Leksiyon 13—“Doktrina ug mga Pakigsaad 3: ‘Ikaw Wala Unta Mahadlok Sa Tawo Labaw Pa Kay Sa Dios,’” Manwal sa Magtutudlo sa Seminary sa Doktrina ug mga Pakigsaad (2025)
“Doktrina ug mga Pakigsaad 3,” Manwal sa Magtutudlo sa Seminary sa Doktrina ug mga Pakigsaad
Leksyon 13: Doktrina ug mga Pakigsaad 3-5
Doktrina ug mga Pakigsaad 3
“Ikaw Wala Unta Mahadlok Sa Tawo Labaw Pa Kay Sa Dios”
Usahay bation nato nga murag napugos sa uban sa pagsupak sa Dios. Si Joseph Smith mibati og susama nga pagkapugos sa dihang mihangyo si Martin Harris sa pagkuha sa gihubad nga mga pahina sa Basahon ni Mormon. Si Joseph nakat-on, hinoon, nga kini ang mga higayon nga kita kinahanglan nga magmatinud-anon sa Dios ug dili magpadala sa pagpugos sa uban. Kini nga leksiyon makatabang sa mga estudyante nga mobati og dugang nga tinguha sa pagsalig sa Dios labaw pa kay sa ubang mga tawo.
Posibleng mga Kalihokan sa Pagkat-on
Ang mga kabug-at [pressures] sa kinabuhi
Sugdi ang klase pinaagi sa pagpakita sa mga estudyante og humok nga butang sama sa usa ka stuff toy [plush toy] o unlan. Sultihi ang mga estudyante nga kini nga butang mahimong magrepresentar kanila. Sa matag tubag nga ilang ihatag sa mosunod nga mga pangutana, pagdapit og usa ka estudyante nga magbutang og libro o bug-at nga butang ibabaw sa humok nga butang. Samtang ang butang mapisat, dapita ang mga estudyante sa pagpamalandong kon gibati ba nila sukad nga nabug-atan sama niini.
-
Unsa nga mga kabug-at [pressure] ang gibati sa mga tin-edyer sa ilang mga kinabuhi?
-
Pila niini nga mga kabug-at ang naggikan sa pagpaningkamot sa pagpahimuot sa uban?
Paggahin og usa ka minuto sa pagpamalandong kon unsa ka dako ang kabug-at [pressure] nga imong gibati aron makapahimuot sa uban ug ngano.
Niini nga leksiyon, imong tun-an kon sa unsang paagi si Propeta Joseph Smith mibati og kabug-at aron mapahimuot si Martin Harris ug kon unsay gitudlo sa Manluluwas kaniya niana nga sitwasyon. Samtang magtuon ka, tinguhaa ang giya sa Espiritu Santo aron makakaplag og mga kamatuoran nga makatabang nimo kon imong bation kini nga kabug-at [pressure].
“Ang tanan nawala”
Ang mosunod mao ang mga ideya aron sa pagtabang sa mga estudyante nga makasabot sa mahinungdanon nga konteksto sa kasaysayan sa ubos:
-
Ihatag ang teksto ngadto sa usa ka estudyante sa dili pa ang klase, ug dapita siya sa pagpamubo niini alang sa tanan.
-
Dapita ang mga estudyante sa pagpakigbahin unsay ilang nahibaloan mahitungod sa nawala nga 116 ka mga pahina gikan sa orihinal nga hubad sa Basahon ni Mormon. Ipasabot ang impormasyon nga wala gipakigbahin sa mga estudyante.
-
Ipakita ang pipila sa mosunod nga teksto nga adunay nawala nga mahinungdanon nga mga pulong, ug tan-awa kon makompleto ba sa mga estudyante ang impormasyon. Tubagi kon unsay wala mahibaloi sa mga estudyante.
-
Ipakita ang bidyo nga “The Work of God [Ang Buhat sa Dios]” (ChurchofJesusChrist.org) gikan sa time code 2:25 hangtod sa 8:45. O mahimo nimong pilion nga ipakita kini nga bidyo sa inyong pagtuon sa Doktrina ug mga Pakigsaad 10.
13:34
Si Martin Harris usa ka tinahod nga lumulupyo sa Palmyra ug malamposon nga mag-uuma kinsa usa sa pipila lamang ka mga tawo sa lugar nga mituo ni Joseph Smith. Bisan og hapit kaduhaon ang iyang edad, si Martin higala ni Joseph ug mihatag kaniya og kwarta aron makabalhin siya ngadto sa Harmony, Pennsylvania, aron sa paghubad sa Basahon ni Mormon nga walay kasamok. Misakripisyo usab si Martin sa pagbiyahe didto sa iyang kaugalingon ug nag-alagad isip tigsulat.
