Leksiyon 80: Doktrina ug mga Pakigsaad 67–70

Doktrina ug mga Pakigsaad 67

Ang Pagpamatuod sa Kamatuoran

Daghang mga lider sa Simbahan ang misuporta sa pagmantala sa mga pagpadayag nga nadawat ug nasabtan ni Propeta Joseph Smith nga kini gikan sa Dios. Ang uban nagpunting sa mga pagkadili-hingpit nga ilang nakita diha sa mga pagpadayag ug, isip resulta, wala makaseguro nga kini nagagikan sa Ginoo. Kini nga leksiyon makatabang nga madugangan ang pagsalig sa mga estudyante nga ang Ginoo mamulong kanato pinaagi sa mga propeta ug nga ang Doktrina ug mga Pakigsaad Iyahang pulong.

Mga Posibleng Kalihokan sa Pagkat-on

Usa ka pagpamatuod

Tinoa ang usa ka paagi aron matabangan ang mga estudyante sa paghunahuna mahitungod sa ilang pagpamatuod sa mga kamatuoran sa ebanghelyo nga may kalabotan sa plano sa Langitnong Amahan. Sila mahimong mobuhat sa mosunod nga kalihokan diha sa pisara o diha sa ilang journal sa pagtuon.

Pagdrowing og simpol nga hulagway sa tawo diha sa usa ka bahin sa pisara. Sa laing bahin sa pisara, ilista ang lain-laing mga aspeto sa plano sa Langitnong Amahan nga ang tawo magkinahanglan nga makabaton og pagpamatuod. Mahimo ka usab magpakita og mga hulagway nga nagrepresentar sa mga aspeto sa plano sa Langitnong Amahan, sama sa hulagway ni Jesukristo, sa kasamtangan nga propeta, o sa mga kasulatan. Pagpili og pipila niini nga mga aspeto ug dapita ang mga estudyante sa paghisgot sa mosunod.

• Ngano kahang makatabang man ang pagbaton og pagpamatuod niining mga aspeto sa plano sa Langitnong Amahan?

• Unsa ang pipila ka mga babag nga mahimong makababag sa paglig-on niini nga pagpamatuod?

Samtang mopakigbahin ang mga estudyante, mahimo nimong ilista ang mga babag diha sa tunga-tunga sa simpol nga drowing sa tawo ug sa listahan sa mga butang nga kinahanglan atoang tinguhaon ang pagbaton og pagpamatuod diha sa atong kinabuhi.

Human sa panaghisgot, mahimo nimong dapiton ang mga estudyante sa paghunahuna sa ilang kaugalingong pagpamatuod sa lain-laing mga bahin sa plano sa Langitnong Amahan. Dapita sila sa pagpangita og mga kamatuoran atol sa leksiyon nga makatabang kanila nga makaangkon o makapalig-on sa ilang pagpamatuod.

Unsaon sa pagdawat ug sa paglig-on sa pagpamatuod

Aron matabangan ang mga estudyante sa pagsabot sa konteksto sa seksiyon 67, mahimo nimong ipakigbahin ang pipila ka mga detalye gikan sa mosunod nga parapo.

Ngadto sa kataposan sa 1831, si Joseph Smith adunay usa ka koleksiyon sa mga pagpadayag gikan sa Ginoo, apan diyotay ra kaayo ang mga tawo nga adunay access sa mga kopya niini. Ang Ginoo mipadayag nga ang Simbahan kinahanglang momantala niini diha sa usa ka basahon. Sama sa Basahon ni Mormon, ang Basahon sa mga Sugo (sa kaulahian gimantala isip ang Doktrina ug mga Pakigsaad) kinahanglan nga maglakip og mga pagpamatuod gikan sa mga saksi. Apan, ang ubang mga lider sa Simbahan nagdumili sa pagpamatuod; sila adunay mga kabalaka sa pipila sa mga pulong ug gusto nga palamboon kini.

Ikonsiderar ang pagdugang sa “mga pulong” ngadto sa lista sa mga babag. Pangutan-a kon aduna bay sa bisan unsang mga paagi nga kini mahimong makonektar ngadto sa kabatan-onan karon.

