“Mga Kalihokan sa Pagsukod sa Imong Nakat-onan alang sa mga Leksiyon sa Pagpangandam sa Kinabuhi,” Manwal sa Magtutudlo sa Seminary sa Doktrina ug mga Pakigsaad (2025)
“Mga Kalihokan sa Pagsukod sa Imong Nakat-onan,” Manwal sa Magtutudlo sa Seminary sa Doktrina ug mga Pakigsaad
Apendiks
Mga Kalihokan sa Pagsukod sa Imong Nakat-onan alang sa mga Leksiyon sa Pagpangandam sa Kinabuhi
Dihang mahuman na nimo og tudlo ang usa sa mga kategoriya sa mga leksiyon sa Pagpangandam alang sa Kinabuhi, ikonsiderar ang pagtabang sa mga estudyante nga pamalandongan ang ilang nakat-onan ug pag-uswag pinaagi sa paglakip og kalihokan sa pagsukod gikan sa maong kategoriya sa umaabot nga leksiyon sa Pagsukod sa Imong Nakat-onan. Pwedeng ipahaom kini nga mga kalihokan ngadto sa mga panginahanglan sa imong mga estudyante.
Mga Pagtulun-an sa mga Lider sa Simbahan
Gamita ang mga pagtulun-an sa mga Lider sa Simbahan diha sa imong kinabuhi
Sa tibuok kurso, daghan og kahigayonan ang mga estudyante nga tun-an ug gamiton ang mga pagtulun-an sa mga lider sa Simbahan. Para niini nga kalihokan, pwede nimong pahinumdoman ang mga estudyante sa piho nga mga pakigpulong nga gitun-an sa klase. Kon posible, dapita sila nga magpili og usa sa mga pakigpulong nga ilang gitun-an ug rebyohon kini ug ang bisan unsang mubo nga mga sulat nga ilang nasulat. Dasiga ang mga estudyante nga pamalandongan kon sa unsang paagi ang mga pagtulun-an gikan sa pakigpulong nakatabang nila sa pagpaningkamot nga mahimong mga disipulo ni Jesukristo.
Ikonsiderar ang pagpares-pares sa mga estudyante para sa mosunod nga kalihokan. Pwede silang magpulihanay og interbiyo sa usag usa. Pagkahuman, pwede nimong dapiton ang usa o daghang pares sa mga estudyante sa pagpahigayon sa ilang interbiyo atubangan sa klase.
Hunahunaa nga ikaw giinterbiyo alang sa usa ka artikulo nga imantala diha sa magasin nga Alang sa Kalig-on sa mga Kabatan-onan bahin sa pagtuon sa mga pagtulun-an sa mga lider sa Simbahan. Ang tig-interbiyo mangutana kanimo sa mosunod nga mga pangutana:
-
Unsay imong nakat-onan bahin sa pagtuon sa mga pagtulun-an sa mga lider sa Simbahan?
-
Sa mga pakigpulong ug mga artikulo nga imong natun-an sa seminary, hain ang labing mahinungdanon para nimo ug ngano?
-
Unsa ang piho nga mga pagtulun-an sa mga lider sa Simbahan ang bag-ohay lang nimong gigamit sa imong kinabuhi?
Alang sa Kalig-on sa mga Kabatan-onan: Paghimo og mga Pagpili
Dawata ang kusog gikan sa Ginoo sa paghimo og dinasig nga mga pagpili
Kini nga kalihokan makatabang sa mga estudyante sa pagsukod sa unsay ilang nakat-onan sa mga leksiyon nga may kalabotan sa katergoriya nga giulohan og “Alang sa Kalig-on sa mga Kabatan-onan: Paghimo og mga Pagpili.” Makatabang tingali ang pagrebyo sa pipila sa mga sulod gikan niini nga mga leksiyon uban sa mga estudyante.
Ang usa ka paagi sa pagtabang sa mga estudyante sa pagsukod sa unsay ilang nakat-onan ug gibati niini nga mga leksiyon mao ang pagdapit nila nga sulatan ang ilang kaugalingon. Pwedeng gamiton o ipahaom ang mosunod nga pag-aghat.
