Apendiks

Mga Ideya nga Nagkalain-lain

Mga Ideya nga Nagkalain-lain

Kini nga kapanguhaan naglakip og lainlaing paagi sa pagtabang sa mga estudyante nga aktibong moapil sa mga leksiyon. Bisan ang makapadani nga mga teknik sa pagtudlo mahimong dili epektibo o makalaay kon perming gamiton. Bisan og dili ka kinahanglan nga mamili og mga pamaagi aron lang magkalainlain, ikonsiderar kon unsaon pag-usab-usab ang mga pamaagi sa imong pagtudlo panahon sa kada leksiyon. Ang paggamit og lainlaing pamaagi sa pagtudlo makatabang aron matandog ang daghang mga estudyante. Ania ang pipila ka pangutana nga ikonsiderar kon magpili og mga kalihokan nga ilakip sa usa ka kasinatian sa pagkat-on:

• Ang kalihokan ba nagpasiugda og kasinatian nga nakasentro kang Kristo, nakabase sa kasulatan, ug nakapunting sa mga tigkat-on? Tan-awa sa Pagsagop ug Pagpahiangay sa Kurikulum sa Seminary alang sa dugang nga impormasyon bahin niini.

• Ang kalihokan ba nagdapit sa Espiritu Santo sa pagtudlo ug pagpamatuod? Hunahunaa kon sa unsang paagi ang kalihokan makaapekto sa balaanong palibot nga gikinahanglan aron mahimo sa Espiritu Santo ang Iyang tahas.

• Sa unsang paagi nga ang pamaagi nagrepresentar sa sagradong pulong sa Dios? Ang mga kasulatan ug mga pulong sa mga propeta kinahanglang ipresentar sa dungganon ug balaang paagi.

• Gitratar ba ang kada estudyante uban ang dignidad? Tinguhaa kanunay nga mapasiugda ang mga pagbati sa panaghiusa ug gugma. Likayi ang mga kalihokan nga posibleng makapahimo sa estudyante nga mobati nga dili komportable, mawad-an og kadasig, o mobati nga nag-inusara.

• Ang kalihokan ba angayan sa oras sa klase nga igahin alang niini? Ang panahon nga imong gigahin sa pagpundok uban sa mga estudyante sa seminary bililhon nga higayon. Mahimong epektibo ang mga kalihokan bisan og dili kaayo mogahin og taas nga panahon.

• Pila ka oras ug pila ka kapanguhaan ang gikinahanglan aron maandam ang kalihokan? Importante nga magamit nimo pag-ayo ang bililhong panahon ug mga kapanguhaan.

Kini nga mga ideya sagad magamit sa daghang bahin sa tibuok leksiyon. Sa daghang higayon, ang paghatag og modelo kon unsay ipahimo sa mga estudyante makatabang nila nga mahimong mas malamposon. Seguroa nga nasabtan nimo pag-ayo ang kalihokan ug makahatag ka og klaro nga mga instruksiyon ug usa ka sampol, kon makatabang, ayha sugdan sa mga estudyante ang kalihokan. Kini nga mga kalihokan giorganisar sa mosunod nga mga seksiyon:

1. Tun-i ang kasulatan aron masabtan ang dagan sa istorya ug ilha ang mga baroganan o doktrina

2. Palawomi ang pagsabot gamit ang mga gikutlo ug mga kasulatan

3. Ipakigbahin ang ilang nakat-onan

4. Paghimo og representasyon sa ilang nakat-onan

Aron mohatag og feedback o mosugyot og dugang nga mga ideya, palihog pag-email sa [e-mail]. Apila diha sa hilisgotan ang “Mga Ideya nga Nagkalain-lain.”

1. Tun-i ang kasulatan aron masabtan ang dagan sa istorya ug ilha ang mga baroganan o doktrina

Ang mga leksiyon kasagaran naglakip og mga kalihokan diin tun-an sa mga estudyante ang sunod-sunod sa mga bersikulo aron masabtan ang mahinungdanong konteksto ug dagan sa istorya sa usa ka hugpong nga igo nga mailhan ang mga baroganan o doktrina. Ang mosunod nga mga kalihokan mao ang pipila ka paagi nga matabangan nimo ang mga estudyante sa paghimo niini.

Interpretasyon sa art

Gamita ang art sa ebanghelyo aron sa paghisgot og usa ka istorya. Pagpakita og imahe gikan sa Media Library sa Simbahan ug dapita ang mga estudyante sa pagtuon sa mga bersikulo nga gipakita diha sa mga imahe. Pangutan-a ang mga estudyante:

• Unsay imong usbon?

• Unsa ang artistikong interpretasyon (dili makita diha sa teksto)?

• Unsang mga bersikulo sa kasulatan ang girepresentahan?

Laing ideya: Imbes ipakita ang tibuok litrato sa sinugdanan sa klase aron sugdan ang panaghisgot, bahin-bahina ang litrato. Anam-anama og pakita ang mga piraso sa litrato ug ipatagna sa mga estudyante kon unsay nahitabo diha sa tibuok litrato. Hangyoa sila nga ihulagway ang ilang nakita ug tagnaon ang wala nila makita.

Laing ideya: Pagpili og pipila ka imahe sa Manluluwas ug ibutang kini diha sa pisara. Dapita ang mga estudyante nga hinay nga tan-awon ang kolor, gipunting, ug ang layout sa mga imahe ug ilhon kon unsay gitudlo sa matag usa bahin kon kinsa si Jesukristo. Human maila ang usa ka baroganan, pwede nimong ipangutana ang sama sa:

• Hain sa mga litrato ni Kristo nga para nimo nagrepresentar sa baroganan nga imong nakaplagan ug ngano?

• Hain niini nga mga litrato ni Jesus ang makatabang nimo nga mabati ang kaimportante niini nga kamatuoran?

• Unsay gusto nimong mahibaloan sa usa ka higala bahin kang Jesukristo kon maghunahuna niini nga kamatuoran?

Dugangi og dayalogo ang usa ka ilustrasyon

Kopyaha ang mga litrato gikan sa Scripture Stories for Children ug i-paste kini diha sa usa ka handout para sa mga estudyante. Pagdugang og mga word bubble diin pwedeng isulat sa mga estudyante kon unsay giingon o gihunahuna sa mga karakter.

Istorya nga balita o book report

Hatagi ang kada estudyante og seksiyon sa kasulatan nga ilang tun-an. Dayon hatagi sila og mga kinahanglanon sa istorya nga balita o book report (sa papel man o diha sa pisara). Pwedeng apil niini ang pangunang mga karakter, dagan sa istorya, usa o duha ka leksiyon nga nakat-onan (nagkutlo sa mga bersikulo kon diin kini gikan), ug ang paggamit para sa usa ka tin-edyer. Hatagi og panahon ang mga estudyante sa pagpakigbahin ngadto sa laing estudyante kon unsay ilang giandam.

Laing ideya: Sa gamayng grupo, pwedeng kuhaon sa kada estudyante ang usa ka bahin sa istorya o book report: pangunang mga karakter, dagan sa istorya, mga leksiyon, o kon unsaon paggamit.

Pag-ila sa mga pangutana

Human mabasa sa mga estudyante ang hugpong sa kasulatan, dapita sila sa paglista og mga pangutana nga makatabang ang mga bersikulo sa pagtubag. Hagita ang mga estudyante nga magsulat og makahuloganon, may kalabotan nga mga pangutana para sa usa ka tin-edyer, kay sa yano nga makapasiksik nga mga pangutana. Pananglitan, imbes mangutana lang nga “Unsay giingon ni Alma bahin sa hugot nga pagtuo? Unsay iyang giingon nga dili usa ka hugot nga pagtuo?” pwedeng mangutana ang mga estudyante nga “Unsa ang kinahanglan nakong buhaton aron makahibalo sa akong kaugalingon nga ang usa ka butang nga gitudlo sa Manluluwas tinuod?” Kon dunay mas daghang hugpong sa kasulatan kay sa usa nga kinahanglang tun-an sa mga estudyante, pwede nilang ilista ang ilang mga pangutana ug ipakigbahin kini sa usa ka estudyante nga nagtuon og laing hugpon. Pwedeng pangitaon ug hunahunaon sa mga estudyante ang mga tubag sa mga pangutana sa ilang mga klasmeyt.

