Pasiuna sa Manwal sa Magtutudlo sa Seminary sa Doktrina ug mga Pakigsaad

Ang katuyoan sa Seminaries and Institutes of Religion mao ang “pagtabang sa kabatan-onan ug mga young adult nga mapalawman ang ilang pagkakabig ngadto ni Jesukristo ug sa Iyang gipahiuli nga ebanghelyo, mahimong sarang alang sa mga panalangin sa templo, ug makaandam sa ilang mga kaugalingon, sa ilang mga pamilya, ug sa uban alang sa kinabuhing dayon uban sa ilang Amahan sa Langit” (“Ang Tumong sa Seminaries and Institutes of Religion” [2022], ChurchofJesusChrist.org).

Aron matabangan nga makab-ot kini nga tumong, kini nga manwal naghatag sa mga estudyante og lain-laing mga kasinatian sa pagkat-on pinaagi sa duha ka lain-laing matang sa mga leksiyon: mga leksiyon sa Doktrina ug mga Pakigsaad ug mga leksiyon sa Pagpangandam sa Kinabuhi. Ang mga leksiyon sa Doktrina ug mga Pakigsaad mohaom sa mga hut-ong sa kasulatan nga gihatagan og gibug-aton matag semana sa Dali, Sunod Kanako—Alang sa Panimalay ug sa Simbahan: Doktrina ug mga Pakigsaad 2025. Ang mga leksiyon sa Pagpangandam sa Kinabuhi makatabang sa mga estudyante nga makat-on sa pagkuha og kalig-on gikan ni Jesukristo ug paggamit sa Iyang mga pagtulun-an sa pag-andam alang sa mga hagit sa kinabuhi.

Pinaagi sa paggamit sa mga sugyot sa pagtudlo nga makita niining duha ka matang sa mga leksiyon ug sa pagsunod sa direksyon sa Espiritu, makatabang ka sa mga estudyante nga makagamit sa gahom ni Jesukristo sa daghang aspeto sa ilang kinabuhi—lakip sa espiritwal, sosyal, intelektwal, ug pisikal nga mga paagi. Makatabang usab ka nila sa pag-andam sa ilang umaabot uban ang hugot nga pagtuo sa Langitnong Amahan ug ni Jesukristo.

Kining manwal sa magtutudlo anaa sa Librarya sa Ebanghelyo sa online sa ChurchofJesusChrist.org, diin makakita usab ka og ma-download nga PDF sa manwal. Anaa usab kini sa Librarya sa Ebanghelyo nga app. Kon gusto ka nga mogamit og giprinta nga manwal, palihog hangyoa kini sa inyong lokal nga koordinitor o tagdumala sa programa.

Mga Himan nga Makatabang Nimo sa Pag-andam sa Pagtudlo

Bisan unsa nga matang sa leksiyon ang imong gitudlo, pipila ka mga himan ang makatabang nimo sa pag-andam.

Ang mga Kasulatan

Ang pagtuon uban sa Dali, Sunod Kanako nga hut-ong sa kasulatan mao ang usa ka importanteng paagi sa pagpangandam sa pagtudlo sa mga estudyante. Ang mga leksiyon nga nalangkob niini nga manwal nagkinahanglan og madasigon nga magtutudlo nga kanunayng nagtuon sa mga kasulatan ug nagtinguha sa pakig-uban sa Espiritu Santo. Samtang regular kang magtuon sa mga kasulatan, makasalig ka nga ang Langitnong Amahan modasig nimo pinaagi sa Iyang Espiritu kon unsaon pagpahiangay kini nga mga materyal aron matubag ang mga panginahanglan sa imong mga estudyante.

Kinatibuk-ang Pagpasabot

Ang kinatibuk-ang pagpasabot gihatag sa sinugdanan sa matag semana sa mga leksiyon sa Doktrina ug mga Pakigsaad ug sa sinugdanan sa matag kategoriya sa mga leksiyon sa Pagpangandam sa Kinabuhi. Kining kinatibuk-ang pagpasabot naghatag og impormasyon nga piho sa leksiyon aron matabangan ka sa pag-andam sa pagtudlo, lakip ang:

• Mga katuyoan sa leksiyon

• Mga ideya sa pagpangandam sa estudyante

• Usa ka lista sa mga leksiyon nga maggamit og butang, mga handout, mga hulagway, mga bidyo, o uban pang materyal nga mahimong kinahanglanon nga andamon daan

Ang pagrebyo sa kinatibuk-ang pagpasabot sa dili pa nimo itudlo ang katugbang nga mga leksiyon makatabang nimo sa pagdesisyon kon unsa nga mga materyal ang andamon daan.

