Pagsagop Dayon Pagpahiangay sa Kurikulum sa Seminary

Adunay daghang mga epektibo nga mga paagi sa pagpangandam sa pagtudlo sa ebanghelyo ni Jesukristo. Kini nga pagpangandam kanunay nga maglakip sa mainampoong pagtuon sa pulong sa Dios ug sa pagtinguha sa giya sa Espiritu Santo aron masayod kon unsaon nga labing makatabang niadtong imong gitudloan aron makabig ngadto ni Jesukristo ug sa Iyang ebanghelyo. Aron matuman kini, siguroha ang pagtuon sa scripture block diha sa Dali, Sunod Kanako nga eskedyul. Makatabang kini kanimo sa imong pangpangandam sa leksiyon samtang ikaw magrebyo sa kurikulum. Ang kurikulum makatabang kanimo sa pag-ila sa mahinungdanon nga mga baroganan ug doktrina diha sa scripture block, makatabang sa estudyante nga masayod, mohigugma, ug mosunod sa Langitnong Amahan ug ni Jesukristo, ug mosunod sa dinasig nga mga sundanan alang sa epektibo nga pagtudlo.

Ikonsiderar kining tambag ni Presidente Dallin H. Oaks sa Unang Kapangulohan mahitungod sa paggamit sa kurikulum aron sa pagpangandam sa mga leksiyon sa seminary:

Una natong hangopon, dayon atong ipahiangay. Kon hingpit kita nga pamilyar sa gitakda nga leksiyon nga atong ihatag, nan makasunod kita sa Espiritu aron sa pagpahiangay niini. Apan adunay tintasyon, kon maghisgot kita kabahin niini nga pagpailin-ilin, nga mosugod sa pagpahiangay imbis nga mohangop. Usa kini ka pagbalanse. Usa kini ka nagpadayon nga hagit. Apan ang pamaagi nga unang mohangop ug dayon mopahiangay usa ka maayo nga paagi sa luwas nga pagtudlo.

(“A Panel Discussion with Elder Dallin H. Oaks” [sibya sa satellite sa Seminaries and Institutes of Religion, Ago. 7, 2012], broadcasts.ChurchofJesusChrist.org

• Unsa may ipasabot sa pagsagop ug sa papahiangay sa kurikulum samtang ikaw mag-andam og leksiyon?

Si Presidente Henry B. Eyring mitabang kanato sa pagsabot sa ubang mga rason nga kita tingali kinahanglan nga mopahiangay sa kurikulum:

Adunay mas daghan pang mga sugyot nga mga ideya sa pagtudlo, mga pamaagi sa pagtudlo kanila, ug mapuslan nga mga kaparehas nga mga pakisayran [cross-references] kaysa magamit ni bisan kinsa kanato. … Apan tungod kay ganahan kita nga ang atong mga estudyante mangutana sa Ginoo aron nga sila unta malamdagan, kinahanglan ato silang panalanginan pinaagi sa ehemplo. Aron mabuhat kana kita mahimong mobasa sa kurikulum—sa matag pulong. Kita tingali walay panahon sa pagpangita ug pagtuon sa matag pakisayran, apan ang Dios nakaila sa atong mga estudyante. …

…Ang Ginoo hingpit nga nahibalo unsa ang nahibaloan sa [mga estudyante] ug kon unsa ang ilang gikinahanglan. Gihigugma Niya sila ug siya naghigugma kanato. Ug pinaagi sa iyang tabang kita … makapili dili lamang niadtong mga bahin sa kurikulum nga motugot kanato sa hingpit nga paggamit sa atong mga gahom sa pagtudlo apan niadtong mopakanaog sa mga gahom sa langit ngadto sa mga estudyante diha sa atong lawak klasehanan nianang adlawa.

(“The Lord Will Multiply the Harvest” [gabii uban sa usa ka General Authority, Peb. 6, 1998], ChurchofJesusChrist.org)

• Ngano kaha sa imong hunahuna nga importante nga unahon ang pagsagop kon unsa ang anaa sa mga materyal sa leksiyon sa dili pa kini ipahiangay?

