Ang Pamahayag sa Pagpahiuli

Ang Pamahayag sa Pagpahiuli

Kinatibuk-ang Pagpasabot

Atol sa Iyang mortal nga pagpangalagad, ang Manluluwas mitukod sa Iyang Simbahan dinhi sa yuta ug mitawag sa Iyang Apostoles sa pagpangulo niini. Sa kataposan ang Apostoles gipangpatay, nga misangpot sa usa ka panahon nga nailhan nga ang Dakong Apostasiya. Ang Langitnong Amahan ug si Jesukristo misugod sa proseso sa pagpahiuli sa ebanghelyo dinhi sa yuta pinaagi sa pagpakita ngadto ni Propeta Joseph Smith niadtong 1820. Ang ika-200 nga anibersaryo sa Unang Panan-awon gisaulog niadtong 2020 sa “Ang Pagpahiuli sa Kahingpitan sa Ebanghelyo ni Jesukristo: Usa ka Pamahayag ngadto sa Kalibotan sa Ikaduhang Siglo nga Kasaulogan.” Girekord ni Joseph Smith ang mga pagpadayag nga iyang nadawat gikan sa Ginoo, ug daghan niini makita diha sa Doktrina ug mga Pakigsaad, nga nagsilbing saksi nga si Jesukristo namulong sa atong panahon.

Pagdasig og kinaiya sa inadlaw-adlaw nga pagtuon sa kasulatan.Pipila ka mga butang adunay mas gamhanan ug malungtarong impluwensiya sa kahangtoran diha sa mga kinabuhi sa mga estudyante kaysa pagtabang kanila sa pagkat-on sa paghigugma sa mga kasulatan ug sa pagtuon niini inadlaw-adlaw. Usa ka paagi sa pagbuhat niini mao ang pagdapit sa mga estudyante sa paghimo og tumong sa pagbasa ug paghimo og personal nga plano sa pagtuon kada adlaw. Alang sa dugang pa kon sa unsang paagi gibuhat kini sa Manluluwas, tan-awa ang seksiyon nga “Giawhag sa Manluluwas ang Uban sa Pag-ila Kaniya pinaagi sa Pagtuon sa Iyang Pulong” diha sa Pagtudlo Sumala sa Pamaagi sa Manluluwas: Alang sa Tanan Kinsa Nagtudlo diha sa Panimalay ug diha sa Simbahan (2022). Makita usab nimo ang usa ka ehemplo kon unsaon pagbuhat niini diha sa leksiyon karong semanaha nga giulohan og “Pasiuna sa Doktrina ug mga Pakigsaad.”

Pangandam sa pagtudlo

Ang mosunod nga impormasyon naghatag kanimo og mga ideya kon unsa ang imong gikinahanglan nga andamon daan alang sa matag leksiyon.

Ang Dakong Apostasiya

Katuyoan sa leksiyon: Kini nga leksiyon gituyo aron matabangan ang mga estudyante nga makasabot sa panginahanglan sa pagpahiuli sa tinuod nga Simbahan ni Jesukristo sa ulahing mga adlaw.

• Pagpangandam sa estudyante: Dapita ang mga estudyante sa pagpangita sa kahulogan sa apostasiya gamit ang Gospel Library nga app o ubang mga kapanguhaan nga anaa kanila. Dasiga sila sa pagtambong sa klase nga andam sa pagpakigbahin sa unsay ilang nakat-onan.

“Ang Pagpahiuli sa Kahingpitan sa Ebanghelyo ni Jesukristo: Usa ka Pamahayag ngadto sa Kalibotan sa Ikaduhang Siglo nga Kasaulogan”

Katuyoan sa leksiyon: Kini nga leksiyon gituyo aron matabangan ang mga estudyante nga mobati sa kamatuoran ug kamahinungdanon sa nagpadayon nga Pagpahiuli sa ebanghelyo ni Jesukristo.

• Pagpangandam sa estudyante: Dapita ang mga estudyante nga motambong nga andam sa pagpakigbahin sa mga panalangin sa gipahiuli nga ebanghelyo ni Jesukristo nga labing makahuluganon ngadto kanila.

Pasiuna sa Doktrina ug mga Pakigsaad

Katuyoan sa leksiyon: Kini nga leksiyon gituyo aron matabangan ang mga estudyante nga maandam sa pagkat-on nga mas makaila sa Manluluwas samtang magsugod sila sa ilang pagtuon sa Doktrina ug mga Pakigsaad.

• Pagpangandam sa estudyante: Ikonsiderar ang pagdapit sa mga estudyante sa paghingalan sa pipila sa ilang paborito nga mga tudling gikan sa Doktrina ug mga Pakigsaad ug mangandam sa pagpasabot kon ngano nga kana nga mga tudling makahuloganon ngadto kanila.