Pagbansay alang sa Doktrinal nga Kahanas

Pasiuna sa Doktrinal nga Kahanas

Niadtong 2016, si Presidente M. Russell Ballard sa Korum sa Napulog Duha ka Apostoles mipaila sa mahinungdanon nga katuyoan sa doktrinal nga kahanas sa mga kinabuhi sa kabatan-onan karon ug ang kamahinungdanon sa tahas nga ikaw isip usa ka magtutudlo sa seminary aduna sa pagpatuman niini:

Usa pa lamang ka henerasyon ang milabay nga ang pag-akses sa atong kabatan-onan sa impormasyon kabahin sa atong kasaysayan, doktrina, ug mga binuhatan limitado lamang ngadto sa mga materyal nga giimprinta sa Simbahan. Gamay rang mga estudyante ang nakasugat og lahi nga mga interpretasyon. Kadaghanan, ang atong kabatan-onan protektado sa ilang panimuyo.

Ang kurikulum nato niadtong higayona, bisan og maayo ang tuyo, wala moandam sa mga estudyante para sa karon—diin ang mga estudyante diha-diha dayon adunay akses sa computer sa lahi-lahing panan-aw mahitungod sa Simbahan. Karon, unsay ilang makita sa ilang mga mobile device maingon og makahagit sa pagtuo labaw kay sa makadugang og pagtuo. …

Tungod niini nga mga hagit, ang Board of Education bag-o lang miaprubar og bag-ong inisyatibo sa seminary nga gitawag og Doktrinal nga Kahanas. … Kining bag-ong inisyatibo magtutok sa pagpalambo ug pagpalig-on sa pagtuo sa atong mga estudyante diha kang Jesukristo ug pagdugang sa ilang abilidad nga masunod ug magamit ang ebanghelyo sa ilang kinabuhi. Pinaagi sa paggamit sa mga kasulatan ug sa pulong sa mga propeta, makat-onan nila unsaon sa paglihok uban sa pagtuo kang Kristo sa pag-angkon og espirituhanon nga kahibalo ug panabot sa Iyang ebanghelyo. Ug may mga oportunidad sila sa pagkat-on unsaon sa pag-aplay sa doktrina ni Kristo ug mga baroganan sa ebanghelyo diha sa mga pangutana ug mga hagit nga ilang madungog ug makita kada adlaw sa ilang mga higala ug sa social media.

Kini nga inisyatibo dinasig ug tukma sa panahon. Duna kini talagsaong impluwensya sa atong kabatan-onan. Hinoon, ang kalamposan sa Doktrinal nga Kahanas, ug sa tanang uban pang mga programa sa pagtuon sa CES, mag-agad sa usa ka mahinungdanong bahin diha nimo. (M. Russell Ballard, “The Opportunities and Responsibilities of CES Teachers in the 21st Century” [usa ka gabii kauban sa General Authority, Peb. 26, 2016], broadcasts.ChurchofJesusChrist.org, broadcasts.ChurchofJesusChrist.org)

• Unsa ang labing mahinungdanon nganha kanimo gikan sa unsay gipakigbahin ni Presidente Ballard?

• Ngano sa imong hunahuna ang kabatan-onan karon kinahanglan nga andam sa nagkalainlaing paagi kay sa nanglabay nga mga henerasyon sa pagpalig-on sa ilang hugot nga pagtuo diha ni Jesukristo?

Doktrinal nga Kahanas diha sa Kurikulum

Diha sa manwal sa magtutudlo, ang mga kasinatian sa pagkat-on sa doktrinal nga kahanas gilakip na matag semana sa pagtabang sa mga estudyante sa pagpatuman sa mga resulta sa doktrinal nga kahanas. Kini nga mga resulta naglakip og pagtabang sa mga estudyante nga

• magkat-on ug maggamit sa balaanong mga baroganan alang sa pag-angkon og espirituhanon nga kahibalo ug

• magbansay sa pinili nga mga tudling sa kasulatan ug ang doktrina sa ebanghelyo ni Jesukristo nga ilang gitudlo.