Interbyoha ang tagsulat

Hangyoa ang mga estudyante sa paghunahuna nga sila ang tagsulat sa usa ka asoy sa kasulatan ug dunay nag-interbiyo nila bahin sa ilang gisulat. Pwedeng basahon sa mga estudyante ang asoy sa kasulatan ug magpulihanay sa mga tahas isip tig-interbiyo ug tagsulat. Pipila sa mga pangutana nga pwedeng ipangutana sa tig-interbiyo mao ang:

• Unsa ang pipila ka aspeto niini nga mga bersikulo nga dili nimo gustong malaktawan sa mga magbabasa?

• Unsa ang imong isulti nga pangunang punto, o usa sa imong mga pangunang punto?

• Sa unsang paagi nimo gilaoman nga gamiton kini sa mga magbabasa sa ilang kinabuhi?

Dapita ang mga estudyante sa pagpakigbahin sa unsay ilang nakat-onan gikan sa kasinatian. Gamita ang ilang mga komento aron isulti ang gipabaga [bolded] nga kamatuoran.

Pagparespares

Paghatag og pipila ka pakisayran sa kasulatan sa usa ka kolum ug ipares ang mga kamatuoran sa laing kolum nga wala mahan-ay. Pwedeng magtuon ug magparespares ang mga estudyante.

Labing importante nga kamatuoran

Kon ang mga estudyante magtuon og kapitulo sa kasulatan nga naglakip og daghang kamatuoran nga ilang mailhan, pwede nimo silang pasugdon pinaagi sa pagtuon nga silasila ra. Ang matag usa makahukom kon unsa ang ilang gituohan nga tulo o upat ka labing importanteng mga kamatuoran o mga ideya sa hugpong ug isulat kini. Dayon pwedeng bahinon ang mga estudyante ngadto sa duha ka grupo ug ikompara ang mga kamatuoran nga ilang nailhan. Matag pares sa mga estudyante ang mopili kon para nila unsa ang duha ka labing importanteng kamatuoran ug irekord kini. Pahinumdom: Ang mga ideya mahimong lahi gikan sa ilang orihinal nga upat. Dayon ang matag pares mag-uban sa laing paresan aron makaporma og upat sa matag grupo; magdungan, ang upat ka estudyante nga ipakigbahin ug itandi ang ilang mga ideya ug magtinabangay aron matino ang usa ka labing importanteng kamatuoran diha sa teksto.

Hulagway nga han-ay sa panghitabo

Ipakita ang pipila ka mga hulagway nga nagrepresentar sa asoy sa kasulatan nga tun-an sa mga estudyante. Ipakita ang mga bersikulo nga basahon sa mga estudyante. Dapita ng mga estudyante nga ibutang ang hulagway sa hustong pagkahan-ay.

Pag-diagram sa panghitabo sa istorya

Tabangi ang mga estudyante nga ilhon ang doktrina o mga baroganan nga gitudlo sa mga asoy sa kasulatan gamit ang diagram sa panghitabo sa istorya. Tinoa ang lainlaing elemento sa panghitabo sa istorya lakip ang mosunod:

1. Ang sitwasyon sa sinugdanan (lakip ang kinsa, unsa, asa, kanus-a).

2. Nagkadako nga problema o aksiyon. Ilha ang mga kausaban nga nakaapektar sa kinabuhi sa mga tawo diha sa asoy.

3. Labing nindot nga yugto. Kini ang labing importanteng punto sa istorya. Sagad naay dakong kausaban, sama sa nabuntog sa usa ka tawo ang usa ka babag o dunay usa ka higayon sa pagdiskobre.

4. Anam-anam nga pagkasulbad sa problema. Ang mga resulta sa labing nindot nga yugto dihang mikunhod na ang aksiyon.

5. Kasulbaran. Kini naghulagway sa bag-ong pagsabot nga nabatonan sa mga tawo tungod sa ilang kasinatian.

Isulat ang mga pakisayran sa kasulatan para sa kada elemento sa panghitabo sa istorya diha sa pisara. Dapita ang mga estudyante nga basahon ang mga bersikulo para sa kada elemento sa panghitabo sa istorya ug pagdrowing og litrato sa unsay ilang gibasa o kaha paghimo og lista sa mahinungdanong mga hitabo. Kon mahuman na ang mga estudyante sa kataposang lakang, dapita sila nga tan-awon ang katibuk-ang asoy ug magsulat og pahayag sa kamatuoran nga ilang nakat-onan.

Puzzle

Paghimo og simpleng puzzle gikan sa hulagway nga nagrepresentar sa hugpong sa kasulatan. Isulat ang mga pakisayran sa kasulatan sa likod sa kada piraso. Pwedeng grupo-grupohon ang mga estudyante ug hatagan og usa ka piraso sa puzzle. Tun-an sa mga estudyante ang mga pakisayran ug mangandam sa pag-summarize sa ilang mga bersikulo. Samtang ipakigbahin sa mga grupo ang ilang summary ngadto sa klase, pwede nilang ipapilit sa pisara ang mga piraso aron maporma ang kompleto ang hulagway.

Teyatro sa Mambabasa

Para sa mga istorya nga dunay daghang dayalogo, himoang script ang mga bersikulo sa kasulatan aron dali rang makita sa matag usa ang ilang bahin. Pagkuha og tigsaysay nga maoy mobasa sa mga bersikulo nga dili dayalogo. Pwede nimong kopyahon ang mga bersikulo sa kasulatan ug markahan ang matag bahin gamit ang lainlaing kolor sa highlighter. Pahinumdom: Hinumdomi nga ang mga sakop sa Dios nga Kapangulohan kinahanglan kanunay nga irepresentar uban ang labing taas nga ang-ang sa balaanong pagtahod. Kon ang usa ka sakop sa Dios nga Kapangulohan, lakip ni Jesukristo, girepresentahan diha sa asoy sa kasulatan diin gusto nimong himoon kini nga kalihokan, ipabasa sa tigsaysay ang Iyang mga pulong.

Pagbasa sa kasulatan

Dunay daghang paagi sa pagbasa sa mga kasulatan diha sa klase. Ang kada usa naay lainlaing katuyoan. Ikonsiderar ang mga panginahanglan sa imong klase kon magpili og mga pamaagi sa pagbasa.

• Hilom nga pagbasa: Ang mga estudyante makabasa sa hilom sa ilang kaugalingon. Maghatag kini og panahon sa pagpamalandong sa mga kasulatan ug sa pagbasa sa kaugalingon nilang gipaspason.

• Parespares o grupo nga pagbasa: Nagtugot kini og daghang estudyante nga moapil ug mobati nga dili kaayo makulbaan bahin sa pagbasa og kusog.

• Magtutudlo o nakarekord nga audio: Pwede basahon sa magtutudlo ang teksto o i-play ang audio niini ug dapiton ang mga estudyante sa pagsunod.

• Pagbasa og kusog: Pwedeng dapiton ang tibuok klase nga dungan nga basahon ang mga bersikulo. Pwedeng moboluntaryo ang daghang estudyante sa pagbasa og kusog ngadto sa klase o pwedeng dapiton daan ug hatagan og panahon nga mangandam sa pagbasa. Pasaligi ang mga estudyante nga pwede silang “mobalibad” kon dili sila komportableng mobasa.

Mangita diha sa kasulatan

Pag-andam og pipila ka mga pangutana bahin sa mga sunod-sunod nga mga bersikulo sa mga kasulatan diha sa laing mga piraso sa papel. Paadtoa sa atubangan sa klase ang mga estudyante ug hatagi sila og usa ka pangutana. Pabalika sila sa ilang mga lingkoranan aron pangitaon ang tubag. Sa higayon nga makita na nila ang tubag, moadto na usab sila sa atubangan sa klase ug dawaton ang sunod nga pangutana. Pwede usab kining himoon sa ginagmay nga mga grupo.

