Leksiyon 1: Pamahayag sa Pagpahiuli

Ang Dakong Apostasiya

Ang Panginahanglan alang sa Pagpahiuli sa Simbahan sa Manluluwas

Gitukod ni Jesukristo ang Iyang Simbahan atol sa Iyang mortal nga pangalagad. Human sa Iyang kamatayon ug Pagkabanhaw, ang Manluluwas misugo sa Iyang Apostoles sa paggiya sa Simbahan pinaagi sa Iyang mga yawe ug awtoridad sa pagkapari. Tungod sa grabeng pagpanggukod ug sa kamatayon sa Apostoles, ang mga tawo nabiyaan nga walay balaanong direksiyon gikan sa buhing mga propeta. Ang mga pagtulun-an ug doktrina ni Jesukristo giusab, nga miresulta sa panahon nga gitawag og Dakong Apostasiya. Kini nga leksiyon makatabang sa mga estudyante nga makasabot sa panginahanglan sa pagpahiuli sa tinuod nga Simbahan ni Jesukristo sa ulahing mga adlaw.

Mga Posibleng Kalihokan sa Pagkat-on

Pagkabuhi sa wala pa ang Pagpahiuli

Ikonsiderar ang pagdapit sa mga estudyante sa paghisgot sa mosunod nga pangutana uban sa usa ka pares o sa gamay nga grupo. Mahimo usab nimong hangyoon ang mga estudyante sa paghisgot og mas detalyado nga mga pangutana, sama sa unsa kahay ilang gibuhat alang sa panarbaho ug kalingawan, asa kaha sila nagpuyo, sama sa unsa kaha ang ilang balay, ug ang mga matang sa pagkaon nga tingale ilang gikaon.

Mahimo usab nimong gamiton ang dugang nga kalihokan sa pagkat-on nga “Handurawa ang relihiyoso nga kalibog atol sa Dakong Apostasiya” atol niini nga bahin sa leksiyon.

Handurawa nga nabuhi ka sa tuig 1800 imbes karon.

• Sa unsang paagi kaha lahi ang imong kinabuhi?

  Ipasabot nga ang usa ka kalainan mao unta ang pagpuyo nga wala ang ebanghelyo ni Jesukristo dinhi sa yuta. Aron matabangan ang mga estudyante sa paghunahuna kon unsa kaha unta kini, ikonsiderar ang pagpangutana sama sa mosunod:

• Unsa kaha ang sitwasyon sa imong relasyon sa Langitnong Amahan ug ni Jesukristo?

• Unsa kaha nga mga pangutana o kabalaka ang tingali anaa ka?

Ang Dakong Apostasiya

Aron matabangan ang mga estudyante nga makasabot sa pipila ka mga panghitabo nga misangpot sa Dakong Apostasiya, mahimo nimo silang dapiton sa pagpakigbahin sa unsay ilang nahibaloan mahitungod niini nga mga panghitabo o sa paggamit sa pipila sa mosunod nga pagpamubo. Mahimo usab nimong gamiton ang bidyo nga “ Ang Pagpahiuli sa Simbahan ni Kristo? ” gikan sa time code 0:32 hangtod sa 2:08. Kini nga bidyo anaa sa ChurchofJesusChrist.org.

Ang apostasiya mahitabo kon ang mga tawo motalikod sa tinuod nga doktrina sa ebanghelyo ug mosalikway sa awtorisado nga mga sulugoon sa Ginoo. Usa ka yugto sa apostasiya nahitabo human sa panahon sa Bag-ong Tugon, human ang Manluluwas mitukod sa Iyang Simbahan ug misugo sa Iyang Apostoles sa pagpangulo niini.

“Human sa kamatayon sa Manluluwas ug sa Iyang mga Apostoles, ang mga tawo midaot sa mga baroganan sa ebanghelyo ug mihimo og dili awtorisadong mga kausaban diha sa organisasyon sa Simbahan ug sa mga ordinansa sa pagkapari. Tungod niining mikaylap nga apostasiya, gibawi sa Ginoo ang awtoridad sa pagkapari gikan sa yuta” (Mga Hilisgotan ug Mga Pangutana, “Apostasiya,” topics.ChurchofJesusChrist.org).

Basaha ang mosunod nga mga kasulatan, mangita sa mga kahimtang nga anaa sa yuta atol sa Dakong Apostasiya.