Pinaagi sa pagbansay sa pinili nga mga tudling ug sa doktrina sa ebanghelyo ni Jesukristo nga ilang gitudlo, ang mga estudyante makahimo sa

• pagkahibalo ug pagsabot sa doktrina nga gitudlo diha sa mga tudling sa kasulatan sa doktrinal nga kahanas;

• pagpasabot sa doktrina sa klaro nga paagi gamit ang may kalabotan nga mga tudling sa kasulatan sa doktrinal nga kahanas;

• paggamit sa doktrina sa ebanghelyo ni Jesukristo ug sa mga baroganan sa pag-angkon og espirituhanon nga kahibalo sa ilang inadlaw-adlaw nga mga pagpili ug sa ilang mga tubag sa doktrinal, personal, sosyal, ug makasaysayanon nga mga isyu ug mga pangutana; ug

• paghinumdom ug pagpangita sa mga tudling sa doktrinal nga kahanas ug pagmemorya sa importanteng hugpong sa mga pulong sa kasulatan.

Mga Leksiyon sa “Pag-angkon og Espirituhanon nga Kahibalo”

Mahimo nimong ipaila sa mga estudyante ang mga baroganan sa pag-angkon og espirituhanon nga kahibalo pinaagi sa pagtudlo sa “Pag-angkon og Espirituhanong Kahibalo” mga bahin 1, 2, ug 3. Seguroha nga matudlo ang matag usa niining mga leksiyon kon magsugod na ang seminary atol sa pagsugod sa tuig ting-eskwela. Kini nga mga leksiyon nagsangkap og mga baroganan sa pundasyon nga ang ubang leksiyon sa doktrinal nga kahanas matukod. Ang pag-angkon og espirituhanon nga kahibalo nga mga leksiyon kinahanglan nga itudlo sa seminary matag tuig. Ang matag bahin nagpaila sa mga estudyante sa usa sa mga baroganan sa pag-angkon og espirituhanon nga kahibalo.

• Bahin 1: Lihukon inubanan sa hugot nga pagtuo

• Bahin 2: Susihon ang mga pangutana ug mga pagpakabana inubanan sa mahangturong panglantaw

• Bahin 3: Tinguhaon ang dugang nga panabot pinaagi sa balaanong gitudlo nga mga tinubdan

Mga Leksiyon sa Tudling alang sa Doktrinal nga Kahanas

Adunay duha ka leksiyon nga may kalabotan sa matag tudling sa doktrinal nga kahanas, usa ka leksiyon nga may kalabotan sa mga panghitabo ug ang leksiyon sa doktrinal nga kahanas. Ang mga resulta sa doktrinal nga kahanas gisulbad niining duha ka leksiyon.

Diha sa leksiyon nga may kalabotan sa mga panghitabo, ang tudling sa doktrinal nga kahanas ipaila sa kinatibuk-an sa hut-ong sa kasulatan. Ang mga estudyante kinahanglan nga mogahin og igong panahon sa pagtuon sa doktrina nga gitudlo sa tudling aron sila masayod ug makasabot niini. Kini makatabang sa mga estudyante sa pagpasabot ug pagamit sa doktrina sa mosunod nga leksiyon sa tudling alang sa doktrinal nga kahanas.

Diha sa leksiyon sa tudling alang sa doktrinal nga kahanas, ang mga estudyante adunay kahigayonan sa pagpasabot sa doktrina gamit ang tudling sa doktrinal nga kahanas ug sa pagsugod sa pagmemorya sa pakisayran sa kasulatan ug importanteng hugpong sa mga pulong sa kasulatan. Mahimo usab nimong awhagon ang mga estudyante sa pagmemorya sa tibuok tudling. Ang pagtabang sa mga estudyante sa pagpasabot sa doktrina ug pagmemorya sa pakisayran ug importanteng hugpong sa mga pulong sa kasulatan importante nga resulta sa doktrinal nga kahanas. Kining mga kalihokan sa pagkat-on dili magkinahanglan og daghang panahon, apan importante kini nga unahon.

