Ang Tema ug Ako

Ang mga kabatan-onan mipaambit kon giunsa nila sa pagsunod ang mga pulong sa mga Tema sa Young Women ug sa Korum sa Aaronic nga Pagkapari

Pagbuntog sa Akong Kinadak-an nga Kahuyang

“Akong gihatagan og bili ang gasa sa paghinulsol ug nagtinguha nga molambo sa matag adlaw.”

Ni Elena Bunker

batan-ong babaye

Sa mas bata pa ko, aduna akoy dako nga problema sa pagpamakak ngadto sa akong mga ginikanan. Nagsugod kini isip usa ka inosente nga sayop, apan paglabay sa katuigan midako kini ngadto sa usa ka dili maayo gayod nga kinaiya.

Namakak ako kanila hapit kada adlaw mahitungod sa labing walay hinungdan nga mga butang. Naabot kini sa punto nga dili na sila mosalig kanako. Bisan og nagsulti ako sa kamatuoran, dili gihapon sila motuo kanako. Nasagmuyo gayod ako. Ang akong mama ug papa misulay sa tanan aron sa pagtabang kanako nga mohunong sa pagpamakak, apan dili gihapon ko makahunong.

Usa ka Dominggo human sa pagsimba, milingkod uban kanako ang akong mga ginikanan diha sa among lamesa sa kosina. Gibasa nila kanako ang mga pulong sa Manluluwas sa Ether 12:27: “Ug kon ang mga tawo moduol ngari kanako, Ako mopakita ngadto kanila sa ilang kahuyang. Ako mohatag ngadto sa mga tawo og kahuyang nga sila mahimo nga magpaubos; ug ang akong grasya igo alang sa tanan nga mga tawo nga magpaubos sa ilang mga kaugalingon sa akong atubangan; kay kon sila magpaubos sa ilang mga kaugalingon sa akong atubangan, ug magbaton og hugot nga pagtuo ngari kanako, niana Ako mohimo sa mahuyang nga mga butang nga mahimo nga malig-on ngadto kanila.”

Wala pa ko sukad nakadungog og kasulatan nga dako kaayo og epekto. Gisag-ulo nako kini ug naningkamot nga makapausab kini sa akong kasingkasing.

Sulod lang sa pipila ka semana, human sa daghang oras sa pag-ampo, paghilak, ug pagpaubos sa akong kaugalingon sa atubangan sa Dios, wala na koy problema sa pagpamakak. Gitugotan nako ang gahom sa Pag-ula ni Jesukristo nga moepekto sa akong kinabuhi!

Sukad niana nga adlaw lima ka tuig ang nakalabay, wala na ko nakapamakak bisan kausa ngadto sa akong mga ginikanan. Mapasigarbohon kaayo ko sa akong paningkamot. Sa kataposan mipili ko nga maghinulsol ug, uban sa tabang ni Kristo, nga mag-usab. Nasayod gayod ako nga “ang … grasya [ni Jesukristo] igo alang sa tanan nga mga tawo nga magpaubos sa ilang mga kaugalingon sa [Iyang] atubangan.”

Kana nga kasinatian nakatabang kanako nga makaangkon og mas dako nga pagpamatuod sa Basahon ni Mormon. Makapamatuod ako nga ang mga kasulatan tinuod. Gidapit ko kamo sa pagtinguha kang Kristo pinaagi sa mga kasulatan.

Ang tagsulat nagpuyo sa Virginia, USA.