Leksiyon 203: Misyonaryo nga Pagpangandam

Kakugi diha sa Misyonaryo nga Buhat

Pagpangandam aron Mahimong Kugihan nga Misyonaryo

Gihatagan kita ni Jesukristo og hingpit nga ehemplo sa kakugi nga kinahanglan natong paningkamotan nga sundogon samtang nagserbisyo ta sa uban. Kini nga leksiyon makatabang sa mga estudyante nga tinguhaon ang tabang sa Ginoo nga mahimong mas kugihan diha sa ilang kinabuhi ug sa ilang pagpangandam sa pagserbisyo isip Iyang mga misyonaryo.

Posibleng mga Kalihokan sa Pagkat-on

Ikaupat nga andana, kataposang pultahan

Ikonsiderar ang pagsugod sa leksiyon pinaagi sa pagtabang sa mga estudyante sa pagpamalandong sa kaimportante sa kakugi diha sa misyonaryo nga buluhaton. Pwede nimong ipakita ang mosunod nga litrato ug ipakigbahin ang asoy sa ubos. O pwede nimong ipasalida ang bidyo nga “Ikaupat nga Andana, Kataposang Pultahan,” nga anaa sa ChurchofJesusChrist.org, gikan sa time code 14:17 hangtod 17:27. Pwede nimong ihunong kadyot ang bidyo sa time code 16:03 aron ikonsiderar sa mga estudyante kon unsay ilang tubag niining puntoha. Dayon ipasalida ang nahibiling bahin sa bidyo.

Gipakigbahin ni Elder Dieter F. Uchtdorf sa Korum sa Napulog Duha ka Apostoles ang mosunod nga kasinatian sa mga misyonaryo sa Europe nga mibati nga nadasig sa pagpakigbahin sa ebanghelyo ngadto sa mga residente sa ikaupat nga andana sa usa ka bilding apartment.

Gisugdan nila sa unang andana ug gituktok ang matag pultahan, nagpresentar sa ilang makaluwas nga mensahe ni Jesukristo ug sa Pagpahiuli sa Iyang Simbahan.

Walay usa sa unang andana ang gustong maminaw nila. …

… Gituktok nila ang matag pultahan sa ikaduhang andana.

Sa gihapon, walay usa nga maminaw.

Ang ikatulong andana mao ra gihapon. (Dieter F. Uchtdorf, “Ikaupat nga Andana, Kataposang Pultahan,” Liahona, Nob. 2016, 17)

• Unsa kahay gihunahuna niini nga mga misyonaryo niining puntoha?

Mipadayon si Elder Uchtdorf:

Ug mao gihapon sa ikaupat—hangtod nga gituktok nila ang kataposang pultahan sa ikaupat nga andana.

Dihang miabli kana nga pultahan, usa ka batang babaye mipahiyom kanila ug mihangyo sa paghulat samtang istoryahon niya ang iyang mama. …

… Gipadangat sa mga misyonaryo ang ilang mensahe ug gihatagan ang mama og basahon—ang Basahon ni Mormon.

Sa nakabiya na sila, nakahukom ang mama nga mobasa og pipila ka pahina.

Nahuman niya ang tibuok basahon sulod lang sa pipila ka adlaw.

Wala madugay, kining talagsaong nag-inusara nga ginikanan nga pamilya nagpabunyag. (Dieter F. Uchtdorf, “Ikaupat nga Andana, Katapusang Pultahan,” Liahona, Nob. 2016, 17–18)

• Unsa nga Kristohanong mga hiyas ang imong nakita niini nga mga misyonaryo?

Kristohanong mga hiyas sa mga misyonaryo

Ikonsiderar ang pag-asayn sa katunga sa klase nga basahon ang mga bersikulo sa ubos diha sa Doktrina ug mga Pakigsaad seksiyon 4 ug ang katunga sa klase maoy mobasa sa mga bersikulo sa seksiyon 75. Human og basa, pwedeng ipakigbahin sa mga estudyante ang ilang mga tubag sa mga pangutana sa ubos ngadto sa usa ka tawo nga mibasa sa laing pakisayran.

Sa laing bahin, pwede nimong dapiton ang mga pares nga tun-an ang seksiyon nga “Kakugi,” apil ang mga ideya sa “Pagtuon sa Kasulatan,” sa mga panid 151–52 sa Isangyaw ang Akong Ebanghelyo: Usa ka Giya sa Pagpakigbahin sa Ebanghelyo ni Jesukristo (2023).

Basaha ang Doktrina ug mga Pakigsaad 4:2–6; 75:2–5, 29, nga pangitaon ang mga pulong ug hugpong sa mga pulong nga gigamit sa Ginoo sa paghulagway niadtong nagtinguha sa pagserbisyo Kaniya, lakip ang Iyang mga misyonaryo.

