Leksyon 14: Doktrina ug mga Pakigsaad 3-5

Doktrina ug mga Pakigsaad 4

Pag-alagad sama sa Ginoo

Si Joseph Smith Sr. gustong makahibalo kon sa unsang paagi siya makaserbisyo sa Dios ug sa uban. Agig tubag sa tinguha sa iyang amahan, si Propeta Joseph Smith nagtinguha ug nakadawat sa una sa pipila ka mga pagpadayag nga gihatag ngadto sa mga indibidwal kinsa nagtinguha sa pagtabang sa buhat sa Ginoo (tan-awa usab sa Doktrina ug mga Pakigsaad 11–12; 14–16; 25). Kini nga leksiyon makatabang sa mga estudyante sa pag-alagad sa Dios ug sa uban sa Kristohanong mga paagi.

Posibleng mga Kalihokan sa Pagkat-on

Pag-alagad sama sa Manluluwas

Ikonsiderar ang pagsugod sa klase pinaagi sa usa ka kalihokan nga makatabang sa mga estudyante sa pagpamalandong sa ilang kinaiya mahitungod sa pag-alagad sa Dios ug sa uban sa Kristohanong mga paagi. Ang mosunod maoy usa ka pananglitan.

Handurawa ang usa ka tawo nga nagbuhat sa usa sa mosunod nga mga buhat sa pag-alagad alang kanimo:

• Nakig-istorya kanimo aron mangumusta

• Mitabang kanimo sa usa ka buluhaton nga kinahanglan nimong buhaton

• Nag-ampo alang kanimo

Unsa kaha ang epekto niini kanimo kon sila nag-alagad sa mosunod nga mga paagi? Ngano man?

• Kinasingkasing o dili kaayo kinasingkasing

• Mapailobon o walay pasensiya

• Nadasig gumikan sa gugma alang kanimo o sa laing butang

Karon handurawa ang Manluluwas nga nagbuhat niana nga pag-alagad alang kanimo. Sa unsang paagi kaha Niya himoon kini ug unsa kaha ang epekto niini?

Niini nga leksiyon, imong tun-an ang mahitungod sa pag-alagad ug sa Kristohanong mga hiyas nga gusto sa Ginoo nga atong tinguhaon samtang kita nag-alagad. Samtang magtuon ka, pamalandongi ang imong kaugalingong mga tinguha sa pag-alagad ug kon nganong gusto nimong maningkamot nga maangkon kini nga mga hiyas.

Pagtubag sa pangutana ni Joseph Smith Sr.

Bisan og wala pa siya nakig-uban sa bisan unsang organisado nga relihiyon, si Joseph Smith Sr. mituo sa unsay gipakigbahin sa iyang anak mahitungod sa iyang langitnong mga panan-awon ug misuporta kaniya sa iyang paghubad sa Basahon ni Mormon. Si Joseph Sr. gustong moalagad sa Dios apan wala mahibalo kon unsay buhaton. Niadtong Pebrero 1829, siya ug ang iyang asawa mibisita ni Joseph Jr. sa Harmony, Pennsylvania. Atol niana nga pagbisita, nadawat ni Propeta Joseph ang Doktrina ug mga Pakigsaad 4 agig tubag sa pangutana sa iyang amahan.

Basaha ang Doktrina ug mga Pakigsaad 4:1–4, mangita sa unsay gitudlo sa Ginoo mahitungod sa (1) kon unsaon nato pag-alagad Kaniya ug (2) kon ngano nga kita kinahanglan nga moalagad Kaniya. Mahimong makatabang ang pagkahibalo nga sa bersikulo 4, gitandi sa Ginoo ang trigo nga andam nang anihon ngadto sa mga tawo nga andam sa pagdawat sa ebanghelyo. Ang sanggot usa ka himan alang sa pag-ani.