Basaha ang Doktrina ug mga Pakigsaad 67:1–5, mangita sa unsay gisultisa Ginoo niini nga mga tawo.

• Ngano sa imong hunahuna nga sila kinahanglan nga makadungog niini?

• Unsa nga kamatuoran sa ebanghelyo ang atong matino gikan niini nga mga bersikulo?

  Samtang mopakigbahin ang mga estudyante, tabangi sila sa pag-ila og kamatuoran sama niini: Ang Ginoo naminaw sa atong mga pag-ampo, nasayod sa atong mga kasingkasing, ug makahatag kanato og pagpamatuod sa kamatuoran nga atong gitinguha.

• Sa imong hunahuna sa unsang paagi kini makatabang kanato kon kita nagtinguha o naglisod sa pagbaton og pagpamatuod?

• Ngano sa imong hunahuna nga ang “mga kahadlok sa [atong] mga kasingkasing” (Doktrina ug mga Pakigsaad 67:3) mahimong makapugong kanato sa pagdawat og mga panalangin?

• Sa bersikulo 5, unsay giila sa Ginoo mahitungod ni Joseph Smith? Bisan og ang Propeta dili hingpit o maayong manulti, nganong dili man maalamon ang pagsulay sa “[pagpahayag] labaw sa iyang pinulongan”? (Doktrina ug mga Pakigsaad 67:5).

Pagbuntog sa mga babag uban sa panabang sa Ginoo

Ang Ginoo nakaila sa atong mga kasingkasing ug makatabang kanato sa pagbuntog sa mga babag sa atong mga pagpamatuod. Niini nga higayon, ang Ginoo mihatag og usa ka hagit alang sa mga elder sa Iyang Simbahan sa pagtabang kanila sa pagdawat og “usa ka pagpamatuod sa kamatuoran” (bersikulo 4) sa mga pagpadayag nga nadawat ni Joseph Smith.

Kon ang imong mga estudyante ganahan og usa ka hagit, ang mosunod nga kalihokan mahimong ihatag isip usa ka pasulit. Dapita sila sa pagbasa og maayo sa mga bersikulo ug dayon sa pagsira sa ilang mga kasulatan ug sa pagpaningkamot sa pagtubag sa mosunod nga mga pangutana.

Basaha ang Doktrina ug mga Pakigsaad 67:6–9, mangita sa mga detalye sa hagit sa Ginoo.

• Unsa nga matang sa pagpadayag ang angay nilang pilion? (Tan-awa sa bersikulo 6.)

• Unsa nga matang sa tawo ang angay nilang pilion? (Tan-awa sa bersikulo 6.)

• Unsa ang gidapit niini nga tawo nga isulat? (Tan-awa sa bersikulo 7.)

• Unsa kaha ang mahitabo kon sila magmalamposon? (Tan-awa sa bersikulo 7.)

• Unsa kaha ang mahitabo kon sila mapakyas? (Tan-awa sa mga bersikulo 8–9.)

  Aron mahibaloan kon unsay sunod nga nahitabo, mahimo nimong iprinta o ipakita ang gidrowing nga paghulagway sa “Ang mga Pulong sa Propeta Tinuod” gikan sa Hunyo 2021 nga Alang sa Kalig-on sa mga Kabatan-onan nga magasin ug dapita ang mga estudyante sa pagbasa niini. Sa laing paagi, mahimo nimong ipasabot nga si William McLellin, usa ka 25-anyos nga magtutudlo sa eskwelahan ug bag-o lang nakabig ngadto sa Simbahan, gitudlo isip “ang labing maalamon” (bersikulo 6) sa grupo ug midawat sa hagit sa Ginoo. Sa dihang nahuman na siya, ang tanan nakamatikod nga ang unsay iyang gisulat dili gikan sa Ginoo.

• Unsa sa imong hunahuna ang pipila sa mga leksiyon nga nakat-onan niini nga mga tawo gikan niini nga kasinatian?