• Unsay gidahoman sa Manluluwas niadtong nagtinguha sa pagserbisyo Kaniya isip full-time nga mga misyonaryo? Ngano man?

• Sa unsang paagi makatabang kini nga mga hiyas ug mga aksyon dihang mag-atubang kita og mahagitong mga kahimtang?

Taliwala sa mga kamatuoran nga gipakigbahin sa mga estudyante, mailhan tingali nila nga ang Ginoo nagdahom nga magkugi ang Iyang mga misyonaryo sa pagpaambit sa Iyang ebanghelyo.

Unsa ang kakugi?

Isulat ang mosunod nga pag-aghat diha sa pisara, ug dapita ang mga estudyante kon unsaon nila kini paghuman.

Ang kakugi mao ang …

Kon nagkinahanglan og tabang ang mga estudyante sa paghatag og kahulogan sa kakugi, pwedeng nimong ipakigbahin ang usa sa posibleng kahulogan nga mao ang “kanunay, tinuoray nga paningkamot” (Isangyaw ang Akong Ebanghelyo: Usa ka Giya sa Pagpakigbahin sa Ebanghelyo ni Jesukristo [2023], 151).

• Unsa ang pipila ka sitwasyon diin ikaw o ang imong mga kaedad makaatubang og sitwasyon nga nagkinahanglan og kakugi?

Mahimo nimong ilista sa pisara ang mga tubag sa mga estudyante. Human makatigom og pipila ka ideya gikan sa mga estudyante, hatagi sila og higayon nga mas hunahunaon pag-ayo kon giunsa nila pagpakita ang kakugi diha sa ilang kinabuhi.

Ang usa ka paagi sa paghimo niini mao ang pagpakita sa mosunod nga pagsukod sa kaugalingon ug paghatag og panahon sa mga estudyante nga hilom nga pamalandongan kon unsay ilang tubag. Ikonsiderar ang pagpasabot sa mga estudyante nga samtang kompletohon nila ang pagsukod sa kaugalingon, ang Espiritu Santo makatabang nila nga mailhan kon unsay ilang gihimo nga maayo ug kon unsa pay ilang pauswagon. Makabenepisyo tingali ang mga estudyante sa pagrekord sa ilang mga hunahuna diha sa ilang journal sa pagtuon. (Pahinumdom: Mahimo nimong pilion nga ipakita pag-usab kini nga mga pamahayag sa kataposan sa leksiyon.)

Hilom nga pamalandonga kon unsa ka maayo ang matag mosunod nga mga pamahayag naghulagway kanimo:

• Maningkamot ko og maayo hangtod malamposong mahuman ang usa ka buluhaton, bisan pa og lisod kini.

• Ako maayong motrabaho, bisan kon walay nagbantay nako sa duol.

• Ang mga tawo makasalig nako ug sa akong paningkamot nga humanon ang usa ka buluhaton.

• Malipay ko sa paghimo sa akong labing maayo nga pagpaningkamot.

Ikonsiderar ang pagpakita sa mosunod nga mga instruksiyon ug pagdapit sa mga estudyante nga makigtinabangay sa gagmayng grupo aron kompletohon ang kalihokan. Human makompleto sa mga grupo ang kalihokan, dapita sila sa pagpakigbahin ngadto sa ubang grupo sa unsay ilang nakat-onan.

1. Pangita og pakisayran sa kasulatan o propetikanhong pamahayag nga nagpakita sa kaimportante sa kakugi.

2. Hisgoti kon sa unsang paagi si Jesukristo maoy usa ka ehemplo sa kakugi.

3. Pagpakigbahin og kasinatian dihang napanalanginan ka o ang tawo nga imong kaila pinaagi sa kakugi.

4. Hisgoti kon nganong para nimo importante nga kugihan ang mga misyonaryo.

5. Hisgoti ang uban pang bahin sa imong kinabuhi diin importante ang kakugi.

Ang Espiritu Santo makatabang nga sinserong masabtan og maayo sa mga estudyante ang mga kamatuoran ug maandam ang mga estudyante sa paggamit sa maong mga kamatuoran. Ang usa ka paagi nga makatabang ka sa mga estudyante sa pagdapit sa Espiritu Santo mao ang paghatag og mga kahigayonan nga makita nila kon sa unsang paagi gipakita sa Manluluwas ug sa uban ang kakugi. Para sa mga ehemplo kon giunsa pagpakita sa Manluluwas ang kakugi, pwedeng basahon sa mga estudyante ang Doktrina ug mga Pakigsaad 19:16–19 o Lucas 22:39–44. Para sa pananglitan sa usa ka tawo nga nagpakita og kakugi, ikonsiderar ang pagpasalida sa “Pagpangandam ni Gordon B. Hinckley: Kalimti ang Imong Kaugalingon ug Pagtrabaho” (2:03), nga anaa sa ChurchofJesusChrist.org.

