Ang Tema ug Ako

Mga Kabatan-onan mipaambit kon giunsa nila sa pagsunod ang mga pulong sa mga Tema sa Young Women ug Korum sa Aaronic nga Pagkapari

Pisikal ug Espirituwal nga Pag-ehersisyo

“Ako naningkamot sa pagserbisyo, pagpakita og hugot nga pagtuo, paghinulsol, ug paglambo sa matag-adlaw.”

Ni Sven Wouter

batan-ong lalaki nga nagdagan

Litrato gikan sa Getty Images

Human ko naangol sa pagdula og [American] football, nagsugod na sa paglabad ang akong ulo sa matag adlaw. Maglisod ko sa pag-focus tungod sa kasakit nga akong gibati. Usa ka adlaw mibati ko nga naaghat gikan sa Espiritu Santo nga ang kalipay wala maggikan sa atong mga kahimtang apan gikan sa atong pag-focus. Nakaamgo ko nga ako nag-focus kanunay sa akong kasakit imbis sa inadlaw-adlaw nga mga panalangin nga akong nadawat gikan sa Dios.

Misugod ko sa paghunahuna, kon unsa pa kaha ang nakapugong kanako gikan sa paglambo sa espirituwal nga paagi? Uban sa mapainubsanon nga kasingkasing ako nangutana sa Langitnong Amahan niini nga pangutanaha. Ako nasayod nga ako dili makakab-ot og hustong tubag sa akong kaugalingon, apan ang atong Langitnong Amahan adunay tubag sa tanan.

Ang tubag nga akong nadawat ingon og yano kaayo, apan kini gipahaom sa unsay akong gikinahanglan: “Bangon sa higdaanan ug pag-ehersisyo pag-usab.” Misugod ko sa pag-ehersisyo bisan pa man sa makanunayong kasakit nga akong gibati. Akong namatngonan ang akong kaugalingon nga nag-abante paduol ngadto sa Dios.

Kon mag-ehersisyo ko, dili dayon nako makita ang mga resulta. Apan kon akong ipadayon sa pagdasig ang akong kaugalingon, makita nako ang kausaban. Ang sama nga baroganan magamit sa espirituhanong paglambo. Kon kita mobasa sa mga kasulatan, kita tingale dili makasinati og usa ka dinalian nga kausaban. Kon kita magpadayon sa pagbasa sa mga kasulatan, ug mangutana uban sa sinsero nga kasingkasing, kita makakita og usa ka kalainan diha sa mga panalangin nga atong madawat ug sa atong hugot nga pagtuo.

Ang Dios naghatag kanako og hilabihan ka dako nga gugma. Pinaagi sa pag-ehersisyo sa pisikal ug espirituwal nga paagi, ako molambo nga mas mapaduol ngadto Kaniya. Ang masuod ngadto sa Langitnong Amahan mao ang akong kinadak-ang kahupay ug matang sa kalinaw. Sa inyong pag-ambit sa sakramento, dapiton ko kamo sa pag-focus sa espirituwal nga paglambo nga inyong mahimo sa umaabot nga semana. Ang Espiritu Santo mohatag kaninyo og personal nga giya nga inyong gikinahanglan.

Ang tagsulat nagpuyo sa Netherlands.