Pagsundog sa usa ka sitwasyon

Ihan-ay ang klasrom sa paagi nga nagsundog sa sitwasyon sa istorya nga basahon diha sa mga kasulatan sa maong adlaw. Pananglitan, kon gibasa ang Doktrina ug mga Pakigsaad 121, pwedeng ihan-ay ang mga lingkoranan aron masundog ang gidak-on sa selda sa prisohan sa Liberty. Kini nga pamaagi makatabang sa mga estudyante nga makakuha og biswal nga ideya sa ilang gitun-an. Para sa Doktrina ug mga Pakigsaad 136, pwedeng organisahon ngadto sa mga pundok sa pioneer ang mga estudyante ug magpili og kapitan isip tigpamaba.

Signal sa paghunong

Ihatag ang gipabaga [bolded] nga kamatuoran ngadto sa mga estudyante. Hinayhinaya og basa ang pipila ka bersikulo ngadto kanila, ug hangyoa sila nga ipataas ang ilang kamot o moingon og “Stop” dihang mailhan nila ang usa ka butang diha sa bersikulo nga makatabang sa pagtudlo niana nga kamatuoran. Dayon dapita ang mga estudyante sa pagpakigbahin sa ilang nabantayan.

Summary sa estudyante

Sa dili pa magklase, hatagi ang usa o daghang estudyante og konteksto o sulod bahin sa mga kasulatan nga gusto nimo nga ilang isummarize para sa klase. Pwede kining iprinta ug iapod-apod sa adlaw una pa ang klase, o ihatag sa mga estudyante inig sulod nila sa klase. Dapita sila nga mangandam sa pagpakigbahin sa summary dihang tawagon sa haom nga panahon sa klase.

Hubara ang usa ka bersikulo

Human mabasa sa mga estudyante ang hugpong sa kasulatan, pwede nimo silang papilion og bersikulo nga hubaron o isulat ang kada linya gamit ang kaugalingon nilang mga pulong. Tabangi sila nga magpraktis sa pagpangita og mga kahulogan o sa paggamit sa ubang kasulatan ug mga himan sa pagtuon sa kasulatan aron masabtan ang lisod nga mga pulong o hugpong sa mga pulong.

Husto o sayop

Pagsulat og lainlaing husto o sayop nga mga pahayag bahin sa importanteng mga detalye sa usa ka hugpong sa kasulatan. Dapita ang mga estudyante nga ipahayag kon sa sinugdan uyon o supak ba sila sa mga pahayag. Dapita sila sa pagpangita og pruwebao batok sa mga pahayag samtang nagtuon sa hugpong sa kasulatan. Dayon, usbon og sulat sa mga estudyante ang sayop nga mga pahayag aron ihusto ni samtang nagbasa silag tudling sa kasulatan.

Paggamit og litrato

Dapita ang mga estudyante nga mamili og litrato nga importante para nila. Pwedeng naa kini sa ilang selpon, o pwede silang magdala og usa gikan sa balay. Dapita sila nga mangandam sa pagpakigbahin sa mosunod:

• Ang background, nga naghulagway kon unsay nahitabo nga misangpot sa pagkuha sa litrato.

• Ang pangunang punto o katuyoan sa litrato.

• Pipila ka detalye nga importante para nila.

Human sa pagpakigbahin sa mga estudyante, pwede nilang basahon ang hugpong sa kasulatan para sa leksiyon ug andamon ang samang tulo ka butang nga may kalabotan sa hugpong sa kasulatan.

Paghanduraw

Dapita ang mga estudyante nga hunahunaon ang usa ka istorya o ang bahin sa teksto nga gitun-an. Pwedeng magpiyong ang mga estudyante ug magpunting sa paghanduraw sa mga imahe nga gihulagway sa magtutudlo. Pananglitan, pwede nimong dapiton ang mga estudyante nga hunahunaon nga sila mga magbalantay og karnero nga misunod sa pagdapit sa anghel nga pangitaon ang batang Kristo diha sa pasungan. Dayon pwede nimong iingon ang parehas sa “Misulod ka sa pasungan diin gikugos ni Maria ang batang Kristo. Kinsay imong nakita didto? Unsang mga hayop ang imong nahunahunaan? Sa imong imahinasyon, unsay tubag ni Maria sa imong pag-abot?” Padayona ang pagpangutana nga makatabang sa mga estudyante nga hunahunaon ang sitwasyon.

Word Cloud

Dapita ang mga estudyante sa pag-ila sa mga pulong o hugpong sa mga pulong nga para nila importante sa usa ka tudling sa kasulatan. Paghimo og word cloud gamit ang labing komon o importanteng mga pulong ug hugpong sa mga pulong nga ilang nailhan. Ang gidak-on sa mga pulong pwedeng magpaila sa lebel sa kaimportante niini.

2. Palawmi ang pagsabot gamit ang mga kinutlo ug mga kasulatan

Kasagaran sa mga leksiyon maglakip og daghang tudling sa kasulatan gikan sa sumbanan nga mga buhat aron tabangan ang mga estudyante nga palawman ang ilang pagsabot sa mga baroganan o doktrina nga ilang gitun-an. Aduna usab mga leksiyon nga naglakip og daghang kinutlo gikan sa mga lider sa Simbahan. Ang mosunod nga mga kalihokan mao ang pipila ka paagi nga matabangan nimo ang mga estudyante sa pagtuon sa lainlaing kasulatan o mga kinutlo ug hatagi sila og kahigayonan nga makaplagan ang kamatuoran para sa ilang kaugalingon.

Paghimo og mga istasyon sa pagtuon

Pag-istablisar og mga istasyon sa pagtuon sa tibuok klasrom. Ang kada istasyon mahimong maglakip og mga naka-post nga mga instruksiyon diha sa bongbong o sa mga lingkoranan. Kini nga mga instruksiyon mahimong maglakip og mga kasulatan o mga kinutlo nga basahon, ug mga pangutana o uban pang kalihokan nga kompletohon. Pwedeng molibot ang mga estudyante diha sa gagmayng grupo, nga hisgotan kon unsay ilang nakat-onan sa kada istasyon. Pwede usab nila kining tagsa-tagsa nga himoon ug moirog base sa gipaspason nga gusto nila. Pwede kang magbutang og dakong piraso sa papel sa kada istasyon diin pwedeng irekord sa kada grupo o estudyante ang ilang mga tubag. Pwede nimong basahon ug pamalandongan ang gisulat sa uban.

Paghimo og kaugalingon nimong mga footnote

Dapita ang mga estudyante nga magdugang og mga footnote sa mga kasulatanan nga ilang gitun-an. Pwede kining idugang pinaagi sa paghimo og mga link tali sa mga tudling nga gitun-an ug sa uban pang kasulatan ug mga pahayag gikan sa mga lider sa simbahan. Pwedeng isulat sa mga estudyante ang mga cross-reference diha sa ilang mga margin o gamiton ang feature sa pag-link diha sa Librarya sa Ebanghelyo. Pwede nilang ipakigbahin ang daghang dugang nga mgapakisayran kutob sa mahimo nga naghatag og daghang panabot bahin sa hilisgotan. Laing ideya: Pwedeng gamiton sa mga estudyante ang mga Tag diha sa ilang Librarya sa Ebanghelyo aron ikonektar ang lainlaing kasulatan ug mga kinutlo gikan sa usa ka leksiyon.

Hatagi og kahulogan

Ilhon sa mga estudyante ang usa ka pulong o konsepto nga lisod sabton. Papangitaa sila og mga kapanguhaan lakip ang mga kasulatan ug mga himan sa pagtuon sa kasulatan (Topical Guide, Giya ngadto sa mga Kasulatan, Mga Hilisgotan ug mga Pangutana) aron tabangan sila nga makakat-on og dugang bahin sa termino. Pahatagi nila og kahulogan ang termino o hugpong sa mga pulong sa kaugalingon nilang mga pulong.

Mga doodle note

Samtang nagtuon ang mga estudyante, hatagi sila og papel nga naay mga thought bubble o mga seksiyon diin pwede nilang isulat ang ilang nadiskobrehan.

