Doktrina ug mga Pakigsaad 6–9

Doktrina ug mga Pakigsaad 6–9

Kinatibuk-ang Pagpasabot

Nasayran ni Oliver Cowdery ang buhat ni Joseph Smith Jr. nga paghubad sa Basahon ni Mormon samtang nagpuyo sa panimalay ni Joseph Smith Sr. ug Lucy Mack Smith. Mibati si Oliver og tinguha sa pag-apil sa buhat ug mibalhin ngadto sa Harmony, Pennsylvania, sa tingpamulak sa 1829, diin nahimo siyang tigsulat sa Propeta. Pinaagi ni Joseph Smith, ang Ginoo mihatag kang Oliver og daghang mga pagpadayag kalabot sa iyang tahas isip tigsulat ug sa iyang tinguha sa pag-apil sa paghubad. Kini nga mga pagpadayag naglangkob og mahinungdanon nga mga kamatuoran mahitungod sa personal nga pagpadayag. Uban ni Oliver nga nag-alagad isip tigsulat, si Joseph Smith nakahimo og mahinungdanong pag-uswag sa paghubad sa Basahon ni Mormon pinaagi sa gasa ug gahom sa Dios.

Pagatutoki ang mga kamatuoran nga modala ngadto sa pagkakabig: Tabangi ang mga estudyante nga makadiskobre sa doktrina ug mga baroganan nga makapalig-on sa hugot nga pagtuo kang Jesukristo ug sa kaandam sa pagsunod sa kabubut-on sa Dios. Dasiga sila sa pag-analisar kon sa unsang paagi kini nga mga kamatuoran makapalawom sa ilang pagkakabig ug makatabang kanila sa paglihok nga adunay hugot nga pagtuo. Alang sa dugang pa kon sa unsang paagi kini gibuhat sa Manluluwas, tan-awa sa “Gitudlo sa Manluluwas ang mga Kamatuoran nga Naggiya ngadto sa Pagkakabig ug Paglig-on sa Hugot nga Pagtuo” diha sa Pagtudlo Sumala sa Pamaagi sa Manluluwas. Usa ka ehemplo kon unsaon nimo kini pagbansay gilakip diha sa leksiyon sa Doktrina ug mga Pakigsaad 8.

Pangandam sa pagtudlo

Ang mosunod nga impormasyon naghatag kanimo og mga ideya kon unsa ang imong gikinahanglan nga andamon daan alang sa matag leksiyon.

Doktrina ug mga Pakigsaad 6

Katuyoan sa leksiyon: Aron matabangan ang mga estudyante nga mosalig ngadto sa Manluluwas kon sila mag-atubang og mga pagduha-duha ug kahadlok

• Pagpangandam sa estudyante: Ipasabot nga ang Doktrina ug mga Pakigsaad 6:36 usa ka tudling sa doktrinal nga kahanas. Dasiga ang mga estudyante sa pagsag-ulo niining mubo nga bersikulo sa dili pa motambong sa klase.

• Bidyo: “Days of Harmony” (25:01; tan-awa gikan sa mga time code 3:07 hangtod sa 7:18 ug 15:02 hangtod sa 17:49)

• Hulagway: Hulagway ni Jesukristo nga ipakita diha sa pisara

Ang Paghubad sa Basahon ni Mormon

Katuyoan sa leksiyon: Aron matabangan ang mga estudyante nga mapalig-on ang ilang pagpamatuod nga ang Dios mihatag og paagi ug gahom kang Joseph Smith sa paghubad sa Basahon ni Mormon alang kanato

• Pagpangandam sa estudyante: Ikonsiderar ang pagdapit sa mga estudyante sa pagpili og bersikulo o istorya gikan sa Basahon ni Mormon nga nakaapekto kanila.

• Mga Bidyo: “Seer Stone” (3:47); “Days of Harmony” (25:01; tan-awa gikan sa time code 7:18 hangtod sa 11:33)

• Giimprinta nga mga materyal: Alang sa mga estudyante nga walay digital access sa Dali, Sunod Kanako, ikonsiderar ang pagprinta og mga kopya sa “Mga Tingog sa Pagpahiuli” nga seksiyon sa “Doktrina ug mga Pakigsaad 6–9: Kini Mao ang Espiritu sa Pagpadayag,” Dali Sunod Kanako—Alang sa Panimalay ug Simbahan: Doktrina ug mga Pakigsaad 2025.

Doktrina ug mga Pakigsaad 8

Katuyoan sa leksiyon: Aron matabangan ang mga estudyante nga madugangan ang ilang abilidad sa pag-ila kon sa unsang paagi ang Dios nakigsulti kanila pinaagi sa Espiritu Santo

• Pagpangandam sa estudyante: Hangyoa ang mga estudyante sa paghinumdom sa mga paagi nga ang Dios nakigsulti kanila pinaagi sa Espiritu Santo.

• Dayagram: Ang dayagram nga nagrepresentar sa hunahuna ug kasingkasing

• Mga Bidyo: “Aron Makabaton og Espirituhanong Giya” (16:00; tan-awa gikan sa time code 14:41 hangtod sa 15:04); “Patterns of Light: Discerning Light” (2:12)

Pagbansay 1 sa Doktrinal nga Kahanas

Katuyoan sa leksiyon: Aron mahatagan ang mga estudyante og mga kahigayonan nga makat-on sa mga tudling sa doktrinal nga kahanas ug sa mga kamatuoran nga anaa niini ingon man sa pagkat-on ug paggamit sa balaanong mga baroganan alang sa pag-angkon og espirituhanong kahibalo

• Pagpangandam sa estudyante: Dapita ang mga estudyante sa pagpili og usa o daghang mga tudling sa doktrinal nga kahanas nga gusto nilang isag-ulo. Mahimo nilang isag-ulo ang mga pakisayran sa kasulatan ug ang mahinungdanon nga mga hugpong sa mga pulong sa kasulatan diha sa Mahinungdanon nga Dokumento sa Doktrinal nga Kahanas (2023) o mohimo sa pagsag-ulo sa tibuok nga mga tudling.

• Sulod nga ipakita: Tsart nga adunay mga pakisayran sa kasulatan sa doktrinal nga kahanas ug mga mahinungdanon nga mga hugpong sa mga pulong sa kasulatan; mga kalihokan sa panaghisgotan A, B, ug C nga nagsunod sa senaryo