Ikonsiderar ang pagdapit sa mga estudyante sa paggamit og nagkalainlaing mga paagi sa pagmarka sa kon unsaon ug kon ngano nga kita nag-alagad. Pananglitan, mahimo nilang badlisan kon unsaon pag-alagad sa Dios ug linginan kon nganong kinahanglan kitang moalagad Kaniya. O mahimo silang mogamit og nagkalainlaing mga kolor. Mahimong itandi dayon sa mga estudyante ang ilang gimarkahan ngadto sa kauban o diha sa gamay nga grupo.

• Unsay imong nakaplagan?

  Ikonsiderar ang paghimo og duha ka kolum diha sa pisara nga giulohan og Unsaon ug Ngano. Mahimo nimong dapiton ang mga estudyante sa pagsulat diha sa pisara sa unsay ilang nakit-an sa angay nga kolum. Mahimo nimong ikonsiderar ang pagsulat sa mga pulong nga kasingkasing, gahom, hunahuna, ug kusog diha sa pisara ug mangutana sa mga estudyante kon unsay ilang gihunahuna nga sama sa unsa kaha kini makita nga ang usa ka tawo nga moalagad nga aduna sa “tanan” sa matag usa niini.

• Unsa nga mga panalangin ang anaa niini nga mga bersikulo alang niadtong kinsa nag-alagad sa Dios sa tibuok nilang kasingkasing, gahom, hunahuna, ug kusog?

Human sa pagtudlo mahitungod sa mga panalangin sa pag-alagad sa Dios uban sa tibuok natong kasingkasing, gahom, hunahuna, ug kusog, gilista sa Ginoo ang daghang mga hiyas nga makatabang kanato samtang kita nag-alagad. Si Jesukristo aduna sa matag usa niini nga mga hiyas ug nagdapit kanato sa pagpalambo niini diha sa atong kaugalingong mga kinabuhi. Samtang ato kining buhaton, mas mahisama kita Kaniya ug makaalagad sama sa Iyang pag-alagad.

Basaha ang Doktrina ug mga Pakigsaad 4:5–6, mangita sa mga hiyas nga gusto sa Ginoo nga atong mapalambo samtang kita nag-alagad.

Ipasabot nga kini nga mga hiyas mao ang kon unsaon nato sa pag-alagad ug mahimong markahan sa samang paagi sa unsaon nga mga panabot diha sa mga bersikulo 1–4. Mahimong idugang sa mga estudyante kini nga mga hiyas diha sa pisara sa katugbang nga kolum.

• Unsaon kaha nimo pagpamubo ang mga pagtulun-an niini nga seksiyon ngadto sa usa ka kapahayag?

Usa ka baroganan nga atong makat-onan gikan niini nga seksiyon mao nga samtang kita nag-alagad nga adunay Kristohanong mga hiyas, kita mobarog nga walay mansa sa atubangan sa Dios ug magdala og kaluwasan sa atong mga kalag.

Pagsabot sa Kristohanong mga hiyas

Ikonsiderar ang pagpangutana kon unsa nga mga hiyas ang wala masabti sa mga estudyante. Dapita ang mga estudyante sa pagpangita sa mahinungdanong mga pulong diha sa Giya ngadto sa mga Kasulatan, o mga pakigpulong sa kinatibuk-ang komperensiya. Ang diksyonaryo o ang pagpangita diha sa Gospel Library nga app mahimong mapuslanon usab.

Dapita ang mga estudyante sa pagpakigbahin kon hain nga Kristohanong mga hiyas diha sa Doktrina ug mga Pakigsaad 4 ang ilang gibati nga kasagarang mabatonan sa mga tin-edyer. Ikonsiderar ang pagpangutana kon hain nga mga hiyas ang tingali mas talagsa ra ug kon ngano. (Mahimo nimong pangutan-on kon hain ang gihisgotan sa makaduha diha sa seksiyon 4 ug sa ilang hunahuna ngano nga naingon man niana.) Mahimong ipakigbahin sa mga estudyante kon sa unsang paagi nila nakita kini nga Kristohanong mga hiyas diha sa ilang mga klasmeyt. Kini makadugang sa panaghiusa sa klase ug makadasig sa uban sa pagpalambo og Kristohanong mga hiyas.

