Leksyon 16: Doktrina ug mga Pakigsaad 3-5

Sukda ang Imong Pagkat-on 1

Doktrina ug mga Pakigsaad 1–5; Joseph Smith—Kasaysayan 1

Ang pagpamalandong ug pagsukod sa atong espirituhanong pagkat-on makatabang nato nga mas maduol ngadto sa Manluluwas. Kini nga leksiyon makatabang sa mga estudyante sa paghinumdom ug pagtimbang-timbang kon sa unsang paagi ang ilang mga kasinatian sa pagtuon sa Doktrina ug mga Pakigsaad ug sa Joseph Smith—Kasaysayan nakatabang kanila nga molambo sa espirituhanong paagi ug mas maduol ngadto kang Jesukristo.

Posibleng mga Kalihokan sa Pagkat-on

Ngano nga kinahanglan kita nga mosukod?

Aron matabangan ang mga estudyante sa pagtimbang-timbang sa ilang pag-uswag hangtod karon, ikonsiderar ang pagbuhat og usa ka kalihokan sama sa mosunod. Pagdrowing sa mosunod nga hulagway diha sa pisara ug ikonsiderar ang paghatag og usa ka ehemplo sa usa ka tumong. Ang mga estudyante tingali mokonsiderar og espiritwal, intelektwal, pisikal, o sosyal nga mga tumong nga ilang gihimo sa programa sa Kabataan ug Kabatan-onan.

Sa usa ka pahina sa imong journal sa pagtuon, pagbadlis og usa ka linya. Sa tumoy sa linya sa tuo nga bahin, isulat ang usa sa imong mga tumong nga molungtad og dugay. Pipila ka mga ehemplo mahimong modula og paugnat sa kusog [sport] o instrumento sa musika sa taas nga lebel, mahimong maayo kaayo sa usa ka kahanas, mokuha og degree o sertipikasyon, o magminyo sa templo.

Ingon sa gipakita sa mosunod nga grapiko, pagdrowing og tinukog nga figura sa ibabaw sa linya aron magrepresentar kon unsa na kalayo paminaw nimo ang imong pag-uswag paingon ngadto sa imong tumong.

Sa wala nga habig sa linya, paggahin og pila ka gutlo sa pagsulat sa imong pag-uswag nga nahimo na. Mahimo nimong ilakip ang piho nga mga butang nga imong nakat-onan o nahimo aron mouswag paingon sa imong tumong.

• Nganong makatabang ang paghunong ug pagsukod sa unsay atong nakat-onan ug kon sa unsang paagi kita miuswag?

Ikonsiderar ang pagdapit og pipila ka estudyante sa pagpakigbahin kon unsa ang ilang nakat-onan o nabuhat ngadto sa ilang mga tumong. Dili lamang kini makaandam sa mga estudyante nga makat-on pa og dugang niini nga leksiyon apan mahimong makatabang usab sa mga estudyante nga mas makaila sa usag usa ug makatukod og panaghiusa sa klase.

Usa sa mga katuyoan sa seminary mao ang pagtabang kanimo nga mas maduol ngadto sa Manluluwas, si Jesukristo, ug mahimong mas mahisama Kaniya.

• Ngano kaha nga importante usab ang paghunong ug pagtimbang-timbang sa atong mga paningkamot aron mas mapaduol ngadto kang Jesukristo ug mas mahisama Kaniya?

Unsay imong nakat-onan? Kumusta ang imong pag-uswag?

Ipasabot nga sa tibuok niini nga tuig sa pagtuon, matag upat ngadto sa unom ka semana adunay leksiyon nga sama niini, diin ang mga estudyante makahunong aron sa pagtimbang-timbang sa unsay ilang nakat-onan ug sa unsang paagi sila mas maduol ngadto sa Manluluwas.

Kon mapuslanon, ikonsiderar ang pagdapit sa mga estudyante sa paglista sa pipila ka mga istorya ug mga hilisgotanan nga ilang nakat-onan sa pagkakaron. Kini mahimong makatabang kanila kon sila mobuhat sa mosunod:

Paggahin og pipila ka minuto sa pagsulat sa imong journal sa pagtuon mahitungod sa pag-uswag nga imong nahimo aron mas maduol ngadto sa Manluluwas samtang ikaw nagtuon sa Doktrina ug mga Pakigsaad karong tuiga. Mahimong maglakip kini sa doktrina ug mga kamatuoran nga imong nakat-onan, mga paagi nga ang imong pagpamatuod ni Jesukristo nagkadako, bag-ong mga pamatasan nga imong giumol, ug mga paagi nga ikaw naningkamot nga mausab.

Human sa igong panahon, dapita ang mga estudyante sa pagpakigbahin sa ilang mga hunahuna kon kini dili kaayo personal. Mahimong buhaton kini diha sa gagmay nga mga grupo o isip usa ka klase. Sa laing paagi, mahimo usab nga maghunahuna ang mga estudyante og usa ka pulong o hugpong sa mga pulong aron ipamubo kon giunsa nila pagkat-on o paglambo ug ipasulat kini diha sa pisara (pananglitan, “mas lig-on nga pagpamatuod,” “pagkat-on mahitungod Kaniya pinaagi sa mga kasulatan,” o “pagbati sa gugma sa Manluluwas”). Dayon mahimo nimong itudlo ang mahinungdanon nga mga pulong diha sa pisara ug mangutana kon ang estudyante kinsa nagsulat niini andam ba nga mopakigbahin kon nganong gilista niya kini. Samtang maminaw ka, pangita og mga paagi sa pagdayeg sa mga paningkamot sa mga estudyante, dasiga sila sa pagpadayon, ug pagpamatuod sa tabang ug mga panalangin sa Ginoo.