Mga panalangin sa kakugi

Pahinumdomi ang mga estudyante sa asoy ni Elder Dieter F. Uchtdorf sa duha ka misyonaryo sa Europe nga nanuktok sa kataposang pultahan sa ikaupat nga andana. Ipasabot nga ang ilang makugihong mga paningkamot misangpot sa pagpanalangin ni Elder Uchtdorf. Ikonsiderar ang pagpakita sa mosunod nga litrato sa mga misyonaryo ug sa pamilya nga nagpuyo luyo sa kataposang pultahan sa ikaupat nga andana. Itudlo nga usa sa duha ka batang babaye mao si Harriet, ang asawa ni Elder Uchtdorf.

Gipakigbahin ni Elder Dieter F. Uchtdorf ang iyang gibati bahin niining duha ka misyonaryo:

Kanunay nga nabayaw ang akong kasingkasing sa pagpasalamat alang sa duha ka mga misyonaryo nga wala mohunong sa unang andana! Kanunay nakong bation ang pagpasalamat sa ilang pagtuo ug buhat. Kanunay kong nagpasalamat nga sila mipadayon—hangtod sa ikaupat nga andana, sa kataposang pultahan. (Dieter F. Uchtdorf, “Ikaupat nga Andana, Katapusang Pultahan,” Liahona, Nob. 2016, 18)

• Kon kadtong mga misyonaryo makapakigbahin og usa ka butang bahin sa kakugi diha sa klase,, unsa imong hunahuna nga ilang isulti?

Kakugi diha sa akong kinabuhi

Ikonsiderar ang pagpakita sa mga pamahayag bahin sa personal nga kakugi nga gipamalandongan sa mga estudyante sa unang bahin sa leksiyon. Gibati tingali sa mga estudyante nga nadasig sila sa Espiritu nga magpunting sa usa ka pamahayag kay sa ubang pahayag. Dapita ang mga estudyante nga hunahunaon ang maong pamahayag samtang ilang isulat ang ilang mga tubag sa mosunod nga mga pangutana diha sa ilang mga journal sa pagtuon.

• Unsa nga mga kausaban ang akong mahimo aron mahimong mas kugihan?

• Sa unsang paagi nga ang kakugi mas moandam nako nga mopakigbahin sa ebanghelyo ni Jesukristo isip full-time nga misyonaryo ug diha sa akong inadlaw-adlaw nga pagkinabuhi?

• Sa unsang paagi makatabang nako ang kakugi aron mahimong mas sama sa Manluluwas?

Samtang irekord sa mga estudyante ang ilang mga tubag, dasiga sila nga dili magduhaduha sa pagplano sa paghimo og usa ka butang nga makapahagit kanila ug magkinahanglan og kanunay nga pagpaningkamot ug kakugi.

Dugang nga mga Kapanguhaan

Nganong ang misyonaryo nga buhat nagkinahanglan sa atong makugihong mga paningkamot?

Si Elder Jeffrey R. Holland sa Korum sa Napulog Duha ka Apostoles mipasabot:

Bisan kinsa nga naghimo og bisan unsang matang sa misyonaryo nga buhat makapangutana usahay, Nganong lisod man kaayo kini? Nganong dili man ni moarang-arang? Nganong dili man mas paspas ang atong kalamposan? Nganong daghan man ang dili mopasakop sa Simbahan?… Nganong dili na lang man gyod magtapok ang mga tawo sa bunyaganan? Nganong dili man lang pulmonya ang atubangon nga kapeligrohan sa misyonaryo nga buhat gikan sa tibuok adlaw ug tibuok gabii nga pagkahumol diha sa bunyaganan?

Makasukna ka usahay sa maong mga pangutana. Naghunahuna ko mahitungod niini sa makadaghan. Gitanyag nako isip akong personal nga pagbati. Kombinsido ko nga ang misyonaryo nga buhat dili sayon tungod kay ang kaluwasan dili yano nga kasinatian. Ang kaluwasan dili gayod sayon. Kita ang Simbahan ni Jesukristo, kini ang kamatuoran, ug Siya ang atong Halangdon nga Mahangtorong Pangulo. Unsaon man nato sa pagtuo nga mahimo kining sayon alang kanato nga dili man gayod kadto sayon alang kaniya? Morag maayo alang nako nga ang mga misyonaryo ug mga lider sa misyon kinahanglang mogahin og pipila ka gutlo didto sa Getsemani. Ang mga misyonaryo ug mga lider sa misyon kinahanglang molakaw og dili mominus sa usa o duha ka lakang paingon sa tumoy sa Kalbaryo. (Jeffrey R. Holland, “Missionary Work and the Atonement,” Ensign, Mar. 2001, 14–15)

Unsaon nako nga mahimong usa ka malamposong misyonaryo?