• Unsa kaha ang kalainan sa mga paagi sa pag-andam og leksiyon sa magtutudlo nga naggamit sa kurikulum ug sa magtutudlo nga wala maggamit niini?

Unsa ang Ikonsiderar kon Magpahiangay sa mga Leksiyon

Ania ang pipila ka mga pangutana nga ikonsiderar samtang ikaw mohangop ug mopahiangay sa mga materyal sa leksiyon:

1. Unsa ang katuyoan sa kinatibuk-an nga leksiyon ingon man ang nagkalain-lain nga bahin sa leksiyon?

2. Unsa ang intensyon sa dinasig nga tagsulat, ug ang pagpahiangay nga akong gikonsiderar nahiuyon ba niini?

3. Unsa ang akong mga rason nga gusto man nga ipahiangay ang leksiyon? Kini usa ba lamang ka personal nga kagustohan, o ang kausaban makahatag ba sa mga estudyante og mas maayo nga kasinatian sa pagkat-on?

4. Ang akong pagpahiangay nasubay ba sa mga pag-aghat sa Espiritu Santo?

Mahimo nimong ipahiangay ang usa ka leksiyon aron sa

• pagsunod sa mga pag-aghat sa Langitnong Amahan nga nadawat pinaagi sa Espiritu Santo. (Tan-awa sa pag-estudyo sa sitwasyon ni Brother Dube.)

• pagtubag sa espesyal o talagsaon nga mga panginahanglan, mga abilidad, ug anaa nga mga kapanguhaan sa mga estudyante. (Tan-awa sa pag-estudyo sa sitwasyon nila ni Brother Dube ug Brother Reyes.)

• pagpahaom sa mga bahin sa leksiyon ngadto sa lokal nga mga sirkumstansiya ug kultura. (Tan-awa sa pag-estudyo sa sitwasyon ni Sister Rodriguez.)

• pagtabang sa mga estudyante sa ialng kasamtangan nga mga problema ug mga pangutana nga kinahanglang atimanon dayon. (Tan-awa sa pag-estudyo sa sitwasyon ni Brother Dube.)

• pagpangita og mas maayo nga paagi sa pagtuman sa sama nga katuyoan sa gitun-an nga seksiyon sa leksiyon. (Tan-awa sa mga pag-estudyo sa sitwasyon ni Brother Li ug Sister Martin.)

• paggamit sa labing bag-o nga direksiyon ug mga kapanguhaan nga gihatag sa mga lider sa Simbahan. (Tan-awa sa pag-estudyo sa sitwasyon ni Sister Schmidt.)

Mga Pag-estudyo sa Sitwasyon [Case Studies]

Sister Rodriguez

Si Sister Rodriguez nangandam sa pagtudlo sa leksiyon sa “Mateo 1:18–25; Lucas 1:26–35.” Nakahibalo siya nga ang mga estudyante sa iyang klase ganahan nga makahibalo kon unsa ang gitudlo sa mga kasulatan kabahin sa inahan ni Jesus, si Maria. Adunay kultura sa kusog nga pagbati ug lain-laing pagtuo kabahin ni Maria sa ilang siyudad. Daghan gani ang nagsimba ni Maria tungod sa iyang tahas isip ang inahan sa Dios. Samtang siya nagtuon sa leksiyon gikan sa kurikulum, si Sister Rodriguez nangita og tukma nga dapit sa pagtabang sa mga estudyante nga makasabot kon unsa ang gitudlo sa mga kasulatan ug sa mga lider sa Simbahan kabahin ni Maria.

Usa sa mga kalihokan sa pagtuon diha sa leksiyon nagdapit sa mga estudyante sa pagpangita alang sa mga pagtulon-an kon si kinsa ang mga ginikanan sa Manluluwas diha sa Lucas 1:30–35, Mateo 1:18–23, ug sa Alma 7:10.

Si Sister Rodriguez nakahukom sa pagpahiangay sa leksiyon human mabasa sa mga estuyante ang Alma 7:10 pinaaig sa pagdugang sa mosunod nga duha ka pangutana sa unsay nalakip sa kurikulum.