Mga eksperto

Bahina ang mga estudyante ngadto sa gagmayng grupo ug i-asayn ang kada grupo og usa ka hilisgotan nga tun-an. Hatagi og panahon ug mga kapanguhaan ang mga grupo sa pagtuon sa mga hilisgotan aron ang kada sakop sa grupo mahimong eksperto sa hilisgotan sa ilang grupo. Human ang igong panahon, bahina ang mga estudyante ngadto sa bag-ong mga grupo aron ang kada grupo naay “eksperto” sa laing hilisgotan. Dayon ipakigbahin sa mga estudyante ang unsay ilang nakat-onan bahin sa ilang mga hilisgotan.

Mga koneksiyon sa Alang sa Kalig-on sa mga Kabatan-onan

Pagpili og seksiyon sa booklet nga Alang sa Kalig-on sa mga Kabatan-onan: Usa ka Giya sa Paghimo og mga Pagpili ug dapita ang mga estudyante nga mangita og mga pahayag nga nagsuporta sa kamatuoran nga ilang nakaplagan gikan sa usa ka hugpong sa kasulatan.

Pagtulun-an human sa usa ka pagtulun-an

Ipasulat pag-usab sa mga estudyante ang kada linya o kapahayag sa usa ka kasulatan diha sa ilang journal sa pagtuon. Kinahanglan silang magbutang og espasyo tali sa kada linya o kapahayag. Ang mga estudyante pwedeng magtuon pag-ayo ug mamalandong sa kada pulong sa maong linya o kapahayag. Pwede sab nilang tan-awon ang mga cross reference o uban pang impormasyon sa Librarya sa Ebanghelyo bahin sa maong linya. Dayon himoa na usab kini sa sunod nga linya sa tudling. Ang usa ka pananglitan niini makita sa “Ayaw Kahadlok,” Alang sa Kalig-on sa mga Kabatan-onan, Peb. 2021, 32.

Mapa sa hunahuna

Dapita ang mga estudyante sa pagbuhat og mapa sa hunahuna diha sa ilang journal sa pagtuon sama nianang naa sa ibabaw. Pwede nilang isulat ang baroganan o doktrina nga ilang nailhan diha sa tunga nga kahon. Dayon ipapangita nila ang dugang nga mga kasulatan o mga kinutlo nga magdugang sa ilang pagsabot. Pwede nilang idugang ang ilang mga panabot bahin sa hilisgotan diha sa gawas sa mga kahon. Dapita ang mga estudyante nga palapdan ang ilang mapa sa hunahuna pinaagi sa padayong pagdugang og mga kahon ug pagkonektar niini sa mga butang nga ilang gitun-an.

Nagsapaway nga mga ideya

Dapita ang mga estudyante nga mopili og duha o daghang mga hilisgotan gikan sa leksiyon nga parehas sa pipila ka paagi ug managlahi sa uban pang paagi. Paghimo og diagram nga parehas sa imahe sa ibabaw diin ang mga estudyante mohan-ay kon unsa ang komon niining mga butanga ug kon unsay kalainan sa duha ka hilisgotan. Pwede kining himoon sa duha ka indibidwal nga naa sa usa ka asoy (pananglitan, si Laman ug Nephi) o duha ka hilisgotan (pananglitan, pagsaylo ug ang sakramento).

Pakigbahin og mga panabot

Hatagi ang mga estudyante og kopya sa pahina sa usa ka hugpong sa kasulatan ug ipasulat ang ilang ngalan sa ibabaw niini. Hatagi sila og usa hangtod duha ka minuto nga basahon ang hugpon ug isulat ang panabot nga ilang nakat-onan gikan sa ilang pagtuon.

Ang mga pananglitan mahimong maglakip sa: Mahimong markahan sa mga estudyante ang mga footnote, ipakigbahin ang mga kinutlo gikan sa mga propeta, badlisan ang importanteng mga hugpong sa mga pulong, linginan ang espesyal nga mga pulong, isulat ang mga baroganan ug ipakigbahin ang ilang pagpamatuod ug uban pang panabot diha sa mga margin.

Human sa gihatag nga panahon, ipapasa ang ilang mga papel ngadto sa bag-ong estudyante aron masulat ang lainlaing panabot. Human sa pipila ka pagpasa, ipabalik nila ang ilang papel ngadto sa orihinal nga estudyante. Laing ideya: Imbes ang hugpong sa kasulatan, ang kada papel dunay lahi nga pangutana sa paggamit nga may kalabotan sa hugpon. Pwedeng tubagon sa daghang mga estudyante ang mga pangutana gamit ang mga kasulatan ug ipakigbahin ang ilang mga pagpamatuod sa hilisgotan.

Sulagma nga pagpili og kinutlo

Pagbutang og daghang kinutlo nga nagtudlo og usa ka kamatuoran gikan sa leksiyon diha sa usa ka kalo o bag. Dapita ang mga boluntaryo nga mobunot og usa ka kinutlo gikan sa kalo ug ipakigbahin kon sa unsang paagi may kalabotan kini sa kamatuoran nga ilang gitun-an ug kon unsay kahulogan niini ngadto kanila. Seguroa nga mahatagan sila og panahon sa pagbasa ug pagpangandam sa pagpakigbahin. Laing ideya: Dihang nakapakigbahin na ang mga estudyante, magbaylo sila og mga kinutlo ug mangita og bag-ong mga kapares diin nila ipakigbahin ang ilang bag-ong kinutlo.

Bracket sa kasulatan

Pagpili og 16 ka pakisayran sa kasulatan ug isulat ang kada pakisayran diha sa 16 ka linya sa gawas nga mga kolum sa bracket. Dapita ang mga estudyante nga magkapares o sa gamayng grupo nga basahon ang mga kasulatan nga gipares sa kada bracket ug tinoon kon hain nga pakisayran ang labing makahuloganon para sa usa ka tin-edyer karon. Ang tudling nga ilang gipili moadto sa sunod nga bracket. Padayong hisgotan sa mga estudyante ang kada pares sa kasulatan hangtod nga mailhan nila ang usa ka kasulatan nga para nila labing makahuloganon ug hisgotan kon ngano. Pwedeng ipakigbahin sa mga estudyante kini nga mga kasulatan diha sa klase.

Mga kalihokan sa pagtuon nga gipili sa estudyante

Paghimo og listahan sa unom ka kalihokan sa pagtuon. Human maila sa mga estudyante ang kamatuoran gikan sa usa ka hugpong sa kasulatan, paggamit og sulagma nga paagi nga makapili ang mga estudyante kon hain nga kalihokan ang kompletohon (dice, bunotbunot, pagkuha og piraso sa papel, sulagma nga mohatag og numero).

Mga pananglitan mahimong maglakip sa:

1. Pagpakigbahin og usa ka istorya gikan sa kinabuhi ni Jesus diin Iyang gitudlo o gipakita ang kamatuoran.

2. Pangita og tudling sa doktrinal nga kahanas o uban pang tudling sa kasulatan bahin sa kamatuoran.

3. Pangita og ehemplo sa istorya sa kasulatan sa usa ka tawo nga nagkinabuhi subay sa kamatuoran.

4. Pangita og usa ka pahayag gikan sa lider sa Simbahan nga nagtudlo sa kamatuoran.

5. Pagpakigbahin og personal nga kasinatian sa usa ka tawo nga napanalanginan tungod sa kamatuoran.

6. Pagpili og kaugalingon nimong pananglitan sa usa ka butang nga atong mahimo aron magkinabuhi subay sa kamatuoran. Pangita og usa ka tudling sa kasulatan nga nagtudlo sa pananglitan nga imong ipakigbahin.

Sumpay-sumpay nga pagtuon

Sa kada lingkoranan, pagbutang og kard nga naay instruksiyon nga sama sa “pagbasa og usa ka kasulatan o kinutlo,” o “tubaga ang usa ka pangutana gikan sa leksiyon.” Pwedeng liboton sa mga estudyante ang mga lingkoranan ug sundon ang mga instruksiyon sa maong card.

