“Pahinumdom nga Mahimong Putli,” Alang sa Kalig-on sa mga Kabatan-onan, Abr. 2022.
Lig-on nga mga Pundasyon
Pahinumdom nga Mahimong Putli
Paghulagway pinaagi ni Corey Egbert
Kadaghanan sa mga tawo sa akong eskwelahan dili sama og mga sumbanan kanako. Usahay kini mahimong lisod kaayo. Daghan sa akong mga higala mogamit og ngil-ad nga pinulongan ug dili ligdong nga magsinina. Adunay mga higayon nga mibuhat ako sa samang mga butang nga ilang gibuhat ug mihimo og mga pagpili nga dili ako mapasigarbohon.
Dayon alang sa Pasko ang akong inahan mihatag kanako og unsay gitawag niya nga singsing sa kaputli. Gisultihan ko niya nga ang singsing makatabang sa pagpahinumdom kanako nga mosunod sa Manluluwas ug mahimong putli sa akong mga hunahuna ug mga aksiyon. Gisul-ob nako kini ug mihukom nga mag-usab ako. Nagsugod ako nga mahimong mas mabinantayon sa mga pulong nga akong gigamit ug sa paagi sa akong pagsinina. Mibasa ako sa akong mga kasulatan ug mas makanunayon nga mitambong sa seminary. Ug mas naningkamot gayod ko nga mahimong ehemplo ngadto sa akong mga higala.
Usahay ang mga tawo sa eskwelahan nangutana kanako mahitungod sa akong singsing. Mibati ako nga murag bata sa pagpasabot niini sa sinugdanan, apan nagsugod ako nga mobati nga mas masaligon kon mas maghisgot ako mahitungod sa akong mga sumbanan. Wala gayod nako gihubo ang akong singsing, ug giseguro nako nga makahibalo ang mga tawo nga gisul-ob nako kini. Daghan sa akong mga higala ang nagsugod sa pagdayeg sa akong maayong ehemplo tungod kay nabantayan nila kon sa unsang paagi ako nausab.
Ang pagtan-aw sa akong gamay nga singsing nakatabang kanako nga mahibalik sa higpit ug pig-ot nga agianan, makahinumdom sa Manluluwas, ug mamahimong usa ka tawo nga akong ikapasigarbo. Nasayod ako nga ang Ginoo mag-uban kanato ug kita makabati sa Iyang presensiya kon kita mosunod sa ebanghelyo, motuman sa atong mga sumbanan, ug maningkamot nga mahimong mas putli matag adlaw.
Jessie L., Missouri, USA