Pangitaa ang sinemanang kinatibuk-ang pagpasabot alang sa sunod semana nga mga leksiyon nga imong itudlo.

• Unsa nga mga impormasyon ang imong nakita dinhi nga makatabang kanimo nga makahibalo daan?

• Sa unsang paagi kaha nimo magamit kini nga impormasyon samtang ikaw mangandam sa pagtudlo?

Mga Sugyot sa Pagtudlo

Ang matag kinatibuk-ang pagpasabot nga nag-una sa mga leksiyon sa Doktrina ug mga Pakigsaad naglangkob og sugyot sa pagtudlo nga nagpasabot sa girekomendar nga mga buhat o mga baroganan gikan sa Pagtudlo sumala sa Pamaagi sa Manluluwas: Alang sa Tanan Kinsa Nagtudlo diha sa Panimalay ug diha sa Simbahan. Kini nga mga sugyot mailhan niini nga icon: . Kon mobati ka og kaandam, sulayi ang pagpatuman niining mga buhat ug mga baroganan samtang nagtudlo. Imong mamatikdan nga ang paglakip niining mga sugyot makatabang sa pagpalambo sa imong mga abilidad sa pagtudlo.

Ang sugyot sa pagtudlo sa matag kinatibuk-ang pagpasabot nagpunting kanimo sa usa ka leksiyon diin ang girekomendar nga buhat o baroganan gimodelo. Tan-awa sa kana nga leksiyon alang sa icon sa pagbansay aron makakita og ehemplo sa sugyot nga gimodelo. Kini nga mga tabang nagpunting usab nimo sa Pagpalambo sa mga Kahanas sa Magtutudlo nga makatabang nimo nga makat-on pa bahin sa mga buhat o mga baroganan sa pagtudlo nga gihatagan og gibug-aton. Kon itugot sa panahon ug sa imong mga kapabilidad, ikonsiderar ang paggamit niining mga pagbansay isip kabahin sa imong pagpangandam sa leksiyon.

Rebyoha ang sugyot sa pagtudlo diha sa kinatibuk-ang pagpasabot alang sa umaabot nga semana sa sulod nga imong itudlo. Unsaon kaha nimo sa pagpraktis niini nga sugyot sa umaabot nga leksiyon?

Mga Sugyot sa Gipaspason

Ang kinatibuk-ang pagpasabot sa matag hut-ong sa mga leksiyon sa Pagpangandam sa Kinabuhi naglakip sa mga sugyot sa gipaspason. Kini nga mga sugyot naghatag og mga ideya kon asa kini nga mga leksiyon mahimong ilakip ngadto sa giya sa gipaspason. Ang mga koordinitor ug mga tagdumala sa programa makagamit niini nga mga sugyot samtang maghimo sila og giya sa gipaspason.

Pagpangandam sa Estudyante

Ang matag kinatibuk-ang pagpasabot naglakip usab og mga sugyot sa pagtabang sa mga estudyante nga maandam ang ilang mga hunahuna ug mga kasingkasing alang sa matag leksiyon. Mahimo nimong tan-awon kini nga mga ideya sa sinugdanan sa semana ug mainampoong modesisyon kon unsa nga mga ideya ang pamati nimo nga labing makatabang sa imong mga estudyante. Dili ka kinahanglan nga mogamit sa matag sugyot sa pagpangandam sa estudyante. Mahimo nimo kining ipahiangay o pagmugna og imong kaugalingong mga ideya. Daghan niining mga sugyot ang gidisenyo aron ihatag daan sa mga estudyante usa ka adlaw o labaw pa sa dili pa ang kasinatian sa pagkat-on.

Rebyoha ang mga ideya sa pagpangandam sa estudyante diha sa kinatibuk-ang pagpasabot alang sa umaabot nga semana sa mga leksiyon nga imong itudlo. Ikonsiderar hain nga mga ideya ang imong gamiton, ipahiangay, o dili gamiton. Kon makadesisyon ka nga dapiton ang imong mga estudyante sa pagpangandam, unsaon nimo sa pagpakigbahin ang ideya sa pagpangandam ngadto kanila? Mahimo nimong ipakigbahin kini pinaagi sa pagsulti o ipakita kini sa kataposan sa nag-una nga klase. O, kon angay, ipadala kini pinaagi sa email o sa messaging nga app.

