Apendiks

Sukda ang Imong Nakat-onan, Bahin 1

Joseph Smith—Kasaysayan 1; Doktrina ug mga Pakigsaad 1–4, 8–10

Ang pagpamalandong ug ang pagsukod sa atong espirituhanong pagkat-on makatabang kanato nga mas maduol sa Manluluwas. Kini nga leksiyon makatabang nimo nga mahinumdom ug masukod kon sa unsang paagi ang imong mga kasinatian sa pagtuon sa Doktrina ug mga Pakigsaad 1–4, 8–10 ug Joseph Smith—Kasaysayan nakatabang nimo nga mouswag sa espirituwal nga paagi ug mas mapaduol kang Jesukristo. Pangita og mga kahigayonan sa pagpakigbahin sa pipila sa imong mga tubag ngadto sa ubang estudyante o mga sakop sa pamilya.

Pahinumdom: Sa dili pa kompletohon kini nga pagsukod, seguroa nga kompletohon ang gikinahanglang mga pagbasa kon wala pa nimo kini mahimo: Joseph Smith—Kasaysayan 1; Doktrina ug mga Pakigsaad 1–4, 8–10.

Unsay imong nakat-onan? Sa unsang paagi ka nag-uswag?

Paggahin og pipila ka minuto sa pagsulat sa imong journal sa pagtuon bahin sa imong pag-uswag aron mas maduol sa Manluluwas samtang imong gitun-an ang Joseph Smith—Kasaysayan 1 ug Doktrina ug mga Pakigsaad 1–4, 8–10. Mahimong maglakip kini sa doktrina ug mga kamatuoran nga imong nakat-onan, mga paagi nga ang imong pagpamatuod ni Jesukristo nagkadako, bag-ong mga pamatasan nga imong giumol, ug mga paagi nga ikaw naningkamot nga mausab.

Pagsukod sa pagtuon sa kasulatan

• Sa unsang paagi ang pagtuon sa kasulatan nakatabang ni Propeta Joseph Smith?

Pamalandongi ang kaugalingon nimong tumong sa pagtuon.

• Sa unsang paagi ka naapektohan sa imong pagpaningkamot?

• Unsa ang usa ka paagi nga imong gibati nga nagmalamposon ka sa imong pagtuon sa kasulatan?

• Unsa ang kalisod nga aduna ka diha sa imong pagtuon sa kasulatan?

Sukda ang imong gibati bahin kang Propeta Joseph Smith (tan-awa sa Joseph Smith—Kasaysayan 1)

Pagsulat og daghang mga butang kutob sa imong mahunahunaan nga imong nakat-onan mahitungod ni Propeta Joseph Smith sa miaging pipila ka semana sa seminary.

Badlisi o lingini ang bisan unsa diha sa imong listahan nga nagtumong usab sa usa ka paagi nga nakatabang nimo nga mas mapaduol kang Jesukristo.

Susiha kon unsa ka dako ang imong pagtuo sa mga aytem nga imong gilista gamit ang sukdanan nga 1 hangtod 5 (1=walay pagtuo ug 5=dako kaayog pagtuo). Pwede nimong irekord ang mga kasinatian nga nakatabang aron modako ang imong pagtuo nga gitawag sa Dios si Joseph Smith nga mahimong propeta aron tabangan kita nga mas mapaduol kang Jesukristo.

• Kon naay usa ka tawo nga nanlimbasog sa pagtuo nga gitawag sa Ginoo si Joseph Smith nga mahimong propeta, unsay imong isugyot nga buhaton niya aron makabaton o molig-on ang iyang pagtuo?

Pagdawat og personal nga pagpadayag (Doktrina ug mga Pakigsaad 8)

Pagpili og pipila sa mosunod nga mga pahayag, ug kompletoha kini sa imong journal. Apila ang bisan unsang uban pang mga hunahuna ug impresyon nga nadasig kang irekord.

• Ang labing importante nga bag-ohay lang nakong nakat-onan bahin sa pagpadayag gikan sa Langitnong Amahan mao ang …

• Ang pipila ka butang nga bag-ohay lang nakong gisulayan sa pagdawat og pagpadayag naglakip sa …

• Ang usa ka butang nga nakaapektar sa akong katakos sa pagdawat og pagpadayag mao ang …

• Ang bag-ohay lang nako nga kasinatian nga dili nako gustong malimtan mao ang …

• Gusto nakong padayong nga dugangan ang akong abilidad sa pagdawat og pagpadayag gikan sa Dios tungod kay …

• Aron mas madugangan ang akong abilidad sa pagdawat og pagpadayag gikan sa Dios, manaad ko nga …

Ipakigbahin ang usa sa imong girekord ngadto sa usa ka sakop sa pamilya, higala, o usa ka tawo diha sa klase.