Ang seksiyon sa “Pagpraktis sa paggamit” kinahanglang gahinan og dakong panahon diha sa leksiyon sa tudling alang sa doktrinal nga kahanas. Ang matag seksiyon sa pagpraktis sa paggamit magsugod sa kahigayonan alang sa mga estudyante sa pagrebyo sa mga baroganan sa pag-angkon og espirituhanon nga kahibalo. Ang mga estudyante kinahanglan nga kanunay magrebyo niining mga baroganan aron mahimo silang mapasaligon sa paggamit niini. Pagbantay nga dili magdahom nga tungod kay ang usa o duha ka estudyante kahibalo na kaayo sa mga baroganan nga ang tanan nimong estudyante kahibalo usab niini.

Human sa pagrebyo sa mga baroganan sa pag-angkon og espirituhanon nga kahibalo, ang mga estudyante dayon hatagan og usa ka senaryo nga naghulagway og pangutana o sitwasyon diin ang eksakto nga pagsabot sa tinuod nga doktrina makatabang. Ang mga estudyante makapraktis sa paggamit sa doktrina nga gitudlo diha sa tudling sa doktrinal nga kahanas ug sa mga baroganan sa pag-angkon og espirituhanon nga kahibalo sa pagtubag sa mga pangutana o sitwasyon.

Mahimo kang mopahiangay sa mga senaryo ug ang gisugyot nga mga pangutana o ubang mga kalihokan sa pagkat-on kon gikinahanglan aron mas matubag ang mga panginahanglan sa mga estudyante. Seguroha nga ang bisan unsa nga mga pagpahiangay makahatag lang gihapon sa mga estudyante og mga kahigayonan sa pagpraktis sa paggamit sa doktrina ug mga baroganan sa pag-angkon og espirituhanon nga kahibalo ngadto sa usa ka tinuod nga sitwasyon.

Makabantay usab ka nga sa kataposan sa matag leksiyon sa doktrinal nga kahanas usa ka gisugyot nga pagrebyo ang buhaton sa klase human sa pipila ka adlaw. Kining mga kalihokan sa pagrebyo gidisenyo aron sa pagtabang sa mga estudyante sa pagmemorya sa pakisayran sa kasulatan ug importanteng hugpong sa mga pulong sa kasulatan alang sa matag tudling sa doktrinal nga kahanas.

Mga Rebyo sa Doktrinal nga Kahanas

Pipila sa sinemana nga mga hut-ong sa kasulatan diha sa Dali, Sunod Kanako nga pagpadagan wala maglakip og tudling sa doktrinal nga kahanas. Aron sa paghatag sa mga estudyante og sinemana nga kasinatian sa doktrinal nga kahanas, ang manwal sa magtutudlo, manwal sa estudyante, ug online nga kurikulum sa seminary naglakip og rebyo sa doktrinal nga kahanas isip usa sa lima ka leksiyon niini nga mga semana. Kini nga mga leksiyon gidisenyo aron sa pagtabang sa mga estudyante sa pagmemorya sa mga pakisayran sa kasulatan ug importanteng hugpong sa mga pulong sa kasulatan, pagsabot sa doktrina, ug paggamit sa doktrina.

Kon adunay leksiyon sa tudling alang sa doktrinal nga kahanas nga nalaktawan o malaktawan sa mga estudyante tungod sa walay klase sa ilang eskwelahan, imo gayod itudlo kining mga leksiyon sa tudling alang sa doktrinal nga kahanas agig hulip sa rebyo sa doktrinal nga kahanas. Ang leksiyon nga may kalabotan sa mga panghitabo nga kauban sa leksiyon sa doktrinal nga kahanas magkinahanglan usab nga ibalhin aron ihulip sa laing leksiyon atol sa semana. Tan-awa ngadto sa lokal nga giya sa pagpadagan nga gihatag sa imong coordinator o administrator sa programa aron mahibaloan kanus-a gayod ka motudlo sa mga leksiyon sa doktrinal nga kahanas nga nalaktawan sa mga estudyante tungod sa eskedyol sa ilang eskwelahan.