Hunahunaa kon unsa ang imong kinabuhi usa ka tuig gikan karon. Hunahunaa kon unsa ang imong gilaoman nga makab-ot nianang panahona ug ang bisan unsang mga hagit nga imong gipaabot. Paghimo og sulat sa pagdasig sa imong umaabot nga kaugalingon. Ang pipila sa mosunod nga mga pangutana mahimong makatabang.
-
Unsay imong nakat-onan ug gibati bahin sa pagkadawat og kusog gikan sa Ginoo aron makahimo og dinasig nga mga pagpili?
-
Naa bay mga tumong nga imong gitakda nga gusto nimong paningkamotan?
-
Unsay imong nakat-onan kon sa unsang paagi ang Ginoo makatabang nimo sa paghimo og epektibong dinasig nga mga pagpili?
Pagtukod og Pagbarog sa Kinaugalingong Paningkamot
Pagtukod og pagbarog sa kinaugalingong paningkamot sa paagi sa Ginoo
Ikonsiderar ang paghangyo sa usa ka estudyante nga magdrowing og stick figure sa usa ka tin-edyer diha sa pisara. Dapita ang klase sa paghatag og ngalan niini nga tin-edyer ug paghimo og pipila ka detalye bahin sa iyang personalidad ug kahimtang sa pamilya.
Dayon hangyoa ang mga estudyante nga maghunahuna og reyalistiko nga sitwasyon diin kana nga tin-edyer nag-atubang og mga hagit sa kinabuhi.
Dapita ang mga estudyante nga magporma og gagmayng grupo ug hisgotan ang ilang mga tubag sa mosunod nga mga pangutana:
-
Sa unsang paagi ang pagsalig sa Manluluwas ug sa Iyang mga pagtulun-an makatabang niini nga tin-edyer nga makasugakod sa mga hagit?
-
Unsay mahimo niini nga tin-edyer aron makatukod og pagbarog sa kinaugalingong paningkamot diha sa ilang kahimtang?
Pwede usab nimong dapiton ang mga estudyante sa pagpakigbahin og mga kamatuoran bahin sa pagbarog pinaagi sa kinaugalingong paningkamot nga ilang nakat-onan gikan sa mga kasulatan.
Ang pipila ka tudling nga gitun-an sa mga estudyante diha sa leksiyon nga “Pagtukod og Pagbarog Pinaagi sa Kinaugalingong Paningkamotsa Paagi sa Ginoo” naglakip sa:
Ipakita ang mosunod nga mga pangutana. Dapita ang mga estudyante sa pagpamalandong niini ug sa pagrekord sa ilang mga hunahuna diha sa ilang mga journal sa pagtuon.
-
Unsa nga mga kahanas ug mga kinaiya ang imong nakat-onan nga makatabang nimo nga mahimong mas makabarog pinaagi sa kinaugalingong paningkamot sa lainlaing bahin sa imong kinabuhi (sama sa edukasyon, panglawas, panarbaho, o espirituhanon nga kalig-on)?
-
Sa unsang mga paagi nga nahimo kang mas makabarog pinaagi sa kinaugalingong paningkamot?
-
Sa unsang paagi nimo dapiton ang Dios sa pagtabang nimo nga padayong makatukod og pagbarog pinaagi sa kinaugalingong paningkamot?
Pisikal ug Emosyonal nga Kahimsog
Gamita ang mga baroganan ug mga kahanas aron mahimong mas himsog sa pisikal ug emosyonal nga paagi
Ikonsiderar ang pagdrowing og yano nga roller coaster o usa ka dalan nga dunay mga bungtod ug mga walog.
-
Ngano kaha nga ang ubang mga tawo ikompara ang ilang kinabuhi ngadto sa usa ka roller coaster o usa ka dalan nga dunay mga bungtod ug mga walog?
-
Unsa ang pipila ka “kaayohan” ug “kalisdanan” nga atong mabati sa atong kinabuhi?
Pahinumdomi ang mga estudyante nga niini nga kurso, gitun-an nila ang lainlaing leksiyon nga makatabang nila sa pagdangop ngadto sa Ginoo aron mahimong mas lig-on sa emosyonal nga paagi atol sa tanang panahon sa kinabuhi.