Web sa hilisgotan

Dapita ang mga estudyante nga maghimo og diagram nga sama niini nga nagsugod sa gipabaga nga kamatuoran o hilisgotan diha sa tunga. Dayon pwedeng magdrowing og mga linya ang mga estudyante ngadto sa gawas sa mga lingin ug butangan kini og label sa konektadong mga kasulatan, mga kamatuoran, o mga elemento sa pangunang hilisgotan. Pananglitan, pwedeng irekord sa mga estudyante ang pagdapit ni Hari Benjamin nga “Tuohi ang Dios” diha sa tunga nga lingin uban ang pakisayran nga “Mosiah 4:9–10.” Pwede nilang ilista sa mga lingin sa gawas kon unsay gidapit ni Hari Benjamin nga tuohan nato bahin sa Dios.

Paghunong og kadyot sa bidyo

Paggamit og bidyo nga nagpakita o nagtudlo bahin sa baroganan sa ebanghelyo. Ihunong kadyot sa lainlaing gutlo aron maintriga o tabangan ang mga estudyante nga analisahon ang ilang gitan-aw. Pwede nimong pangutan-on ang mga estudyante og sama sa:

• “Unsa kaha ang imong gihunahuna o gibati o unsa kaha ang imong mga pangutana kon ikaw ang naa niini nga sitwasyon?”

• “Unsa nga mga kasulatan ang imong gitun-an karon nga tingali makatabang?”

• “Unsay imong gilaoman nga masabtan niini nga tawo bahin sa kamatuoran nga atong gitun-an karon?”

• “Asa nimo makita ang imong kaugalingon niini nga istorya karon?”

3. Ipakigbahin ang unsay ilang nakat-onan

Sa tibuok leksiyon, gidapit ang mga estudyante nga ipakigbahin ang ilang mga hunahuan ug mga panabot. Samtang ang mga estudyante nagpasabot, nakigbahin, ug nagpamatuod, ngadto sa kapares, sa gagmayng grupo, o sa klase, kasagaran sila gigiyahan sa Espiritu Santo ngadto sa usa ka mas lawom nga pagpamatuod sa mga butang gayod nga ilang gipahayag. Pinaagi sa gahom sa Espiritu Santo, ang ilang mga pulong ug mga ekspresyon mahimo usab nga adunay dakong epekto diha sa kasingkasing ug hunahuna niadtong naminaw. Ingon ka importante niini, ang pagpakigbahin mahimong lisod buhaton para sa mga estudyante tungod sa pipila ka rason. Hinumdomi nga pwede ra nga “mobalibad” ang mga estudyante kon dili sila komportable nga mopakigbahin. Ang mosunod nga mga ideya makatabang sa mga estudyante nga ipakigbahin ang unsay ilang nakat-onan.

Pag-analisar sa usa ka tudling

Isulat ang bersikulo sa kasulatan diha sa tunga sa dakong papel (sa laing paagi, pwede nimo kining ipakita diha sa pisara). Seguroa nga igo ang gidak-on niini aron makita sa kada estudyante. Pwedeng mogahin og pipila ka minuto ang mga estudyante sa pagpangutana og daghan bahin sa bersikulo sa kasulatan kutob sa ilang mahimo. Dayon hatagi sila og pipila ka minuto sa pagpangita diha sa Librarya sa Ebanghelyo aron tubagon ang mga pangutana. Sa laing paagi, pwedeng iprinta ang kasulatan diha sa papel ug pwedeng himoon sa mga estudyante ang samang kalihokan nga mag-inusara.

Pisara sa ideya

Pwedeng mogamit og mga sticky note ang mga estudyante o gagmayng piraso sa papel nga sulatan sa ilang mga ideya bahin sa mga paagi sa paggamit sa usa ka kamatuoran sa ebanghelyo ug ipapilit kini diha sa pisara. Pananglitan, pwedeng hangyoon ang mga estudyante nga isulat ang ilang mga ideya bahin sa mga paagi sa paggamit sa usa ka baroganan sa ebanghelyo. Ang pisara sa ideya pwedeng naay dako nga imahe sa usa ka butang nga may kalabotan sa hilisgotan. Pananglitan, kon nagtuon sa kahoy sa kinabuhi, pwedeng ilista sa mga estudyante ang mga paagi sa pagkaon sa prutas ug ipakita kini sa mga sanga sa usa ka kahoy diha sa pisara. Hatagi og panahon ang mga estudyante sa pagrebyo sa unsay gisulat sa uban.

Ilha ang imong tigpaminaw

Papilia ang mga estudyante og piho nga grupo sa mga tawo ug ipakigbahin ang unsay ilang nakat-onan sa paagi nga masabtan sa maong mamiminaw. Kini nga kalihokan pwedeng himoon sa mga estudyante uban ang usa ka kapares o grupo. Epektibo tingali ang paghatag sa mga estudyante og daghang opsiyon ug papilion sila kon hain nga mamiminaw ang gusto nilang tudloan. Ania ang pipila nga ilang kapilian:

• Usa ka higala nga lahi og pagtuo diha sa imong misyon.

• Mga bata diha sa klase sa primary.

• Usa ka higala sa eskwelahan.

• Usa ka sakop sa imong pamilya.

Ipadayon ang panag-istoryahanay

Sa dili pa maghisgot isip usa ka klase, makatabang ang pagdasig sa mga estudyante nga maminaw pag-ayo sa usag usa. Ang mosunod nga mga ideya pwedeng ihatag sa mga estudyante sa dili pa ang panaghisgot. Makatabang tingali kini nga maminaw sila pag-ayo sa usag usa ug makahimo og makapalig-on nga panaghisgotan nga maglakip og daghang estudyante sa panaghisgotan. Pwede nimo kining ipakita o hatagan ang mga estudyante og usa ka handout niini nga mga ideya.

Dugang niini—Ipakigbahin ang ganahan nimo sa pahayag sa imong klasmeyt ug dayon idugang ang kaugalingon nimong hunahuna.

• “Kana nagpahinumdom nako sa …”

• “Uyon ko, kay …”

• “Bitaw. Ang laing pananglitan mao ang dihang …”

• “Nindot na nga punto …”

Isumada kini—Isulti sa laing paagi ang giingon sa imong klasmeyt ug dayon pagkomento niini.

• “Nadunggan ka nako nga miingon nga …”

• “Unya, kon sakto akong pagsabot nimo …”

• “Ganahan ko sa imong pagkasulti sa …”

Pangutana—Pangutan-a ang laing estudyante bahin sa unsay ilang gisulti.

• “Pwede ko nimong sultihan og dugang pa bahin niana?”

• “Morag wala ko kasabot … ?”

• “Nakasabot ko nimo, pero unsa man ang bahin sa … ?”

• “Nahunahunaan ba nimo ang bahin sa … ?”

Ipasa ang papel

Paghimo og papel nga naay sunod-sunod nga mga instruksiyon nga pwedeng maglakip sa mga kasulatan o mga kinutlo nga basahon ug mga pangutana nga tubagon. Seguroa nga naay igong lugar nga kasulatan sa mga estudyante sa ilang mga tubag. Hatagi og kopya ang kada estudyante ug dapita sila nga isulat ang ilang ngalan sa ibabaw. Tubagon sa mga estudyante ang unang pangutana. Dayon ilang pil-on ang papel aron tabonan ang ilang tubag. Ilang ipasa ang papel sa laing estudyante nga maoy motubag sa sunod nga pangutana o pag-aghat. Pil-on sa kada estudyante ang papel aron tabonan ang ilang tubag ug ipasa kini sa laing estudyante. Sa kataposan sa pagtuyok, ibalik ang mga papel sa orihinal nga estudyante nga maoy mobasa sa unsay gisulat sa ilang mga klasmeyt.