Pagsukod sa pagtuon sa kasulatan

Pagpakita og hulagway ni Joseph Smith sama sa mosunod ug hisgoti uban sa mga estudyante ang epekto sa pagtuon sa mga kasulatan diha kaniya isip usa ka propeta sa Dios.

• Sa unsang paagi ang pagtuon sa kasulatan nakatabang ni Propeta Joseph Smith?

Pamalandongi ang imong kaugalingong tumong sa pagtuon sa kasulatan. Sa unsang paagi nakaapekto nimo ang imong paningkamot?

Hatagi ang matag estudyante og duha ka gagmay nga mga palid sa papel. Mahimong irekord sa mga estudyante ang ilang tubag sa unang pangutana diha sa usa ka panid sa papel ug dayon irekord ang ilang tubag sa ikaduhang pangutana diha sa ikaduhang panid.

• Unsa ang usa ka paagi nga imong gibati nga nagmalamposon ka sa imong pagtuon sa kasulatan?

• Unsa ang kalisod nga aduna ka diha sa imong pagtuon sa kasulatan?

Ipabutang sa mga estudyante ang mga papel sa ilang mga kalamposan sa usa ka pundok ug ang mga papel sa ilang mga kalisdanan sa laing pundok. Isagol-sagol ang duha ka gilahi nga pundok ug ipakigbahin kini sa klase. Samtang imong basahon ang ilang mga kalamposan, dayega ug dasiga ang mga estudyante. Ikonsiderar ang pagpangutana kon “Aduna pa bay uban nga nakakaplag og kalamposan sa pagbuhat sa susama?” ug “Sa unsang paagi ang imong pagtuon sa kasulatan nakatabang kanimo nga mas maduol ngadto sa Langitnong Amahan ug ni Jesukristo?” Samtang imong basahon ang mga kalisod nga nasinati sa mga estudyante sa pagtuon sa kasulatan, mahimong epektibo ang pagdapit sa klase sa pagpangita og mga kasulatan, pagpangita og mga pamahayag gikan sa mga propeta o mga lider sa Simbahan, o paghunahuna og personal nga mga kasinatian nga makatabang.

Sukda kon unsa ang gibati sa mga estudyante mahitungod ni Propeta Joseph Smith

Paghatag og kahigayonan sama sa mosunod alang sa mga estudyante sa pagsukod kon unsay ilang gibati mahitungod ni Propeta Joseph Smith.

Pagsulat og daghang mga butang kutob sa imong mahunahunaan nga imong nakat-onan mahitungod ni Propeta Joseph Smith sa miaging pipila ka semana sa seminary.

Mahimong makasulat ang mga estudyante kon unsa ang ilang nakat-onan diha sa pisara palibot sa imahe ni Joseph Smith. Sa laing paagi, mahimong buhaton kini nga kalihokan sa mga estudyante diha sa gagmay nga mga grupo.

Badlisi o lingini ang bisan unsang butang diha sa imong lista nga nagpasabot usab sa usa ka paagi nga siya nakatabang kaninyo nga mapaduol ngadto ni Jesukristo.

Kon ang mga estudyante dili mohisgot niini, siguroa ang paglakip nga si Joseph Smith nakakita sa Langitnong Amahan ug ni Jesukristo sa Unang Panan-awon, mihubad sa Basahon ni Mormon pinaagi sa gahom sa Dios, ug midawat og mga pagpadayag gikan sa Ginoo nga nalakip diha sa Doktrina ug mga Pakigsaad. Ilakip usab nga gipahiuli sa Ginoo ang pagkapari, ang Simbahan, ug ang mga pakigsaad ug mga ordinansa pinaagi ni Joseph Smith.

Dapita ang mga estudyante sa pagtimbang-timbang kon unsa ka lig-on nga sila motuo sa mga butang nga ilang nalista sa grado nga 1 hangtod 5 (1=dili gyod motuo ug 5=masaligon gyod nga nagtuo). Dapita sila sa pagpakigbahin og mga kasinatian nga nakatabang og pausbaw sa ilang pagtuo nga ang Dios mitawag ni Joseph Smith aron mahimong usa ka propheta aron motabang kanato nga mas mapaduol ngadto ni Jesukristo.

Ang pipila sa imong mga estudyante tingali maglisod gihapon sa ilang pagpamatuod nga si Joseph Smith usa ka propeta. Ang pagpangutana sa mosunod ug pagtugot sa mga estudyante sa paghatag og daghang ideya lagmit makatabang niining mga estudyante.

• Kon adunay usa ka tawo nga naglisod sa pagtuo nga ang Ginoo mitawag ni Joseph Smith nga mahimong usa ka propeta, unsa kaha ang imong isugyot nga iyang buhaton aron mapalig-on ang iyang pagtuo?