Mga Kahanas aron sa Epektibo nga Pagtudlo sa Doktrinal nga Kahanas

Ang mosunod nga mga pagbansay motudlo og mga kahanas nga makatabang sa mga estudyante nga makaangkon og kahanas sa doktrina. Ang matag pagbansay (1) nag-ila ug nagpasabot sa kahanas, (2) nagpakita ug pagpraktis kon unsaon paggamit sa kahanas, (3) naglakip og oportunidad sa pagpamalandong pinaagi sa pag-analisar sa kahanas, ug (4) nagpadangat og imbitasyon sa paglakip sa kahanas diha sa imong pagtudlo.

Ipatin-aw ang rason alang sa doktrinal nga kahanas nga kalihokan.

Ipasabot:

Ang paghatag og rason sa pagbuhat sa doktrinal nga kahanas nga kalihokan makadasig sa mga estudyante sa pag-apil sa kalihokan. Magtugot usab kini sa Espiritu Santo sa pagtudlo kanila bahin sa kaimportante sa kalihokan. Human nimo masulti unsa ang buhaton sa klase, pagpakigbahin og usa o duha ka rason ngano nga imong gibuhat ang kalihokan aron makasabot ang mga estudyante sa bili sa pagbuhat niini.

Ipakita:

“Class, sulod sa pipila ka minuto atong ipasabot ang doktrina nga atong nakat-onan gikan sa Lucas 2:10–12 nga si Jesukristo mao ang Manluluwas sa kalibotan. Usa sa rason nga ato kining gibuhat mao ang pagtabang kanato nga mahimong masaligon nga motubag kon aduna kitay kaila nga mangutana kanato ngano nga si Jesukristo importante kanato.”

Praktison:

Kompletoha ang mosunod nga mga pahayag.

1. “Okay, class. Maghimo kita og kalihokan nga makatabang kanato nga mamemorya ang pakisayran sa doktrinal nga kahanas uban sa importante nga hugpong sa mga pulong. Usa sa rason nga kita naningkamot nga mamemorya kini mao …”

2. “Sa mosunod nga pipila ka minuto, atong rebroyohon ang mga baroganan sa pag-angkon og espirituhanon nga kahibalo. Ang pagkahibalo niini nga mga baroganan makatabang kanato nga …”

3. “Atong praktison gamit ang tulo ka baroganan sa pag-angkon og espirituhanon nga kahibalo. Ang paggamit niini nga mga baroganan maka…”

Pag-analisar:

Unsa ang inyong nakat-onan samtang kamo nagpraktis sa pagpasabot sa mga rason sa paghimo sa doktrinal nga kahanas nga kalihokan?

Paglakip:

Samtang imong giandam ang matag doktrinal nga kahanas nga kalihokan, pagsulat og labing minos usa ka rason nga aduna kini bili sa mga estudyante.

Dapita ang mga estudyante sa pagrebyo sa mga baroganan sa pag-angkon og espirituhanong kahibalo.

Ipasabot:

Samtang ikaw kanunay magrebyo sa mga baroganan sa pag-angkon og espirituhanong kahibalo uban sa imong klase, ang Espiritu Santo makatabang sa mga estudyante sa paghinumdon ug paggamit kanila sa panahon sa panginahanglan. Mahimo kang modapit sa mga estudyante sa pagrebyo niini nga mga baroganan sa dili ka pa mopakigbahin sa mga sitwasyon o samtang sila nagtrabaho sa mga senaryo. Kini nga mga imbitasyon naglakip sa oportunidad alang sa mga estudyante sa pagrebyo sa labing minos usa ka baroganan, mga instruksiyon alang sa unsa kadugaya nila nga rebyohon ang mga baroganan. ug usa ka oportunidad alang kanila sa pagpakigbahin unsa ang ilang nakat-onan. Sa pagbuhat niini, ang mga estudyante mas makagamit sa mga baroganan isip kabahin sa pagpraktis sa paggamit.

