Leksyon 15: Doktrina ug mga Pakigsaad 3-5

Doktrina ug mga Pakigsaad 5

“Ako Nakahibalo sa Pagkatinuod Nga Sila Tinuod”

Ang Ginoo mipasalig pag-usab ni Martin Harris samtang siya nagtinguha og dugang nga ebidensiya nga anaa ni Joseph Smith ang bulawan nga mga palid. Kini nga leksiyon gituyo aron matabangan ang mga estudyante sa pag-ila sa mga saksi nga gihatag sa Ginoo aron matabangan sila nga makaangkon og personal nga pagpamatuod sa Basahon ni Mormon isip laing pagpamatuod ni Jesukristo ug sa tawag ni Joseph Smith isip propeta sa Dios.

Posibleng mga Kalihokan sa Pagkat-on

Problema ni Martin Harris

Hatagi ang mga estudyante og kahigayonan sa pagtimbang-timbang sa ilang mga pagpamatuod sa Basahon ni Mormon ug ni Joseph Smith. Ang pagpamalandong sa mosunod nga senaryo ug mga pangutana makatabang nila nga matuman kini. Mahimong ipakigbahin sa mga estudyante ang pipila sa ilang mga tubag ngadto sa klase.

Mahimo usab nimong ipakita ang “Compelling Witness,” makita sa ChurchofJesusChrist.org, gikan sa time code 0:00 hangtod sa 0:37.

Handurawa nga adunay gipahigayon nga bista sa pagsuta kon tinuod ba nga anaa sa mga kamot ni Joseph Smith ang bulawan nga mga palid.

• Unsa ka komportable kaha ang imong bation nga mopamatuod sa Basahon ni Mormon isip pulong sa Dios ug kang Joseph Smith isip Propeta sa Pagpahiuli? Ngano man?

• Unsay imong isulti?

• Unsa ang imong ipakita isip ebidensiya sa pagsuporta sa imong kaso?

Ang pagpakigbahin o pagpamubo sa mosunod nga background nga impormasyon makatabang sa mga estudyante nga mas masabtan kon unsaon paggamit ang Doktrina ug mga Pakigsaad 5 sa ilang kaugalingong talagsaon nga mga kahimtang.

Si Lucy Harris, ang asawa ni Martin Harris, nasuko mahitungod sa panahon ug kwarta nga gipahinungod sa iyang bana sa pagmantala sa Basahon ni Mormon. Misang-at siya og legal nga reklamo batok ni Joseph Smith ug mipundok og pipila ka mga tawo kinsa andam nga mopamatuod nga siya namakak mahitungod sa pagkaanaa sa mga palid. Gipasidan-an si Martin nga kon dili siya moapil kanila sa pagpamatuod batok ni Joseph, mahimo usab nga mapriso si Martin. Bisan og si Martin kaniadto pa usa ka tigsulat ni Joseph, mipakita og mga karakter gikan sa mga palid ngadto sa mga eskolar aron sa pagmatuod sa ilang kakaraan, ug nakawagtang sa 116 ka mga pahina sa orihinal nga manuskrito, si Martin nangita gihapon og dugang nga saksi sa katinuod sa bulawan nga mga palid. Mibiyahe siya ngadto sa panimalay ni Joseph Smith, diin si Joseph nangutana sa Ginoo ug nakadawat sa pagpadayag sa Doktrina ug mga Pakigsaad 5.

Samtang magtuon ka sa Doktrina ug mga Pakigsaad 5, tinguhaa ang tabang sa Espiritu Santo aron mokumpirma kon unsay imong nahibaloan na mahitungod ni Joseph Smith ug sa Basahon ni Mormon. Tinguhaa usab ang mga paagi sa pagpalig-on sa imong pagpamatuod ni Jesukristo ug sa Iyang gipahiuli nga Simbahan.

Basaha ang Doktrina ug mga Pakigsaad 5:1–3, mangita kon giunsa pagtubag sa Ginoo si Martin Harris.

• Sa imong hunahuna ngano kaha nga ang Ginoo wala magpamatuod sa katinuod sa Basahon ni Mormon pinaagi sa pagtugot sa mga palid nga mapakita ngadto sa kalibotan?

Bisan tuod si Martin wala tugoti nga makakita sa bulawan nga mga palid nianang higayona, kini nga pagpadayag nakapalig-on kaniya sa paagi nga nakahimo kaniya sa paghatag og gamhanang pagpamatuod sa Propeta. Niini nga leksiyon, imong makita nga ang Ginoo mihatag og mga saksi aron sa pagtabang sa matag usa kanato nga makabaton sa atong kaugalingong pagpamatuod ni Joseph Smith isip propeta sa Dios ug sa Basahon ni Mormon isip laing tugon ni Jesukristo.