Ang asawa ni Martin, si Lucy, wala mosuporta sa iyang kalambigitan sa paghubad sa Basahon ni Mormon. Gihangyo ni Martin si Joseph kon mahimo ba niyang ipakita ang unang 116 ka mga pahina sa hinubad ngadto kang Lucy isip ebidensiya sa ilang buhat. Si Joseph kaduha nga nag-ampo mahitungod niini ug sa matag higayon gisultihan nga dili tugotan si Martin sa pagkuha sa mga pahina.
Si Joseph nag-ampo sa ikatulong higayon, ug ang Ginoo mihatag og pagtugot nga adunay higpit nga mga kondisyon. Gidala ni Martin ang mga pahina ngadto sa Palmyra aron ipakita kini sa iyang asawa.
-
Sa imong hunahuna ngano kaha nga si Joseph wala mosunod sa unang duha ka mga tubag nga iyang nadawat gikan sa Ginoo?
Mahimo ninyong i-drama-drama [reenact] ang kalihokan gikan sa sinugdanan sa leksiyon aron ipakita ang kabug-at [pressure] nga giatubang ni Joseph.
Sa adlaw human mibiya si Martin, nanganak si Emma Smith sa ilang unang anak ni Joseph, usa ka bata nga lalaki. Subo lang, ang masuso nabuhi lamang og pipila ka oras, ug ingon og si Emma lagmit mamatay usab. Salamat na lang, ang kahimsog ni Emma misugod sa pag-uswag pagkahuman sa pipila ka semana. Bisan og si Joseph dili gustong mobiya sa iyang kiliran, si Emma miawhag kaniya sa pagbiyahe ngadto sa Palmyra ug mangutana mahitungod sa manuskrito.
Sa dihang miabot si Joseph sa panimalay sa iyang mga ginikanan, ilang gidapit si Martin nga moapil kanila sa pamahaw. Wala moabot si Martin kapin na sa upat ka oras. Sa dihang naabot na siya ug milingkod, siya magul-anon nga mituaw, “Wala na ang akong kalag!” Wala niya higpit nga nasunod ang mga sumbanan ug nawala ang manuskrito.
“Oh, Dios ko, Dios ko. Wala na ang tanan!” Si Joseph miingon. “Mobalik ba ko ngadto sa akong asawa nga dala ang ingon ana nga istorya? Ug unsaon nako pag-atubang sa Ginoo?”
Human mibalik si Joseph sa Harmony, mipakita si Moroni ug mikuha sa mga palid gikan kaniya. (Tan-awa sa Mga Santos, 1:55–59.)
-
Sa imong hunahuna ngano kaha nga gibati ni Joseph nga nawala na ang tanan?
Wala madugay human niini nga kasinatian, nakigsulti ang Ginoo ngadto ni Joseph Smith, mipanton kaniya ug mihatag kaniya og mga pulong sa paghupay.
Kahadloki ang Dios labaw pa kay sa tawo
Basaha ang Doktrina ug mga Pakigsaad 3:1–10. Ilha kon unsa ang gusto sa Ginoo nga makat-onan ni Joseph gikan niini nga kasinatian.
Awhaga ang mga estudyante nga maghinay-hinay ug mainampingon sa pagtuon, nga mangita og daghang mga leksyon.
Dapita ang mga tigkat-on sa pagdiskobre sa mga kamatuoran alang sa ilang kaugalingon: Ang mosunod nga pangutana gituyo aron sa pagtabang sa mga estudyante sa pag-ila sa kamatuoran alang sa ilang kaugalingon. Alang sa dugang nga pagbansay sa mga pangutana nga makatabang sa mga tigkat-on sa pagdiskobre sa doktrina ug mga baroganan alang sa ilang kaugalingon, tan-awa ang pagbansay nga giulohan nga “Pagkat-on sa doktrina ni Jesukristo sa imong kaugalingon,” makita sa Pagpalambo sa mga Kahanas sa Magtutudlo.
-
Unsa ang pipila ka mga leksiyon nga imong nakaplagan?
Ang mosunod mao ang mga ehemplo sa mga baroganan nga mahimong makaplagan sa mga estudyante:
-
Ang mga buhat sa Dios dili gayod makawang (tan-awa sa Doktrina ug mga Pakigsaad 3:1). Kon maila sa mga estudyante kini nga kamatuoran, ikonsiderar ang paghangyo kanila sa pagpakigbahin nganong importante kini nga masabtan ug sa unsang paagi kaha tingale kini nakahupay ni Joseph Smith.
-
Ang Ginoo maluluy-on (tan-awa sa Doktrina ug mga Pakigsaad 3:10). Kini naglakip sa higayon nga nagpadala kita sa pagpugos [pressure] sa uban sa pagsupak Kaniya. Kon maila sa mga estudyante kini nga kamatuoran, ikonsiderar ang pagpangutana sama sa mosunod: Sa unsang paagi ang paghinumdom sa kaluoy sa Manluluwas nakatabang ni Propeta Joseph Smith niining higayona? Sa unsang paagi nga ang pagsabot sa Iyang kaluoy makatabang kanato kon kita kinahanglan nga mag-usab?