  Samtang motubag ang mga estudyante, mahimo nimo silang dapiton sa pagrebyo sa bersikulo 9. Mahimo usab nimong ipasabot nga daghan sa mga elder ang mipirma og dokumento nga naghatag sa ilang pormal nga pagpamatuod sa katinuod sa mga pagpadayag diha sa Basahon sa mga Sugo.

• Sa unsang paagi kini nga kasinatian nagpakita nga ang Ginoo nakaila kanila ug makatabang sa ilang mga pagpamatuod?

Ang Ginoo mipadayon sa pagsaad og mas dagko pa nga espirituhanong mga kasinatian ngadto niini nga mga kalalakin-an kon sila “[mohubo] sa [ilang] mga kaugalingon gikan sa mga kasilag ug mga kahadlok, ug [magpaubos] sa [ilang] mga kaugalingon diha sa akong atubangan” (Doktrina ug mga Pakigsaad 67:10).

Sa unsang paagi kini nga kamatuoran magamit karon

Hunahunaa nga ang usa ka tawo nga imong nailhan naglisod sa pagtuo nga ang Ginoo mamulong kanato pinaagi sa mga propeta ug nga ang Doktrina ug mga Pakigsaad mao ang pulong sa Ginoo.

Kon gusto sa mga estudyante, mahimo silang makadugang og mga detalye sa senaryo pinaagi sa pagpili og usa sa mga babag nga gilista diha sa pisara ug mosugyot nga ang tawo kinahanglan nga mobuntog niini aron makadawat og pagpamatuod. Mahimo dayon nimong ipakigbahin o ipakita ang mosunod nga mga instruksiyon.

Hunahunaa kon unsaon nimo sa pagtabang kini nga tawo pinaagi sa paghimo sa mosunod:

1. Isulat kon unsay imong isulti aron matabangan sila nga mahibalo nga ang Ginoo naminaw sa atong mga pag-ampo, nahibalo sa atong mga kasingkasing, ug makahatag kanato og pagpamatuod sa mga propeta ug sa Doktrina ug mga Pakigsaad. Kon mahimo, pwede nimong ilakip ang bisan unsa nga personal nga mga kasinatian, o mga kasinatian niadtong suod nimo, nga nagpamatuod niini nga mga kamatuoran.

2. Gamita ang mga kasulatan, mga istorya sa kasulatan, o ang imong kaugalingong mga kasinatian sa pagpakigbahin sa pipila ka mga butang nga atong mahimo aron madugangan ang atong mga pagpamatuod sa mga propeta ug sa Doktrina ug mga Pakigsaad (pipila ka mga ehemplo naglakip sa Doktrina ug mga Pakigsaad 1:37–38; 21:4–6; Moroni 10:4–5). Ipakigbahin kon sa unsang paagi ang Ginoo makapanalangin kanato tungod niini nga mga buhat.

Pagdapit og lain-laing mga estudyante sa pagpakigbahin sa unsay ilang giandam. Pasalamati ang mga estudyante alang sa ilang mga ideya ug mga kasinatian.

Taposa pinaagi sa pagdapit sa mga estudyante sa pagpamalandong sa ilang kaugalingong mga pagpamatuod nga ang Ginoo mamulong pinaagi sa mga propeta ug nga ang Doktrina ug mga Pakigsaad tinuod. Pagpamatuod nga ang Ginoo naminaw sa ilang mga pag-ampo, nasayod sa ilang mga kasingkasing, ug makatabang kanila nga makaangkon og mga pagpamatuod. Dapita sila sa pagsulat sa bisan unsa nga inspirasyon nga ilang nadawat sa tibuok leksiyon.

Dugang nga mga Kapanguhaan

Unsa ang girekord ni Joseph Smith kabahin niini nga panghitabo?