Ebidensiya gikan sa Ginoo

Ikonsiderar ang pagbahin sa klase ngadto sa tulo ug pag-assign sa matag usa og nagkalainlaing “saksi” nga pagatun-an sa ilang kaugalingon gamit ang handout sa ubos. Human ang igong panahon, mahimong itandi sa mga estudyante ug hisgotan uban sa ilang grupo kon unsay ilang nakat-onan.

Mahimo usab nimong sulatan ang tulo ka managlahing mga sobre og “Saksi #1,” “Saksi #2,” ug “Saksi #3.” Sudli ang matag sobre og daghang kopya sa katugbang nga bahin sa handout. Iapud-apod kini sa matag grupo aron matun-an.

Mga Saksi

Saksi #1

Ang mga pulong sa Ginoo

Si Joseph Smith gimandoan nga dili ipakita ang bulawan nga mga palid ngadto sa kalibotan (tan-awa sa Doktrina ug mga Pakigsaad 5:3). Basaha ang Doktrina ug mga Pakigsaad 5:6–10, mangita sa unsay gitugot kang Joseph nga ipakigbahin.

Mahimo nimong markahan ang hugpong sa mga pulong nga gisubli sa Ginoo diha sa mga bersikulo 5, 6, ug 7.

• Ngano sa imong hunahuna nga ang Ginoo mas nabalaka mahitungod sa atong pagtuo ug pagpatalinghog sa Iyang mga pulong diha sa Basahon ni Mormon kay sa Siya nabalaka mahitungod sa atong pagkasayod nga ang mga palid anaa?

Nagpasabot sa Basahon ni Mormon, si Presidente Gordon B. Hinckley (1910–2008) mitudlo:

Ang ebidensiya sa kamatuoran niini, alang sa pagkabalido niini sa usa ka kalibotan nga daling mangayo og ebidensiya, wala sa arkeyolohiya o sa antropolohiya, bisan kon kini makatabang sa pipila. Wala kini sa pagpanukiduki sa pulong o pagtuki sa kasaysayan, bisan kon kini mahimong kompirmasyon. … Ang pagsulay sa kamatuoran niini anaa sa pagbasa niini. Kini usa ka basahon sa Dios. (Gordon B. Hinckley, “Four Cornerstones of Faith,” Ensign, Peb. 2004, 6)

Paggahin og pipila ka minuto sa pagpamalandong sa imong kasinatian sa pagtuon ug sa pagkanatudloan gikan sa Basahon ni Mormon. Hunahunaa kon sa unsang paagi ang imong pagtuon nakaapekto sa imong kinabuhi. Mahimo nimong irekord ang pipila sa imong mga hunahuna diha sa imong journal.

Saksi #2

Ang Pagpamatuod sa tulo ka mga sulugoon

Basaha ang Doktrina ug mga Pakigsaad 5:11–15, mangita kon si kinsa ang tugotan sa Ginoo nga makakita sa mga palid.

• Unsa ang imong nakita niini nga mga bersikulo nga makapahimo sa mga pagpamatuod sa Tulo ka mga Saksi nga gamhanan?

Sa wala madugay, si Martin Harris, Oliver Cowdery, ug David Whitmer nakakita sa bulawan nga mga palid ug nagpamatuod sa katinuod niini. Makakat-on ka og dugang pa mahitungod niini nga panghitabo sa higayon nga magtuon ka sa Doktrina ug mga Pakigsaad 17.

Nagpasabot sa Tulo ka mga Saksi, si Presidente Dallin H. Oaks sa Unang Kapangulohan mitudlo:

Ang ilang pagpamatuod wala gisupak sa uban pang mga saksi. Ang usa ka tawo mahimong mosalikway niini, apan unsaon pagpasabot nga ang tulo ka mga tawo nga adunay maayo nga kinaiya naghiusa ug nagpadayon niining gimantala nga pagpamatuod hangtod sa kataposan sa ilang mga kinabuhi nga nag-atubang og dakong pagbiaybiay ug uban pang personal nga kadaot? Sama sa Basahon ni Mormon mismo, walay mas maayo nga pagpasabot kaysa sa gihatag diha sa pagpamatuod mismo, ang ligdong nga pamahayag sa maayo ug matinuoron nga mga tawo kinsa misulti sa unsay ilang nakita. (Dallin H. Oaks, “The Witness: Martin Harris,” Liahona, Mayo 1999, 36)

Ikonsiderar ang pagbasa sa “Ang Pagpamatuod Sa Tulo Ka Mga Saksi” anaa sa sinugdanan sa Basahon ni Mormon o paghimo og lista sa mga tawo kinsa mipamatuod diha kanimo nga ang Basahon ni Mormon tinuod. Hunahunaa kon sa unsang paagi ang ilang pagpamatuod nakapalig-on sa imohang pagpamatuod.