“Unsa ang gitabang ni Alma kanato aron makasabot kabahin ni Maria? Samtang kita nagtahod ug naghigugma ni Maria ug sa ubang matinud-anong mga disipolo diha sa kasulatan, giunsa sa Alma 7:11–13 pagtabang kanato nga makasabot ngano nga kita nagsimba lamang sa Langitnong Amahan ug ni Jesukristo?”

Brother Li

Samtang si Brother Li nangandam sa pagtudlo sa leksiyon sa “Juan 1:1–16,” iyang nakita ang mosunod nga sugyot ug duha ka pangutana sa sinugdanan sa leksiyon:

Ipakita ang mosunod nga hulagway o pagdala og bola nganha sa klase nga gigamit sa sikat nga isport, ug isukna ang mosunod nga mga pangutana. Mahimong mogamit og laing aytem kon ang pagkat-on pa og dugang mahitungod sa aytem makatabang sa mga estudyante nga makaamgo nga mas bililhon kini kay sa ilang orihinal nga gihunahuna.

• Sa imong hunahuna, unsa kadako ang bili niini nga bola?

• Unsa kaha kon gigamit kini sa championship sa dula sa tibuok kalibotan o gipirmahan sa usa ka sikat nga magdudula?

Si Brother Li nagpadayon sa pagbasa sa leksiyon aron makat-on kon unsa kaha ang katuyoan sa pagdala og bola ngadto sa klase. Iyang gitino nga ang katuyoan mao ang pagtabang sa pag-andam sa mga estuydante aron makasabot nga samtang madugangan ang atong pagkat-on kon si kinsa si Jesukristo kaniadto sa wala pa ang Iyang mortal nga kinabuhi, mas madugangan ang atong pasalamat sa bili sa Iyang misyon dinhi sa yuta.

Gusto nga matuman kini nga katuyoan sa labing epektibo nga paagi alang sa iyang mga estudyante, siya namalandong sa makadiyot kon unsa nga aytem ang iyang madala sa klase nga ang labing haom sa kasinatian sa mga estudyante. Nakahukom siya sa pagpahiangay sa leksiyon pinaag sa pagdala og usa ka yano nga kwentas ngadto sa klase. Human mopaambit ang mga estudyante kon pila sa ilang hunahuna ang kantidad sa kwentas, siya mosulti kon si kinsa ang naghimo sa kwentas ug nganong ang pagkahibalo sa kasaysayan niini nakapahimo niini nga labing makahuloganon ngadto kaniya kaysa mahimo niini.

Sister Martin

Samtang si Sister Marin nagandam sa pagtudlo sa leksiyon “Mga Buhat 3,” nakabantay siya og usa ka sugyot nga ipasalida ang usa ka bidyo nga naghulagway sa usa ka bakol nga lalaki nga giyao ni Pedro ug Juan pinaagi sa gahom sa Dios. Gitan-aw niya ang bidyo ug nakadayeg sa kaepektibo niini. Apan nasayod usab siya nga ang mga estudyante ikatulo na nakatan-aw og mga bidyo sa iyang klase niining semanaha. Nakahukom siya nga mangita og laing paagi sa pagtuman sa katuyoan sa mao nga bidyo.

Nakaamgo siya nga ang bidyo usa ka biswal nga pasundayag sa matag pulong niini nga isotrya. Siya mitapos nga ang katuyoan sa bidyo mao ang pagtugot sa mga estudyante nga ihulagway ang unsay nahitabo kay sa basahon lang kini. Aron sa pagpahiangay sa leksiyon, nakadeterminar siya nga dapiton ang mga estudyante sa pagbasa ug dayon sa pagdrama-drama sa unsay nahitabo sa istorya, nga motugot sa mga estudyante nga mahimong aktibo nga mga partisipante, mopahuway sa pagtan-aw og mga bidyo, ug sa gihapon makatabang nila sa paghulagway niini nga panghitabo.

