Leksiyon 199: Misyonaryo nga Pagpangandam

Pagpakigbahin sa Ebanghelyo tungod sa Kristohanong Gugma

Gugma sa Dios ug sa Uban

Naay daghang rason kon nganong pilion nato nga ipakigbahin ang ebanghelyo ni Jesukristo ngadto sa uban. Modako ang atong tinguha nga ipakigbahin ang ebanghelyo samtang nagkat-on kita sa paghigugma sa Dios ug niadtong anaa sa atong palibot. Kini nga leksiyon makatabang sa mga estudyante nga masabtan kon sa unsang paagi ang ilang gugma sa Langitnong Amahan, kang Jesukristo, ug sa uban modasig nila aron ipakigbahin ang ebanghelyo.

Posibleng mga Kalihokan sa Pagkat-on

Hinungdan sa pagserbisyo

Ikonsiderar ang pagpakita sa mga litrato sa kabatan-onan nga nagserbisyo sa lainlaing sitwasyon. Dapita ang mga estudyante sa pagpakigbahin sa daghang posibleng rason kon nganong mipili ang kabatan-onan sa matag litrato nga moserbisyo. (Apil sa mga posibleng rason mao ang obligasyon, gugma, gilaoman sa mga ginikanan, pagbati nga sad-an, o sosyal nga inter-aksiyon.)

• Bisan tuod adunay daghang mga rason sa pagserbisyo sa uban, hain sa mga rason ang posibleng mas makatabang nato nga mahisama sa Manluluwas? Ngano man?

Dayon pwede kang magpakita og litrato sa usa ka tawo nga nagpakigbahin sa ebanghelyo samtang dapiton nimo ang mga estudyante sa paghisgot sa mosunod nga mga pangutana:

• Unsa ang pipila ka mga rason nga mopili ang usa ka tawo sa pagpakigbahin sa ebanghelyo ngadto sa usa ka higala o mopili gani nga moserbisyo og full-time nga misyon?

• Hain sa mga rason ang posible nga mas motabang nila nga mahimong epektibo sa pagdala sa uban ngadto sa Dios?

Ikonsiderar ang paghatag og panahon sa mga estudyante aron pamalandongan ug irekord diha sa ilang mga journal sa pagtuon ang mga gibati nila bahin sa mosunod:

• Unsay imong gibati bahin sa pagpakigbahin sa ebanghelyo ni Jesukristo ngadto sa uban? Nganong ingon niana man ang imong gibati?

• Nagplano ba kang moserbisyo og full-time nga misyon? Kon mao, unsay nagtukmod nimo sa paghimo niana?

Dapita ang mga estudyante nga tinguhaon ang giya sa Espiritu Santo panahon sa leksiyon samtang ilang hunahunaon ang ilang mga tinguha sa pagpakigbahin sa ebanghelyo ni Jesukristo.

Mga hinungdan sa Dios

Ikonsiderar ang pagpasabot sa mga estudyante nga dihang nasayod kita unsa angnakadasig sa Langitnong Amahan ug ni Jesukristo sa pagserbisyo nato, mas masunod nato ang Ilang mga ehemplo.

Aron tabangan ang mga estudyante nga masabtan kini, pwede nimong ipakita ang mosunod nga mga pakisayran. Dapita ang matag estudyante sa pagpili og usa niini o duha ka tudling nga basahon ug pamalandongan.

Basaha ang usa o duha sa mosunod nga mga tudling, nga mangita kon unsay ilang gitudlo mahitungod sa Langitnong Amahan ug ni Jesukristo:

• Juan 3:16–17

• Juan 15:12–13

• 2 Nephi 26:24

• Doktrina ug mga Pakigsaad 18:10–13

• Doktrina ug mga Pakigsaad 34:1–3

• Doktrina ug mga Pakigsaad 95:1

• Doktrina ug mga Pakigsaad 138:1–4

Dapita ang mga estudyante nga molibot sa lawak klasehan ug ipakigbahin ngadto sa mga klasmeyt nga mipilig laing tudling unsa ang ilang nakat-onan bahin sa Langitnong Amahan ug kang Jesukristo.

Dihang mahuman na sa pagpakigbahin ang mga estudyante, hangyoa ang mga boluntaryo nga i-summarize ang ilang nakat-onan mahitungod sa Langitnong Amahan ug kang Jesukristo.

Tabangi ang mga estudyante nga mailhan nga nagserbisyo ang Langitnong Amahan ug si Jesukristo nadasig sa pagserbisyo tungod sa gugma.