Saksi #3

Ang Espiritu Santo

Basaha ang Doktrina ug mga Pakigsaad 5:16 ug ang Moroni 10:4–5. Ilha kon giunsa pagpadayag sa Dios ang katinuod sa Basahon ni Mormon ngadto sa Iyang mga anak.

• Unsa ang pipila ka mga paagi nga ang Espiritu mahimong magpamatuod ngadto sa usa ka tawo sa katinuod sa Basahon ni Mormon?

Si Glenn L. Pace, kinsa nag-alagad isip Presiding Bishop, miingon:

Walay laing paagi sa pag-angkon og pagpamatuod kondili pinaagi sa pagsaksi sa Espiritu Santo. Wala na kay laing masaligan. … Daghan kita og mga ehemplo sa kasulatan kon unsa ka walay pulos ang pisikal nga pagpakita nga walay kauban ngapagdawat sa pagsaksi sa Espiritu Santo. Ang pagkakabig dili moabot pinaagi sa pisikal nga mga pagpakita gikan sa langit. (Glenn L. Pace, “The Elusive Balance,” New Era, Mar. 1989, 49)

Paghimo og lista sa mga rason kon nganong sa imong hunahuna ang pagsaksi gikan sa Espiritu Santo, usa ka miyembro sa Dios nga Kapangulohan, mas importante kay sa pisikal nga ebidensiya nga ang usa ka butang tinuod. Ikonsiderar ang paglakip sa bisan unsang mga saksi nga imong gibati nga imong nadawat pinaagi sa Espiritu Santo nga ang Basahon ni Mormon tinuod.

Kon mahuman na ang mga estudyante sa pagtuon ug paghisgot sa gi-assign kanila nga saksi, dapita sila sa pagpili og usa o subra sa usa ka mga representante gikan sa ilang grupo aron sa pagpresentar sa mosunod nga impormasyon ngadto sa klase:

• Ipasabot ang pagsaksi nga gihatag sa Ginoo nga imong gitun-an uban sa imong grupo.

• Ipakigbahin ang mga ehemplo gikan sa mga lista nga gihimo sa mga miyembro sa imong grupo.

Mahimo nimong dapiton ang tanang estudyante sa pagdugang sa ilang mga panabot ug pagpamatuod sa unsay gipakigbahin sa ilang mga klasmeyt.

Mahimo nimong tan-awon ang nahabilin sa bidyo nga “Compelling Witness” gikan sa time code 0:37 hangtod sa 7:46.

Human sa pagpadayag sa Doktrina ug mga Pakigsaad 5, si Martin maisogon nga mipamatuod sa korte sa kinaiya ni Joseph Smith ug sa katinuod sa bulawan nga mga palid. Human madungog ang pagpamatuod ni Martin ug sa uban pa, gibasura sa huwes ang kaso batok kang Joseph Smith.

Ipakigbahin ang imong mga hunahuna ug pagpamatuod sa mga kamatuoran niini nga leksiyon.

Dugang nga mga Kapanguhaan

Unsay nahitabo sa kaso sa korte?

Sa korte, nagkalainlaing mga saksi ang nagkasumpaki sa usag usa samtang sila mihatag og sayop nga pagpamatuod batok kang Joseph Smith. Sama pananglit, sila miingon nga si Joseph Smith walay mga palid apan ang kahon diin siya miangkon nga nahimutangan niini napuno sa balas, tingga, o wala gayod. Sila nangangkon usab nga kining tanan usa ka limbong aron makakuha og kwarta gikan ni Martin Harris. Dayon si Martin “mipamatuod nga adunay kaisog, desisyon, ug kusog.” Siya miingon, “Ako makapanumpa, nga si Joseph Smith wala gayod makakuha og usa ka dolyar gikan kanako pinaagi sa pagdani, kay ang Dios ang nagpabuhat niini kanako. Ug mahitungod sa mga palid nga iyang giangkon nga anaa kaniya, mga ginoo [gentlemen] , kon kamo dili motuo niini, apan magpadayon sa pagsukol sa kamatuoran, kini usa ka adlaw mahimo nga paagi sa pagpanghimaraot sa inyong mga kalag” (Lucy Mack Smith, Biographical Sketches [1853], gikutlo sa Larry E. Morris, A Documentary History of the Book of Mormon [2019], 296–97).