Pangandam sa pagpakigbahin

Ipakigbahin ang usa ka importanteng pangutana nga gusto nimong tubagon sa mga estudyante. Seguroa nga ipakigbahin kini sa pipila ka minuto sa dili pa sila dapiton nga tubagon ang pangutana. Pananglitan, pwede kang moingon nga, “Pipila ka minuto gikan ron, ganahan kong ipakigbahin sa pipila ninyo ang inyong hunahuna bahin sa ______________. Palihog hunahunaa kon unsay gusto ninyong ipakigbahin samtang atong tun-an ang mosunod nga tudling.” Pwedeng dapiton ang mga estudyante nga ipakigbahin una sa usa ka kapares o sa grupo.

Paghimo og survey sa klase

Paghimo og survey sa imong mga estudyante pinaagi sa paghatag nila og gamayng piraso sa papel. Pwedeng motubag ang mga estudyante nga dili sila mailhan ug dayon ibutang ang ilang mga papel diha sa usa ka kahon o kalo. Pwede nimong kolektahon ang ilang mga hunahuna bahin sa usa ka baroganan, pangutana, o desisyon nga himoon tingali sa usa ka tawo diha sa usa ka senaryo. Sa laing paagi, kon naay smartphone ang mga estudyante, pwede kang mogamit og polling app nga libre ug daling gamiton. Hatagi og asaynment nga tun-an ang mga estudyante ug ang link sa survey sa usa ka pangutana ug patubaga sila gamit ang ilang mga selpon. Makita nimo ang mga tubag ug pwede nimo kining ipakita diha sa klase. Dunay daghang app sa pag-survey nga makahimo niini.

Gamhanang mga pulong

Paggamit og gamhanang hugpong sa mga pulong aron bansayon ang imong mga estudyante sa pagpakigbahin ug pagpasiugda sa usa ka panaghisgot diha sa klase.

Makatabang kini nga himan para sa hilom nga mga klase o dili segurado kon unsaon o unsa ang ipakigbahin. Ipakita ang listahan sa hugpong sa mga pulong sa ubos nga makatabang sa mga estudyante nga mahan-ay kon unsay ilang ipakigbahin. Patun-i nila ang hugpong sa kasulatan ug paandama sila sa pagpakigbahin gamit ang usa o daghang gamhanang mga hugpong sa mga pulong. Idumala ang panaghisgotan o ipadumala kini sa usa ka estudyante.

• Ang bersikulo nga ganahan nako mao ang…

• Ang hugpong sa mga pulong nga makahuloganon mao ang…

• Ang leksiyon nga makuha niini mao ang…

• Nakaplagan nako ang baroganan…

• Ang usa ka pulong nga akong nakit-an nga makapainteres/makapalibog mao ang…

• Ang usa ka butang nga angayng mahibaloan sa usa ka tin-edyer bahin niini mao ang…

• Ang usa ka butang nga akong nahibaloan nga tinuod mao ang…

• Ang usa ka butang nga dili ko segurado mao ang…

• Ang usa ka butang nga para nako nga kinahanglan nakong himoon niini karon mao ang…

• Ang usa ka butang nga akong nakat-onan bahin sa Manluluwas mao ang…

Mga kard sa pag-apil

Pag-apod-apod og mga kard nga pwedeng iisa sa mga estudyante para sa makita nga mga tubag para sa imong mga pangutana. Pwedeng gamiton sa mga estudyante ang mga kard aron ipakita ang ilang tubag o dihang andam na silang ipakigbahin o hisgotan ang ilang mga hunahuna. Pananglitan:

• Green para sa tinuod, pula para sa sayop

• “Naghunahuna Pa” sa usa ka bahin ug “Andam nga Mopakigbahin” sa pikas bahin

• Ang kard nga naay mga numero o mga letra nga nagrepresentar sa lainlaing opsyon nga nakalista sa pisara. Ang tanang estudyante mopakita og usa ka numero o letra para sa ilang mga tubag aron imong makita ang ilang mga tubag ug pilion ang mga estudyante nga imong patubagon.

• Ang kard nga naay daghang tubag sa lainlaing mga bahin (tan-awa ang pananglitan sa ubos). Dihang dapiton ang estudyante nga motubag, ang tunga sa ibabaw nga bahin ang ilang posisyon. Dayon pwede ka o ang usa ka estudyante nga motawag sa mga estudyante base sa unsa nga posisyon nga ilang gipakita.

Tigsugod og senaryo

Hatagi ang mga estudyante og dili kompleto nga senaryo ug dapita sila nga dugangan ang mga detalye aron mahimo kining mas mahinungdanon ug mas masabtan. Pananglitan, pwede kang moingon og sama sa “Maghimo kita og senaryo bahin sa usa ka tawo nga kaedad ninyo, ginganlan og Julia, nga nag-atubang og mga hagit sa kinabuhi. Unsa kaha ang pipila niini?” Samtang makigbahin ang mga estudyante, tabangi sila nga mosugyot og mga detalye nga makapahimo kang Julia, o uban pang ngalan nga imong pilion, nga morag tinuod nga tawo. Pwede usab kang modugang og mahinungdanong mga detalye nga makaimpluwensiya sa panaghisgot, sama sa pangunang pangutana ni Julia.

Sa laing paagi, pwede nimong ipabuhat sa mga estudyante ang ilang kaugalingong mga senaryo ug isulat kini sa papel. Pwede nimong ibaylo kini nga mga senaryo ug patubagon ang mga estudyante gamit ang ilang nakat-onan.

Senaryo sa text thread

Paghimo og senaryo nga magsugod sa usa ka text message, pero ayaw og isulti sa mga estudyante ang mga kahimtang nga misangpot sa maong text message. Pwede nimong hatagan ang kada estudyante og blangko nga template sa text sama sa mosunod ug dapita sila nga maghimo og dayalogo para sa text thread.

Paspas nga pagbaton og higala

Ang pagtabang sa mga estudyante nga mobati nga komportable sa pagpakigbahin sa usag usa pinaagi sa pagtabang nila nga mailhan ang ilang mga klasmeyt. Kini nga kalihokan makatabang sa mga estudyante nga mailhan ang usag usa ingon man usab sa pagpakigbahin og usa ka butang bahin sa mga kasulatan. Bahina ang mga estudyante nga magpares pinaagi sa pag-organisar og duha ka laray nga nag-atubangay nga mga lingkoranan. Dayon dapita ang mga estudyante nga markahan ang gihatag nga tudling sa kasulatan ug tubagon ang usa ka pangutana nga imong giandam bahin sa maong tudling. Dapita ang kada pares nga nag-atubangay nga tubagon ang pangutana sa pagpakighigala nga imong giandam aron tabangan sila nga mas mailhan ang usag usa. Dapita ang mga estudyante nga magbaylo og mga pares ug usbon ang proseso gamit sa daghang higayon gamit ang lainlaing pangutana ug mga tudling sa kasulatan. Aron magtinabangay ang mga estudyante sa kada paresan, ang estudyante nga naglingkod sa usa sa mga bangko sa tumoy dili moapil og libot.

Sticky board

Ibutang sa pisara ang pipila ka pangutana nga tubagon sa mga estudyante o mga bersikulo nga pwede nilang ipakigbahin ang ilang mga panabot. Isulat sa kada estudyante ang iyang ngalan diha sa (mga) sticky note ug ibutang kini tupad sa (mga) pangutana o (mga) bersikulo nga gusto nilang tubagon o komentaryohan.

Laing ideya: ang mga kolor mahimong nagpasabot kon unsay gustong ipakigbahin sa mga estudyante, nga mao, ang usa ka panabot, pangutana, cross-reference, ug uban pa.

Mokuha og litrato

Dapita ang mga estudyante nga mopili og usa ka butang diha sa klasrom o usa ka litrato diha sa ilang selpon nga magamit sa pagtabang sa pagtudlo sa usa ka baroganan o doktrina. Dapita sila sa pagpakigbahin kon unsaon nila pagtudlo ang usa ka tawo bahin sa ilang nakat-onan gamit ang butang o litrato.

Isulat sa dili pa nimo ipakigbahin

Hatagi og panahon ang mga estudyante sa pagrekord sa ilang mga tubag sa importanteng mga pangutana diha sa ilang mga journal sa pagtuon sa dili pa sila dapiton nga motubag og kusog.

