Leksiyon 2: Pamahayag sa Pagpahiuli

“Ang Pagpahiuli sa Kahingpitan sa Ebanghelyo ni Jesukristo: Usa ka Pamahayag ngadto sa Kalibotan sa Ikaduhang Siglo nga Kasaulogan”

Niadtong Abril 5, 2020, gibasa ni Presidente Russell M. Nelson ang “mga pulong sa ligdong ug sagrado nga mga pamahayag” (“Paminaw Kaniya,” Liahona, Mayo 2020, 91) aron sa pagsaulog sa ika-200 nga anibersaryo sa Unang Panan-awon. Kini nga deklarasyon girekord sa “Ang Pagpahiuli sa Kahingpitan sa Ebanghelyo ni Jesukristo: Usa ka Pamahayag ngadto sa Kalibotan sa Ikaduhang Siglo nga Kasaulogan” (ChurchofJesusChrist.org). Kini nga leksiyon makatabang sa mga estudyante nga mobati sa kamatuoran ug sa kamahinungdanon sa nagpadayon nga Pagpahiuli sa ebanghelyo ni Jesukristo.

Mga Posibleng Kalihokan sa Pagkat-on

Pagsaulog og halangdong mga tawo o mga panghitabo

Sa pagsaulog og usa ka tawo o usa ka panghitabo nagpasabot sa pagpakita og pasalamat, pasidungog, ug pagtahod. Kini sa kasagaran gibuhat pinaagi sa paghimo og usa ka butang nga makatabang kanato sa paghinumdom sa tawo o panghitabo.

Ikonsiderar ang paghisgot og mga panghitabo ug mga tawo nga gisaulog. Mahimo nimong ipakita ang pipila ka mga hulagway sa mga monumento diha sa inyong lugar nga nagsaulog sa mga panghitabo o mga tawo nga pamilyar ang imong mga estudyante. Mahimo nimong dapiton ang mga estudyante sa pagpakigbahin kon hain ang ilang nahibaloan o nabisitahan.

Aron matabangan ang mga estudyante nga makakonektar sa personal nga lebel, mahimo usab nimo silang dapiton sa paghunahuna mahitungod sa importanteng mga panghitabo nga nahitabo diha sa ilang mga pamilya o kaparyentehan. Hangyoa sila sa pagpakigbahin og mga ideya mahitungod sa unsay ilang buhaton kon sila hangyoon sa paghimo og usa ka butang aron sa pagsaulog sa usa niini nga mga panghitabo.

Hinumdomi nga human sa kamatayon sa Apostoles ni Jesukristo, dihay panahon nga nailhan isip ang Dakong Apostasiya. Mao kini ang panahon sa dihang ang ebanghelyo ug awtoridad sa pagkapari ni Jesukristo wala dinhi sa yuta. Sa tingpamulak sa 1820, mipasiugda ang Langitnong Amahan ug si Jesukristo sa Pagpahiuli sa ebanghelyo dinhi sa yuta sa dihang Sila mipakita ngadto kang Joseph Smith.

Niadtong 2020, aron pagsaulog sa ika-200 nga anibersaryo sa Unang Panan-awon ni Joseph Smith, ang Unang Kapangulohan ug ang Korum sa Napulog Duha ka Apostoles misulat og usa ka pamahayag. Gitawag kini og “Ang Pagpahiuli sa Kahingpitan sa Ebanghelyo ni Jesukristo: Usa ka Pamahayag ngadto sa Kalibotan sa Ikaduhang Siglo nga Kasaulogan.” Si Presidente Russell M. Nelson misulti niini mahitungod niini:

Kami naghunahuna kon angay ba nga mopabarog og monumento. Apan samtang among gikonsiderar ang talagsaon nga makasaysayanon ug internasyonal nga epekto sa Unang Panan-awon, nadasig kami sa paghimo og usa ka monumento dili sa granite o bato apan sa mga pulong—mga pulong sa ligdong ug sagrado nga mga pamahayag—gisulat, dili ikulit diha sa “papan nga bato” apan hinoon ikulit diha sa “papan” sa atong mga kasingkasing. (Russell M. Nelson, “Paminaw Kaniya,” Liahona, Mayo 2020, 90–91)

Ikonsiderar ang pagdapit sa mga estudyante sa paghunahuna mahitungod sa unsay ilang nahibaloan mahitungod sa Unang Panan-awon ni Joseph Smith ug ngano nga kini angay nga personal nga saulogon nila. Mahimong mopakigbahin ang pipila ka andam nga mga estudyante sa ilang mga tubag ngadto sa klase.