Ang mga estudyante mahimong nagkinahanglan og panahon nga pamalandongan ang mosunod nga mga pangutana sa dili pa sila mobati nga andam sila nga motubag diha sa klase. Pwede nimo silang hatagan og panahaon nga isulat ang ilang mga tubag diha sa ilang mga journal sa pagtuon sa dili pa mohangyo sa mga boluntaryo nga mopakigbahin.

• Unsang mga kasinatian ang nakatabang nga mabati nimo ang gugma sa Langitnong Amahan ug ni Jesukristo para nimo?

• Sa unsang paagi ang pagsabot kon nganong nagserbisyo kanato ang Langitnong Amahan ug si Jesukristo makaimpluwensiya sa imong tinguha nga ipakigbahin ang ebanghelyo ngadto sa uban?

Ang gugma motukmod nato nga ipakigbahin ang ebanghelyo

Kini nga seksiyon sa leksiyon mogamit sa mga pagtulun-an sa Manluluwas diha sa Juan 21 aron tabangan ang mga estudyante nga makita nga ang gugma motukmod nato nga ipakigbahin ang ebanghelyo.

Usa ka alternatibong paagi sa paghimo niini mao ang pagdapit sa mga magkapares nga tun-an ang seksiyon nga “Gugmang Putli ug Gugma,” apil ang mga ideya sa “Pagtuon sa Kasulatan,” sa pahina 147 sa Isakyaw ang Akong Ebanghelyo: Usa ka Giya sa Pagpakigbahin sa Ebanghelyo ni Jesukristo (2023), nga mangita kon sa unsang paagi ang gugma magtukmod nato nga ipakigbahin ang ebanghelyo.

Wala madugay human ang Paglansang ni Jesukristo, pipila sa Iyang mga disipulo ang nangisda. Samtang nangisda sila, usa ka tawo diha sa baybay ang midapit nila nga itaktak ang ilang mga pukot sa tuo nga bahin sa ilang mga sakayan. Human nila kini gihimo ug nakakuhag daghang isda, nakaamgo ang mga disipulo nga kadtong tawhana mao ang nabanhaw nga Manluluwas. Pagdunggo nila sa baybay, giserbisyohan sila ni Jesus pinaagi sa pagpakaon ug pagtudlo nila.

Ikonsiderar ang pagdapit sa mga estudyante nga pangitaon ang balikbalik nga pagdapit sa Manluluwas ngadto kang Pedro pinaagi sa pagbasa sa Juan 21:15–17 nga magkauban o tan-awon ang bidyo nga “Feed My Sheep” (5:47), nga anaa sa ChurchofJesusChrist.org, gikan sa time code 2:46 hangtod 4:29. (Makatabang tingali sa mga estudyante nga mahibaloan nga ang pulong niini diha sa bersikulo 15 pwedeng magtumong sa tanang isda nga nakuha sa mga disipulo.)

• Unsay imong nakat-on gikan sa kon unsa ka gusto ni Jesus nga ipakita kang Pedro nga gimahal niya siya?

Basaha ang mosunod nga pamahayag ni Propeta Joseph Smith (1805–44), nga mangita kon unsay madugang niini sa imong pagsabot sa mga pagdapit ni Jesus diha sa Juan 21.

Ang gugma mao ang usa sa labing halangdong kinaiya sa Dios, ug angay ipakita niadtong naninguha nga mamahimong mga anak sa Dios. Ang usa ka tawo nga puno sa gugma sa Dios, dili kontento nga mopanalangin sa iyang pamilya lamang, apan molakip sa tibuok kalibotan, naghinamhinam sa pagpanalangin sa tibuok kaliwatan sa tawo. (Mga Pagtulun-an sa mga Presidente sa Simbahan: Joseph Smith [2007], 515)

• Unsa ang mipatigbabaw kanimo gikan sa pamahayag ni Joseph Smith?

• Unsay iong nakat-onan gikan sa Juan 21 ug sa pamahayag ni Joseph Smith nga magdasig nimo sa pagpakigbahin sa ebanghelyo o kaha sa pagserbisyo og usa ka misyon?

• Sa imong hunahuna unsa ang epektibong mga paagi aron mapalawman nato ang atong gugma sa Dios? Aron mapalawman nato ang atong gugma sa ubang mga tawo?

Pagbuntog sa pagduhaduha nga ipakigbahin ang ebanghelyo

Pwedeng maggrupo-grupo ang mga estudyante aron kompletohon ang mosunod nga kalihokan. Makatabang tingali ang paghatag og papel sa matag grupo.

1. Isip usa ka grupo, paghimog senaryo diin ang usa ka batan-ong lalaki nagduhaduha sa paserbisyo og usa ka full-time nga misyon o usa ka tin-edyer nga nagduhaduha sa pagpakigbahin ngadto sa usa ka higala. Pagpilig og mosulat sa senaryo diha sa papel. Seguroa nga iapil ang mga rason kon nganong nagduhaduha ang maong tawo.

