia mo vahevahe ʻenau ngaahi fakakaukaú ʻi heʻene ʻosí.

  1. Tuku ha ngaahi miniti ke nau kumi ai ha niʻihi ʻo e ngaahi veesi ko ʻení mo e ngaahi lea ʻa e kau palōfita ʻo onopōní. ʻI hoʻo akó, fakakaukauloto ki ha folofola atu ʻaki ʻe he ʻEikí ʻa e ngaahi leá ni kiate koe. (Ko ha taukei ako ʻaonga ʻeni te ke lava ʻo fakaʻaongaʻi ʻi ha taimi pē te ke ako ai e folofolá.) Fakakaukau ke fakaʻilongaʻi ʻa e meʻa ʻoku ʻuhingamālie kiate koé.

    Tokāteline mo e Ngaahi Fuakava 6:34–37; 10:5; 19:23; 27:15–18; 58:26–28; 68:5–6; 78:18–19; 82:10; 98:1–3; 112:10. (Pe fili ha ngaahi veesi kehe ʻi he Tokāteline mo e Ngaahi Fuakavá.)

    Kapau ʻokú ke ongoʻi ʻe feʻunga lelei ange ia mo e ngaahi fiemaʻu hoʻo kau akó, kae ʻikai ko e ngaahi meʻa ko ʻení, fakakaukau ke fakatahatahaʻi ha ngaahi kupuʻi lea kimuí ni mei he kau palōfitá ʻa ia ʻoku tautautefito ʻene ʻaonga ki hoʻo kau akó. Fakapapauʻi ʻokú ke maʻu ha ngaahi tatau ʻo e makasini Liahona ʻo e konifelenisi lahi fakamuimuitahá.

  2. Ako ha niʻihi pe kotoa ʻo ha lea ʻi he konifelenisi lahi fakamuimuitahá ʻokú ke ongoʻi ʻe tokoni fakataautaha atu kiate koe.

    Fakaafeʻi e kau akó ke vahevahe ʻenau ngaahi aʻusiá. ʻE lava ke ʻaonga mo e ngaahi fehuʻi ko ʻení:

  3. Ko e hā e meʻa naʻá ke akó?

  4. Naʻá ne tokoniʻi fēfē hoʻo akó ke fakakaukauloto ʻoku folofola atu ʻaki ʻe he Fakamoʻuí ʻa e ngaahi lea ko iá kiate koé?

  5. ʻE tokoni fēfē hoʻo fakahoko maʻu pē ʻeni ʻi hoʻo ako fakatāutahá ki ho vā fetuʻutaki mo e Fakamoʻuí?

Lolotonga e vahevahe ʻa e kau akó, kumi ha ngaahi founga ke fakamamafaʻi ai ʻoku kei folofola mai pē ʻa e ʻEikí kiate kitautolu ʻo fakafou ʻi he folofolá mo e kau palōfita moʻuí.

Ke fakaʻosí, hiki ʻi hoʻo tohinoa akó ʻa e meʻa ʻokú ke fie fai ke ofi ange ai ki he Fakamoʻuí ʻo fakafou ʻi he ngaahi lea ʻa ʻEne kau tamaioʻeikí. Mahalo ʻe kau ʻi he ngaahi fakakaukaú ʻa e:

  • Ako maʻu pē ʻa e Tokāteline mo e Ngaahi Fuakavá ʻo hangē pē naʻe folofola atu ʻa e ʻEikí kiate koé.

  • Fakafanongo ki he ngaahi lea ʻa e kau palōfitá ʻi hoʻo teuteu ki he akó ʻi he pongipongí pe mohe ʻi he efiafí pe lolotonga ha toe taimi kehe ʻe ʻaonga ange ai kiate koe.

Ako Ma‘uloto

Mahalo te ke fie tokoni ki he kau akó ke ako maʻuloto ʻa e fakamoʻoni folofola mo e kupuʻi lea mahuʻinga ʻo e Tokāteline mo e Ngaahi Fuakava 1:37–38 pea fakamanatu kinautolu ʻi he ngaahi lēsoni he kahaʻú. Ko e kupuʻi lea mahuʻinga ʻo e folofolá ko e “Neongo pē ko e fai ia ʻi hoku leʻo pē ʻoʻokú pe ʻi he leʻo ʻo ʻeku kau tamaioʻeikí, ʻoku tatau ai pē.” Ko e ngaahi fakakaukau ki he ngaahi ʻekitivitī ako maʻulotó ʻoku maʻu ia ʻi he ngaahi naunau fakalahi ʻi he “Ngaahi ʻEkitivitī Fakamanatu ʻo e Fakataukei Fakatokāteliné.”