Tun-i ang pamahayag sa Pagpahiuli

Ipakita sa mga estudyante kon asa nila makit-an ang Pamahayag sa Pagpahiuli diha sa ilang journal sa pagtuon o sa Gospel Library nga app. Mahimo ka usab mohatag og papel nga kopya sa pamahayag. Sa tibuok klase, dapita ang mga estudyante sa pagmarka sa mga bahin sa Pagpahiuli nga ilang gibati nga takos nga pagahandumon.

Usa ka paagi nga makamatikod sa mga panalangin nga gihatag sa Dios diha kanimo mao ang paghimo og lista. Mahimo nimong ilista ang mga pulong o mga hugpong sa mga pulong nga naghulagway kon unsa ang gipahiuli. Dayon hunahunaa kon unsa nga mga panalangin ang imong natagamtaman karon, o matagamtaman sa umaabot, tungod sa unsay gipahiuli sa Dios.

Tugoti ang mga estudyante sa pagtuon sa pamahayag sulod sa pipila ka minuto. Hangyoa sila sa paghimo og lista diha sa pisara sa mga pulong o mga hugpong sa mga pulong nga ilang gikonsiderar nga mahinungdanon. Pagpili og pipila ug hangyoa ang mga estudyante sa pagpasabot kon ngano nga ang nakaplagan nila nga mga pulong mahinungdanon.

• Unsa nga mga pulong o mga hugpong sa mga pulong ang nakatabang kanimo sa pagmatikod kon unsa ang gipahiuli sa Dios?

• Hain niining gipahiuli nga mga panalangin ang labing makahuloganon diha kanimo? Ngano man?

Paggahin og kadiyot sa pagpamalandong kon unsa ang natabang niining gipahiuli nga mga panalangin diha kanimo nga masabtan ang mahitungod sa Langitnong Amahan ug ni Jesukristo.

• Unsa ang pipila ka mga kamatuoran nga kining pamahayag makatabang kanimo sa pag-ila mahitungod Kanila?

Gilaoman ang mga estudyante nga makaila og daghang nagkalainlaing mga kamatuoran. Tugoti sila sa pagpakigbahin. Ania ang duha ka kamatuoran nga mahimo nimong ipatugbaw [highlight]: Ang Langitnong Amahan ug si Jesukristo misugod sa pagpahiuli sa kahingpitan sa ebanghelyo pinaagi ni Propeta Joseph Smith, ug ang Pagpahiuli sa ebanghelyo ni Jesukristo nagpadayon sa atong panahon.

Pagsaulog sa mga panalangin sa Pagpahiuli

Pagpili og usa ka elemento sa Pagpahiuli nga hilabihan nimong gipasalamatan. Hunahunaa kon unsa ang imong mahimo aron sa pagsaulog niini nga panalangin nga gikan sa Dios o sa pagpakigbahin niini ngadto sa uban. Hinumdomi nga ang pagsaulog nagpasabot sa pagpakita og pasalamat, pasidungog, ug pagtahod.

Hatagi og panahon ang mga estudyante sa klase sa pagpili ug paghimo og usa ka paagi sa pagsaulog sa usa ka panalangin sa Pagpahiuli. Aron matabangan ang mga estudyante, mahimo kang magsulat og pipila ka mga opsiyon sama sa mosunod diha sa pisara. Mahimo usab nga maghunahuna ang mga estudyante sa ilang kaugalingon nga paagi.

• Sugdi ang pagsag-ulo sa usa ka bahin sa pamahayag sa Pagpahiuli.

• Pagsulat og mubo nga espirituhanong panghunahuna mahitungod sa usa ka aspeto sa Pagpahiuli nga ipakigbahin sa imong pamilya.

• Paghimo og post sa social media aron ipakigbahin ang imong pasalamat alang sa usa ka panalangin sa Pagpahiuli.

• Isulat ang imong pagpamatuod sa Pagpahiuli sa ebanghelyo ni Jesukristo. Mahimo nimong ipakigbahin ang imong pagpamatuod sa umaabot nga miting sa Simbahan.

