“7 ka mga Paagi ang Ginoo Makatubos Kaninyo,” Alang sa Kalig-on sa mga Kabatan-onan, Abr. 2022.
Dali, Sunod Kanako
7 ka mga Paagi ang Ginoo Makatubos Kaninyo
Pagkat-on og pito sa daghang mga paagi nga ang Ginoo makatubos kanato gikan sa atong inadlaw-adlaw nga mga hagit.
Kon kamo mag-atubang og usa ka hagit nga ingon og walay kasulbaran, unsa ang inyong buhaton?
Sa dihang ang karaang mga Isrealita anaa didto sa Ehipto, nag-atubang sila og dagko kaayong mga kalisdanan. Naulipon sila. Gipugos sila sa pagbuhat og grabe nga kabug-at nga paghago. Wala sila nakabaton og paglaom alang sa mas maayo nga kinabuhi. Busa unsay ilang gihimo? “[Sila] nag-agulo … miabot sa Dios ang ilang mga hangyo” alang sa tabang (Exodo 2:23).
Ug ang Ginoo mitubag. Siya mihinumdom sa Iyang mga tawo sa pakigsaad ug mipadala ni Moises sa pagtabang kanila ngadto sa kagawasan. Pinaagi ni Moises, ang Ginoo mipadala og mga talimad-on ug mga kahibulongan, mga pagtakboy sa mga sakit ug mga milagro. Nagmagahi ang Paraon sa iyang kasingkasing sulod sa taas nga panahon. Apan human sa makalilisang nga pagtakboy sa mga sakit, sa kataposan siya mitugot sa mga Israelita sa paglakaw (tan-awa sa Exodo 2–12).
Apan bisan human sila nahimong gawasnon, wala pa gihapon nahuman ang mga kagubot sa mga Israelita. Nag-atubang sila og pagsulay human sa laing pagsulay, problema human sa laing problema.
Sa kinatibuk-an niining tanan, ang Ginoo misulay, balik-balik, sa pagtudlo og usa ka yano nga leksiyon: Kon kamo mosalig Kaniya, Siya motubos kaninyo.
Lain-laing mga Matang sa Pagtubos
Ang Ginoo adunay gahom sa pagtubos kanato gikan sa mga hagit ug mga problema nga atong giatubang. Apan Siya adunay daghang lain-laing mga paagi sa pagtubos kanato, ug usahay kini mahimong dili maoy atong gilauman. Kita makakat-on gikan sa mga kasulatan kon unsa ang pipila niadtong lain-laing mga matang sa pagtubos.
Ania ang pito ka lain-laing mga paagi ang Ginoo mitubos ni Moises ug sa iyang mga katawhan—ug sa unsang paagi Siya makatubos kaninyo.
1
Pagpahumok sa inyong kasingkasing
Mahimong dili sayon sa mga Israelita sa pagtuo nga si Moises gipadala sa Ginoo. Apan alang niadtong kinsa mipakita og hugot nga pagtuo, ang Ginoo makapahumok sa ilang mga kasingkasing ngadto sa mensahe ni Moises. (Sama kaayo kini sa unsay Iyang gibuhat ni Nephi aron motuo siya sa mga pulong sa iyang amahan [tan-awa sa 1 Nephi 2:16]).
Kamo usahay mahimong maglisod sa pagtuo, pagsabot, o pagdawat og usa ka butang nga gisulti sa sulugoon sa Ginoo. Apan kon kamo magmapainubsanon ug sinsero, ang Ginoo makatubos kaninyo gikan sa pagkalibog, kapaitan, ug kasagmuyo pinaagi sa pagpahumok sa inyong kasingkasing.
2
Pagpahumok sa mga kasingkasing sa uban
Pagkahuman nga natawo si Moises, ang paraon mideklarar nga ang matag Israelita nga batang lalaki nga matawo nianang panahona kinahanglan patyon. Apan si Moises nalugwayan tungod kay siya gipalutaw sa iyang inahan sa sulod sa usa ka bukag didto sa suba. Ang anak ni paraon nakakita ni Moises ug natandog, busa siya mihukom sa pagpadako kaniya sama nga iyang kaugalingong anak. Ang iyang kasingkasing napahumok. (Tan-awa sa Exodo 2:1–10.)
Usahay kadtong kinsai mopasakit kaninyo mobukas sa ilang mga kasingkasing og igo lang para sa tingog sa Ginoo nga makasulod, motandog kanila aron makabaton og kalooy. Ang Ginoo makatubos kaninyo gikan sa kagubot pinaagi sa pagtabang sa pagpahumok sa mga kasingkasing sa uban.
3
Paghatag kaninyo og kalig-on
Sa dihang si Moises unang mihangyo ngadto ni Paraon aron tugotan ang mga Israelita sa paglakaw, ang Paraon mitubag pinaagi sa paghatag kanila og mas bug-at nga palas-anon kay sa ilang nadawat kaniadto. Daghan sa mga Israelita mireklamo, apan ilang giantos kadto nga mga palas-anon.
Ang Ginoo gusto nga inyong isangon ang inyong mga palas-anon diha Kaniya. Kon mosalig kamo Kaniya, Siya makahimo gayod sa mga palas-anon nga ingon og mas mogaan (tan-awa sa Mosiah 24:13–15). Siya makatubos kaninyo gikan sa pisikal, mental, o emosyonal nga pag-antos pinaagi sa paglig-on kaninyo aron inyong maantos ang inyong palas-anon.
