“Mana,” Alang sa Kalig-on sa mga Kabatan-onan, Abr. 2022.
Mga Butang gikan sa Mga Kasulatan
Dali, Sunod Kanako
Mana
Kini nga gamay nga butang nagpahinumdom kanato sa pipila sa labing dako nga mga milagro sa Ginoo.
Unsa Man Kini?
Unsa man ang dagway sa mana? Kini gamay, lingin, nipis sama sa usa ka hup-ak [flake], ug puti (tan-awa sa Exodo 16:14, 31).
Unsa man ang lami niini? “Sama sa tinapay nga sinagolag dugos” (Exodo 16:31) o sama sa “torta nga giluto [o]g lana” (Numeros 11:8).
Sa unsang paagi kini miabot? Miabot kini uban sa yamog kada buntag gawas lang sa Igpapahulay. Sa adlaw sa dili pa ang Igpapahulay, ang mga tawo mokuha og igo alang sa duha ka adlaw. Sa ubang mga adlaw, madaot ang bisan unsa nga sobra nga ilang kuhaon. (Tan-awa sa Exodo 16:14–30.)
Unsa man ang gibuhat sa mga tawo niini? Ila “kining galingon o lubkon sa lusong ug lutoon diha sa mga kulon ug himoon nila kining torta” (Numeros 11:8). Usahay ila kining lung-agon (tan-awa sa Exodo 16:23).
Mga Kamatuoran sa Kasulatan
-
Ang mana nagpasabot og “Unsa man kini?” sa Hebreo. Ang mga Israelita wala pa gayod makakita og bisan unsa nga butang nga sama niini.
-
Gisultihan sa Ginoo ang mga Israelita sa pagbutang og gamay nga mana diha sa usa ka kulon ug dad-on kini uban kanila. Nakatabang kini kanila nga makahinumdom sa unsay Iyang nabuhat alang kanila (tan-awa sa Exodo 16:33–34; Mga Hebreo 9:4).
-
Kausa mireklamo ang mga Israelita mahitungod sa pagkaon og mana lamang. Gimingaw sila sa pagkaon sa Ehipto—bisan og nahimo sila nga mga ulipon didto (tan-awa sa Numeros 11: 1–6).
-
Gitudloan ni Moises ang katawhan nga ang ilang pag-antos gituyo aron sa pagtabang kanila nga mosalig sa Ginoo. Siya mitudlo nga ang Ginoo mihatag kanila og mana “aron pagtudlo [kanila] nga ang tawo dili mabuhi sa pagkaon lamang kondili sa matag pulong sa Ginoo” (Deuteronomio 8:3).
-
Human ang mga Israelita nakasulod na sa gisaad nga yuta, mihunong sa pag-abot ang mana (tan-awa sa Josue 5:12).
-
Kausa milagrosong gipakaon sa Manluluwas ang lima ka libo ka tawo ug dayon naghisgot mahitungod sa mana. Dayon Siya miingon, “Ako mao ang pan nga gikan sa langit nga naghatag sa kinabuhi. Ang mokaon niini nga pan dili gayod mamatay. Ug ang pan nga akong ihatag mao ang akong unod aron mabuhi ang kalibotan” (Juan 6:51).