Unsaon nako sa paggamit ang mga pulong sa Basahon ni Mormon ug sa Espiritu Santo aron matabangan ko nga makabaton og pagpamatuod sa katinuod sa Basahon ni Mormon?

Si Brother Tad R. Callister, kanhi Kinatibuk-ang Presidente sa Sunday School, mipakigbahin sa mosunod nga istorya:

Usa sa akong suod ug utokan nga mga higala ang mibiya sa Simbahan sa usa ka panahon. Bag-ohay lang siya nga misulat nako bahin sa iyang pagbalik: “Sa sinugdanan, ganahan ko nga ang Basahon ni Mormon mapamatud-an ngari nako sa historikal, sa heyograpikal, sa pinulongan, ug sa kultural nga paagi. Apan sa dihang giusab nako ang akong pagpunting ngadto sa unsay gitudlo niini mahitungod sa ebanghelyo ni Jesukristo ug sa Iyang makaluwas nga misyon, nagsugod ko pagbaton og pagpamatuod sa katinuod niini. Usa ka adlaw samtang nagbasa sa Basahon ni Mormon sa akong kwarto, mihunong ko kadali, miluhod, ug mihatag og kinasingkasing nga pag-ampo ug klarong mibati nga ang Langitnong Amahan mihunghong sa akong espiritu nga ang Simbahan ug ang Basahon ni Mormon tinuod gayod. Ang akong tulo ka tuig og tunga nga pag-imbestigar pag-usab sa Simbahan midala nako pabalik sa hingpit ug sa makapakumbinser nga paagi ngadto sa kamatuoran niini.”

Kon ang usa ka tawo mogahin og panahon nga mapaubsanong mobasa ug mamalandong sa Basahon ni Mormon, sama sa gihimo sa akong higala, ug maminaw sa malumong mga bunga sa Espiritu, nan siya sa kataposan makadawat sa gitinguha nga pagsaksi. (Tad R. Callister, “Gamhanang Saksi sa Dios: Ang Basahon ni Mormon,” Liahona, Nob. 2017, 109)

Ngano nga mas makahuloganon ang pagpadayag sa Espiritu [manifestation of the Spirit] kay sa pisikal nga ebidensiya?

Dili lamang kay gusto sa atong Langitnong Amahan nga kita makakat-on; Gusto Niya nga kita mausab ug mahimong mas mahisama Kaniya ug sa Iyang Anak. Ang pagdawat og espirituhanong pagsaksi adunay makapausab nga epekto sa magtotuo. Usa kini ka rason kon ngano nga dili igo nga makakita lang sa mga palid. Ang proseso sa pagbasa sa Basahon ni Mormon, pagtuo sa mga pulong, ug pagdawat og espirituhanong pagpadayag [manifestation] sa kamatuoran maoy hinungdan sa kausaban—usa ka espirituhanong pagkatawo pag-usab— sa magbabasa (tan-awa sa Doktrina ug mga Pakigsaad 5:16).

Dugang nga mga Kalihokan sa Pagkat-on

Dugang pagsabot

Samtang magtuon ang mga estudyante sa ilang handout, mahimo nimong dasigon sila sa paggamit sa mga footnote ug sa Gospel Library sa pagpangita og dugang nga mga kasulatan o mga pamahayag gikan sa kinatibuk-ang komperensiya aron madugangan ang ilang pagsabot sa saksi nga ilang gitun-an. Samtang nagpresentar sila sa klase, mahimo nilang ipakigbahin ang pipila niining dugang nga mga pakisayran.

“Akong sulugoon Joseph”

Mahimong makabenepisyo ang mga estudyante gikan sa pagtutok sa mga bersikulo nga nagpadayag kon giunsa paghulagway ni Jesukristo si Joseph Smith. Dapita sila sa pagbasa sa Doktrina ug mga Pakigsaad 5:1–10, 21–22, ug 33–35 ug sa pagkonsiderar kon unsay gipadayag niini nga mga bersikulo mahitungod sa mga pagbati sa Manluluwas ngadto ni Joseph Smith.

Ipaubos ang imong kaugalingon

Si Martin Harris gihatagan og dugang nga instruksiyon sa pag-andam sa iyang kaugalingon nga mahimong usa sa Tulo ka mga Saksi sa bulawan nga mga palid. Basaha ang mga bersikulo 24 ug 28 uban sa mga estudyante. Hisgoti kon sa unsang paagi kini nga mga panudlo makatabang usab sa atong mga paningkamot sa pag-angkon og personal nga saksi sa Basahon ni Mormon isip laing tugon ni Jesukristo.