Mga Instruksiyon sa Pagtudlo

Sa tibuok matag leksiyon, imong mamatikdan ang mga kahon nga naglangkob og mga instruksiyon alang sa mga magtutudlo. Ang mga instruksiyon sa pagtudlo gidisenyo aron tabangan ka sa pagpangandam sa pagtudlo. Makatabang usab kini kanimo nga makahibalo kon unsaon sa paggamit ang mga kalihokan sa pagkat-on nga gisugyot diha sa leksiyon. Kini lagmit mopasabot sa mga katuyoan sa mga kalihokan sa leksiyon o magtanyag og mga sugyot kon unsaon sa pagpahiangay ang sulod sa leksiyon aron mas matubag ang panginahanglanon sa mga estudyante. Kini nga mga sugyot mahimong maglakip og alternatibong mga paagi, mga pangutana, o mga kalihokan nga makatabang kanimo nga mopahiangay sa sulod ug mga kalihokan kon gikinahanglan.

Irebyo ang pipila sa mga instruksiyon sa pagtudlo sa usa ka leksiyon nga imong itudlo puhon. Unsa nga mga pagpahiangay ang lagmit nimong himoon base sa mga instruksiyon sa pagtudlo nga imong nakita?

Posibleng mga Kalihokan sa Pagkat-on

Ang matag leksiyon naglangkob og posibleng mga paagi nga imong magamit sa kasinatian sa pagkat-on. Dili ka kinahanglan nga mogamit sa tanang gisugyot nga kalihokan sa pagkat-on diha sa mga leksiyon nga imong itudlo.

Aron ang imong mga estudyante makabaton og labing maayong kasinatian, kinahanglan nimong gamiton ang sulod niini nga bahin isip usa ka giya kaysa sa usa ka tamdanan [script]. Kon bag-o lang ka nga nagsugod isip magtutudlo sa seminary, mahimong labing maayo nga magsugod pinaagi sa pagsunod sa gisugyot nga mga kalihokan sa pagkat-on. Uban sa dugang nga kasinatian, ang imong abilidad sa pagpahiangay sa sulod niini nga manwal aron labing makatubag sa mga panginahanglan sa imong mga estudyante mahimong mamaayo.

Daghang gisugyot nga mga kalihokan sa pagkat-on ang modapit sa mga estudyante sa pagkompleto niini sa usa ka journal sa pagtuon. Ang PDF sa journal sa pagtuon nga magamit sa mga estudyante anaa sa ChurchofJesusChrist.org/si/seminary/manuals. Palihog kontaka ang imong koordinitor o tagdumala sa programa aron makakuha og giprinta nga mga kopya niini nga journal alang sa imong klase, kon ganahan.

Alang sa tabang aron makahibalo kon unsaon pagbalanse sa gilakip nga gisugyot nga mga kalihokan sa pagkat-on uban sa pagpahiangay sa mga materyal sa kurikulum aron mas matubag ang mga panginahanglan sa mga estudyante, tan-awa sa “Pagsagop Dayon Pagpahiangay sa Kurikulum sa Seminary” sa Pagbansay alang sa Kurikulum sa Seminary (2025). Mahimong labing epektibo ang pagkompleto niini nga pagbansay sulod sa unang pipila ka semana sa tuig.

Dugang nga mga Kapanguhaan

Kadaghanan sa mga leksiyon naglangkob og “Dugang nga mga Kapanguhaan” nga seksiyon sa kataposan sa leksiyon. Kini nga seksiyon naglakip og impormasyon nga mahimong makatabang sa pagpalawom sa pagkat-on. Mahimo kang makakaplag og posibleng mga tubag sa mga pangutana sa mga estudyante o makakaplag og mga pamahayag pinaagi sa mga lider sa Simbahan nga lagmit gusto nimong ilakip sa leksiyon. Kini nga bahin anaa lamang kon ikaw nag-access sa manwal sa magtutudlo pinaagi sa Librarya sa Ebanghelyo nga app o sa Librarya sa Ebanghelyo sa online diha sa ChurchofJesusChrist.org. Ang “Dugang nga mga Kapanguhaan” nga seksiyon wala gilakip sa PDF nga bersiyon sa manwal sa magtutudlo.

Tan-awa kon ang leksiyon nga imong sunod nga itudlo naglakip ba og “Dugang nga mga Kapanguhaan.” Aduna bay bisan unsang mga pangutana, mga tubag, o mga pamahayag ang mga lider sa Simbahan nga tingali makaayo nga ipakigbahin ngadto sa imong mga estudyante?

