“Pagpabilin diha sa Sakayan nga Igluluwas [Lifeboat],” Alang sa Kalig-on sa mga Kabatan-onan, Abr. 2022.
Pagpabilin diha sa Sakayan nga Igluluwas [Lifeboat]
Samtang magkagrabe ang kahimtang sa kalibotan, sama sa unsay nahitabo sa Titanic, magsugod ang ubang tawo sa pagpangita og sakayan nga igluluwas. Si Jesukristo ug ang Iyang Simbahan mao ang sakayan nga igluluwas.
Mga paghulagway pinaagi ni Melissa Manwill
“Bati kini nga panahon nga mahimong batan-on,” miingon kanako ang usa ka tin-edyer. “Ingon og mahugno na ang kalibotan.”
“Nakasinati gayod kita og pipila ka hagit,” mitubag ko. “Apan hunahunaa kini sama niini: Ang kalibotan mao ang Titanic , ug ang Simbahan mao ang sakayan nga igluluwas! Sa pagkatinuod nindot kaayo kini nga panahon alang kanimo nga mahimong batan-on! Anaa ikaw diha sa usa ka sakayan nga igluluwas—ang hingpit nga dapit nga motabang sa uban.”
Sa dihang ang Titanic misugod sa unang paglawig niini kaniadtong 1912, ang mga tawo miingon nga kini dili malunod nga barko. Apan, sa dihang mibangga kini sa usa ka iceberg diha sa taliwala sa amihanang Kadagatan sa Atlantiko, misugod kini sa pagkalunod. Gisultihan sa kapitan ang tanan nga mosakay sa mga sakayan nga igluluwas, apan kombinsido sila nga nagsakay sila sa barko nga dili malunod. Kadaghanan sa mga pasahero wala makakita sa panginahanglan nga mosakay sa sakayan nga igluluwas—hangtod nga ang Titanic peligrong mitakilid sa usa ka habig. Dayon ang tanan gusto na nga mosakay sa usa ka sakayan nga igluluwas. 1
Apan nianang higayona, ulahi na kaayo.
Sa 2019 mipahayag ang pipila ka tawo, “Walay makapugong sa ekonomiya sa kalibotan. Ang gidaghanon sa walay trabaho sa tibuok kalibotan mas ubos sukad.” Dayon miabot ang kagaw nga dili gani nato makita, ug kini nakapatakilid sa kalibotan. Dili lamang minilyon ka tawo ang nasakit ug daghang nangamatay, apan daghan usab ang nawad-an og mga trabaho ug ang kahadlok anaa bisan asa. Atol sa pandemya, daghang tawo ang nakaamgo kon sa unsang paagi si Jesukristo ug ang Iyang Simbahan usa ka sakayan nga igluluwas.
Tuo sa Dios
Usa ka bag-ong internasyonal nga pagtuon nagpakita nga mas daghang batan-on ang nagpadayag sa ilang mga kaugalingon nga mga walay pagtuo sa Dios kay sa kaniadto. Kini nga mga tawo naghunahuna nga ang pagtuo sa Dios wala maghimo og kalainan kon kini kabahin sa pagkahimong usa ka maayo, buotan, ug may konsyensiya nga tawo. 2
Ania ang hagit: Ang Dios mihatag kanato og kagawasan sa pagtuo Kaniya o dili, apan dili husto ang pag-ingon nga dili kini makahimo og kalainan. Ang atong pagtuo sa Dios nakaapekto kon giunsa nato pagtan-aw ang atong mga kaugalingon ug giunsa nato pagtan-aw ug pagtagad ang uban. Ang mga pagtuon nagpakita nga sa mga panahon sa kasamok ug krisis, ang mga tumutuo mas malamposong makasugakod kay sa mga dili tumutuo. 3
Hatagi og Bili ang Organisado nga Relihiyon
Daghang tawo ang nagtuo sa Dios apan dili sa organisado nga relihiyon. Sila nag-ingon, “Ako espirituhanon, dili relihiyoso.” Si Elder Jeffrey R. Holland sa Korum sa Napulog Duha ka Apostoles nagtudlo nga ang pagka-espirituhanon mahimo nga mao ang tanan nga atong gikinahanglan kon kita nagpuyo nga nag-inusara sa tumoy sa usa ka bukid, apan nagpuyo kita sa mga pamilya, mga komunidad, ug mga katilingban. 4 Sayon ra nga maglingkod nga nag-inusara sa tumoy sa usa ka bukid ug moingon, “Gihigugma nako ang tanan.” Tungod kay walay laing tawo sa palibot, dili gayod ninyo kinahanglan buhaton kana nga espirituhanon nga pagtuo. Gikinahanglan nato ang mga lagda ug ang mga sumbanan sa relihiyon aron sa pagtabang kanato sa pagdala sa mga mithi nga sama sa “paghigugma sa tanan” ngadto gayod sa pagkatinuod sa higayon sa dihang ang usa ka tawo lisod higugmaon. Mao kana ang unsay matabang sa Simbahan ni Jesukristo kanato nga atong buhaton.
Ang ubang mga tawo miingon nga wala sila makakita og panginahanglan alang sa organisado nga relihiyon, pero diay nagtinguha sila og organisado nga mga eskwelahan, mga siyudad, mga tindahan, ug mga ospital. Nakita nila ang benepisyo sa pag-adto sa usa ka ospital diin organisado ang trabaho ug ang mga trabahante ug adunay mga lagda ug mga gidahom alang sa tanan. Atong makita ang samang benepisyo sa usa ka organisado nga Simbahan.
Tabangi ang Uban nga Makakita og Sakayan nga Igluluwas
Samtang magkagrabe ang kahimtang sa kalibotan, sama sa unsay nahitabo sa Titanic, magsugod ang ubang tawo sa pagpangita og sakayan nga igluluwas. Si Jesukristo ug ang Iyang Simbahan mao ang sakayan nga igluluwas. Usa kini ka nindot kaayo nga panahon nga mahimong batan-on tungod kay makahimo kamo og kalainan! Anaa kamo sa usa ka talagsaon nga posisyon nga motabang sa uban nga makakaplag sa unsay ilang nataligam-an sa dili pa ulahi kaayo ang tanan. Ayaw og balik ngadto sa Titanic. Pagpabilin diha sa sakayan nga igluluwas diin kamo makakaplag og kahilwasan, kalig-on, ug oportunidad sa pagtabang sa uban nga moapil kaninyo.