Ikonsiderar ang pagbilin og igong oras sa kataposan sa klase aron tugotan ang mga estudyante nga ipakigbahin uban sa usa ka pares ang ilang gibuhat o gipaningngkamotang buhaton. Mahimo usab nimong dapiton ang pipila ka estudyante sa pagpakigbahin ngadto sa tibuok klase.

Dugang nga mga Kapanguhaan

Daghan pa ba sa ebanghelyo ni Jesukristo ang ipahiuli pa?

Si Presidente Dieter F. Uchtdorf, kanhi sa Unang Kapangulohan, mitudlo:

Usahay maghunahuna kita sa Pagpahiuli sa ebanghelyo ingon nga kompleto, butang nga nahitabo na—si Joseph Smith mihubad sa Basahon ni Mormon, nadawat niya ang mga yawe sa pagkapari, ang Simbahan naorganisar. Apan sa tinuod lang, ang Pagpahiuli usa ka nagpadayon nga proseso; nagpuyo kita niini karon mismo. Naglakip kini sa “tanan nga gipadayag sa Dios, sa tanan nga gipadayag Niya karon,” ug sa “daghan nga dagko ug mahinungdanon nga mga butang” nga “Siya mopadayag pa” [Mga Artikulo sa Hugot nga Pagtuo 1:9]. Mga kaigsoonan, ang makapahinam nga mga kalamboan karon kabahin nianang dugay nang gipanagna nga panahon sa pagpangandam nga matapos sa mahimayaong Ikaduhang Pag-anhi sa atong Manluluwas, si Jesukristo. (Dieter F. Uchtdorf, “Wala Ba Kamo Nalambigit sa Buhat sa Pagpahiuli?,” Liahona, Mayo 2014, 59)

Si Elder Jeffrey R. Holland sa Korum sa Napulog Duha ka Apostoles mipahayag:

Ako mopamatuod nga ang umaabot mahimong puno sa mga milagro ug buhong sa mga panalangin sama sa nangagi. Anaa kanato ang tanan nga rason nga molaom sa mga panalangin gani mas dagko kay sa ato nang nadawat tungod kay kini mao ang buhat sa Labawng Makakagahom nga Dios, kini ang Simbahan nga adunay padayon nga pagpadayag, kini ang ebanghelyo sa walay kinutoban nga grasya ug kaayo ni Kristo. (Jeffrey R. Holland, “Usa ka Hingpit nga Kahayag sa Paglaom,” Liahona, Mayo 2020, 83–84)

Kinsa ang napanalanginan pinaagi sa Pagpahiuli sa ebanghelyo ni Jesukristo?

Si Elder D. Todd Christofferson sa Korum sa Napulog Duha ka Apostoles mitudlo:

Naghisgot kita ug nanganta uban sa hingpit nga kalipay mahitungod sa katumanan sa dugay na nga gipanagna nga “pagtuman na sa tanan,” [Mga Buhat 3:21], mahitungod sa pagpahinabo sa “laraw sa paghiusa diha kang Kristo sa tanang mga butang,” [Mga Taga-Efeso 1:10], mahitungod sa pagbalik sa kahingpitan sa ebanghelyo, pagkapari, ug sa Simbahan ni Jesukristo dinhi sa yuta, tanan niini atong gisulod sa ulohan nga “ang Pagpahiuli.”

Apan ang Pagpahiuli dili lamang alang kanato kinsa nagmaya karon. Ang mga pagpadayag bahin sa Unang Panan-awon dili lamang alang kang Joseph Smith apan gitanyag isip kahayag ug kamatuoran alang ni bisan kinsa nga “nakulangan og kaalam” [Santiago 1:5]. Ang Basahon ni Mormon iya sa katawhan. Ang mga ordinansa sa pagkapari alang sa kaluwasan ug kahimayaan giandam alang sa matag indibidwal, lakip na niadtong wala na magpuyo sa mortalidad. Ang Simbahan ni Jesukristo sa mga Santos sa Ulahing mga Adlaw ug ang mga panalangin niini gitumong alang sa tanang gusto niini. Ang gasa sa Espiritu Santo gituyo alang sa tanan. Ang Pagpahiuli iya sa kalibotan, ug ang mensahe niini labihan ka dinalian karon. (D. Todd Christofferson, “Pagpaambit sa Mensahe sa Pagpahiuli ug sa Pagkabanhaw,” Liahona, Mayo 2020, 110)

Unsa ang ubang mga pamahayag sa Simbahan ang gipagawas?