• Amos 8:11–12

• 2 Nephi 26:20

• Doktrina ug mga Pakigsaad 1:15–16

• Doktrina ug mga Pakigsaad 112:23

Mahimong magtuon ang mga estudyante niini nga mga bersikulo nga magtinagsa o uban sa usa ka grupo. Mahimo usab nimong i-assign ang matag grupo sa pagtuon og usa ka hugpong sa mga bersikulo ug ipakigbahin sa klase kon unsay ilang nakaplagan.

Gamita ang mga pangutana sama sa mosunod sa paghisgot kon unsay nakat-onan sa mga estudyante gikan niini nga mga bersikulo. Isip kabahin niini nga panaghisgotan, mahimong mahinungdanon nga ipasabot nga bisan og ang Simbahan ug awtoridad sa Manluluwas wala dinhi sa yuta atol sa Dakong Apostasiya, adunay daghang mga indibidwal nga nabuhi niadtong panahona kinsa nahigugma sa Dios ug naningkamot sa matinud-anong pagsunod Kaniya sumala sa ilahang pagsabot.

• Unsa ang pipila ka mga pulong o mga hugpong sa mga pulong nga imong nakaplagan nga naghulagway sa kahimtang sa kalibotan atol sa Dakong Apostasiya?

• Sa unsang paagi nga ang walay paagi sa paggamit sa tinuod nga ebanghelyo ni Jesukristo matandi sa usa ka kagutom? Unsa ang gitanyag ni Jesukristo ug sa Iyang ebanghelyo nga nagdala og kinabuhi ug pag-alima sa kalibotan?

• Ngano sa imong hunahuna nga importante nga masabtan ang Dakong Apostasiya ug ang mga sangpotanan niini?

Agig tubag sa miaging pangutana, mahimong mosulti ang mga estudyante og susama sa mosunod nga kamatuoran: Ang doktrina ug awtoridad ni Jesukristo kinahanglang ipahiuli aron mabuntog ang mga epekto sa Dakong Apostasiya. Ikonsiderar ang pagsulat niini nga kamatuoran diha sa pisara.

Ang Pagpahiuli sa ebanghelyo sa Manluluwas

Sa daghang mga higayon sa kasaysayan sa kalibotan, ang Langitnong Amahan mitabang sa Iyang mga anak kinsa nahulog sa apostasiya pinaagi sa pagtawag og mga propeta sa pagtukod sa kamatuoran ug sa pagpahayag sa ebanghelyo. Sa atong dispensasyon, Iyang gisugdan ang Pagpahiuli sa ebanghelyo pinaagi ni Propeta Joseph Smith (tan-awa sa Joseph Smith—Kasaysayan 1:15–20; Doktrina ug mga Pakigsaad 1:17).

Ang sunod nga leksiyon, “Ang Pagpahiuli sa Kahingpitan sa Ebanghelyo ni Jesukristo: Usa ka Pamahayag ngadto sa Kalibotan sa Ikaduhang Siglo nga Kasaulogan,” maghatag sa mga estudyante og kahigayonan sa pagtuon og dugang pa mahitungod sa Pagpahiuli sa ebanghelyo sa Manluluwas sa ulahing mga adlaw.

Aron matabangan ang mga estudyante nga mahibaloan ang sumbanan sa pagpanalangin sa Dios sa Iyang mga anak sa ebanghelyo human sa panahon sa apostasiya, ikonsiderar ang pagpasalida sa bidyo nga “ Mga Dispensasyon: Ang Sumbanan sa Apostasiya ug Pagpahiuli ” (6:52), anaa sa ChurchofJesusChrist.org. Dapita ang mga estudyante sa paghunahuna bahin sa unsay ilang nakat-onan o gibati bahin sa Langitnong Amahan ug ni Jesukristo samtang sila nagtan-aw sa bidyo.

• Unsa ang imong nakat-onan mahitungod sa Langitnong Amahan ug ni Jesukristo gikan sa Ilang pagkaandam sa pagpahiuli sa ebanghelyo dinhi sa yuta atol sa mga panahon sa apostasiya?

• Unsa ang gihatag sa gipahiuli nga ebanghelyo ni Jesukristo nga makatabang kanimo nga molambo sa espirituhanong paagi?

Ipasabot ang Dakong Apostasiya ug ang panginahanglan alang sa Pagpahiuli

Aron matabangan ang mga estudyante sa pagpahayag sa ilang pagsabot sa unsay ilang nakat-onan, ikonsiderar ang pagpakigbahin sa mosunod nga senaryo ug paghatag og kahigayonan sa mga estudyante sa pagtubag niini.

