“Si Jesukristo Mao ang Inyong Manluluwas,” Alang sa Kalig-on sa mga Kabatan-onan, Abr. 2022.
Si Jesukristo Mao ang Inyong Manluluwas
Ang Pag-ula ni Jesukristo para kaninyo.
He Lives [Siya Buhi], ni Simon Dewey
“Wala na siya dinhi; nabanhaw siya” (Mateo 28:6).
Mao kini ang pipila sa labing mahinungdanon nga mga pulong diha sa mga kasulatan. Gisulti kini sa mga anghel duol sa usa ka lubnganan nga walay sulod. Gipahayag nila nga nabuntog ni Ginoong Jesukristo ang sala ug kamatayon pinaagi sa Iyang Pag-ula, nga natapos sa Iyang mahimayaon nga Pagkabanhaw.
Gusto ko nga mahibalo kamo nga ang Pag-ula ni Jesukristo para kaninyo! Ang Iyang misyon sa kinabuhi para kaninyo! Ang Iyang sakripisyo sa kamatayon para kaninyo! Ug ang Iyang pagkabanhaw para kaninyo! Usahay sayon ra nga mobati nga gibuhat ni Jesukristo kining tanan alang sa laing tawo. Apan ako magpamatuod nga gibuhat Niya kini para kaninyo.
Mao kini ang mensahe sa unang buntag sa Pasko sa Pagkabanhaw: Gihigugma pag-ayo sa Dios ang kalibotan nga gipadala Niya ang Iyang Bugtong Anak aron sa pagtabang kanato. Ug ang Iyang Anak, si Jesukristo, mihatag sa Iyang kinabuhi alang kanato.
Ang sakripisyo ni Jesukristo nakaapekto sa tibuok kalibotan—lakip kaninyo.
Gipanagna ug Gihulagway
Sukad sa sinugdanan mismo, gitudloan sa Dios ang mga tawo mahitungod sa Manluluwas. Nagpadala siya og anghel aron sa pagtudlo kang Adan ug Eva, “Ikaw mobuhat sa tanan nga imong buhaton diha sa ngalan sa Anak, ug ikaw maghinulsol ug motawag sa Dios diha sa ngalan sa Anak hangt[o]d sa kahangt[o]ran” (Moises 5:8). Sukad niana nga adlaw hangtod sa panahon ni Jesukristo, ang mga tawo misakripisyo og mga hayop aron sa pagtabang kanila nga magpaabot sa sakripisyo nga sa dili madugay himoon sa Anak sa Dios.
Agig dugang, ang Pag-ula ni Jesukristo dugay nang gipanagna sa wala pa siya matawo sa Betlehem. Ang mga propeta nanagna niini sulod sa daghang henerasyon.
Ang Iyang Walay Kinutoban nga Pag-ula ug Pagkabanhaw
Dili gayod kita makasabot sa tanan nga gibuhat ni Jesukristo alang kanato. Dili kita makatugkad kon unsa ka dako ang Iyang pag-antos ug unsa ka halapad ang mga epekto sa Iyang sakripisyo. Apan mabati ninyo ang mga epekto sa Iyang Pag-ula kada adlaw.
Didto sa Getsemani ug didto sa krus, Siya “nag-ant[o]s sa kasakit sa tanan nga mga tawo, nga unta ang tanan … maghinulsol ug moduol ngadto kaniya” (Doktrina ug mga Pakigsaad 18:11). Giako Niya sa Iyang kaugalingon ang kabug-at sa mga sala sa tanang katawhan. Ang pagpas-an niana nga dako kaayo nga palas-anon nakapahimo Kaniya nga magdugo sa matag lungag sa panit (tan-awa sa Lucas 22:44; Doktrina ug mga Pakigsaad 19:18).
Sa wala madugay Siya gibunal-bunalan ug gilatos. Usa ka korona sa hait nga mga tunok ang gibutang sa Iyang ulo. Dayon gipugos siya sa pagkarga sa Iyang kaugalingon nga krus ngadto sa Kalbaryo, diin nakompleto ang paghingutas sa Pag-ula samtang gilansang Siya ngadto niana nga krus ug gipaantos sa grabeng kasakit. Gibuhat Niya ang kabubut-on sa Iyang Amahan. Nag-antos Siya ug gihatag ang Iyang kinabuhi.
The Crucifixion [Ang Paglansang], ni Harry Anderson
Sama sa gipanagna Niya ug sa Iyang mga propeta, mibangon Siya gikan sa lubnganan sa ikatulo nga adlaw. Siya ang nahimong una nga nabanhaw. Tungod Kaniya, ang tanan nga nabuhi sukad makadawat sa gasa sa pagkabanhaw. Salamat Kaniya, ang matag lawas mapahiuli ngadto sa iyang hingpit nga bayanan.
