Seminary
Pagpangandam sa Misyonaryo: Kinatibuk-ang Pagpasabot

“Pagpangandam sa Misyonaryo: Kinatibuk-ang Pagpasabot,” Manwal sa Magtutudlo sa Seminary sa Doktrina ug mga Pakigsaad (2025)

“Pagpangandam sa Misyonaryo,” Manwal sa Magtutudlo sa Seminary sa Doktrina ug mga Pakigsaad

Pagpangandam sa Misyonaryo

Pagpangandam sa Misyonaryo

Kinatibuk-ang Pagpasabot

Makatabang kita sa pagpundok sa Israel pinaagi sa paghigugma sa uban, pagpaambit sa mensahe ni Jesukristo, ug pagdapit nila nga modangop sa Manluluwas. Ang Dios nagpanalangin sa mga misyonaryo samtang makugihon silang nagserbisyo ug nagtudlo sa mga tawo diha sa ilang mga komunidad ug sa tibuok kalibotan. Gihatag sa Dios ang sa Basahon ni Mormon para sa pagpundok sa ulahing mga adlaw.

Sugyot sa gipaspason: Naay daghang maayo nga opsyon nga ikonsiderar alang sa gipaspason niini nga mga leksiyon. Pananglitan:

  1. Itudlo ang pipila o tanan niini nga mga leksiyon sa kataposan sa tuig sa pag-eskwela dihang giandam na sa mas magulang nga mga estudyante ang ilang mga papeles sa misyon aron isumite.

  2. Itudlo ang pipila niini nga mga leksiyon samtang tun-an ang mga seksiyon sa Doktrina ug mga Pakigsaad nga motabang nato nga mas masabtan ang misyonaryo nga buhat. Ang pipila sa mga sugyot gilista tupad sa piho nga mga leksiyon sa ubos.

Pangandam sa pagtudlo

Ang mosunod nga impormasyon naghatag kanimo og mga ideya kon unsa ang imong gikinahanglan nga andamon daan alang sa matag leksiyon.

Pagpakigbahin sa Ebanghelyo Tungod sa Kristohanong Gugma

Sugyot sa gipaspason: Mahimo nimong ikonsiderar ang pagtudlo niini nga leksiyon sa samang higayon nga imong itudlo ang Doktrina ug mga Pakigsaad 18. Ang mga bersikulo 10–16 nakatabang nato nga masabtan kon sa unsang paagi ang gugma sa Manluluwas modala ngadto sa Iyang tinguha nga modangop ang tanan ngadto Kaniya.

Katuyoan sa leksiyon: Aron tabangan ang mga estudyante nga masabtan kon sa unsang paagi ang ilang gugma para sa Langitnong Amahan, kang Jesukristo, ug sa ubang tawo makadasig nila sa pagpaambit sa ebanghelyo.

  • Pagpangandam sa estudyante: Hatagi ang mga estudyante og kopya sa pamahayag ni Joseph Smith gikan niini nga leksiyon. Dapita silang mangandam sa pagpakigbahin kon sa unsang paagi kini nga pahayag makadasig sa usa ka tawo nga ipaambit ang ebanghelyo ngadto sa uban o sa pagpangandam sa pagserbisyo og full-time nga misyon.

  • Mga hulagway nga ipakita: Batan-on nga nagserbisyo sa lainlaing sitwasyon; usa ka tawo nga nagpaambit sa ebanghelyo

  • Bidyo: “Pakan-a ang Akong mga Karnero” (5:47; tan-awa gikan sa time code nga 2:46 hangtod 4:29)

  • Mga materyal: Mga blangko nga mga piraso sa papel nga magamit sa gagmayng mga grupo

Paghigugma, Pagpakigbahin, ug Pagdapit

Katuyoan sa leksiyon: Aron tabangan ang mga estudyante nga magplano sa pagpakigbahin sa ebanghelyo ni Jesukristo pinaagi sa paggamit sa mga baroganan sa paghigugma, pagpakigbahin, ug pagdapit.

