Apendiks

Sukda ang Imong Nakat-onan, Bahin 2

Doktrina ug mga Pakigsaad 76; 84; 93; 110; 121–123

Ang paggahin og panahon sa pag-ila sa paglambo ug espirituwal nga pag-uswag makapalig-on sa atong mga relasyon sa Langitnong Amahan ug kang Jesukristo ug modasig nato nga magpabilin sa dalan sa pakigsaad. Kini nga leksiyon makatabang nimo sa pagsusi sa imong espirituwal nga paglambo gikan sa imong pagtuon sa Doktrina ug mga Pakigsaad 76; 84; 93; 110; 121–123. Pangita og mga kahigayonan sa pagpakigbahin sa pipila sa imong mga tubag ngadto sa ubang estudyante o mga sakop sa pamilya.

Hinumdomi: Sa dili pa kompletohon kini nga pagsukod, seguroa nga kompletohon ang gikinahanglan nga mga pagbasa kon wala pa nimo kini mahimo: Doktrina ug mga Pakigsaad 76; 84; 93; 110; 121–123.

Pagpabili sa paglambo ug pag-uswag

Hunahunaa ang bahin sa layo o mahagiton nga pagdagan, paglakaw, o pagbisikleta.

• Unsa ang imong mabuhat aron malingaw sa panaw?

• Sa unsang paagi nato makompara ang ingon niana nga panaw ngadto sa proseso sa pagkahimong mas nahisama kang Jesukristo?

• Unsa ang mga paagi nga kita mahimong mas malingaw ug mas mapasalamaton sa proseso sa espirituhanong paglambo?

• Unsay imong gibati sa imong pag-uswag ug mas nagkaduol ngadto sa Ginoo?

• Sa unsang paagi ang Ginoo nagtabang kanimo?

Pagpasabot sa tulo ka ang-ang sa himaya

Hunahunaa nga duna kay suod nga higala nga ginganlan og Olivia nga dili miyembro sa Simbahan pero dako og pagtuo kang Jesukristo. Usa ka adlaw miduol siya nimo ug nangutana, “Unsay gituohan sa mga miyembro sa imong Simbahan bahin sa kinabuhi human sa kamatayon? Gitudloan ko nga ang tanan moadto sa langit o sa impyerno, apan nadungog nako nga ang mga miyembro sa Ang Simbahan ni Jesukristo sa mga Santos sa Ulahing mga Adlaw nagtuo sa daghang mga langit. Unsa man diay kana?”

Paggahin og pipila ka minuto sa pagsulat og tubag ngadto ni Olivia nga magpasabot sa imong pagsabot ug kahibalo sa tulo ka ang-ang sa himaya. Kon gusto nimo, mahimo kang mag-apil og mga drowing aron matabangan si Olivia sa paghulagway sa unsay imong gipasabot. Pangita og usa ka tawo ug pagpraktis sa pagpasabot sa imong tubag ngadto nila ingon nga sila mao si Olivia.

Ipasabot ang mga tahas, mga titulo, ug mga kinaiya ni Jesukristo

Usa sa mga pagdapit sa Manluluwas diha sa Doktrina ug mga Pakigsaad mao ang “pagkat-on [Kaniya], ug pagpaminaw sa [Iyang] mga pulong” (Doktrina ug mga Pakigsaad 19:23). Pangandam nga ipakigbahin ngadto sa usa ka tawo ang imong nakat-onan bahin sa mga tahas, titulo, o mga hiyas sa Maluluwas pinaagi sa paghimo sa usa sa mosunod nga mga kalihokan:

• Paghimo og listahan sa pipila sa mga tahas, mga titulo, o mga hiyas ni Jesukristo nga bag-ohay lang nimong gitun-an sa Doktrina ug mga Pakigsaad 76:1–7, 22–24; 93:1–10. Dayon pagpili og usa o daghan niini ug tubaga ang mosunod nga pangutana: (1) Unsay gitudlo kanimo niini nga ngalan, titulo, o hiyas bahin kang Jesukristo? (2) Unsay gikatabang niini nga ngalan, titulo, o hiyas aron masabtan kon sa unsang paagi Siya makatabang nimo?

• Paghimo og biswal nga representasyon sa usa o daghan pa sa imong paborito nga mga tahas, mga titulo, o mga hiyas ni Jesukristo. Pwede kini nga usa ka word cloud o drowing. Apila ang angay nga mga pakisayran sa kasulatan isip kabahin sa imong gihimo.

• Paghimo og balak o liriko sa kanta nga naay pipila sa imong paboritong mga tahas, mga titulo, o mga hiyas ni Jesukristo.

• Handurawa nga naa kay kahigayonan nga tudloan ang usa ka tawo bahin kang Jesukristo ug kon unsay mahimo Niya para nato. Pagsulat og paghulagway nga dili moubos sa usa ka parapo ang gitas-on nga naglakip sa labing menos tulo sa mga tahas, mga titulo, o mga hiyas ni Kristo.

Ipakigbahin ang nadesisyonan nimong himoon ngadto sa usa ka sakop sa pamilya, higala, o usa ka tawo sa imong klase.

Pagpangandam sa pagsimba sa Ginoo diha sa templo

Sa Doktrina ug mga Pakigsaad 110:5–10, nabantayan tingali nimo kon sa unsang paagi ang pagkahimong takos makatabang nato nga mobati nga duol sa Ginoo diha sa Iyang templo.

Tinguhaa ang personal nga pagpadayag nga mogiya nimo samtang imong tubagon ang usa o kapin pa sa mosunod nga mga pangutana sa imong journal sa pagtuon:

• Unsa nga mga sakripisyo ang imong gihimo o andam himoon aron himoong prayoridad ang pagsimba sa Ginoo diha sa templo?

• Unsang mga panalangin ang imong nadawat samtang namalandong ka sa mga pangutana sa rekomend sa templo?

• Unsay imong gihimo sa pagpaningkamot nga mahimong takos sa pagsimba sa Ginoo diha sa templo?

Hunahunaa kon sa unsang paagi ka napanalanginan tungod sa imong mga paningkamot. Unsay kinahanglan nimong ipadayon o sugdan sa paghimo aron mas maandam sa pagsimba sa Iyang templo?

Pagbati og mas dakong pagsalig sa Dios atol sa mga pagsulay

Gikan sa Doktrina ug mga Pakigsaad 121–122 makakat-on kita og importanteng mga kamatuoran bahin sa mga pagsulay.

• Unsay imong nakat-onan gikan niini nga mga seksiyon bahin sa mga pagsulay?

• Nakatabang ba kini nga mga kamatuoran nga malahi ang imong pagbati bahin sa imong mga pagsulay? Sa unsa nga paagi?

• Unsay imong nakat-onan bahin sa Langitnong Amahan ug ni Jesukristo samtang nakasinati ka og lisod nga mga panahon?

Isulat sa imong journal ang imong pagbati kon giunsa ka pagsuporta sa Langitnong Amahan ug ni Jesukristo sa imong mga pagsulay. Ikonsiderar kon sa unsang paagi ang ilang hugot nga pagtuo kang Jesukristo naapektohan tungod sa ilang nakat-onan ug nasinatian.