Tinguhaa ang giya sa Espiritu Santo sa pagpili og Kristohanong hiyas nga labing makahuloganon nga imong tun-an. Isulat kini sa ibabaw sa usa ka pahina diha sa imong journal sa pagtuon. Ubos sa hiyas nga imong gipili, isulat ang mosunod.

1. Mga Pananglitan: Pamalandongi kon giunsa pagpakita sa Manluluwas kini nga hiyas sa karaang-panahon o sa imong kinabuhi karon. Kon mogamit og ehemplo sa kasulatan, sulayi sa pagsulat og piho nga istorya o pakisayran. (Ang Giya ngadto sa mga Kasulatan mahimong mapuslanon na usab.) Mahimo usab kang mosulat og modernong-adlaw nga ehemplo sa usa ka tawo nga nag-alagad nga aduna niini nga hiyas ug sa unsang paagi kini nakahimo og kalainan.

2. Unsa ang atong mahimo: Paglista og usa o duha ka mga lakang nga imong mahimo aron mas mapalambo kini nga hiyas diha sa imong kinabuhi. Alang sa mga ideya, basaha pag-usab ang Doktrina ug mga Pakigsaad 4:7, pangayo og tambag pinaagi sa pag-text o pagpangutana sa usa ka tawo nga imong gibati nga anaa niining Kristohanong hiyas.

Dapita ang pipila ka mga estudyante sa pagpakigbahin sa ilang mga hunahuna. Samtang sila mopakigbahin, ikonsiderar ang pagpangutana kon aduna bay uban nga mipili sa samang hiyas ug gustong mopakigbahin sa ilang mga hunahuna. Ipakigbahin usab ang imong kaugalingon nga mga hunahuna. Mahimong usa kini ka dakong kahigayonan nga mas masabtan ang nagkalainlaing Kristohanong mga hiyas ug mobati sa kamahinungdanon niini. Pangita og mga paagi sa paghatag og gibug-aton sa ehemplo sa Manluluwas.

Pagpalambo sa Kristohanong mga hiyas

Sa pagtapos niini nga leksiyon, paghimo og plano nga adunay usa o duha ka mga lakang nga imong mahimo aron makapalambo og Kristohanong kinaiya nga imong gitun-an karon. Mahimo nimong iapil ang mga paagi sa pagtinguha og tabang sa Ginoo samtang nagpalambo niini nga hiyas.

Mahimong mapuslanon ang pagdapit sa mga estudyante sa pagrekord sa ilang tumong diha sa ilang journal sa pagtuon o sa Personal nga Kalamboan: Giya nga Basahon sa Kabatan-onan. Sa umaabot nga leksiyon, hangyoa ang mga estudyante sa pagreport kon kumusta sila sa ilang gibuhat. Ikonsiderar ang paghimo og personal nga tumong ug ipakigbahin sa imong mga estudyante kon giunsa nimo pagtinguha ang tabang sa Ginoo.

Dugang nga mga Kapanguhaan

Asa ako makakat-on og dugang mahitungod ni Joseph Smith Sr.?

Ang mosunod nga mga kapanguhaan mahimong makatabang:

• Mga Hisgotanan sa Kasaysayan sa Simbahan, “Joseph Smith Sr.,” ChurchofJesusChrist.org/study/history/topics

• Mga Hisgotanan sa Kasaysayan sa Simbahan, “Pamilya ni Joseph Sr. ug Lucy Mack Smith,” ChurchofJesusChrist.org/study/history/topics

• “Joseph Smith Sr.“ (sulat diha sa biograpiya), sa Joseph Smith Papers, josephsmithpapers.org/person/joseph-smith-sr

• “The Joseph Smith Sr. Family,” Mga Impresyon sa Kaniadto (serye sa audio), ChurchofJesusChrist.org

Sa unsang paagi gituman ni Joseph Smith Sr. ang pagpadayag ug nag-alagad?

