“Unsaon nako nga makabaton og ‘hingpit nga kalipay diha sa panaw’ kon kini ingon og lisod kaayo?,” Alang sa Kalig-on sa mga Kabatan-onan, Abr. 2022.
Mga Pangutana ug Mga Tubag
“Unsaon nako nga makabaton og ‘hingpit nga kalipay diha sa panaw’ kon kini ingon og lisod kaayo?”
Hinumdumi Unsa ang Makapadasig Kaninyo
“Usahay mahimong lisod ang pagpangita og makapadasig. Aron matabangan kita, mahimo kita nga mohinumdom unsay nakapadasig kanato sa pagpadayon sa unahan, sama sa atong mga pamilya ug sa atong personal ug espirituhanong mga tumong. Kita makabaton og kamasaligon nga sa usa ka punto ang panaw mahimong mas sayon. Matag usa sa mga babag nga atong atubangon makatabang kanato nga molambo.”
Karime R., 17, Mexico
Ang Pagpamatuod Makadala og Kalinaw
“Niining milabay nga tuig misalig kaayo ko sa akong pagsaksi sa Basahon ni Mormon ug sa gipahiuli nga Simbahan. Gikan sa pandemya hangtod sa kamatayon sa akong amahan, ako nasayod nga anaa ang Dios ug adunay usa ka plano. Ang pagkahibalo nga ang ebanghelyo tinuod nakatabang kanako nga magbaton og usa ka pagbati sa kalinaw samtang ang mga pagsulay sa kinabuhi nagpalibot kanako.”
Ethan G., 17, Utah, USA
Mobaling Ngadto sa Inyong Gisaligan
“Kita kinahanglan gayod nga mosalig sa Dios ug ni Jesukristo. Kita makabati og kalipay, tungod kay Sila kanunayng nag-uban kanato. Sila motabang kanato sa pagbuhat unsa ang husto bisan kon kini lisod. Kitang tanan adunay mga kalisdanan, apan kita usab adunay mga tawo nga atong masaligan nga motabang kanato, sama sa atong mga ginikanan ug mga lider.”
Caique O., 16, ug Kaylane O., 14, Portugal
Hinumdomi Kon Kinsa Kamo
“Kon mobati ako nga daw dili na ko makapadayon, mohunong ko ug maghunahuna mahitungod sa kabantogan sa Langitnong Amahan. Maghinumdom nga ako ang anak nga babaye sa ingon ka gamhanan nga Dios makatabang kanako sa pag-ila sa akong balaan nga potensiyal ug makapadasig kanako sa pagpadayon.”
Solene M., 15, Brazil
Pangita og Kalig-on sa Inadlaw-adlaw nga mga Butang
“Kita kinahanglang magpabilin nga malig-on atol sa malisod nga mga panahon. Ang magpabilin nga lig-on lisod, apan kini mas mapasayon kon ako naghimo sa inadlaw-adlaw nga mga butang nga importante gayod, sama sa pagbasa sa mga kasulatan ug pag-ampo. Kon ako adunay makahuluganon nga mga pag-ampo, mabati nako ang kalig-on ug determinasyon sa pagbuhat unsa ang matarong.”
Emily H., 16, Canada
Sunda ang Espiritu sa Matag Adlaw
“Ako usahay mangutana usab niini nga pangutana sa akong kaugalingon. Apan samtang kita motan-aw ngadto sa Manluluwas sa tanang butang nga atong buhaton, kita makakaplag og kalipay niining kinabuhia bisan paman kon usa ang atong giagian. Pagkat-on sa pagsunod sa tingog sa Espiritu sa matag adlaw, ug kamo makakaplag og tinuod nga kalipay sa kinabuhi.”
Pauline K., 17, Fiji