Brother Dube

Si Brother Dube makugihong nag-andam sa Biyernes sa wala pa ang hinapos sa semana nga komperensiya aron sa pagtudlo sa leksiyon diha sa basahon sa Mga Taga-Roma sigon sa gilatid diha sa kurikulum alang sa umaabot nga Lunes. Sa iyang kahingangha, iyang nadungog ang propeta nga mipahibalo atol sa komperensiya nga ang unang templo itukod sa ilang dapit sa dili madugay. Gamay ra kaayo sa iyang mga estudyante ang nakakita og templo sa personal. Nasayod siya nga ang mga estudyante motambong sa klase nga mahinamon nga maghisgot kabahin sa templo ug daghan ang adunay mga pangutana bahin niini.

Human sa pag-ampo, gibati niya nga giaghat sa Espiritu Santo sa paglaktaw ug itudlo ang leksiyon nga may kalabotan sa mga panghitabo [contextual lesson] “1 Pedro 3:18–22; 4:1–6” ug ang kauban niini nga leksiyon alang sa doktrinal nga kahanas “1 Pedro 4:6” sa Lunes ug sa Miyerkules. Ingon og mao kini ang insakto nga pag-usab tungod kay ang leksiyon nga may kalabotan sa mga panghitabo nagsaysay sa katuyoan nga, “Kini nga leksiyon makatabang kaninyo sa pagtuon og mga paagi aron sa pagtabang sa Manluluwas sa Iyang buhat sa pagtubos sa patay.” Gibati niya nga kining talagsaon nga panahon maoy labing maayo nga oportunidad sa pagtabang sa mga estudyante nga madasig kabahin sa pagpangandam sa pagtubos sa ilang mga katigulangan sa umaabot nga templo.

Samtang si Brother Dube nangandam sa leksiyon para sa Lunes, nakamatikod siya sa usa ka pagdapit sa pag-aplay sa unsay nakat-onan sa mga estudyante nga nag-ingon:

Bisitaha ang FamilySearch.org o gamita ang FamilySearch Family Tree nga app. Tan-awa kon makakita ka ba sa mga ngalan sa katigulangan kinsa nagkinahanglan pang makadawat sa mga ordinansa sa pagkapari. Mahimo nimong ireserba kini nga mga ngalan ug dalhon kini ngadto sa templo sa imong kaugalingon o isumiter ang ilang mga ngalan ngadto sa templo aron ang laing tawo mahimong mopahigayon sa mga ordinansa alang kanila. Ang feature nga Mga Ordinansa nga Andam Na mahimong gamiton sa pagtabang kanimo aron dali nga maila ang mga katigulangan kinsa nagkinahanglan sa mga ordinansa sa pagkapari.

Si Brother Dube nasayod nga ang kadaghanan sa iyang mga estudyante dili maka-access sa internet o sa FamilySearch Family Tree nga app. Maalamon niyang gipahiangay ang imbitasyon sa pag-aplay sa ilang nakat-onan aron sugdan sa pagsulat ang mga panid sa grupo sa pamilya nga anaa sa papel uban sa ilang mga pamilya ug sa pagpakigsulti sa temple and family history consultant sa ilang ward aron makat-on kon unsaon nila sa pagsiksik og laing mga ngalan sa pamilya nga maandam nila alang sa umaabot nga buluhaton sa templo.

Sister Schmidt

Human sa pagtuon sa leksiyon “Mateo 22:34–40” kabahin sa duha ka dagko nga mga sugo, si Sister Schmidt nakahinumdom sa usa ka pamahayag nga gisulti sa labing bag-o nga kinatibuk-ang komperensiya nga haom kaayo alang niini nga leksiyon. Nakabantay siya nga sa wala pa matapos ang leksiyon, adunay mas dugay na nga pamahayag nga gituyo aron sa pagtabang sa mga estudyante nga makasabot nga kon kita mohigugma sa Dios, Iyang ipaling ang atong mga kasingkasing ngadto sa kaayohan sa uban. Iya kining gipulihan sa mosunod nga pamahayag:

Gimando ni Jesus ang una nga dakong sugo: “Higugmaa ang Ginoo nga imong Dios sa tibuok mong kasingkasing, sa tibuok mong kalag ug sa tibuok mong hunahuna” [Mateo 22:37]. …

Mao nga una, higugmaa ang Amahan ug ang Anak.