Si Joseph Smith Sr. nagpadayon sa pag-alagad sa Kristohanong mga paagi sa tibuok niyang kinabuhi. Wala madugay human niini nga pagpadayag, iyang gipakigbahin ang ebanghelyo ngadto ni Oliver Cowdery. Nagpadayon si Joseph Sr. sa pagsuporta sa iyang anak ug nabunyagan ngadto sa Simbahan sa wala madugay human kini matukod. Nahimo usab siyang usa sa Walo ka mga Saksi sa Basahon ni Mormon. Nagtrabaho si Joseph Sr. sa Templo sa Kirtland ug mialagad sa nagkalainlaing mga tawag, lakip ang Patriyarka ug kaabag nga magtatambag sa Unang Kapangulohan. Sa edad nga 63, mialagad siya og usa ka misyon sa Sidlakang Estados Unidos.

Nganong kinahanglan nga moalagad ako sa Dios?

Si Elder David A. Bednar sa Korum sa Napulog Duha ka Apostoles mitudlo:

Ang pagserbisyo Kaniya nagkinahanglan sa bug-os natong kasingkasing, gahom, hunahuna, ug kusog. Isip sangpotanan, ang dili hinakog nga pagserbisyo sa uban mobuntog sa pagsentro lang sa kaugalingon ug mga pagkahakog sa kinaiyanhon nga tawo. Magkadako ang atong gugma sa atong giserbisyohan. Ug tungod kay ang pagserbisyo sa uban pagserbisyo man sa Dios, modako ang atong paghigugma Kaniya ug sa atong mga kaigsoonan. Ang ingon niana nga gugma usa ka pagpakita sa espirituhanong gasa sa gugmang putli, gani ang tiunay nga gugma ni Kristo. (David A. Bednar, ““Kon Nakaila Pa Kamo Kanako”,” Liahona, Nob. 2016, 104)

Nganong kinahanglan nakong tun-an ang Doktrina ug mga Pakigsaad 4?

Si Presidente Joseph Fielding Smith (1876–1972) misulat:

Ang [Doktrina ug mga Pakigsaad 4] mubo ra kaayo, pito lamang ka mga bersikulo, apan kini adunay igong tambag ug panudlo alang sa tibuok kinabuhi nga pagtuon. Wala pay nahimong hanas niini. Wala kini gituyo isip usa ka personal nga pagpadayag ngadto ni Joseph Smith [Sr.], apan aron makahatag og kaayohan sa tanan kinsa nagtinguha sa pagsugod sa pag-alagad sa Dios. Kini usa ka pagpadayag sa matag miyembro sa Simbahan. … Tingali wala nay laing pagpadayag sa tanan natong mga kasulatan nga naglangkob og mas mahinungdanong panudlo kalabot sa paagi sa kuwalipikasyon sa mga miyembro sa Simbahan alang sa pag-alagad sa Dios, ug sa ingon ka pinamubo nga porma kay sa niini nga pagpadayag. Kini sama ka lapad, ingon ka taas ug sama ka lawom sa kahangtoran. Walay elder [o sister] sa Simbahan ang kuwalipikado sa pagtudlo diha sa Simbahan, o pagdala sa mensahe sa Kaluwasan ngadto sa kalibotan, hangtod iyang masabtan, bisag bahin lang, niining pinadala sa langit nga panudlo. (Joseph Fielding Smith, Church History and Modern Revelation [1953], 1:35)

Unsaon nako pagpalambo og Kristohanong mga hiyas?

Ikonsiderar ang pagtan-aw o pagbasa sa “Pagkahimong sama Kaniya” ni Scott D. Whiting sa Seventy (Liahona, Nob. 2020, 12–15).