Si Presidente Russell M. Nelson mihatag og gibug-aton sa importante nga kinaiya sa pamahayag sa Pagpahiuli sa dihang iyang gipasabot nga lima lang ka nangaging mga pamahayag nga gipagawas sa mga lider sa Simbahan (tan-awa sa Russell M. Nelson, “Paminaw Kaniya,” Liahona, Mayo 2020, 90–91).

Ang matag pamahayg daklit nga gihulagway diha sa artikulo nga naka-link sa ubos:

Scott Taylor, “How Rare a Proclamation: A Look at 2020’s on the Restoration and the 5 Previous in Church History,” Church News, Apr. 5, 2020.

Dugang nga mga Kalihokan sa Pagkat-on

Pagpahayag sa kamatuoran

Tabangi ang mga estudyante nga makasabot unsay buot ipasabot sa pagpahayag og usa ka butang. Mahimo nimo silang dapiton sa pagpangita sa matag parapo sa pamahayag sa Pagpahiuli sa mga pulong ug mga hugpong sa mga pulong nga nagpakita sa kamahinungdanon sa mensahe. Kini nga mga hugpong sa mga pulong naglakip sa “kami modeklarar,” “kami momatuod,” ug “dugang kaming mosaksi,” ug uban pa. Mahimo nimong dapiton ang mga estudyante sa paghimo og poster o post sa social media diin ilang gigamit ang usa niini nga mga hugpong sa mga pulong sa pagpahayag sa ilang personal nga pagsabot ug pagpamatuod sa Pagpahiuli sa kahingpitan sa ebanghelyo ni Jesukristo.

Pagpili og usa ka hulagway o paghimo og usa ka butang

Ang pamahayag sa Pagpahiuli naghisgot og daghang mga panalangin nga mahimong maangkon nato tungod sa usa ka Dios kinsa naghigugma kanato. Ikonsiderar ang pagpangita og mga imahe diha sa Church History—Gospel Art Book nga koleksiyon sa ChurchofJesusChrist.org nga motukma sa mga panghitabo sa Pagpahiuli nga gihulagway sa pamahayag. Mahimo nimong hatagan ang matag estudyante og parapo nga tun-an ug hangyoon sila sa pagtakdo og imahe nga ikatudlo bahin nianang piho nga gipahiuli nga panalangin. Mahimo usab nga maghimo ang mga estudyante og usa ka butang nga nagrepresentar sa unsay gitudlo sa parapo nga gi-assign kanila.

Paghimo og usa ka lista sa mga indibidwal o usa ka dagan sa panahon [time line]

Dapita ang mga estudyante sa pagbasa sa matag parapo sa pamahayag sa Pagpahiuli. Kon mahuman na sila, pahimoa sila og listahan sa tanang mga indibidwal nga gihisgotan niini. Hangyoa ang mga estudyante sa paglakip usab og mga indibidwal kinsa mahimong wala mahisgoti sa ngalan diha sa pamahayag apan adunay mahinungdanong mga tahas sa Pagpahiuli. Mahimo kang maghimo og dagan sa panahon [time line] diha sa pisara gikan sa 1820 hangtod karon ug ilakip ang mga indibidwal ug mga panghitabo nga mahinungdanon sa Pagpahiuli. Ikonsiderar ang pagdugang og mga tawo ug mga panghitabo samtang magtuon ka niini sa seminary sa tibuok tuig.

Mga kasulatan ug ang pamahayag sa Pagpahiuli

Mahimong makatabang ang paghatag sa mga estudyante og mga kahigayonan sa pagpangita og mga kasulatan nga may kalabotan sa mga hugpong sa mga pulong gikan sa pamahayag sa Pagpahiuli. Usa ka paagi sa pagbuhat niini mao ang pagtugot sa mga estudyante sa pagpares og usa ka kasulatan ngadto sa matag parapo. Ang mosunod nga mga kasulatan mahimong magamit (apan dili lamang mao ang mga kapilian):

• Juan 3:16

• Santiago 1:5

• Joseph Smith—Kasaysayan 1:15–20

• Doktrina ug mga Pakigsaad 27:12–13

• Mormon 8:16

• 3 Nephi 27:20–21

• Doktrina ug mga Pakigsaad 65:2

• Mga Taga-Efeso 1:10

• Mateo 28:19–20