“Social Media: Gahom sa Pag-usab sa mga Kinabuhi,” Alang sa Kalig-on sa mga Kabatan-onan,, Abr. 2022.

Social Media: Gahom sa Pag-usab sa mga Kinabuhi

Ni Megan Thomson Ramsey

Mga Magasin sa Simbahan

Sigurado, makalingaw tan-awon kon unsa ang gipangbuhat sa inyong mga higala. Apan ang inyong paggamit sa social media sa pagkatinuod makapausab sa mga kinabuhi.

Imahe

tawo nga naggamit og selpon [smartphone]

Nakahunahuna na ba kamo sukad mahitungod kon sa unsang paagi ang teknolohiya nga giimbento sa mga tawo sa pagkatinuod dinasig sa Ginoo sa pagpadali sa Iyang buhat?

Hunahunaa ang milagro sa eroplano. Ang mga misyonaryo sa Ginoo karon makaabot na sa matag suok sa kalibotan sulod sa pila ka oras lang. Unsa pa kaha ang selpon [smartphone]? Ang unang mga misyonaryo makakonektar sa mga tawo diha lang sa ilang samang kwarto. Apan ang selpon gikonektar ngadto sa social media mahimong usa ka himan nga mapaambit dayon ang ebanghelyo ngadto sa birtuwal ug dili limitadong gidaghanon sa mga tawo.

Ang tibuok kalibotan nga pandemya mipalapad sa paggamit sa social media sa pagtabang sa mga misyonaryo ug mga miyembro sa pagkonektar sa daghan pang mga anak sa Dios. Kon mogamit kamo sa social media, ania ang pipila ka mga baroganan nga mahimo ninyong sundon aron sa pagtabang sa pagpundok sa Israel. Samtang kamo magbasa, pamalandongi kon unsaon ninyo sa paggamit ang social media sa pagtabang niining importanting buhat.

Ipaambit Nganong Kamo Malipayon

Samtang si Ashlee Steede anaa pa sa misyon, siya mikonektar sa usa ka batan-ong babaye nga mikontak niya tungod kay siya nakagusto sa litrato sa iyang malipayon nga pamilya. “Base sa akong profile makaingon siya nga ang Dios importante kanako. Mibati siya nga adunay butang nga espesyal kabahin sa akong pamilya. Miingon siya nga malipayon kaayo kaming tan-awon, ug kana ang butang nga gusto niya. Ganahan siya sa tanan nga among gitudlo, ug siya nabunyagan.”

Sulayi Kini:

Kon kamo ganahan gayod og usa ka butang, gusto ninyo nga mopaambit niini sa uban. Sugdi pinaagi sa pag-ugmad sa inyong kaugalingong gugma alang sa ebanghelyo ug dayon ipaambit kon nganong kini nakapahimo kaninyo nga malipayon.
Ipaambit ang butang nga kamo mapasalamaton ug paglakip og pipila ka mga litrato.
Ipaambit ang mga post nga makapadasig kaninyo, tingali gikan sa imong lokal nga mga misyonaryo o gikan sa Kinatibuk-ang Awtoridad.

Magmatuod ug Mamugnaon

Ang mga tawo kasagaran makasulti kon ang imong gipost sinsero ug tinuod. Kon kita magpost uban sa Espiritu, kita makatandog og daghang kasingkasing.

Usa ka elder sa New York mipost og usa ka malumo nga personal nga istorya. Usa ka batang babaye nakakita sa post mikonektar sa mga misyonaryo. Ang lunsay nga pagpamatuod sa mga elder mitabang kaniya nga makahukom nga mabunyagan.

Ang mga misyonaryo sa New Zealand mi-post og mga pahinumdom [ad] nga libreng serbisyo diha sa Facebook. Daghan kaayo ang ilang gibuhat nga pagserbisyo nga sila namantala sa duha ka lokal nga pamantalaan.

Ang mga misyonaryo sa Romania nagmugna og mga pahinumdom alang sa libreng pag-ampo. Ang mga tawo misumiter sa ilang mga numero, ang mga misyonaryo sa ilang siyudad mitawag kanila, mipasabot sa pag-ampo, ug sila dungan nga nag-ampo.

“Ako militok og pipila ka pag-ampo uban sa mga tawo diin ang Espiritu hilabihan ka kusog,” si Sister Maci Sorensen miingon. “Hilabihan ka talagsaon ang matawagan tanan kining mga tawo ug mag-ampo uban kanila.”

Sulayi Kini:

Ipaambit ang kasinatian o kasulatan nga nakadala kaninyo nga mas mapaduol ngadto ni Kristo.
I-post ang mga video sa imong kahanas sa musika, art, atleta, o sa pagluto ug isaysay kini sa yanong mga baroganan sa ebanghelyo o sa mga kasulatan.

Tutokan ang Pagtabang sa Usa ka Tawo

“Miapil ako sa usa ka Kristiyano nga grupo sa Facebook ug mipost mahitungod sa akong gibati sa gugma sa Dios,” miingon si Sister Ashton Petty. “Sulod sa 24 oras aduna koy mga 200 ka komentaryo. Usa ka komentaryo nga nagustohan kaayo nako. Akong siyang gipadalhan og indibidwal nga mensahe, ug misulti siya nako nga siya dili angayan sa gugma sa Dios. Ako misulti kaniya mahitungod sa walay kinutuban nga Pag-ula ni Jesukristo. Sa kadugayan siya nabunyagan. Sa inyong account sa social media, ipamatuod ang gugma sa Dios, kay kamo wala gayod masayod kon si kinsa ang nagkinahanglan nga makadungog niini.”

Sulayi Kini:

Ikonsiderar ang pagpadala og mensahe sa inyong indibidwal nga mga higala sa pagtubag sa ilang mga pangutana ug mga komentaryo. Ipaambit kanila ang baroganan sa ebanghelyo nga nakatabang kanimo.
Idalit ang tubag sa mga pangutana mahitungod sa Simbahan diha sa usa ka post.
Sa personal nga paagi dapita ang imong mga higala ngadto sa seminary o sa mga kalihokan sa Simbahan.

Imahe

batan-ong lalaki nga naggitara

Si Elder David A. Bednar sa Korum sa Napulog Duha ka Apostoles miingon: “Ako nagtuo nga ang panahon miab[o]t alang nato isip mga disipulo ni Kristo sa paggamit niining dinasig nga mga himan sa husto ug mas epektibo … sa pagsangyaw sa kamatuoran sa Pagpahiuli sa ebanghelyo sa ulahing mga adlaw. …

“… Ako moawhag kaninyo nga molukop sa yuta uban sa mga mensahe nga puno sa pagkamatar[o]ng ug kamatuoran—mga mensahe nga tinuod, makapalig-on, ug dalaygon” ¹