Ipakita:

Karon samtang kita magrebyo sa mga baroganan sa pag-angkon og espirituhanong kahibalo gikan sa Mahinungdanon nga Dokumento sa Doktrinal nga Kahanas (2018), atong bahinon ang grupo ngadto sa tulo. Ang matag grupo morebyo og lainlain nga baroganan.

• Ang usa ka grupo morebyo sa “Baroganan 1: Lihokon inubanan sa Hugot nga Pagtuo.”

• Ang laing grupo morebyo sa “Baruganan 2: Susihon ang mga Konsepto ug mga Pangutana inubanan sa Mahangturong Panglantaw.”

• Ug ang usa ka grupo morebyo sa “Baruganan 3: Tinguhaon ang Dugang nga Panabut pinaagi sa Balaanong Gitudlo nga mga Tinubdan.”

Paggahin og tulo hangtod sa upat ka minuto sa pagbasa ug pag-andam sa pagpakigbahin sa inyong grupo sa usa ka paagi nga ang baroganan makatabang sa usa ka tawo nga nag-atubang og lisod nga pangutanan o kahimtang.

Praktison:

1. Pagsulat og imbitasyon alang sa matag estudyante aron sa pagrebyo og usa ka baroganan sa pag-angkon og espirituhanon nga kahibalo.

2. Pagpraktis sa pagpaabot sa imong imbitasyon ngadto sa usa ka kauban, sakop sa pamilya, o higala.

Pag-analisar:

Samtang nagpraktis ka, unsay imong nakat-onan bahin sa kaimportante sa pagpaabot sa klaro ug tinuyo nga imbitasyon sa pagrebyo sa mga baroganan sa pag-angkon og espirituhanong kahibalo?

Paglakip:

Pagsulat og plano sa kanunay nga pag-imbitar og mga estudyante sa pagrebyo sa mga baroganan sa pag-angkon og espirituhanong kahibalo.

Pangutana og mga pangutana nga makatabang sa mga estudyante sa pagsulti kon sa unsa nga paagi nga ang tulo ka baroganan sa pag-angkon og espirituhanon nga kahibalo makatabang sa usa ka tawo kinsa nag-atubang og lisod nga pangutana o kahimtang.

Ipasabot:

Human marebyo sa mga estudyante ang mga baroganan sa pag-angkon og espirituhanong kahibalo ug makabasa sa pangpraktis nga senaryo, pangutana og makadapit kanila sa pagsulti kon unsa nga mga baroganan ang makatabang kanila niana nga senaryo. Ang imong mga pangutana kinahanglan nga:

1. Dili limitado sa oo o dili ang tubag.

2. Makatabang sa mga estudyante sa paggamit sa tulo ka mga baroganan sa pag-angkon og espirituhanon nga kahibalo.

3. Magtugot sa mga estudyante nga makapahayag unsay ilang gihunahuna ug gibati.

Samtang ang mga estudyante naningkamot nga makatubag niini nga mga pangutana, sila mahimo nga mas andam sa pag-atubang sa mga pangutana ug mga sirkumstansiya sa ilang kinabuhi uban sa hugot nga pagtuo.

Ipakita:

Hinumdomi nga ang mga estudyante nakarebyo na sa mga baroganan sa pag-angkon og espirituhanong kahibalo ug nakatuon na sa senaryo.

• Hain nga baroganan sa pag-angkon og espirituhanon nga kahibalo ang makatabang kanimo niini nga senaryo, ug ngano?

• Sa unsang paagi kadto nga baroganan makatabang kanimo kon ikaw mag-atubang og pangutana nga sama sa anaa niini nga senaryo?