Ang Propeta mirekord:

Si William E. McLellin, ingon nga labing maalamon nga tawo, sa iyang kaugalingong paghukom, nga adunay labaw nga kahibalo kay sa pagbati, naningkamot sa pagsulat og usa ka sugo nga sama ngadto sa usa sa labing ubos nga sugo sa Ginoo, apan napakyas; usa ka dako nga responsibilidad ang pagsulat sa ngalan sa Ginoo. Ang mga Elder ug ang tanan nga anaa nga nakasaksi niini nga kawang nga pagsulay sa usa ka tawo sa pagsundog sa pinulongan ni Jesukristo, mibag-o sa ilang hugot nga pagtuo diha sa kahingpitan sa Ebanghelyo, ug diha sa kamatuoran sa mga sugo ug mga pagpadayag diin ang Ginoo mihatag ngadto sa Simbahan pinaagi sa akong pagkainstrumento; ug ang mga Elder nagpakita og kaandam sa paghatag og pagpamatuod sa kamatuoran niini ngadto sa tibuok kalibotan. (Joseph Smith, sa History of the Church, 1:226)

Doktrina ug mga Pakigsaad 67:3. Sa unsang paagi ang atong mga kahadlok makaapekto kanato?

Si Elder Dieter F. Uchtdorf sa Korum sa Napulog Duha ka Apostoles mitudlo:

Kabahin sa atong hagit mao, sa akong hunahuna, nga atong hunahunaon nga gisirad-an sa Dios ang Iyang tanang panalangin sa kalangitan, dili kini ihatag nato gawas kon kita mosunod sa higpit, inamahan nga mga gikinahanglan nga Iyang ipatuman. … Ang tinuod, ang Langitnong Amahan kanunayng nagbu-bu nato og mga panalangin. Ang atong kahadlok, pagduha-duha, ug sala, sama sa payong, ang nakaali niining mga panalangin. (Dieter F. Uchtdorf, “Pagsunod sa Ebanghelyo nga Malipayon,” Liahona, Nob. 2014, 122)

Si Elder David A. Bednar sa Korum sa Napulog Duha ka Apostoles mitudlo kon unsaon nato sa pagbuntog ang atong mga kahadlok:

Mapanalanginan kita sa pagbuntog sa atong mga kahadlok ug mapalig-on ang atong [hugot nga pagtuo] samtang kita nagsunod sa panudlo sa atong Ginoo: “Paghunahuna ngari kanako sa matag hunahuna; ayaw pagduha-duha, ayaw kahadlok” (D&P 6:36). (David A. Bednar, “Busa Sila Mihupay sa Ilang mga Kahadlok,” Liahona, Mayo 2015, 48)

Unsa ang kinahanglan kong buhaton kon akong namatikdan ang mga pagkadili hingpit sa uban?

Si Elder Jeffrey R. Holland sa Korum sa Napulog Duha ka Apostoles miingon:

Busa, Kamo Kinahanglan Magmahingpit—sa Katapusan

Si Elder Holland nagtudlo nga sa pagsanong sa sugo nga magmahimong hingpit, kinahanglang dili kita maluya apan magpadayon sa pagkab-ot sa tumong sa kahangturan.

Akong mga kaigsoonan, gawas ni Jesus, walay perpekto nga mga kinabuhi niining yutan-on natong panaw, busa samtang anaa sa mortalidad maningkamot kita nga kanunayng molambo apan dili magpasulabi nianang gitawag sa mga behavioral scientist nga “makadaut nga pagkaperpeksyonista.” Kinahanglang likayan nato kana nga nanobrang ekspektasyon diha sa atong kaugalingon ug sa uban ug, akong dugangan, niadtong gitawag aron moserbisyo diha sa Simbahan—nga alang sa mga Santos sa Ulahing mga Adlaw nagpasabot sa tanan, kay kitang tanan gitawag sa pagserbisyo bisan asa. (Jeffrey R. Holland, “Busa, Kamo Kinahanglan Magmahingpit—sa Kataposan,” Liahona, Nob. 2017, 42)

Dugang nga mga Kalihokan sa Pagkat-on

Mga pagsabot kabahin sa mga Propeta sa Dios

Kon makatabang ang dugang nga paghisgot sa mga kabalaka sa mga Elder kabahin sa pinulongan sa mga pagpadayag, ikonsiderar ang paggamit sa mosunod nga leksiyon nga maggamit og butang: Ipakita ang usa ka butang nga nindot, sama sa usa ka painting, apan hangyoa ang mga estudyante sa pagpahayag sa bisan unsa nga dili nila gusto mahitungod niini.