Si Presidente Ezra Taft Benson (1899–1994) mitudlo:

Usa sa labing dakong sekreto sa misyonaryo nga buhat mao ang trabaho. Kon ang usa ka misyonaryo magtrabaho, makabaton siya sa Espiritu; kon makabaton siya sa Espiritu, magtudlo siya pinaagi sa Espiritu; ug kon magtudlo siya pinaagi sa Espiritu, matandog niya ang mga kasingkasing sa mga tawo ug magmalipayon siya. … Trabaho, trabaho, trabaho—walay lain pang makatagbaw nga hulip, ilabi na sa misyonaryo nga buhat. (Mga Pagtulun-an sa mga Presidente sa Simbahan: Ezra Taft Benson [2014], 340)

Unsay ipasabot nga mahimong kugihan nga misyonaryo?

Gipakigbahin ni Brother Craig B. Ballard ang gihatag nga tambag sa iyang amahan, si Presidente M. Russell Ballard sa Korum sa Napulog Duha ka Apostoles, dihang siya usa pa ka batan-ong misyonaryo:

Sunda kanunay ang mga balaod, pagkugi ug padayon sa pagpaningkamot. Kon mareport nimo sa Ginoo diha sa imong mga pag-ampo kada gabii sa dili pa ka matulog nga gihimo nimo ang imong labing maayo aron magmasulundon ug makugihon ug magtrabaho og maayo mabati nimo ang Iyang gugma ug pagdawat sa imong mga paningkamot. Samtang himoon na nimo kada adlaw sa katibuk-an sa imong misyon, mailhan ug higugmaon nimo ang imong Manluluwas nga wala pa sukad. (M. Russell Ballard, sa Craig B. Ballard, “What President M. Russell Ballard Taught His Son about Being a ‘Diligent Missionary,’” Church News, Apr. 21, 2021, thechurchnews.com)

Dugang nga mga Kalihokan sa Pagkat-on

Mga istorya sa misyonaryo

Aron tabangan ang mga estudyante nga makakita kon sa unsang paagi ang kakugi ug paglahutay nakaapektar sa mga misyonaryo sa tibuok kalibotan, pwede nimong ipakigbahin ang mosunod nga mga istorya. Pwedeng ilhon sa mga estudyante kon sa unsang paagi ang mga hiyas nga kakugi ug paglahutay nagpanalangin sa mga misyonaryo samtang ilang gihimo ang buhat sa Ginoo.

• Ang kakugi ni Elizabeth McCune nakaamot sa desisyon sa Unang Kapanguluhan niadtong Marso 11, 1898 nga motawag og sister nga mga misyonaryo. Basaha ang “Naadto Unta Nako ang Tanang Balay” (Ago. 24, 2018, history.ChurchofJesusChrist.org), o tan-awa ang “Kining Dako nga Kahigayonan: Si Elizabeth McCune ug ang Unang Sister nga mga Misyonaryo.”

• Gipakigbahin ni Elder Ulisses Soares sa Kurom sa Napulog Duha ka Apostoles kon sa unsang paagi magpabiling kugihan ang usa ka misyonaryo diha sa misyonaryo nga buhat bisan og nahibaloan niya nga namatay ang iyang igsoong babaye (tan-awa sa Ulisses Soares, “Salig sa Dios sa Walay Pagduha-duha,” Liahona, Mayo 2017, 35). Ikonsiderar ang pagpasalida sa kinutlo gikan sa “Salig sa Dios sa Walay Pagduha-duha.”

• Si Brother M. Joseph Brough, kinsa nagserbisyo sa Kinatibuk-ang Kapangulohan sa Young Men, mipakigbahin sa unsay nakat-onan sa iyang anak nga babaye bahin sa kakugi ug lisod nga mga butang (tan-awa sa M. Joseph Brough, “Ihangad ang Imong Ulo ug Pagmaya,” Liahona, Nob. 2018, 14). Ikonsiderar ang pagpasalida sa kinutlo gikan sa “Ihangad ang Imong Ulo ug Pagmaya.”

Bidyo

Aron tabangan ang mga estudyante nga masabtan kon sa unsang paagi makatabang ang mga hagit sa kinabuhi sa misyonaryo aron maandam sa umaabot nga mga hagit, ikonsiderar ang pagpasalida sa “Pagkat-on sa Pag-atubang sa Kalisdanan” (2:37). Gipakigbahin ni Elder Jeffrey R. Holland ug Elder Quentin L. Cook sa Korum sa Napulog Duha ka Apostoles ang ilang mga hunahuna bahin niini nga hilisgotan.