Direkta sa Punto

Unsay buot ipasabot sa “ayaw pagsimba [o]g laing dios”?

The Lord Appearing to Moses [Ang Ginoo nga Nagpakita ngadto ni Moises], ni Wilson J. Ong

Si Jesukristo miingon nga “ang labing dako ug labing importanteng sugo” mao ang “higugmaa ang Ginoo nga imong Dios sa tibuok mong kasingkasing, sa tibuok mong kalag ug sa tibuok mong hunahuna” (Mateo 22:37–38). Kabahin niini nagpasabot sa “ayaw pagsimba ug laing dios gawas [Kaniya]” (Exodo 20:3).

Dili gusto sa Ginoo nga ang Iyang katawhan mohatag sa ilang mga kasingkasing, mga kalag, ug mga hunahuna ngadto sa bisan unsa kay sa Kaniya. Siya mipasidaan kanila nga ang bahandi, mga higala, ug kadtong ilang giminyoan makabalda kanila sa pagtutok Kaniya (tan-awa sa Deuteronomio 7:3-6; 8:11-14; 13:6). Gusto sa Ginoo nga Iyang magiyahan ang mga hunahuna, mga tinguha, ug mga aksiyon sa Iyang katawhan. Nasayod Siya nga kini makatabang kanato nga makabaton sa labing dako nga kalipay.

Karon, ang mga propeta mipasidaan kanato mahitungod sa “mini nga mga dios.” Sama pananglit, si Presidente Dallin H. Oaks, Unang Magtatambag sa Unang Kapangulohan, miingon kausa:

“Unsay laing prayoridad ang ‘gialagaran’ og una … kaysa sa Dios … ? Hunahunaa kini nga mga posibilidad, nga komon sa atong kalib[o]tan:

• Mga tradisyon sa kultura ug pamilya.

• Buhat nga di ikasilo sa uban.

• Paningkamot sa pagpanarbaho.

• Tinguha sa materyal nga butang.

• Paglingaw-lingaw.

• Gah[o]m, kainila, ug dungog” (Okt. 2013 nga kinatibuk-ang komperensiya [Liahona, Nob. 2013, 72]).