Ikonsiderar ang pagdapit sa mga estudyante sa paglista sa pipila sa mga baroganan ug mga katakos nga ilang nakat-onan aron mahimong mas lig-on sa emosyonal nga paagi. Kon posible, pwede nilang hisgotan ang mga kasulatan o mga pamahayag gikan sa mga lider sa Simbahan nga nagtudlo nila niini nga mga baroganan ug mga kahanas. Ang mga tubag sa mga estudyante mahimong maglakip sa mga paagi sa pagpauswag sa mga sumbanan sa panghunahuna ug pag-atubang sa kaugtas, kabalaka, kaguol, depresyon, ug pagkaperpeksyonista. Pwede usab nilang hisgotan ang bahin sa pagpauswag sa ilang pisikal nga kahimsog.
Dapita ang mga estudyante sa pagsulat sa mga tubag sa mosunod nga mga pangutana diha sa ilang mga journal sa pagtuon:
-
Unsay imong nakat-onan nga makahuloganon o makatabang nimo?
-
Unsa nga mga kahanas ang imong gigamit sa pagdangop ngadto sa Ginoo aron mahimong mas lig-on sa emosyonal nga paagi?
-
Unsa nga mga kalamposan ug mga panalangin gikan sa Ginoo ang imong nasinati? Unsa nga mga hagit ang giatubang gihapon nimo?
-
Unsa sa imong hunahuna ang gusto sa Ginoo nga himoon nimo aron padayon sa “paghunahuna [Kaniya] sa matag hunahuna” (Doktrina ug mga Pakigsaad 6:36) aron mahimong mas lig-on sa emosyonal nga paagi?
Dapita ang mga estudyante sa pagpakigbahin sa ilang mga tubag ug mga kasinatian, kon dili kaayo kini personal. Pangita og mga paagi sa pagdayeg sa mga estudyante sa ilang mga paningkamot ug sa pagpamatuod nga ang Ginoo motabang ug mopanalangin kanila sa kaugalingon Niyang panahon ug paagi. Pahinumdomi ang mga estudyante nga kon nakasinati sila og seryoso nga mga hagit tungod sa kaugtas, kabalaka, depresyon, o uban pang problema sa mental o emosyonal nga kahimsog, pwede silang makig-istorya sa kasaligang hamtong o sa propesyonal sa mental nga kahimsog. Ang pagdangop sa uban alang sa tabang kon kita nanlimbasog dili timaan sa kaluya o kawalay pagtuo.
Pagpangandam alang sa Umaabot nga Edukasyon ug Pagpanarbaho
Sabta ang kaimportante sa tibuok kinabuhi nga temporal ug espirituwal nga edukasyon
Ipakigbahin ang mosunod nga senaryo o sama niini aron hatagan og kahigayonan ang mga estudyante sa pagpasabot sa unsay ilang nakat-onan mahitungod sa kaimportante sa edukasyon.
Samtang naglakaw pauli gikan sa eskwelahan, miingon ang imong higala nga si Naomi nga dili siya ganahang moeskwela. Gibati niya nga lisod kaayo kini ug kanunay nga mobati nga walay pulos. Wala siyay tinguha nga maningkamot pag-ayo sa pag-eskwela o ipadayon ang iyang edukasyon inig human niya og high school.
Hatagi og kahigayonan ang mga estudyante sa pagtubag niini nga kabalaka. Ang usa ka paagi sa paghimo niini mao ang pagpakigbahin sa mosunod nga instruksiyon. Pwedeng kompletohon sa mga estudyante ang mga instruksiyon tagsa-tagsa o sa gagmayng grupo.
Paghimo og tubag para kang Naomi nga makatabang niya nga masabtan ang kaimportante sa edukasyon. Ikonsiderar ang paglakip sa pipila o tanan sa mosunod diha sa imong tubag:
-
Usa ka kasulatan o pamahayag gikan sa lider sa Simbahan
-
Usa ka pagpasabot kon nganong gusto sa Langitnong Amahan nga kanunayng tinguhaon sa Iyang mga anak ang temporal ug espirituwal nga edukasyon
-
Personal nga mga kasinatian o pagpamatuod
Human matapos sa mga estudyante paghimo sa ilang mga tubag, hatagi sila og kahigayonan nga ipakigbahin kini ngadto sa uban.
Paghimo og plano para sa umaabot nga edukasyon ug pagpanarbaho
Ang mga estudyante adunay mga kahigayonan sa paghimo og mga plano nga may kalabotan sa ilang umaabot nga edukasyon ingon man usab ang umaabot nga mga oportunidad sa pagpanarbaho ug uban pang tahas nga mabatonan nila inigka hamtong. Dapita sila nga rebyohon ang mga plano nga ilang gibuhat.