Handurawa nga aduna kay usa ka higala kinsa dili miyembro sa Simbahan apan kuryoso sa imong mga gituohan. Human sa pipila ka diskusyon, ang imong higala miingon, “Nakahunahuna na ba ka sukad kon ngano nga adunay daghang Kristiyano nga mga simbahan sa kalibotan? Wala ko makasabot kon sa unsang paagi ang mga tawo makahukom kon hain nga simbahan magpasakop nga daghan man kaayo kini.”

Diha sa imong journal sa pagtuon, paghimo og mubo nga latid [outline] nga adunay mga kasulatan ug mga ideya nga mahimo nimong ipakigbahin nga mahimong makatabang sa imong higala. Seguroha nga ilakip ang unsay imong nakat-onan karon mahitungod sa Dakong Apostasiya ug sa panginahanglan sa Pagpahiuli. Sulayi paggamit ang imong kaugalingong mga pulong sa pagpahayag nganong ang pagpahiuli sa doktrina, awtoridad, ug Simbahan sa Manluluwas gikinahanglan aron mabuntog ang mga epekto sa Dakong Apostasiya.

Ikonsiderar ang pagpakigbahin sa imong pagpamatuod sa mga kamatuoran nga imong gihisgotan niini nga leksiyon. Mahimo nimong dapiton ang mga estudyante sa pag-ampo alang sa kahigayonan nga mapakigbahin sa uban ang ilang nakat-onan karon ug ang kamahinungdanon sa Pagpahiuli.

Dugang nga mga Kapanguhaan

Unsa ang nawala atol sa Dakong Apostasiya?

Si Elder Robert D. Hales sa Korum sa Napulog Duha ka Apostoles mitudlo:

Human sa Pagkabanhaw sa Manluluwas, Iyang gisugo ang Iyang mga Apostoles sa paggiya sa Simbahan ug pagpangalagad sa mga ordinansa sa ebanghelyo. Matinud-anon niini nga sugo, gigukod sila, ug ang uban sa kataposan gimartir. Ang resulta, ang awtoridad sa priesthood sa Ginoo nawala na sa yuta, ug ang kalibotan nahulog sa espirituhanong kangitngit. Sa misunod nga mga siglo, ang mga anak sa Dios adunay Kahayag ni Kristo, makaampo, ug makabati sa impluwensiya sa Espiritu Santo. Pero ang kahingpitan sa ebanghelyo nawala. Walay bisan usa nga nahibilin sa yuta nga adunay gahom ug awtoridad sa paggiya sa Simbahan o sa paghimo og sagradong mga ordinansa sama sa bunyag, pagtugyan sa gasa sa Espiritu Santo, ug sa makaluwas nga mga ordinansa sa templo. (Robert D. Hales, “Mga Pagpangandam alang sa Pagpahiuli ug sa Ikaduhang Pag-anhi: “Ang Akong Kamot Anaa Ibabaw Kanimo”” Liahona, Nob. 2005, 89)

Sa unsang paagi nangandam ang Ginoo alang sa Pagpahiuli atol sa Dakong Apostasiya?

Si Presidente M. Russell Ballard sa Napulog Duha ka Apostoles mitudlo kon sa unsang paagi ang Ginoo nangandam alang sa Pagpahiuli sa ebanghelyo:

Samtang atong hunahunaon kon sa unsang paagi giandam sa Ginoo ang kalibotan alang sa Pagpahiuli, kinahanglan nga atong hinumdoman kanunay nga kadaghanan sa unsay Iyang nahimo gipaagi sa mga kinabuhi sa mga indibidwal—ordinaryo nga mga lalaki ug [mga] babaye kinsa, sa pipila ka mga sitwasyon, nakahimo og talagsaong mga butang. (M. Russell Ballard, “Giunsa sa Ginoo Pag-andam ang Kalibotan alang sa Pagpahiuli,” Liahona, Ene. 2020, 17)

Aron makat-on pa og dugang mahitungod niini nga pagpangandam, ikonsiderar ang pagbasa sa tibuok artikulo ni Presidente Ballard.

Nasayod ba ang mga tawo sa panahon ni Joseph Smith nga adunay panginahanglan alang sa pagpahiuli?

Ang bidyo nga “ A Search for Truth ” (15:43) nagsaysay sa istorya sa pagpangita ni Wilford Woodruff’ sa Simbahan sa Manluluwas.