4. Paghimo og representasyon sa unsay ilang nakat-onan

Ang mga leksiyon kasagaran modapit sa mga estudyante sa paghimo og usa ka butang aron ipakita ang unsay ilang gitun-an. Mahimong maglakip kini sa paggamit og mamugnaon nga mga kahanas. Ang mosunod nga mga kalihokan mao ang pipila ka paagi nga matabangan ang mga estudyante sa paghimo ini.

Acrostic nga balak

Gamita ang mga letra sa ngalan, lokasyon, o doktrina sa paghimo og acrostic nga balak gamit ang ilang nakat-onan sa klase. Pananglitan, isulat tingali sa usa ka estudyante ang usa ka acrostic nga balak gamit ang pulong nga pagtuo sama sa mosunod:

P – Pagsunod sa ehemplo ni Jesukristo.

A – Aghat gikan sa Espiritu Santo sunda.

G – Gahinan og panahon sa pag-ampo bahin sa imong mga pangutana o kabalaka.

T – Tan-awa ang mga propeta sa Dios. U – Uyon sa mga propeta sa Dios.

O - Oh, Dios, naglaom ko sa Imong gisaad nga mga panalangin.

Paghimo og App

Ang mga estudyante magdesinyo sa kaugalingon nilang app diha sa usa ka piraso sa papel. Pwedeng i-feature sa app ang usa ka kamatuoran nga gitudlo diha sa gitun-an nga mga kasulatan ug naglakip og mga kalihokan, mga litrato, mga kasulatan, o mga kinutlo nga makatabang sa usa ka tawo nga gamiton kini sa ilang kinabuhi.

Chiasmus

Ang chiasmus maoy usa ka figure of speech diin ang ikaduhang katunga sa kapahayag, parapo, o sinulat maoy pabali nga katumbas ug nagsubli sa han-ay sa unang katunga. Ang nag-unang mensahe makita sa tungatunga (tan-awa sa Alma 36 isip ehemplo). Dapita ang mga estudyante sa paghimo og usa ka chiasmus gikan sa ilang gitun-an. Ang mga estudyante mobutang sa gipabaga nga kamatuoran diha sa tunga ug magdugang og mga linya sa ibabaw ug ubos niini uban ang nagsuporta nga mga kasulatan o propetikanhong mga pamahayag. Ingon niini ang dagway niana:

A – kon unsay gibati sa mga estudyante bahin sa kamatuoran o sa ilang mga kasinatian niini

B – kon unsay nasabtan sa mga estudyante bahin sa kamatuoran

C – kamatuoran o baroganan sa ebanghelyo

C – kamatuoran o baroganan sa ebanghelyo

B – dugang nga pagsabot bahin sa kamatuoran

A – dugang nga mga kasinatian sa mga estudyante uban ang kamatuoran ug kon unsay ilang gibati bahin niini

Pagtuon gamit ang comic strip

Hatagi ang mga estudyante og blangko nga template sa comic book o pahimoa sila og template diha sa piraso sa papel. Basahon sa mga estudyante ang hugpong sa kasulatan ug maghimo og comic nga naghulagway sa dagan sa istorya diha sa hugpong. Ipagamit nila ang kataposang kahon aron ipakigbahin ang para nila labing bililhon nga kamatuoran nga makat-onan gikan sa istorya. Pwede nilang ipakigbahin ang ilang mga comic diha sa klase. Sa laing paagi, pwede nilang gamiton kini nga kalihokan aron ihulagway ang paggamit sa kamatuoran o baroganan sa modernong panahon.

Paghimo og latid [outline] sa leksiyon

Paghimo og outline nga magamit sa mga estudyante aron mangandam para sa mubong leksiyon, pakigpulong, mensahe, o paagi sa pagpakigbahin sa usa ka tudling sa kasulatan. Pwede kang maghatag og blangko nga template sa outline diin pwedeng irekord sa mga estudyante ang ilang mga nakaplagan. Pwede nimong tudloan ang mga estudyante nga maglakip og lainlaing impormasyon sa kada kahon. Pananglitan, pwedeng magsulat ang mga estudyante og ulohan diha sa unang kahon, i-summarize ang mahinungdanong mga bersikulo sa sunod nga kahon, mga pananglitan o personal nga mga istorya sa tulo ka tag-as nga kahon, ug usa ka pamatuod sa kataposang kahon.

Paghimo og pamphlet

Hatagi ang matag estudyante og usa ka piraso sa papel ug dapita sila nga pil-on kini og katulo. Pwedeng maghimo ang mga estudyante og ulohan sa pahina nga maglangkob sa baroganan o doktrina nga ilang nailhan. Pwedeng maghimo ang mga estudyante og sunodsunod nga mga pahina nga naay mga subtitle ug mga detalye gikan sa ilang nakat-onan. Pwede nimo silang dapiton nga magbilin og luna sa likod sa pamphlet nga masulatan sa bisan unsang tumong o plano nga ilang himoon panahon sa leksiyon.

Mga kategorya sa pagkolor

Pagprinta og gikopya nga pahina sa hugpong sa kasulatan ug paghatag og dekolor nga mga lapis aron markahan ang mga kasulatan. Ilha ang mga kategoriya nga sama sa “Gisaad nga mga panalangin,” “Mga Buhat sa Hugot nga Pagtuo,” o “Mga Sugo.” Pwedeng asaynan og kolor ang matag kategoriya. Dapita ang mga estudyante sa pagtuon sa mga bersikulo ug markahan ang gikoloran nga mga kategoriya kon makit-an nila kini. Dapita ang mga estudyante sa pagpakigbahin sa ilang gimarkahan ug nakat-onan gikan sa kalihokan.

Susiha ang plano

Pwede kang mogamit og graphic organizer sa pagtabang sa mga estudyante sa pagsusi sa ilang mga plano. Tubagon sa mga estudyante ang mga pangutana sa kada seksiyon sa graphic.

Flowchart

Pwedeng maghimo og graphic ang mga estudyante nga naghulagway sa relasyon tali sa lainlaing desisyon o konsepto sa leksiyon. Pananglitan, usa ka tsart nga sama sa mosunod pwedeng gamiton aron ipakita kon unsay padulngan sa hugot nga pagtuo o paglaom diha kang Jesukristo.

Paghimo gamit ang mga kamot

Hatagi og mga materyales ang mga estudyante nga ilang magamit isip mga bloke o modeling clay aron makahimo og usa ka butang nga nagrepresentar sa ilang natun-an. Pananglitan, pwedeng mogamit ang mga estudyante og mga bloke sa pagrepresentar sa mga kuta nga gisugo ni Kapitan Moroni nga tukoron sa iyang katawhan (tan-awa sa Alma 48:7–9). Pwedeng butangan og label sa mga estudyante ang kada bloke og paagi nga makapangandam kita sa espirituhanon aron makabarog sa mga pag-atake ni Satanas.

Collage nga imahe

Pwedeng mangitag mga litrato ang mga estudyante diha sa ilang mga selpon o sa Librarya sa Ebanghelyo nga may kalabotan sa kamatuoran. Pwede silang maghimo og digital collage ug ipakigbahin kini diha sa klase.

Nahibalo – gustong mahibalo – nakat-on

Bahinon og katulo sa mga estudyante ang usa ka papel. Sa unang kulom, ilang isulat ang ila nang nahibaloan bahin sa usa ka hilisgotan. Sa sunod, ilang isulat ang gusto nilang mahibaloan. Ibutang sa ikatulong kolum ang nakat-onan sa mga estudyante panahon ug human sa leksiyon. Pwede silang dapiton nga ilhon kon unsay nakatabang nila sa pagkat-on o nakaapektar sa ilang gibati panahon sa leksiyon, kon naa.

Sulat para sa umaabot

Pwedeng sulatan sa mga estudyante ang ilang kaugalingon nga ablihan ug basahon sa usa ka piho nga panahon (diha sa usa ka misyon, dihang maminyo, pagkatawo sa unang anak). Ang laing opsiyon mao ang pagpahimo og sulat sa mga estudyante para sa mga sakop sa ilang pamilya sa umaabot. O pwede silang magsulat sa umaabot nga mga estudyante nga moadto sa seminary ug ipasabot ang ilang nakat-onan ug kon unsay ilang gibati.