Dugang nga mga Kalihokan sa Pagkat-on

Kini nga bahin, nalakip usab sa kataposan sa leksiyon, adunay dugang nga mga ideya sa pagkab-ot sa kasinatian sa pagkat-on. Kini nga mga kalihokan sa pagkat-on naglakip og mga paagi sa pagpahiangay sa kasamtangan nga mga kalihokan diha sa leksiyon, o mga paagi sa pagtudlo og materyal nga wala maapil sa leksiyon. Ang dugang nga mga kalihokan sa pagkat-on nalakip lamang sa manwal sa magtutudlo kon ikaw nag-akses niini pinaagi sa Librarya sa Ebanghelyo nga app o sa Librarya sa Ebanghelyo sa online diha sa ChurchofJesusChrist.org. Kini nga seksiyon wala malakip sa PDF nga bersiyon sa manwal sa magtutudlo.

Kon ang imong umaabot nga leksiyon naglakip og usa ka “Dugang nga mga Kalihokan sa Pagkat-on” nga bahin, irebyo kini nga mga kalihokan. Aduna bay bisan unsa nga sa imong hunahuna mahimong mapuslanon nga gamiton sa imong mga estudyante agig dugang o puli sa mga kalihokan sa pagkat-on nga gilakip sa nag-unang seksiyon sa materyal sa leksiyon?

Mga Leksiyon sa Doktrina ug mga Pakigsaad ug mga Leksiyon sa Pagpangandam sa Kinabuhi

Ang mga estudyante kinahanglang tudloan sa mga leksiyon sa Doktrina ug mga Pakigsaad ug mga leksiyon sa Pagpangandam sa Kinabuhi sa tibuok tuig. Sa kinatibuk-an, tulo ka leksiyon kada semana sa kasagaran ang mga leksiyon sa Doktrina ug mga Pakigsaad, samtang ang laing duha ka leksiyon kada semana ang mga leksiyon sa Pagpangandam sa Kinabuhi. Tingali adunay mga semana nga nagkinahanglan nimo nga ipahiangay kining kinatibuk-an nga mga gilaoman.

Ang mosunod nga impormasyon makatabang nimo nga masabtan ang katuyoan ug mga paagi sa pag-implementar sa duha ka matang sa mga leksiyon.

Mga Leksiyon sa Doktrina ug mga Pakigsaad

Ang mga leksiyon sa Doktrina ug mga Pakigsaad nagpasabot sa mga hut-ong sa kasulatan nga gihatagan og gibug-aton matag semana sa Dali, Sunod Kanako. Kini nga mga leksiyon naghatag og mga oportunidad sa mga estudyante aron makabaton og lawom nga mga kasinatian sa pagtuon sa mga pagtulun-an sa Manluluwas diha sa Doktrina ug mga Pakigsaad. Ang mga leksiyon sa Doktrina ug mga Pakigsaad naglakip usab sa mga leksiyon sa Pagbansay sa Doktrinal nga Kahanas ug mga leksiyon sa Sukda ang Imong Nakat-onan.

Doktrinal nga Kahanas

Usa ka importanteng prayoridad alang kanimo isip usa ka magtutudlo ang tabangan ang mga estudyante nga makab-ot ang mga resulta sa doktrinal nga kahanas. Kini nga mga resulta naglakip sa pagtabang sa mga estudyante nga:

• Makakat-on ug mogamit sa balaanong mga baroganan alang sa pag-angkon og espirituhanong kahibalo.

• Makabansay sa mga tudling sa kasulatan sa doktrinal nga kahanas ug sa doktrina sa ebanghelyo ni Jesukristo nga ilang itudlo.

Ang pagbansay sa pinili nga mga tudling ug sa doktrina sa ebanghelyo ni Jesukristo nga gitudlo niini nga mga tudling nagpasabot nga ang mga estudyante:

• Makahibalo ug makasabot sa doktrina nga gitudlo diha sa mga tudling sa kasulatan sa doktrinal nga kahanas.

• Makapasabot sa doktrina sa klaro nga paagi gamit ang may kalabotan nga mga tudling sa kasulatan sa doktrinal nga kahanas.