Ikonsiderar ang paghatag nila og higayon nga mohimo og bisan unsang mga kausaban nga gibati nila nga kinahanglan. Pwede usab nilang ikonsiderar kon sa unsang paagi kini nga mga plano makaimpluwensiya sa kasamtangan nilang mga pagpili. Dayon dapita sila sa paghisgot sa mosunod nga mga pangutana uban sa usa ka kapares.
-
Unsay imong mga plano para sa imong umaabot nga edukasyon?
-
Unsay imong mga plano sa pagpangandam sa umaabot nga mga oportunidad sa karera o uban pang responsibilidad nga imong mabatonan isip usa ka hamtong?
-
Unsaon nimo paglakip sa Ginoo diha sa imong mga plano?
Pagmalamposon sa Pag-eskwela
Gamita ang mga kahanas aron magmalamposon sa pag-eskwela
Aron tabangan ang mga estudyante nga hinumdoman ang pipila sa mga kamatuoran ug mga kahanas nga ilang nakat-onan nga makatabang nila nga mas magmalamposon sa pag-eskwela, ikonsiderar ang pagdrowing og stick figure nga nagrepresentar sa usa ka estudyante. Ipasabot nga kini nga estudyante nanlimbasog nga mobuhat og maayo sa pag-eskwela.
-
Unsa ang pipila sa mga kamatuoran ug mga kahanas ang imong gitun-an nga makatabang sa usa ka tawo nga nanlimbasog sa pag-eskwela?
Kon gikinahanglan, pwede nimong dapiton ang mga estudyante nga ipakigbahin ang unsay ilang nahinumdoman nga nakat-onan bahin sa paglakip sa Ginoo diha sa ilang edukasyon, pagbaton og pagkamatinuoron ug kaligdong diha sa ilang edukasyon, pagpangandam sa mga eksaminasyon ug mahagiton nga mga proyekto, ug paglantaw sa mga hagit uban ang panghunahuna nga mouswag pa. Rebyoha ang mga konsepto ug mga kasulatan gikan niadtong mga leksiyon kon gikinahanglan. Pananglitan, pwede nimong dapiton ang mga estudyante nga ipakigbahin ang ilang nahinumdoman bahin kon sa unsang paagi gilakip ni Propeta Joseph Smith ang Ginoo diha sa iyang pagkat-on (tan-awa sa Joseph Smith—Kasaysayan 1:10–18) o kon giunsa ni Nephi paglantaw ang iyang mga hagit uban ang panghunahuna nga mouswag pa (tan-awa sa 1 Nephi 16:18–23, 30–32).
Dayon dapita ang mga estudyante nga pamalandongan kon giunsa nila paggamit niini nga mga konsepto diha sa ilang kinabuhi. Pwede nimong ipakita ang mga pangutana nga sama sa mosunod ug dapita ang mga estudyante sa pagrekord sa ilang mga tubag diha sa ilang mga journal sa pagtuon.
-
Unsa ang pipila sa mga kamatuoran o mga kahanas ang imong gigamit sa imong kinabuhi aron matabangan ka nga mas magmalamposon sa pag-eskwela?
-
Unsa ang kalainan nga nahimo niini nga mga butang?
-
Sa unsang paagi nimo nabantayan nga nausab ang imong relasyon ngadto sa Ginoo o ang imong pag-akses sa Iyang tabang samtang gihimo nimo kini nga mga butang?
Human makabaton og igong panahon ang mga estudyante sa pagsulat sa ilang mga tubag, pagdapit og pipila ka boluntaryo sa pagpakigbahin sa ilang mga hunahuna ug mga kasinatian diha sa klase. Dasiga sila nga maminaw pag-ayo sa ilang mga klasmeyt ug ikonsiderar ang pagsulay sa pipila sa mga kahanas nga ang mga klasmeyt nakaangkon og kalamposan.
Misyonaryo nga Pagpangandam
Pagbati og dugang nga tinguha nga ipakigbahin ang ebanghelyo ni Jesukristo ngadto sa uban
Diha sa leksiyon nga “Paghigugma, Pagpakigbahin, ug Pagdapit,” tingali nagpakita ka og usa ka imahe sa nagtakuban nga hayop. Ikonsiderar ang pagpakita pag-usab sa imahe ug pagpahinumdom sa mga estudyante sa mosunod nga pamahayag nga gigamit niana nga leksiyon.