Pagpili sa Pagserbisyo og Misyon

Sugyot sa gipaspason: Pwede nimong ikonsiderar ang pagtudlo niini nga leksiyon sa samang higayon nga imong itudlo ang Doktrina ug mga Pakigsaad 30–36, Bahin 1, nga nagpunting sa mga rason nga gusto sa Ginoo nga ipakigbahin nato ang Iyang ebanghelyo.

Katuyoan sa leksiyon: Aron tabangan ang mga estudyante nga mobati og tinguha sa pagserbisyo sa Ginoo isip Iyang mga misyonaryo.

  • Pagpangandam sa estudyante: Dapita ang mga estudyante nga makig-istorya sa usa ka tawo nga nagserbisyo og usa ka pangsangyaw o pangserbisyo nga misyon. Pwedeng hangyoon sa mga estudyante ang tawo sa pagpakigbahin sa lainlaing paagi nga gipanalanginan siya sa Ginoo ug ang uban sa tibuok nilang misyonaryo nga pagserbisyo.

  • Mga materyal: Mga pananglitan sa mga asaynment sa misyon diha sa gagmayng papel sulod sa basket; mga kopya sa unang pahayag ni Presidente Russell M. Nelson nga hisgotan sa mga managkompanyon

  • Handout: “Ang mga Panalangin sa Misyonaryo nga Pagserbisyo”

  • Bidyo: “Bili sa usa ka Full-Time nga Misyon” (5:22)

Ang Basahon ni Mormon Maoy Himan sa Pagkakabig

Sugyot sa gipaspason: Pwede nimong ikonsiderar ang pagtudlo niini nga leksiyon sa samang higayon nga imong itudlo ang leksiyon sa “Doktrina ug mga Pakigsaad 84:49–102.” Gitabangan ta sa bersikulo 54–57 nga masabtan ang kaimportante sa dili pagbalewala sa Basahon ni Mormon.

Katuyoan sa leksiyon: Aron matabangan ang mga estudyante nga mabati ang kaimportante sa pagpalig-on sa ilang pagpamatuod sa Basahon ni Mormon agig pagpangandam sa pagpakigbahin sa ebanghelyo sa Manluluwas.

  • Pagpangandam sa estudyante: Dapita ang mga estudyante sa paghangyo sa usa ka sakop sa pamilya o sinaligan nga ipakigbahin kon sa unsang paagi nila unang naangkon ang pagpamatuod sa Basahon ni Mormon. Hangyoa ang mga estudyante nga mobati nga komportable sa paghimo niini nga ipakigbahin usab ang kaugalingon nilang kasinatian sa pag-angkon og pagpamatuod sa Basahon ni Mormon.

  • Mga materyal: Ipakita ang pipila ka yanong mga himan (o mga imahe niini)

  • Mga bidyo: “Istorya sa Basahon ni Mormon” (5:15); “Ang Basahon ni Mormon” (2:10)

Kakugi diha sa Misyonaryo nga Buhat

Sugyot sa gipaspason: Pwede nimong ikonsiderar ang pagtudlo niini nga leksiyon sa samang higayon nga imong itudlo ang leksiyon sa “Doktrina ug mga Pakigsaad 4.” Ang bersikulo 6 nagpakita nga ang kakugi usa ka Kristohanon nga kinaiya niadtong nagtinguha nga motabang sa buluhaton sa Ginoo.

Katuyoan sa leksiyon: Aron tabangan ang mga estudyante nga magtinguha sa tabang sa Ginoo nga mas magkugi sa ilang kinabuhi ug sa ilang pagpangandam sa pagserbisyo isip Iyang mga misyonaryo.

  • Pagpangandam sa estudyante: Dapita ang mga estudyante sa pagpamalandong kon sa unsang paagi ang mosunod nga kahulogan sa kakugi naghulagway kang Jesukristo. Pwede sab nilang ilhon ang mga asoy gikan sa Iyang kinabuhi diin Iyang gipakita ang kakugi.

Ang kakugi usa ka “makanunayon, maisogon nga paningkamot, ilabi na diha sa pagserbisyo sa Ginoo ug sa pagsunod sa Iyang pulong.” (Giya ngadto sa mga Kasulatan, “Kakugi,” scriptures.ChurchofJesusChrist.org).