“Ang Kausaban sa Kasingkasing ni Farid,” Alang sa Kalig-on sa mga Kabatan-onan, Abril 2022
Ang Kausaban sa Kasingkasing ni Farid
Nagsugod kining tanan sa usa ka yano nga imbitasyon diha sa usa ka mensahe sa text.
Sa dihang si Farid 14 anyos pa, nagtuo siya nga nasayod na siya unsa ang iyang gusto sa kinabuhi, ug ang relihiyon dili kabahin niini. Misulti siya sa iyang pamilya nga siya dili gusto motambong sa bisan unsang simbahan.
Siya adunay hingpit nga kinabuhi didto sa matahom nga siyudad sa San Pedro Sula, Honduras. Ang iyang paborito nga mga kalihokan mao ang musika, pagsayaw, soccer, volleyball, paglangoy, ug paglakaw. Migahin siya kadaghanan sa iyang panahon sa pagbasa og mga libro sa pilosopiya ug makig-uban sa iyang mga higala. Si Farid naningkamot nga makaangkon og trabaho diha sa medisina, ug siya gustong matagamtam ang kalipay ang kinabuhi.
Miingon si Farid nga siya usa ka hakog nga 14 anyos—maghunahuna lang siya sa iyang kaugalingon. “Wala koy panginlabot mahitungod sa akong pamilya o sa ilang panginahanglan,” miingon siya. “Makig-away ko sa akong ig-agaw sa makadaghan.”
Dayon usa ka Dominggo, ang kinabuhi ni Farid nausab sa wala damha nga direksiyon. Samtang gilaay siya diha sa panimalay, ang iyang higala si Isaias mi-text niya ug nangutana kon gusto ba siya nga mokuyog sa iyang simbahan uban kaniya. Mao kadto ang unang higayon nga si Farid mibisita sa Ang Simbahan ni Jesukristo sa mga Santos sa Ulahing mga Adlaw. Dayon si Isaias midapit kaniya sa pagtambong sa seminary, ug siya ganahan kaayo niini.
“Ako adunay gibati diha sa akong kalag nga misulti kanako nga ako anaa sa hustong dapit, uban sa husto nga mga tawo, ug sa husto nga simbahan,” miingon si Farid.
Sa wala madugay nga siya mitambong og seminary sa unang higayon, siya mipasakop sa Simbahan. Ug sa wala madugay human niana, misugod siya nga nakamatngon sa pipila ka wala damha nga mga kausaban sa iyang kaugalingon.
Gikan sa Hinakog ngadto sa Pagkadili Hakog
Miingon si Farid, “Ako naggikan sa pagkadili hingkod nga 14 anyos nga gusto lang magmasinupakon, ngadto sa usa ka tawo nga adunay mahangtoron nga panglantaw. Nakamatngon usab, ang akong Pamilya.”
Mihunong si Farid sa pagpangaway sa iyang ig-agaw. Hinoon, siya karon mosulay na sa pagpangita og mga paagi sa pagserbisyo kaniya sama sa paghimo kaniya og paniudto, paglimpyo sa iyang kwarto, o mangutana kaniya kon nagkinahanglan ba siya og tabang. Apan bisan pa man sa positibo nga mga kausaban sa kinabuhi ni Farid, ang pipila sa iyang mga sakop sa pamilya nasuko sa sinugdanan sa dihang mipasakop siya sa Simbahan.
“Wala gayod ako mitugot sa ilang mga komentaryo nga mousab sa akong opinyon mahitungod sa Simbahan,” miingon si Farid. “Mapasalamaton kaayo ko nga ang akong hugot nga pagtuo wala gayod mihunong. Hinoon, kini mitubo pa gyod. Ang akong pamilya karon nakadawat na sa akong pagtuo tungod kay ilang nakita ang akong ehemplo ug sa unsang paagi ako nausab.”
Adunay ubang dagkong kausaban usab sa pamilya ni Farid. Ang iyang mama karon nagdawat og mga leksiyon gikan sa mga misyonaryo, ug siya gusto nga magpabunyag!
“Ang Langitnong Amahan nagsaad kanato nga kon kita mobutang og paningkamot, kita makadawat og mga panalangin,” miingon si Farid. “Apan Siya adunay Iyang gitakda nga panahon. Midangat kini og dul-an sa upat ka tuig alang sa usa ka sakop sa akong pamilya nga gustong nang magpabunyag. Dili kadto sayon alang kanako. Natintal ko sa paghunahuna nga ang Simbahan dili tinuod. Apan sa dihang ako nangutana sa Langitnong Amahan mahitungod sa pagkatinuod sa Simbahan, akong nadawat ang akong pagpamatuod, nga nakapabilin kanako nga magmalig-on.”
Mahangtorong Pamilya
Nag-ingon si Farid nga ang kinadak-ang panalangin nga iyang nadawat sukad sa pagpasakop sa Simbahan mao ang kahibalo nga ang mga pamilya mahimong magkauban hangtod sa kahangtoran. Usa ka tuig human mipasakop si Farid sa Simbahan, ang iyang lolo namatay. “Gihigugma nako pag-ayo siya,” miingon si Farid. “Siya ang usa sa akong labing dakong ehemplo. Mibati gayod ko sa kawalay kaseguroan mahitungod kon asa siya paingon sa sunod kinabuhi.”
Usa sa iyang mga higala sa simbahan nakig-istorya kaniya mahitungod sa plano sa kaluwasan ug kon sa unsang paagi nga siya makahimo sa buhat sa templo alang sa iyang lolo. Gisugdan ni Farid ang pagtrabaho sa iyang family history, ug siya miadto sa templo ug nabunyagan alang sa iyang lolo.
“Ako adunay hugot nga pagtuo nga kon ako mamatay ug moagi na sa tabil, siya maghulat kanako,” miingon si Farid. “Ang buhat sa Ginoo dili matapos niining kinabuhia. Nasayod na ako karon nga kon ang akong mga apohan o mga ginikanan mamatay, kami adunay kahigayonan nga magkita pag-usab sa kinabuhi nga umaabot. Mamahimo kami nga mahangtorong pamilya.”