• Sa unsa pa nga paagi sa imong hunahuna kini nga baroganan makatabang?

• Sa unsang paagi kaha nga ang lain nga baroganan sa pag-angkon og espirituhanon nga kahibalo makatabang niini nga senaryo?

Praktison:

Hinumdomi nga ang mga estudyante nakarebyo na sa mga baroganan sa pag-angkon og espirituhanong kahibalo ug nakatuon na sa senaryo.

1. Kompletoha ang mosunod nga kalihokan uban sa lain pang usa ka tawo. Ikaw ang magtutudlo, ug ang laing tawo mao ang imong estudyante. Ang imong estudyante bag-ohay lang nakakompleto sa pagbasa ug pagpamalandong sa mosunod nga senaryo. Pangutan-a ang estudyante sa mga pangutana diha sa ipakita ug tugoti siya sa pagtubag.

   Ang usa sa imong mga higala nga dili relihiyoso bag-ohay nga nakakita og pares sa mga misyonaryo nga nakig-istorya sa pipila ka tawo sa parke. Gipangutana ka sa imong higala, “Nganong ang mga misyonaryo gikan sa imong simbahan mogawas man ug magsangyaw mahitungod kang Jesus? Morag gisulayan ninyo sa pagpugos ang inyong mga gituohan ngadto sa uban pang mga tawo. Nganong dili na lamang ninyo sila pasagdan nga malipay sa kon unsa sila?”

2. Paggahin og lima ka minutos ug pagsulat og dugang mga pangutana nga imong mapangutana aron sa pagtabang sa mga estudyante nga masulti kon giunsa sa tulo ka baroganan sa pag-angkon og espirituhanon nga kahibalo pagtabang kanila ug sa uban sa lisod nga mga pangutana o mga sirkumstansiya.

Pag-analisar:

Unsa ang mahimong mahitabo sa kinabuhi sa mga estudyante samtang sila nagsulti kon sa unsang paagi nga ang mga baroganan sa pag-angkon og espirituhanong kahibalo makatabang kanila ug sa uban sa dihang mag-atubang og lisod nga pangutana o sirkumstansiya?

Paglakip:

Unsa ang imong mabuhat aron sa pagtabang sa mga estudyante sa pagsulti kon sa unsang paagi nga ang mga baroganan sa pag-angkon og espirituhanon nga kahibalo makatabang kanila ug sa uban kon mag-atubang og lisod nga pangutana o sirkumstansiya?

Panapos

Hunahunaa unsaon sa imong mga estudyante pagsulti sa mga pangutana o mga kabalaka human sa upat ka tuig sa pagpraktis sa doktrinal nga kahanas. Sa sinugdanan, ang mga estudyante magkinahanglan og dugang nga tabang ug suporta gikan kanimo isip usa ka magtutudlo aron sa paggamit sa mga baroganan sa pag-angkon og espirituhanon nga kahibalo ug sa doktrina sa mga sitwasyon sa tinuod nga kinabuhi. Bisan pa man, sa imong pagpadayon sa pag-implementar sa doktrinal nga kahanas sa imong klase ug sa paghatag sa mga estudyante og regular nga mga oportunidad sa pagpraktis, ang paggamit sa mga baroganan sa pag-angkon og espirituhanon nga kahibalo ug ang doktrina mahimong usa ka butang nga natural lang nga buhaton sa mga estudyante. Mao kini ang usa ka paagi nga makatabang ka sa imong mga estudyante sa pag-ugmad sa ilang pundasyon sa lig-ong paagi diha sa lig-on nga sukaranan ni Jesukristo ug sa Iyang doktrina. Palihog buhata ang tanan kutob sa mahimo sa pagtabang sa imong mga estudyante nga makab-ot ang mga resulta sa doktrinal nga kahanas.