Dugang nga mga Kalihokan sa Pagkat-on

Alternatibo nga mga pagsugod

Ikonsiderar ang pagsugod sa klase pinaagi sa pagdapit sa mga estudyante sa pagpiyong sa ilang mga mata ug paghanduraw kon unsa kaha kon ang Manluluwas nga si Jesukristo mopuyo sa ilang siyudad. Unsaon kaha Niya paglihok? Unsaon kaha Niya pagtagad ang uban? Unsa kaha ang Iyang buhaton?

Human ipakigbahin sa mga estudyante ang pipila sa ilang mga hunahuna, dapita sila sa pagbinayloay og ideya [brainstorm] sa pipila ka mga paagi nga ang usa ka tawo karon mahimong mosulay sa pag-alagad sa Dios ug sa uban sama sa himoon sa Manluluwas. Samtang magbinayloay og hunahuna ang mga estudyante, mahimo nimo silang pahinumdoman nga ang Manluluwas mialagad ug nakighigala niadtong gitamay o nailhan nga mga makasasala (tan-awa sa Mateo 9:10–11; Juan 8:1–11). Iyang gibayaw ug gigiyahan ang uban aron sa pagtuo ug pagsalig sa Dios sa mas taas nga mga paagi. Iyang giayo ug gipanalanginan ang uban pinaagi sa Iyang mga pulong ug mga buhat. Ikonsiderar ang pagpangutana kon unsa kaha ang epekto niini nga mga binuhatan ug ngano.

Laing paagi sa pagsugod sa klase mao ang pagdapit sa mga estudyante sa pagtubag niini nga pangutana: “Kon makahimo ka og sulundon nga [atleta, musikero, artista, magtutudlo, o kapikas], unsa nga mga kinaiya ang anaa kanila?” Dayon mahimo nga basahon sa mga estudyante ang Doktrina ug mga Pakigsaad 4 mangita kon sa unsang paagi gihulagway ang sulundon nga sulugoon sa Dios.

Aron mobarog nga walay mansa sa atubangan sa Dios

Human sa paghisgot sa bersikulo 2, ikonsiderar ang pagdapit sa mga estudyante sa paghanduraw kon unsa kaha ang bation nga mobarog sa presensiya sa Dios ug mahimong “walay mansa.” Dayon ipangutana ang mosunod: Unsay buot ipasabot sa walay mansa? Sa inyong hunahuna ngano nga gusto sa Ginoo nga moalagad kamo Kaniya ug sa uban aron mahimong walay mansa? Mahimong mangita ang mga estudyante og mga bersikulo diha sa mga kasulatan nga nagpakita sa kamahinungdanon sa pag-alagad o sa unsang paagi ang Manluluwas nagtabang kanato nga mahimong walay mansa.

Nganong moalagad kita

Ikonsiderar ang pagdapit sa mga estudyante sa pagtan-aw sa mga tubag nga ilang nakaplagan kon nganong kinahanglan kitang moalagad sa Dios. Kon mapuslanon alang sa mga estudyante ang pagtuon sa ubang mga rason kon nganong kita nag-alagad, ikonsiderar ang pagdapit kanila sa pagbasa sa Mateo 25:34–45; Mosiah 2:17; Doktrina ug mga Pakigsaad 76:5; o Dallin H. Oaks, “Why Do We Serve?,” Liahona, Okt. 1984, 12–15. Dapita ang mga estudyante sa pagpakigbahin hain nga mga rason ang labing makapadasig kanila ug ngano.

Ang ehemplo ni Jesukristo

Aron sa paghulagway sa ehemplo sa Manluluwas sa mga hiyas nga makita diha sa Doktrina ug mga Pakigsaad 4, ikonsiderar ang pagtan-aw sa “Christlike Attributes” (2:53). Mahimong ilhon sa mga estudyante ang dugang Kristohanong mga hiyas nga anaa sa bidyo nga dili makita diha sa Doktrina ug mga Pakigsaad 4.