Ikaduha, “Higugmaa ang imong isigkatawo” [Mateo 22:39]. …

Ikatulo, higugmaa ang imong kaugalingon.

Daghan ang naglisod dinhing dapita. Dili ba makapainteres nga ang paghigugma sa atong kaugalingon ingon og mas lisod kay sa paghigugma sa uban? Apan ang Ginoo miingon, “Higugmaa ang imong isigkatawo sama sa imong kaugalingon.” Iyang gihatagan og bili ang pagkadios sa sulod kanato, ug mao nga kinahanglan kita usab. Kon kita nabug-atan sa mga kasaypanan, mga kasakit, mga pagbati sa kakulang, kasagmuyo, kasuko, o sala, ang gahom sa Pag-ula sa Manluluwas, pinaagi sa balaanon nga plano, mao ang usa sa mga butang nga makapabayaw sa kalag. (Ronald A. Rasband, “Ang mga Butang sa Akong Kalag,” Liahona, Nov. 2021, 39, 40)

Si Sister Schmidt mibati nga ang pamahayag gikan sa bag-o lang nga kinatibuk-ang komperensiya makatuman sa samang katuyoan sama sa usa nga makita diha sa leksiyon sa kurikulum. Dugang pa, siya nasayod nga kini usab makatabang sa uban niya nga mga estudyante kinsa nanglimbasog sa paghigugma sa ilang mga kaugalingon aron makakita nga ang paghigugma sa Dios makatabang usab kanila aron mobati sa ialng kaugalingong bili.

Brother Reyes

Samtang nagtuon sa leksiyon sa “Gipadayag 15–19,” si Brother Reyes nakakaplag og kalihokan nga nagdapit sa mga estudyante nga mopili sa pagtuon og duha sa mosunod nga tulo ka opsiyon:

• Opsiyon A: Mga anghel ug mga salot

• Opsiyon B: Pagkadautan ug ang gahom sa Manluluwas

• Opsiyon C: Kaminyoon sa Kordero

Ang matag opsiyon adunay lainlaing mga pangutana, mga pakisayran sa kasulatan, ug mga kalihokan nga may kalabotan niini. Gibati ni Brother Reyes nga ang katuyoan sa kalihokan mao ang pagtabang sa mga estudyante nga makasabot sa gihatagan og importansiya nga baroganan niini nga leksiyon: Si Jesukristo makatabang kanato sa pagbuntog sa pagkadaotan sa kataposang mga adlaw.

Samtang ganahan si Brother Reyes sa mga opsiyon, iyang nakita ang mosunod nga ideya nga nakatabang sa pagtuman sa sama nga katuyoan diha sa “Dugang nga mga Kalihokan sa Pagkat-on” nga seksiyon sa leksiyon, ug iyang gibati nga ang iyang mga estudyante mas nagkinahanglan niini:

Paglimitar sa impluwensiya sa Babilonia ngari kanato

Kon ang mga estudyante makabenepisyo gikan sa mas dako nga paghatag og gibug-aton sa pagbuntog sa Babilonia, ikonsiderar ang paggamit sa pakigpulong ni Elder David R. Stone, “Zion Taliwala sa Balilonia,” Liahona, Mayo 2006, 90–93. Ang iyang analohiya sa templo sa Manhattan mahimong gamiton aron sa pagtabang sa mga estudyante nga makaila sa kaimportante sa pagdugang sa ilang panahon uban sa Manluluwas samtang limitahan ang impluwensiya sa Babilonia diha kanila. Ang mga estuyante mahimo usab nga makabenepisyo gikan sa pagtuon ug paghisgot sa mga sumbanan sa Ginoo alang kanila diha sa Alang sa Kalig-on sa mga Kabatan-onan: (booklet, 2011).

Si Brother Reyes miandam og 10 ka minutos nga bahin sa leksiyon base sa dugang nga mga ideya. Aron makagahin og oras alang niini, nakahukom siya sa pagdapit sa mga estudyante nga mopili sa pagtuon og usa lamang sa tulo sa gisugyot nga mga opsiyon nga makita diha sa pinakauyokan nga bahin sa leksiyon.