4
Paghatag kaninyo og paagi sa paglingkawas
Human sa pagtakboy sa mga sakit, si Paraon sa kataposan miuyon sa pagtugot sa mga Israelita sa paglakaw. Samtang sila nagpadayon, si Paraon miusab sa iyang hunahuna ug mipadala sa iyang karwahe sa paggukod kanila. Diha sa Pulang Dagat, ang mga karwahi nakaapas kanila, ug ang Ginoo miingon kang Moises sa pagbahin sa mga tubig. Ang mga Israelita milabang sa dagat agi sa uga nga yuta. (Tan-awa sa Exodo 14.)
Sa malisod nga mga kahimtang, ang Ginoo makahatag kaninyo og usa ka paagi sa paglingkawas. Kini tinuod gayod ilabi na kon mahitungod sa tintasyon—Siya motabang kaninyo kon kamo mag-ampo ngadto Kaniya (tan-awa sa 1 Mga Taga-Corinto 10:13; Doktrina ug mga Pakigsaad 95:1; Alma 13:28).
5
Pagdasing kaninyo sa pagkaplag og usa ka solusyon
Samtang ang mga Israelita naglatagaw diha sa kamingawan, sila kanunayng modangop ngadto kang Moises sa pagsulbad sa ilang mga problema. Apan kini ingon og si Moises usahay nangandoy nga sila makakat-on sa pagdawat og inspirasyon gikan sa Ginoo sa ilang kaugalingon mismo (tan-awa sa Mga Numero 11:29). Si Nephi mipakita og usa ka maayong ehemplo kabahin niini. Sa dihang ang Ginoo wala mohatag kaniya og detalyadong mga instruksiyon kon unsaon sa pagsulbad sa problema, si Nephi mihimo og paghunahuna, mibuhat unsay iyang mahimo, nagtinguha sa tabang gikan sa Ginoo, ug nakakaplag og dinasig nga mga solusyon diha sa proseso (tan-awa sa 1 Nephi 16:18–32).
Ang Ginoo makatubos kaninyo gikan sa mga problema pinaagi sa pagdasig kaninyo og mga solusyon.
6
Pagdasig sa uban sa pagtabang kaninyo
Human ang mga Israelita mibiya sa Ehipto, ang ugangang lalaki ni Moises, si Jethro, mibisita kaniya. Nakita ni Jethro kon giunsa sa pagdala sa mga tawo ang matag pangutana ug nakiglakis ngadto ni Moises. Miingon siya kini makapaluya ni Moises. Mitambag siya ni Moises sa paghatag og awtoridad ngadto sa ubang kalalakin-an kinsa makatabang kaniya. Misunod si Moises niini nga tambag ug napanalanginan pinaagi niiini. (Tan-awa sa Exodo 18:13–24.)
Kasagaran ang Ginoo modasig sa sakop sa pamilya, mga magtutudlo, mga lider, mga propeta ug apostoles, o mga higala sa pagtabang kaninyo sa mga hagit. Ang Ginoo makatubos kaninyo gikan sa inyong mga problema pinaagi sa pagdasig sa uban sa pagtabang kaninyo. (Ug ikaw mahimong madasig nga mamahimong tabang alang usab sa uban.)
7
Pagtubag sa inyong mga panginahanglan pinaagi sa mga milagro
Didto sa kamingawan, ang mga Israelita adunay daghang panginahanglan, lakip na sa pagkaon ug tubig. Ang Ginoo misangkap sa ilang mga gikinahanglan sa milagroso nga mga paagi. Sama pananglit, siya mihatag kanila og mana aron makaon, nga motumaw sa kada buntag (tan-awa sa Exodo 16). Sa dihang sila nagkinahanglan og tubig, ang Ginoo mihatag ni Moises og gahom sa paghatag kanila og tubig sa milagroso nga paagi—gani naggikan sa gahi nga bato (tan-awa sa Exodo 15:23–26; 17:1–7).
Kon ikaw mosalig diha Kaniya, ang Ginoo makabuhat og mga milagro ug mohatag kaninyo sa unsay inyong gikinahanglan. Siya makatubos kaninyo gikan sa kawalay kaseguroan, kahingawa, ug kahadlok pinaagi sa Iyang milagroso nga gahom.
Atong Tigluwas
Ang Ginoo adunay gahom sa pagtubos kanato gikan sa mga problema ug mga kagubot gikan sa inadlaw-adlaw. Samtang kita mosinati sa Iyang pagtubos sa matag adlaw, kita molambo sa atong hugot nga pagtuo sa Iyang labing dakong gahom sa pagtubos kanato gikan sa atong labing dakong mga hagit: ang sala ug kamatayon.
Samtang kita mohinumdom sa Ginoo ug sa Iyang pagtubos, Siya mohinumdom kanato. Siya nagtanyag kanato og mga pakigsaad nga mobugkos kanato ngadto Kaniya ug mopanalangin kanato uban sa mas dako nga tabang ug kalig-on pinaagi sa Iyang Espiritu. Siya tinuod gayod nga mao ang atong Tigluwas.