Lig-on nga mga Pundasyon

Mga Pag-ampo diha sa Bugnaw nga mga Suba

batang babaye nga nanglimbasog diha sa tubig, laing batang babaye nga nagsakay sa kayak

Paghulagway pinaagi ni Corey Egbert

Atol sa usa ka kamping nga biyahe uban sa among mga pamilya, ang akong higala nga si Bayley ug ako misakay og mga kayak diha sa suba. Nakabansay ako og kadaghan sa kayaking, apan si Bayley wala pa gayod makasulay niini. Human nga gitudloan nako siya sa mga sukaranan, gisul-ob namo ang among mga life jacket ug misakay sa among mga kayak.

Usa kadto ka bugnaw nga tingpamulak, ug ang tubig hilabihan ka tugnaw. Nagbugsay-bugsay kami sa palibot sa dihang nakadungog ko og tampisaw. Milingi ko sa luyo ug nakita ang ilalom sa hayag nga lunhaw nga kayak ni Bayley. Misugod kong paspas nga naghunahuna sa daghang butang. Nag-ampo ako nga motunga siya og balik.

Sa kataposan, mitunga si Bayley, nga nagpunga-punga og ginhawa. Maayo gani, mabaw ra ang tubig nga makatugkad ra siya sa yuta. Apan naglisod gihapon siya sa pagbali sa iyang kayak sa hustong posisyon niini. Misulay ako sa pagtabang kaniya, apan lisod kini samtang nagsakay ako sa akong kayak.

Misulti si Bayley kanako nga naminhod ang iyang mga bitiis. Misugod siya sa pagkataranta. Gibati nako nga mosulti og pag-ampo uban niya. Pagkahuman dayon sa pag-ampo alang sa kahilwasan ug giya, mibati ako nga nahupay; nasayod ako nga mahimong OK ra kami.

Misalom ako ngadto sa bugnaw kaayo nga tubig. Gitabangan nako si Bayley nga makasakay sa akong kayak ug gibali ang iyang kayak. Gikuptan nako ang mga gunitanan sa duha ka kayak ug nanglimbasog sa paglakaw latas sa lapokon nga tubig paingon ngadto sa daplin sa suba.

Mapasalamaton ko nga gitudloan ko sa akong mga ginikanan nga mag-ampo kanunay, ilabi na sa malisod nga mga sitwasyon. Ang akong pag-ampo migiya kanako sa pagtabang sa akong higala nga nanginahanglan.

Usahay mosimba kita ug dili kaayo maminaw. O mobasa sa mga kasulatan ug mobati nga kini dili magamit kanato. Apan kon moabot ang kalisdanan ug masulayan ang atong hugot nga pagtuo, ang yano nga mga butang nga gitudlo kanato makapanalangin kanato.

Adaline L., Prince Edward Island, Canada