-
Kon kita mahadlok sa Dios labaw pa kay sa tawo, Siya motabang kanato sa mga panahon sa kasamok (tan-awa sa Doktrina ug mga Pakigsaad 3:7–8). Ang nahibilin sa leksiyon magtutok niini nga baroganan.
Si Elder D. Todd Christofferson sa Korum sa Napulog Duha ka Apostoles mipasabot unsay kahulogan niini nga mahadlok sa Dios:
Adunay daghang mga dapit sa mga kasulatan nga nagtambag sa katawhan nga mahadlok sa Dios. Sa atong panahon kasagaran natong gihubad ang pulong kahadlok isip “pagtahod” o “pagyukbo” o “paghigugma”; sa ato pa, ang pagkahadlok sa Dios nagpasabot sa paghigugma sa Dios o pagtahod Kaniya ug sa Iyang balaod. …
… Kita kinahanglan gayod nga mohigugma ug motahod Kaniya nga kita mahadlok sa pagbuhat sa bisan unsa nga sayop diha sa Iyang panan-aw, bisan unsa ang mga opinyon o pagpugos sa uban. (D. Todd Christofferson, “A Sense of the Sacred” [Fireside sa Sistema sa Edukasyon sa Simbahan alang sa mga young adult, Nob. 7, 2004], 6–7, broadcasts.ChurchofJesusChrist.org)
-
Sa imong kaugalingong mga pulong, unsaon nimo pagpamubo ang gitudlo ni Elder Christofferson mahitungod sa pagkahadlok sa Dios?
Kon kita matinud-anon, ang Dios motabang kanato sa matag panahon sa kalisdanan
Mahimo nimong isulat Ang Ginoo makasuporta kanako sa panahon sa kalisdanan tungod kay Siya … diha sa pisara.
Isulat ang hugpong sa mga pulong Ang Ginoo makasuporta kanako sa panahon sa kalisdanan tungod kay Siya … diha sa imong journal sa pagtuon. Kompletoha kini nga pamahayag pinaagi sa pagbuhat sa usa o sa daghan pa sa mosunod:
-
Paghimo og lista sa tabang ug suporta nga mahatag ni Jesukristo kanimo nga dili mahimo sa ubang mga tawo.
-
Paghimo og lista sa mga panahon sa imong kinabuhi sa dihang mipili ka nga magmatinud-anon sa Ginoo, bisan kon ang uban nagpugos kanimo sa pagsupak Kaniya, ug Siya mihatag og suporta. Mahimo usab nimong gamiton ang mga ehemplo gikan sa mga kasulatan.
Mahimo usab nga ilista sa mga estudyante ang pipila sa ilang mga tubag diha sa pisara. Mahimong magkinahanglan ang mga estudyante og tabang sa pag-ila sa mga asoy sa kasulatan sa Dios nga nagsuporta sa mga indibidwal kinsa nag-atubang og oposisyon apan nagpabilin nga matinud-anon ngadto Kaniya. Mahimo nimo silang hatagan sa mosunod nga mga ehemplo: Si Abinadi nga nakadawat og gahom gikan sa Dios sa paghatod sa Iyang mensahe bisan pa sa mga hulga gikan ni Hari Noah ug sa iyang mga pari (tan-awa sa Mosiah 13:1–3); ang Ginoo nga nagluwas kang Sadrach, Mesach, ug Abed-nego gikan sa nagdilaab nga hudno (tan-awa sa Daniel 3:23–25).
-
Unsa ang imong gisulat mahitungod sa Manluluwas nga imong gibati nga labing makatabang sa paghinumdom kon matental ka sa pagpahimuot sa uban labaw pa kay sa Dios?
Isip resulta niini nga pagpanton, nakat-on si Joseph nga ang Dios motabang kaniya samtang siya mopili nga magmatinud-anon. Mipadayon si Joseph sa kinabuhi, misalig sa mga sugo ug giya sa Dios, bisan og nakasinati siya og kasakit, pagbiay-biay, pagkabilanggo, ug gani kamatayon (tan-awa sa Doktrina ug mga Pakigsaad 122;135).
Pamalandongi ug isulat diha sa imong journal sa pagtuon kon sa unsang paagi ang imong nakat-onan niini nga leksiyon may kalabotan kanimo. Mahimo nimong ilakip ang gusto nimong hinumdoman o buhaton kon mag-atubang sa kabug-at [pressure] sa pagkahadlok sa uban labaw pa kay sa Dios.
Ikonsiderar ang pagpamatuod nga ang mga leksiyon nga nakat-onan ni Joseph Smith gikan niining lisod nga kasinatian nakatabang niya nga mahimong mas matinumanon sa Dios sa tibuok niyang kinabuhi. Mahimo kang mopamatuod mahitungod sa suporta nga imong nadawat gikan sa Dios samtang imong gisunod ang Iyang tambag bisan kon lisod ang pagbuhat sa ingon.