Dugang nga mga Kalihokan sa Pagkat-on

Mahinungdanon nga mga bahin

Aron matabangan ang mga estudyante nga masabtan ang mahinungdanon nga mga bahin sa Simbahan sa Manluluwas ug unsay nawala atol sa Dakong Apostasiya, ikonsiderar ang pagdala ngadto sa klase og usa ka parte sa makina nga gikinahanglan aron moandar ang usa ka makina o ekipo (sama sa usa ka power cord gikan sa usa ka aplayanses o kompyuter, usa ka kadena o ligid gikan sa usa ka bisekleta, o mga spark plug gikan sa usa ka sakyanan). Ipakita sa mga estudyante ang parte ug pangutan-a sila asa kini nahisakop ug unsay mahimo niini. (Kon wala kay makuha nga parte sa makina, pagdrowing og usa diha sa pisara.) Ikonsiderar ang pagpangutana sama sa mosunod:

• Unsa ang mahitabo kon kini nga parte mawala gikan sa piraso sa ekipo nga kini nahisakop?

• Unsa ang pipila ka mahinungdanon nga mga bahin sa Ang Simbahan ni Jesukristo sa mga Santos sa Ulahing mga Adlaw? Unsa ang mahitabo sa Simbahan kon kini nga mga bahin wala?

Isulat ang ulohan nga Mahinungdanon nga mga Elemento sa Simbahan ni Jesukristo diha sa pisara. Tabangi ang mga estudyante sa pag-ila sa mahinungdanon nga mga elemento gikan sa mga kasulatan, sama sa mosunod:

• Ang apostoles ug mga propeta nahimong pundasyon sa Simbahan ni Jesukristo (tan-awa sa Mga Taga-Efeso 2:19–22).

• Ang awtoridad sa pagkapari gihatag pinaagi ni Jesukristo (tan-awa sa Marcos 3:13–14).

• Sa Simbahan ni Jesukristo, kita makadawat og mga ordinansa nga gikinahanglan alang sa atong kaluwasan (tan-awa sa Juan 3:5; Mga Buhat 2:37–39).

• Si Jesukristo nangulo ug naggiya sa Iyang Simbahan pinaagi sa pagpadayag ngadto sa Iyang mga propeta ug apostoles (tan-awa sa Mateo 16:15–19; Mga Taga-Efeso 4:11–13).

Handurawa ang relihiyoso nga kalibog atol sa Dakong Apostasiya

Samtang namalandong ang mga estudyante kon sama sa unsa kaha ang pagpuyo panahon sa Dakong Apostasiya, mahimo silang makabenepisyo sa pagkadungog sa mosunod nga kasinatian:

Agi og pagpangandam alang sa Abril 2020 nga kinatibuk-ang komperensiya sa Simbahan, si Elder Jeffrey R. Holland sa Korum sa Napulog Duha ka Apostoles ug ang iyang asawa, si Sister Patricia Holland, naghanduraw nga nagpuyo sila sa sayong bahin sa 1800. Ilang gipamalandong ang kalibog nga tingali ilang gibati ug ang mga butang nga ilang gilauman sa espirituhanong paagi (tan-awa sa Jeffrey R. Holland, “Usa ka Hingpit nga Kahayag sa Paglaum,” Liahona, Mayo 2020, 81–84).

Kon anaa, ikonsiderar ang pagtan-aw sa “Usa ka Hingpit nga Kahayag sa Paglaum” gikan sa time code 0:00 hangtod sa 7:16.

Espirituhanong pag-alima gikan ni Jesukristo ug sa Iyang ebanghelyo

Sa dili pa tun-an ang mga bersikulo mahitungod sa Apostasiya, ikonsiderar ang pagpakita og mga hulagway sa patay ug buhi nga tanom. Mahimo usab nimong dad-on kini nga mga butang sa klase kon aduna kay magamit. Dapita ang mga estudyante sa paghisgot kon unsay naghimo sa mga tanom nga managlahi kaayo nga tan-awon ug unsa nga espirituhanong mga analohiya ang atong mahimo gikan niini nga mga tanom. Hisgoti usab kon sa unsang paagi ang pagpabiling konektado kang Jesukristo makatabang kanato nga magpabiling naalima ug himsog sa espirituhanong paagi. Mahimong basahon sa mga estudyante ang Juan 15:4–6 ug ikonsiderar kon unsay kalabotan sa mga pagtulun-an sa Manluluwas ngadto sa unang mga Santos atol sa Dakong Apostasiya.