Sitwasyon nga Pagatun-an [Case Study]

Ang Kasinatian ni Hannah sa Doktrinal nga Kahanas ug sa Unsang Paagi Kini Mipanalangin sa Iyang Kinabuhi

Si Hannah usa ka first year nga estudyante sa seminary. Atol sa usa sa unang mga leksiyon sa tuig, siya gipailaila sa doktrinal nga kahanas ug sa mga baroganan sa pag-angkon og espirituhanon nga kahibalo. Nianang gabhiona ang mama ni Hannah nangutana kaniya, “Unsay imong nakat-onan sa seminary karon?” Mitubag si Hannah, “Naghisgot kami bahin sa doktrinal nga kahanas.” Ang iyang mama dayon nangutana, “Unsa ang doktrinal nga kahanas?”

“Dili gayod ko segurado. Magkat-on kami og piho nga mga kasulatan. Naghisgot kami bahin sa mga paagi sa pagkat-on sa espirituhanon nga kamatuoran, apan dili ko makapasabot kon unsaon.”

Atol sa unang leksiyon sa tudling alang sa doktrinal nga kahanas, ang klase ni Hannah migahin og pipila ka oras sa pagrebyo sa mga baroganan sa pag-angkon og espirituhanon nga kahibalo. Sa dihang ang iyang magtutudlo mihangyo sa klase sa pag-summarize niining mga baroganan, dili segurado si Hannah kon makahimo siya niini. Mapasalamaton siya sa dihang mibulontaryo ang usa sa iyang mga classmate ug mihatag og maayo nga summary sa mga baroganan sa pag-angkon og espirituhanon nga kahibalo. Mibati si Hannah nga daw mitubo ang iyang pagsabot sa summary sa iyang classmate.

Sa kataposan sa semester si Hannah mikuha og pagsukod sa kahibalo sa doktrinal nga kahanas. Gihangyo siya sa pag-summarize sa mga baroganan sa pag-angkon og espirituhanon nga kahibalo ug pagpakigbahin og panahon dihang iya kining nagamit sa iyang kinabuhi. Mibati siya og kakomportable sa paghatag og summary; bisan pa man, dili siya makahunahuna og usa ka panahon nga siya migamit niini. Gani, nasayod siya unsa kini apan mibati siya nga nagkinahanglan pa siya og dugang praktis aron magamit niya kini sa iyang kaugalingong kinabuhi.

Mipadayon si Hannah sa pagtuon sa doktrinal nga kahanas matag semana diha sa seminary. Nalingaw siya sa mga leksiyon ug ganahan nga makigtrabaho sa nagkalainlaing mga senaryo nga nakatabang niya sa pagpraktis sa paggamit sa mga baroganan sa pag-angkon og espirituhanon nga kahibalo. Ang iyang pagsalig sa iyang abilidad sa pagkahibalo ug pagpasabot sa mga kasulatan midako samtang iyang gimemorya ang mga pakisayran sa kasulatan sa doktrinal nga kahanas ug sa importanteng hugpong sa mga pulong sa kasulatan. Dugang pa, mibati siya og malumo nga kasegurohan nga ang iyang Amahan sa Langit nahimuot sa iyang mga paningkamot sa pag-angkon og doktrinal nga kahanas. Mibati siya og tinguha sa paghupot niini ug gani paggahin og panahon sa iyang kaugalingon gawas sa seminary sa pagmemorya og mga tudling gamit ang app sa Doktrinal nga Kahanas.

Atol sa iyang ikaduha nga tuig sa seminary si Hannah misugod nga mas nakasabot sa mga baroganan sa pag-angkon og espirituhanon nga kahibalo. Mibati siya nga mas komportable nga nagtrabaho pinaagi sa pagpraktis sa paggamit sa mga senaryo apan dili pa gihapon hingpit nga segurado nga makahimo niini sa iyang kaugalingon. Mapasalamaton siya nga may tabang sa iyang magtutudlo ug mga classmate. Mipadayon siya sa pagmemorya sa mga pakisayran sa kasulatan ug importanteng hugpong sa mga pulong sa kasulatan. Misugod siya sa pagbati og mas masaligon sa pagpasabot sa doktrina nga gitudlo sa mga tudling. Sa dihang kadto nga mga tudling gihisgotan diha sa pamilya nga pagtuon sa ebanghelyo o sa simbahan, si Hannah mibati og masaligon sa pagtampo sa diskusyon ug mibati sa gugma sa Ginoo sa iyang pagbuhat niini.