• Unsa ang kasagarang mahitabo kon magpunting kita sa mga sayop sa usa ka butang?

Awhaga ang mga estudyante sa paghisgot sa posibleng mga kapeligrohan sa paghukom sa propeta pinaagi sa iyang pinulongan ug mga pagkadili hingpit. Unsa ang peligro sa paghunahuna nga kita “makapahayag labaw sa iyang pinulongan”? (Doktrina ug mga Pakigsaad 67:5).

Mahimong maayo alang sa mga estudyante ang hilom nga pagsukod sa ilang mga pagbati mahitungod sa propeta.

Ang kamahinungdanon sa pagkamapainubsanon

Human matun-an sa mga estudyante ang mahitungod ni William McLellin nga naningkamot sa pagsulat og usa ka pagpadayag, mahimong mapuslanon ang pagpangutana sa mga estudyante kon sa unsang paagi ang kasinatian mahimong nagpaubos sa mga elder.

Dapita ang mga estudyante sa pagbasa sa Doktrina ug mga Pakigsaad 67:10, 14 aron makita unsa nga mga panalangin ang gisaad sa Ginoo kon ilang dugangan ang ilang pagkamapainubsanon.

Mahimong tun-an sa mga estudyante ang pagkamapainubsanon diha sa Giya ngadto sa mga Kasulatan ug mopakigbahin kon nganong naghunahuna sila nga ang pagkamapainubsanon mahinungdanon kon nagtinguha og pagpamatuod.

Doktrina ug mga Pakigsaad 68:1–5

Dapita ang mga estudyante sa pagpakigbahin kon unsaon nato sa pagkahibalo sa kabubut-on sa Ginoo alang kanato.

Ipasabot nga atol sa usa ka komperensiya nga gihimo niadtong Nobiyembre 1, 1831, upat ka mga elder, kinsa sa dili madugay mahimong mga misyonaryo, miduol ni Joseph Smith ug mihangyo nga masayod sa kabubut-on sa Ginoo mahitungod kanila. Agig tubag, ang Ginoo mipadayag og sumbanan sa pagsangyaw sa ebanghelyo. Dapita ang mga estudyante sa pagbasa sa Doktrina ug mga Pakigsaad 68:1–5, mangita sa mga elemento niana nga sumbanan. Mahimong makatabang ang pagkahibalo nga ang pulong nga panig-ingnan usa ka sumbanan o sundoganan.

• Sa mga bersikulo 3–5, unsa nga saad ang gihatag sa Ginoo ngadto sa Iyang mga sulugoon?

• Unsa ang mabuhat sa dinasig nga mga pulong sa mga misyonaryo alang niadtong modawat niini?

Ang mga estudyante mahimong mogamit og lain-laing mga pulong, apan kinahanglan nilang mahibaloan ang mosunod nga baroganan: Kon ang mga sulugoon sa Ginoo matandog sa Espiritu Santo, ang ilang mga pulong mogiya sa mga tawo ngadto sa kaluwasan.

Ipasabot nga samtang kadtong gi-orden sa pagsangyaw sa ebanghelyo makatabang sa mga tawo nga makaangkon og pagpamatuod sa kamatuoran, ang Presidente lamang sa Simbahan ang adunay katungod sa pagdawat ug sa pagpahayag sa kabubut-on sa Ginoo alang sa tibuok Simbahan. Ubos sa iyang paggiya, ang ubang mga sakop sa Unang Kapangulohan ug ang mga sakop sa Korum sa Napulog Duha ka Apostoles adunay awtoridad usab sa pagpahayag sa kabubut-on sa Dios alang kanato.

Hisgoti kon sa unsang paagi nga kini nga baroganan magamit ngari kanato karon.