   Ania ang ehemplo sa usa ka senaryo nga pwedeng himoon sa mga grupo: “Bag-ohay lang nakadungog si Antonio og pakigpulong sa komperensiya nga nagdasig sa mas daghang kabatan-onan sa pagserbisyo isip mga misyonaryo sa Ginoo. Nahibalo siya nga mao ni ang angay niyang himoon. Pero, maglisod siya sa pagpakig-istorya sa mga tawong wala niya mailhi, ug mibati siya nga dili kaayo siya sinati sa kasulatan aron motudlo sa uban. Nabalaka siya nga basig dili siya epektibo nga misyonaryo.”

   Human masulat sa mga grupo ang mga senaryo nga ilang gihimo, ikonsiderar ang paghangyo nila nga makigbaylo og mga senaryo sa ubang grupo sa dili pa himoon ang sunod nga lakang.

2. Gamit ang imong nakat-onan ug gibati karon, ipasulat sa tigsulat ang gustong ipakigbahin sa imong grupo aron tabangan ang tawo nga naa sa senaryo. Apila ang mga sugyot kon unsay pwedeng himoon sa maong tawo aron modako ang iyang gugma para sa Manluluwas ug sa uban. Pwede usab nimong iapil ang bahin sa kon sa unsang paagi makatabang ang pagbati sa gugma sa Manluluwas aron modako ang tinguha niining tawhana sa pagserbisyo.

Ikonsiderar ang pagdapit sa mga grupo nga ipakigbahin sa klase ang ilang tubag sa senaryo sa laing grupo.

Sa pagtapos sa leksiyon, ikonsiderar ang paghatag og panahon sa mga estudyante nga irekord diha sa ilang mga journal sa pagtuon kon sa unsang paagi makatabang nila ang gugma sa Dios ug sa uban aron mabuntog ang bisan unsang pagduhaduha nga ilang gibati bahin sa pagpakigbahin sa ebanghelyo ni Jesukristo.

Dugang nga mga Kapanguhaan

Unsay makatabang nako aron mabuntog ang kahadlok sa pagpakigbahin sa ebanghelyo?

Si Elder L. Tom Perry (1922–2015) sa Korum sa Napulog Duha ka Apostoles mipasabot:

Ang ubang mga miyembro ingon og gustong isekreto ang ilang pagkamiyembro sa Simbahan. Duna silay mga katarungan. Sama pananglit, tingali nagtuo sila nga dili sila angay nga mopaambit sa ilang mga gituohan. Tingali nahadlok sila basin sila og masayop o mapangutan-an og dili nila matubag. Kon ang ingon nga mga hunahuna mosulod man sa inyong ulo, duna koy pipila ka tambag alang nimo. Hinumdomi lamang ang mga pulong ni Juan: “Ang kahadlok wala diha sa gugma, hinonoa ang hingpit nga gugma nagahingilin sa kahadlok” (1 Juan 4:18). Kon gihigugma man nato ang Dios ug gihigugma ang atong mga silingan, gisaaran kita nga atong mabuntog ang atong mga kahadlok. …

Akong isaad kaninyo nga kon kamo mosanong sa pagdapit sa pagpakigbahin sa inyong mga gituohan ug mga pagbati kabahin sa gipahiuli nga ebanghelyo ni Jesukristo, ang diwa sa gugma ug kaisog mao ang kanunay ninyong kauban, kay ang “hingpit nga gugma nagahingilin sa kahadlok” (1 Juan 4:18). (L. Tom Perry, “Ang Hingpit nga Gugma Nagahingilin sa Kahadlok,” Liahona, Nob. 2011, 43, 44)

Unsay koneksyon tali sa gugma ug sa pagpakigbahin sa ebanghelyo ni Jesukristo?

Si Presidente Dallin H. Oaks sa Unang Kapangulohan mitudlo:

Gikan sa atong pagpamatuod sa kamatuoran ug sa kaimportante sa gipahiuli nga ebanghelyo, atong nasabtan ang bili sa kon unsay gihatag kanato. Gikan sa atong gugma sa Dios ug sa atong isigkatawo, atong nakuha ang tinguha nga ipakigbahin ang dakong gasa ngadto sa tanan. …

Ang labing epektibo nga mga misyonaryo, miyembro ug full-time, kanunay nga mobuhat tungod sa gugma. (Dallin H. Oaks, “Sharing the Gospel,” Ensign, Nob. 2001, 7, 8)

Si Elder Quentin L. Cook sa Korum sa Napulog Duha ka Apostoles mitudlo:

Kon moabot sa pagpundok sa Israel, kinahanglan nga … ipalayo ang mga pagbati nga responsibilidad lang o sala ngadto sa mga pagbati og gugma ug pag-apil diha sa balaang panag-uban sa pagpakigbahin sa mensahe, pangalagad, ug misyon sa Manluluwas sa kalibotan.