Paghimo og meme

Ilhon sa kada estudyante ang usa ka baroganan gikan sa ilang pagtuon ug maghimo og makadani nga hugpong sa mga pulong nga naghulagway sa baroganan. Hangyoa usab sila sa pagdrowing og usa ka litrato nga naghulagway sa baroganan. Seguroa nga ilakip nila ang pakisayran sa kasulatan. Ingna sila nga ipakigbahin ug ipasabot ang ilang meme. Pwede tingali kang magpakita og pipila ka ehemplo gikan sa bag-ohay lang nga magasin sa Alang sa Kalig-on sa mga Kabatan-onan.

Paghimo og plano nga “moadto ug mobuhat”

Pwedeng makaplano ang mga estudyante nga mohimo og epektibo, matarong nga aksiyon gikan sa mga butang nga ilang nakat-onan ug gibati panahon sa leksiyon. Aron himoon kini, pwede nimong ipaila nila ang gusto nilang buhaton ug sa paghimo og piho nga mga lakang kon unsaon pagtuman sa ilang mga plano. Kini tingali maglakip sa pag-ila sa mga babag nga mahimo nilang atubangon ug piho nga mga lakang aron mabuntog kini nga mga babag. Samtang ang mga estudyante naghimo sa ilang mga plano, awhaga sila nga bulagon kini sa mas gagmayng mga lakang. Ang paghimo og ginagmayng kausaban sa mga butang nga ilang gihimo kada adlaw makatabang nila nga mobati nga malamposon.

Paghimo og plano nga “decision tree”

Pwedeng mogamit ang mga estudyante og decision tree sa paggamit sa baroganan sa ebanghelyo pinaagi sa paglista sa mga positibo ug mga negatibong bahin sa lainlaing desisyon. Makasugod sila sa usa ka pangutana bahin sa baroganan sa ebanghelyo ug human malista ang mga positibo ug mga negatibong bahin, susiha ang ilang mga kapilian aron mahimo ang maong desisyon. Paghimo og lahi nga mga tree alang sa kada pangutana ug desisyon diha sa plano.

Pananglitan: Paghimog plano sa pagtuon sa mga kasulatan.

Mga Pangutana:

1. Kanus-a nako tun-an ang akong mga kasulatan? (Paghimo og usa ka decision tree.)

2. Asa ko magtuon sa akong mga kasulatan? (Paghimo og laing decision tree.)

3. Unsa ka dugay ang akong igahin sa pagtuon sa akong mga kasulatan? (Paghimo og ikatulong decision tree.)

Sa kataposan sa proseso, ang tulo ka desisyon maghiusa nga mahimong usa ka plano, o tumong, nga naay piho nga mga lakang sa pagtuman niini.

Bag-ong bersikulo sa himno

Pwedeng mopili og himno ang mga estudyante bahin sa kamatuoran nga ilang gitun-an diha sa leksiyon. Dapita sila sa paghimo og bag-ong bersikulo sa himno gikan sa unsay ilang gitun-an. Pwedeng mopili ang klase og pipila ka bag-ong mga bersikulo nga ipakita ug kantahon.

Pagkat-on nga gibase sa proyekto

Pwedeng maghimo ang mga estudyante og proyekto alang sa daghang leksiyon diin magdugang sila og sulod sa sunodsunod nga mga leksiyon/mga semana. Kini pwedeng usa ka balak, himno, bidyo, proyekto sa art, o uban pang mamugnaong mga ekspresyon nga ilang himoon sa sunodsunod nga mga leksiyon.

Usba og sulat ang kataposan

Dapita ang mga estudyante nga usbon os sulat ang kataposan sa usa ka istorya sa kasulatan o istorya nga imong ipakigbahin nga morag ang tawo nakahimo og mas maayo/lahi nga desisyon.

Mga risipi

Pwedeng maghimo og mga risipi ang mga estudyante gamit ang ilang nakat-onan. Pwede kang magsugod pinaagi sa pagpakita og ehemplo sa usa ka risipi nga naay mga sagol, mga sukod, ug mga instruksiyon. Dayon tabangi ang mga estudyante sa pagsunod sa sumbanan aron organisahon ang ilang nakat-onan. Pwede nilang hatagan og ulohan ang risipi og “Unsaon nga mahimong epektibong misyonaryo” o “Mga paagi sa pagbaton og mas epektibong pagtuon sa kasulatan” ug dayon ilakip ang para nila mahinungdanong mga elemento gamit ang mga kasulatan ug mga kinutlo. Pananglitan, sa Doktrina ug mga Pakigsaad 76, pwedeng ilista sa mga estudyante ang mga sagol, mga sukod, ug mga instruksiyon sa pagkahimong usa ka celestial nga tawo. Awhaga sila nga mahimong mamugnaon sa ilang mga risipi. Pwede silang magdrowing og litrato nga nagrepresentar sa kataposang produkto sa risipi.

Pagdrama-drama [role-play]

Dramahon sa mga estudyante ang usa ka senaryo. Naay daghang paagi sa paghimo niini. Pwede ang mga boluntaryo moadto sa atubangan sa klasrom aron dramahon ang senaryo. Pwedeng magdrama-drama ang mga estudyante nga magkapares o gamayng grupo. O pwedeng ikaw ang modrama sa bahin sa usa ka tawo nga naay mga pangutana ug ipatubag sa tibuok klase ang imong mga pangutana o gikabalak-an.

Mubo nga bidyo

Dapita ang mga estudyante sa pagplano og mubo nga bidyo. Pwede silang maghimo og script ug magdesisyon kon unsaon pagpakita ang usa ka butang nga ilang nakat-onan gikan sa leksiyon. Kon posible, pwedeng maghimo og bidyo ang mga estudyante ug ipakigbahin kini diha sa klase.

Post sa social media

Dapita ang mga estudyante nga maghimo og post sa social media aron ipakigbahin ang ilang personal nga gituohan o mga kasinatian nga may kalabotan sa mga baroganan nga gihisgotan diha sa klase. Pwede kini nga usa ka butang nga ilang i-post online, o usa ka butang nga ilang gihimo diha sa ilang mga journal sa pagtuon. O pwede nilang hunahunaon nga naay usa ka tawo ang nag-post og pangutana nga may kalabotan sa gitun-an sa klase ug paghimo og tubag gamit ang kahibalo nga ilang nakat-onan. O pwedeng tun-an sa mga estudyante ang bag-ohay lang nga post sa social media sa lider sa Simbahan ug pagsulat og tubag o makapadasig nga note diha sa post. Alang sa usa ka artikulo nga makatabang sa mga estudyante sa paghimo og makahuloganong mga post sa social media, tan-awa sa “Social Media: Gahom sa Pag-usab sa mga Kinabuhi,” Alang sa Kalig-on sa mga Kabatan-onan, Abril 2022.

Biswal nga ipakita

Grupoha ang mga estudyante sa paggamit sa mga kasulatan, mga kinutlo, ug uban pang kapanguhaan sa pagtuon aron mohimo og mga poster o display sa bongbong para sa klasrom. Pwedeng ilakip sa ilang mga poster o mga display ang mahinungdanong mga bersikulo, mga pangutana nga matubag sa asoy sa kasulatan, mahangtorong mga kamatuoran, mga litrato, ug uban pa. Pwedeng molibot ang mga estudyante ug tan-awon ang gihimo sa ubang grupo.

Pagsulat og artikulo para sa magasin sa Simbahan

Pwedeng hunahunaon sa mga estudyante nga nagsulat sila og artikulo para sa Alang sa Kalig-on sa mga Kabatan-onan, Hgiala, o Liahona nga mga magasin nga ipakigbahin ang unsay ilang nakat-onan ug kon sa unsang paagi kini makatabang sa mga kabatan-onan sa tibuok kalibotan. Pwede kang magpakita og usa ka artikulo isip ehemplo. Awhaga ang mga estudyante nga magdugang og mga ilustrasyon, tsart, ug infographics.