• Makagamit sa doktrina sa ebanghelyo ni Jesukristo ug sa mga baroganan sa pag-angkon og espirituhanon nga kahibalo sa ilang inadlaw-adlaw nga mga pagpili ug sa ilang mga tubag sa doktrinal, personal, sosyal, ug makasaysayanon nga mga isyu ug mga pangutana.

• Makahinumdom ug makapangita sa mga tudling sa doktrinal nga kahanas ug makasag-ulo sa importanteng hugpong sa mga pulong sa kasulatan.

Ang Doktrinal nga Kahanas nga App makatabang sa mga estudyante nga matuman ang pipila ka resulta sa kahanas sa doktrina. Gidisenyo kini aron matabangan ang mga estudyante nga magpraktis sa pagsag-ulo sa mga pakisayran ug importante nga mga hugpong sa mga pulong sa kasulatan alang sa matag usa sa mga tudling sa doktrinal nga kahanas. Mahimo nimong gamiton ang app sa klase ug awhaga ang mga estudyante sa pag-download niini sa ilang kaugalingong mga device, kon mahimo. Anaa kini sa iOS ug Android nga mga device.

Alang sa dugang nga impormasyon mahitungod sa mga katuyoan sa doktrinal nga kahanas, tan-awa ang “What Is Doctrinal Mastery?” (3:56), nga anaa sa ChurchofJesusChrist.org.

Mga Leksiyon sa Pagbansay sa Doktrinal nga Kahanas

Ang mga leksiyon sa Pagbansay sa Doktrinal nga Kahanas gituyo aron matabangan ang mga estudyante nga maningkamot sa pagkab-ot sa mga resulta sa doktrinal nga kahanas.

Alang sa dugang nga impormasyon mahitungod kon unsaon sa pagtabang ang mga estudyante nga makab-ot ang mga resulta sa doktrinal nga kahanas, tan-awa sa “Pagbansay alang sa Doktrinal nga Kahanas” sa Pagbansay alang sa Kurikulum sa Seminary. Mahimong labing epektibo ang pagkompleto niini nga pagbansay sulod sa pipila ka semana human nimo makompleto ang “Pagsagop Dayon Pagpahiangay sa Kurikulum sa Seminary” nga pagbansay.

Mga Leksiyon sa Sukda ang Imong Nakat-onan

Ang pagsukod usa ka importanteng bahin sa pagkat-on. Ang mga kahigayonan sa paghunong ug pagpamalandong sa pagkat-on mahimong usa ka positibo nga kasinatian alang sa mga estudyante ug makapaikag kanila sa ilang padayong pagtubo ug paglambo ngadto sa pagkahimong mas susama sa Langitnong Amahan ug ni Jesukristo. Pinaagi sa pagsukod sa ilang nakat-onan, ang mga estudyante mahimong aktibong mga sumasalmot sa proseso sa pagkat-on ug mahimong mas responsable sa ilang pagkat-on.

Ang mga leksiyon sa Sukda ang Imong Nakat-onan naghatag sa mga estudyante og mga oportunidad sa pagpasabot sa mahinungdanon nga doktrina gikan sa Doktrina ug mga Pakigsaad, pagpamalandong sa ilang mga kinaiya ug mga tinguha, ug sa pagpakigbahin sa ilang pag-uswag sa pagpalambo sa mga kinaiya nga nakatabang kanila aron mahimong mas mahalaron nga mga disipulo ni Jesukristo. Kini nga mga leksiyon mahimong makatabang sa mga estudyante nga mobati og kalipay samtang sila nag-ila sa ilang pagtubo ug ilhon ang umaabot nga mga dapit alang sa dugang nga pag-uswag. Aron makadawat sa kredito sa kurso, ang mga estudyante kinahanglan nga moapil sa labing menos usa ka leksiyon sa Sukda ang Imong Nakat-onan sa matag tunga sa kurso.