Gibayaran sa Manluluwas ang bugti alang sa atong mga sala ug kalapasan. Tungod Kaniya, ang tanang tawo mahimong matubos gikan sa sala—kon sila maghinulsol.
Ang Pag-ula ni Jesukristo walay kinutoban. Giluwas Niya ang tanang katawhan gikan sa walay kataposan nga kamatayon. Hilabihan Siyang nag-antos, labaw sa unsay maantos ni bisan kinsang tawo. Ang Iyang pag-antos para sa tanang tawo nga anaa sa dili maihap nga mga kalibotan nga Iyang gilalang (tan-awa sa Doktrina ug mga Pakigsaad 76:24; Moises 1:33).
Si Jesus lamang ang bugtong nga makahalad sa ingon niana nga walay kinutoban nga Pag-ula, kay gipakatawo Siya sa mortal nga inahan ug sa imortal nga Amahan. Kana mihimo ni Jesus nga usa ka walay kinutoban nga Linalang—ang bugtong nga makapili sa paghalad sa Iyang kinabuhi ug sa pagbuhi niini og balik (tan-awa sa Juan 10:14–18). Ang hingpit nga kinabuhi sa Manluluwas usa usab ka importante nga kwalipikasyon aron Siya makatagbaw sa mga gipangayo sa kaangayan alang kanato (tan-awa sa Alma 34:8–14).
Ang Iyang misyon dinhi sa yuta—nga naglakip sa Iyang Maulaong sakripisyo ug sa Iyang Pagkabanhaw gikan sa mga patay—naghatag sa matag usa kanato sa mga oportunidad sa katubsanan gikan sa sala ug sa usa ka mahimayaon nga pagkabanhaw! Ang atong utang Kaniya dili masukod.
Walay Kinutoban ug Personal
Ang Pag-ula ni Jesukristo walay kinutoban. Apan personal usab kini. Agig dugang sa Iyang hingpit nga gugma alang sa Iyang Amahan, nadasig usab Siya sa Iyang gugma alang sa matag usa sa mga anak sa Langitnong Amahan. Ug ang Iyang Pag-ula nagpanalangin sa matag usa kanato sa personal kaayo nga paagi. Basaha og maayo kini nga pagpasabot gikan sa Manluluwas:
“Kay tan-awa, Ako, ang Dios, nag-ant[o]s niini nga mga butang alang sa tanan, nga sila unta dili mag-ant[o]s kon sila maghinulsol;
“Apan kon dili sila maghinulsol sila kinahanglan gay[o]d nga mag-ant[o]s sama kanako;
“Kansang pag-ant[o]s nakapahimo sa akong kaugalingon, gani ang Dios, ang labing halangdon sa tanan sa pagkurog tungod sa kasakit, ug sa pag-agas sa dugo sa matag lungag sa panit, ug sa pag-ant[o]s sa lawas ug sa espiritu—ug buot nga Ako unta dili moinom sa mapait nga kopa, ug mobiya—
“Bisan pa niana, himaya ngadto sa Amahan, ug Ako nakaambit ug nakahuman sa akong mga pagpangandam alang sa mga katawhan” (Doktrina ug mga Pakigsaad 19:16–19).
Si Jesus nag-antos og maayo tungod kay Siya nahigugma kaninyo og maayo! Gusto Siya nga kamo maghinulsol ug makabig aron Siya hingpit nga makaayo kaninyo.
Ang Pag-ula ni Jesukristo para kaninyo. Giako Niya sa Iyang kaugalingon ang inyong mga sala. Gibayaran Niya ang bugti sa inyong mga sala aron kamo makahinulsol. Gihatag Niya ang gahom aron mabuntog ninyo ang matag pagsulay nga inyong masinati. Maangkon ninyo kana nga gahom pinaagi sa inyong hugot nga pagtuo, pagsalig, ug kaandam sa pagsunod Kaniya.
Kon kamo mag-ampo ug magtuon nga adunay katuyoan, inyong makat-onan kon sa unsang paagi ang Iyang misyon makapanalangin kaninyo. Ug ang Espiritu Santo makatudlo ug makapamatuod kaninyo sa mahangtoron nga kamahinungdanon sa Iyang Pag-ula.
Nagpasalamat ako sa Dios alang sa Iyang Anak, si Jesukristo. Siya mao “ang pagkabanhaw ug ang kinabuhi” (Juan 11:25). Siya buhi. Sa tibuok kong kasingkasing, gihigugma nako Siya, ug ako nagpamatuod Kaniya. Ako mopamatuod nga Siya mao ang buhi nga Anak sa buhi nga Dios. Si Jesus mao ang Kristo—ang atong Manluluwas ug Manunubos.