Si Elder Quentin L. Cook sa Korum sa Napulog Duha ka Apostoles mitudlo:
Usa ka importante nga bahin niining misyonaryo nga paningkamot mao ang alang sa indibidwal nga mga miyembro nga mahimong talagsaon nga mga ehemplo bisan asa kita nagpuyo. Kita kinahanglang dili magtakoban. (Quentin L. Cook, “Luwas nga Pagapundokon Pauli sa Panimalay,” Liahona, Mayo 2023, 23)
-
Unsa kahay bation sa usa ka tawo nga mahimong maayo kaayong panig-ingnan sa pagkahimong misyonaryo para kang Jesukristo? Unsa kahay bation sa usa ka tawo nga magtakoban isip Iyang misyonaryo?
Ang mga estudyante tingali mirekord kon unsay ilang gibati sa pagpakigbahin sa ebanghelyo diha sa leksiyon 199, “Pagpakigbahin sa Ebanghelyo tungod sa Kristohanong Gugma.” Pwede nimo silang dapiton nga tan-awon pag-usab ang ilang gisulat. O pwede nimo silang dapiton nga irekord ang ilang mga gihunahuna ug gibati karon bahin sa pagpakigbahin sa ebanghelyo. Samtang sila mamalandong ug magsulat, pwede nimong isugyot nga tun-an nila pag-usab ang usa o daghan sa mosunod nga mga tudling sa kasulatan gikan sa leksiyon 201, “Pagpili nga Moserbisyo og usa ka Misyon,” aron hinumdoman ang pipila sa mga saad sa Ginoo alang niadtong mopakigbahin sa ebanghelyo.
Human sa igong panahon, dapita ang pipila ka boluntaryo sa pagpakigbahin sa ilang girekord ug kon unsay nakaimpluwensiya sa ilang tinguha sa pagserbisyo isip misyonaryo alang sa Ginoo.
Pagpangandam alang sa Templo
Mobati og dugang tinguha sa paghimo og mga pakigsaad uban sa Dios diha sa templo
Ikonsiderar ang paggamit sa usa o daghan sa mosunod nga mga kalihokan aron tabangan ang mga estudyante sa pagsukod sa ilang tinguha sa paghimo og mga pakigsaad uban sa Ginoo diha sa templo. Pwedeng magsulat sa ilang journal ang mga estudyante o maghisgot diha sa gagmayng mga grupo.
-
Ipakita ang usa ka litrato sa templo ug ipakigbahin kon sa unsang paagi gipahinumdoman ka sa templo bahin kang Jesukristo. Kon kinahanglan, makapangita ka og imahe diha sa media gallery sa temples.ChurchofJesusChrist.org. Ipakigbahin ang imong mga hunahuna ug mga pagbati bahin sa paghimo ug pagtuman sa mga pakigsaad uban sa Langitnong Amahan diha sa Iyang templo.
-
Sa usa sa mga leksiyon sa pagpangandam alang sa templo, nakat-onan nimo ang bahin sa kaimportante sa pagsimba diha sa templo sa tibuok nimong kinabuhi. Gisulatan tingali nimo ang imong umaabot nga kaugalingon bahin sa kaimportante sa pagsimba sa Ginoo diha sa Iyang templo. Naa ba kay nakat-onan o gibati niining bag-ohay lang nga nakaimpluwensiya sa imong tinguha sa paghimo ug pagtuman og mga pakigsaad uban sa Langitnong Amahan diha sa templo? Kon naa, idugang kana sa sulat o pagsulat og bag-o nga mubo nga sulat para sa imong kaugalingon.
-
Pamalandongi ang imong nakat-onan bahin sa paghimo og mga pakigsaad uban sa Ginoo diha sa templo, lakip ang balaod sa pagpahinungod. Tubaga ang mosunod nga mga pangutana.
-
Unsay imong gihimo aron mas makasunod sa mga baroganan sa balaod sa pagpahinungod sa Ginoo?
-
Sa unsang paagi kini nakatabang aron maandam ka sa paghimo og pakigsaad uban sa Ginoo diha sa templo nga magsunod niini nga balaod?