Sa pagtuon ni Hannah sa doktrinal nga kahanas atol sa iyang ikatulong tuig sa seminary, nakita niya ang hilabihang pagtubo sa iyang abilidad sa pagpraktis sa mga baroganan sa pag-angkon og espirituhanon nga kahibalo. Sa dihang usa ka kaila nangutana bahin sa Simbahan, milihok si Hannah diha sa hugot nga pagtuo pinaagi sa pagsalig sa unsay iyang nahibaloan ug nangita og dugang pang impormasyon gamit ang balaang gitudlo nga mga tinubdan. Wala pa gihapon siya sa hingpit makomportable sa pagpahiluna sa nagkalainlaing mga pangutana ug mga kabalaka aron makita kini gikan sa mahangturong panglantaw. Tataw kini ngadto kaniya nga nagkinahanglan pa siya og dugang praktis niini nga bahin.

Nalingaw gayod si Hannah sa mga leksiyon sa doktrinal nga kahanas atol sa iyang kataposang tuig sa seminary. Iyang gibati nga siya nakatabang sa iyang mga classmate sa pagpraktis gamit ang mga baroganan sa pag-angkon og espirituhanon nga kahibalo. Nahinumdom siya unsa ka lisod alang kaniya sa sinugdanan, ug naghinamhinam siya sa pagtabang sa iyang mga classmate sa pagpraktis ug pagtubo. Mibati usab siya og labaw kamapasaligon sa pagpasabot sa doktrina ug malipayon nga makakita og daghang nagkalainlaing mga tudling sa kasulatan gikan sa panumdoman. Ang iyang abilidad sa pag-usab sa mga isyu ug pagtan-aw niini gikan sa usa ka mahangturong panglantaw miuswag.

Human sa paggradwar si Hannah miatubang og hilabihang pagsulay sa pagtuo. Usa ka tawo nga iyang gihigugma ug gisaligan mihagit sa iyang hugot nga pagtuo kang Jesukristo ug sa Iyang gipahiuli nga Simbahan. Sa sinugdanan, si Hannah nakurat sa impormasyon nga gihatag kaniya. Bisan pa man, samtang mainampoon siyang mikonsiderar sa butang, mibati siya sa Espiritu nga nagdala kaniya og kahupayan samtang nahinumdom siya sa iyang nakat-onan gikan sa doktrinal nga kahanas sa seminary. Nakahimo gayod siya sa paglihok diha sa hugot nga pagtuo, nagtan-aw sa mga isyu gikan sa usa ka mahangturon nga panglantaw, ug nagtinguha og dugang nga panabot gamit ang balaanong gitudlo nga mga tinubdan. Daghan sa mga tudling sa kasulatan nga iyang namemorya misantop sa iyang hunahuna. Human sa hilabihang pagtuon ug pag-ampo, mibati siya og kalinaw ug kakomportable sa kahibalo, mga tubag, ug pagtubo sa pagmatuod nga iyang nadawat.

Mapasalamaton si Hannah sa iyang kasinatian sa doktrinal nga kahanas sa seminary. Nakatabang kini niya sa pag-angkon og pagsalig nga siya makahimo ug makabuntog sa bisan unsang umaabot nga pag-atake sa iyang hugot nga pagtuo.

• Sa unsang mga paagi kaha sa imong hunahuna ang imong mga estudyante adunay mga kasinatian nga susama sa kang Hannah?

• Unsa ang imong makat-onan gikan niini nga ehemplo nga makatabang kanimo samtang nagtudlo ka sa doktrinal nga kahanas ngadto sa imong mga estudyante?