Ang mga estudyante nga wala makaapil sa bisan hain niini nga mga leksiyon atol sa katunga sa kurso kinahanglan nga mokompleto sa usa ka leksiyon sa Sukda ang Imong Nakat-onan alang sa matag tunga kon gikinahanglan aron makadawat og kredito sa kurso. Apil diha sa apendiks niini nga manwal mao ang duha ka leksiyon sa Pagsukod sa Imong Nakat-onan. Ang “Sukda ang Imong Nakat-onan, Bahin 1” mahimong gamiton sa paghuman sa pagsukod sa kahibalo nga wala mahimo sa unang katunga sa kurso. Ang “Sukda ang Imong Nakat-onan, Bahin 2” mahimong gamiton sa paghuman sa pagsukod sa kahibalo sa ikaduhang katunga sa kurso. Mahimo nimong hatagan ang mga estudyante niini nga pagsukod sa kahibalo ug ipakompleto nila kini kauban ang mga klasmeyt o mga sakop sa pamilya. Kon mahuman na sila, awhaga sila sa pagpakigbahin kanimo sa unsay ilang nakat-onan gikan sa kasinatian. Makahatag kini kanimo og mga oportunidad sa pagpangalagad niini nga mga estudyante ug sa pagsaulog sa ilang espirituhanong paglambo uban kanila. Hatagi sila og kredito alang sa pagsukod sa kahibalo alang sa katunga sa kurso kon makompleto na nila kini nga leksiyon sa Sukda ang Imong Nakat-onan.

Alang sa dugang nga impormasyon mahitungod kon unsaon sa pag-implementar sa mga leksiyon sa Sukda ang Imong Nakat-onan, tan-awa sa “Pagbansay alang sa mga Pagsukod sa Kahibalo” sa Pagbansay alang sa Kurikulum sa Seminary. Mahimong labing epektibo ang pagkompleto niini nga pagbansay sulod sa pipila ka semana human nimo makompleto ang “Pagbansay alang sa Doktrinal nga Kahanas.”

Mga Leksiyon sa Pagpangandam sa Kinabuhi

Ang mga leksiyon sa Pagpangandam sa Kinabuhi naghatag sa mga estudyante og mga oportunidad sa paggamit sa mga pagtulun-an sa Manluluwas sa:

• Pagdumala sa lisod nga mga pangutana ug sa mahagiton nga mga kahimtang sa kinabuhi

• Paghimo og makapadasig nga mga pagpili gamit ang mga pagtulun-an ni Jesukristo ug sa Iyang mga propeta

• Pag-ugmad og pagbarog pinaagi sa kinaugalingong paningkamot sa pagsangkap sa kaugalingon ug sa pamilya

• Pagkahimong mas himsog sa pisikal ug sa emosyonal nga paagi

• Pagpalambo og mga kahanas aron magmalampuson sa pag-eskwela

• Paghimo og mga plano aron sa pagpangandam alang sa umaabot nga edukasyon ug pagpanarbaho

• Pagpangandam alang sa misyonaryo ug simbahan nga pagserbisyo

• Pagpangandam sa paghimo ug pagtuman sa mga pakigsaad didto sa templo

Paningkamoti ang pagtudlo og duha ka leksiyon sa Pagpangandam sa Kinabuhi kada semana. Pipila ka semana mahimo kang motudlo og labaw pa niini ug sa ubang semana mahimo ka nga motudlo og mas diyutay, apan sa kasagaran kinahanglan nimong paningkamotan nga itudlo ang duha ka leksiyon kada semana kutob sa mahimo. Maghatag kini og oportunidad sa mga estudyante nga matudloan sa matag usa niini nga mga leksiyon atol sa tuig ting-eskwela. Sa kasagaran dili kinahanglan nga itudlo nimo kini nga mga leksiyon sa usa ka piho nga han-ay, bisan pa og adunay pipila ka leksiyon nga nahunahunaan nga gitudlo sa miaging mga leksiyon.

Ang kinatibuk-ang pagpasabot alang sa matag usa sa mga kategoriya sa mga leksyon sa Pagpangandam sa Kinabuhi mahimong usa ka bililhon nga kapanguhaan sa pagtabang nimo sa pagdesisyon kon kanus-a itudlo ang piho nga mga leksiyon sa Pagpangandam sa Kinabuhi. Kini nga mga kinatibuk-ang pagpasabot makatabang nimo nga dali nga makita ang mga katuyoan sa leksiyon para sa lain-laing mga leksiyon sa Pagpangandam sa Kinabuhi, ingon man usab sa mga sugyot sa gipaspason bahin sa posible nga mga panahon sa tuig nga mahimo nimong ikonsiderar ang pagtudlo niini.

Seguroa nga makakuha og kopya sa usa ka giya sa gipaspason nga gihatag kanimo sa imong koordinitor o tagdumala sa programa.

Mahimo usab ka nga mokonsulta sa “Pagbansay alang sa Paghimo og Giya sa Gipaspason” sa Pagbansay alang sa Kurikulum sa Seminary sa pagtabang nimo nga mapahiangay ang imong giya sa gipaspason ngadto sa mga panginahanglan sa imong mga estudyante.