Isip mga miyembro makapakita kita sa atong gugma alang sa Manluluwas ug sa atong mga kaigsoonan sa tibuok kalibotan pinaagi sa paghimo og yano nga mga pagdapit. (Quentin L. Cook, “Dakong Gugma alang sa mga Anak sa Atong Amahan,” Liahona, Mayo 2019, 78)

Aron tabangan ang mga estudyante nga mabati ang kaimportante nga nadasig sa gugma aron sa pagserbisyo og usa ka misyon, ikonsiderar ang pagpasalida sa “Face to Face with Elder Rasband, Sister Oscarson, and Brother Owen” (1:20:41) gikan sa time code 33:58 hangtod 35:43.

Dugang nga mga Kalihokan sa Pagkat-on

Laing pamaagi sa pagsugod: Ang maayong Samarianhon

Pwede nimong sugdan ang klase pinaagi sa pagpabasa o pagpadrama sa mga estudyante sa maayong Samarianhon, diha sa Lucas 10:30–37. Pwede nimong hisgotan kon unsa kahay nakadasig sa pari, sa Levita, ug Samarianhon sa paghimo sa kon unsay ilang gihimo. Pwede nimong hisgotan kon sa unsang paagi ang gugma sa Dios ug sa uban magtukmod sa mga gihimo sa Samarianhon. Dayon pwedeng pamalandongan sa mga estudyante ang ilang kaugalingong mga motibo sa pagserbisyo sa uban.

Pakigsulti uban sa gugma

Ikonsiderar ang pagpasalida sa “Reach Out with Love” (8:31) ug pagdapit sa mga estudyante nga ilhon ang mga rason ni Guillermo sa pagpakig-istorya kang Steve human siya hangyoa sa iyang bishop nga bisitahon si Steve. Awhaga ang mga estudyante nga ikonektar tali sa kasinatian ni Guillermo ug sa ilang tinguha sa pagpakigbahin sa ebanghelyo ngadto sa uban.

Pagbuntog sa mga butang nga makabalda aron moserbisyo og usa ka misyon

Aron tabangan ang mga estudyante nga mailhan ang mga butang nga makabalda nga maoy mobabag sa usa ka tawo sa pagserbisyo og usa ka misyon, ikonsiderar ang pagpakigbahin sa mosunod nga pamahayag ni Elder Marcos A. Aidukaitis sa Seventy:

Samtang adunay daghang paagi sa pagtabang sa pagpundok, ako gusto nga mamulong sa usa ka piho: pagserbisyo isip usa ka full-time nga misyonaryo. Alang sa kadaghanan kaninyo, kini nagpasabot nga usa ka tigtudlo nga misyonaryo. Alang sa uban, kini nagpasabot nga usa ka pangserbisyo nga misyonaryo. Apan ang kalibotan naningkamot sa paglibog sa kabatan-onan gikan niining labing sagrado nga responsibilidad gamit ang kahadlok ug ka walay kasiguroan.

Ang ubang mga paglibog tingali mao ang pagsinati og pandemya, pagbiya sa maayong trabaho, pag-undang sa pag-eskwela, o pagkaibog ngadto sa usa ka tawo. Ang tanan adunay iyang kaugalingon nga mga hagit. Ang maong mga paglibog moabot tumong gayod sa panahon sa pag-alagad sa Dios, ug ang mga pagpili nga ingon og maklaro sa kadugayan dili kanunay sayon nianang higayona. (Marcos A. Aidukaitis, “Ipataas ang Imong Kasingkasing ug Pagmaya,” Liahona, Mayo 2022, 41)

Dapita ang mga estudyante nga ilista ang mga komon nga makabalda nga posibleng mobabag sa pagserbisyo og usa ka misyon. Dayon pwedeng ipakigbahin sa mga estudyante ang mga ideya kon unsaon pagbuntog niini nga mga makabalda.

Laing paagi sa pagpaila sa asoy sa Juan 21

Pwede nimong ipasalida ang bidyo nga “The First Great Commandment” (19:48) gikan sa time code 6:52 hangtod 11:26. Diha sa bidyo, giasoy ni Elder Jeffrey R. Holland sa Kurom sa Napulog Duha ka Apostoles gamit ang kaugalingon niyang mga pulong ang asoy sa pagdapit ni Jesus kang Pedro nga pakan-on ang Iyang mga karnero.